Allinpaq hap’isqa kanku Diospa Reinonpi kamachinankupaq

“Chaykunan sut’inchan Diosqa chaninninpi juzgaq kasqanta, ahinapin Diosqa allinpaq hap’isunkichis qhapaqsuyunpi [“reinonpi”, NM] kanaykichispaq.” (2 TESALONICENSES 1:5.)

1, 2. ¿Pikunatan Jehová Dios juzganqa? ¿Pitan churaran rantinpi juzgananpaq?

PHISQA chunka watapi apóstol Pablo Atenas llaqtata riran. Llaqtapi purispataq rikuran askha idolokunata, chay rikusqanmi sonqontaraq nanachiran, chayraykun Atenas runakunaman allinta predicaran. Tukukuypi rimasqanqa hatuntaraqchá qhawarichiran ídolo yupaychaq runakunataqa. Niranmi: “Kunanmi ichaqa hinantinpi llapallan runakunata [Dios] kamachin huchata saqepuspa Diosman kutirikunankupaq. Diosqa huk p’unchaytan churanña, chay p’unchaypin akllasqan Jesuswan kay pachapi tiyaqkunata chaninninpi juzganqa. Chay hina kasqantaqa lliw runamanmi reqsichin, wañusqanmanta payta kawsarichimpuspan”, nispa (Hechos 17:30, 31).

² Leesqanchis hina, Diosqa huk p’unchayta churan runakunata juzgananpaq, chaymantan allinta yuyaykunanchis. Jehová Diosqa Churin Jesucristowanmi runakunata juzganqa.  Jesús juzgaqtinmi wakin runakuna wañunqa wakintaq kawsanqa.

3. ¿Imapaqmi Jehová Dios Abrahamwan rimanakuran? ¿Piwanmi Jehová Dios yuyaykusqanta hunt’achinqa?

³ Chay Juicio P’unchayqa waranqa watan kanqa, Diospa Reinonpi Kamachikuq Jesustaq Diospa sutinpi juzganqa. Manan ichaqa sapallanchu juzganqa. Jehová Diosmi wakin runakunata akllaran Jesuswan kuska waranqa wata kamachimunankupaq juzgamunankupaqpas (Lucas 22:29, 30 textowan tupachiy). Tawa waranqa wata hinañan Jehová Dios Abrahamwan rimanakuran. Chay rimanakuymi allin takyasqa karan 1943 watapi manaraq Jesús kay pachaman hamushaqtin, chhaynapin Jehová Diosqa Juicio P’unchay kananpaq preparasharanña (leeychis Génesis 22:17, 18). Abrahamqa manan llapantachu entienderan Dioswan rimanakusqan imayna hunt’akunanta. Ñoqanchismi ichaqa chay rimanakuyta estudiaspa entiendenchis Diospa yuyaykusqan Abrahampa mirayninwan hunt’akunanta, chay miraywanmi Jehová Diosqa runakunata juzganqa.

4, 5. a) ¿Pin Abrahampa mirayninpi umalliq? ¿Imatan chay umalliq niran Diospa Reinonmanta? b) ¿Hayk’aqmantan runakunata waqyakuran Diospa Reinonpi kamachinankupaq?

⁴ Abrahampa mirayninpi umalliqqa Jesusmi, paymi 29 watapi santo espirituwan hawisqa karan, chhaynapin tukupuran Mesiasman otaq Cristoman (Gálatas 3:16). Chay qhepamanmi Jesusqa kinsa wata kuskanta Reinomanta allin willakuykunata judío runakunaman willaran. Bautizaq Juanta carcelman wisq’asqanku qhepamanmi Jesusqa willaran hanaq pacha gobiernoman huk runakunapas haykuy atisqankuta, niranmi: “Bautizaq Juanpa tiemponmantapacha kunankaman hanaq pacha reinoman runakuna phawaykunku, phawaqkunataq chayta hap’inku”, nispa (Mateo 11:12, NM).

⁵ Manaraq hanaq pacha reino hap’iqkunamanta rimashaspan Jesús kayta niran: “Cheqaqtan niykichis: Bautizaq Juan hinaqa manan pipas karqanchu, chaywanpas Hanaq pacha qhapaqsuyupiqa aswan huch’uykaqmi Juanmantaqa aswan kurak”, nispa (Mateo 11:11). ¿Imanaqtinmi Jesús chayta niran? 33 watapi Pentecostés fiesta p’unchaymantapachan cristianokunaqa Diospa Reinonpaq waqyasqa karanku, chay p’unchaymi santo espíritu cristianokunaman hunt’aykuran, chay tiempopaqqa Bautizaq Juanqa wañupusqañan (Hechos 2:1-4).

Abrahampa miraynin chaninpaq hap’isqa

6, 7. a) ¿Imanaqtinmi Jehová Dios Abrahamta niran: “Mirayniykita askhayachisaq hanaq pacha ch’askakunata hina”, nispa? b) ¿Imaynatan Abrahamta Dios qhawariran? ¿Imaynatan Abrahampa miraynintapas qhawarin?

⁶ Jehová Diosmi Abrahamta prometeran: “Mirayniykita askhayachisaq hanaq pacha ch’askakunata hina, lamar-qocha patapi aqota hina”, nispa (Génesis 13:16; 22:17). ¿Imanaqtinmi chayta niran? Abrahampa tiemponpiqa manan mayqen runapas yacharanchu hayk’a runa Abrahampa mirayninpi kananta. Tiempowanmi ichaqa yachakuran Abrahampa mirayninpi Jesuswan 144.000 runakunapiwan kanankuta (Apocalipsis 7:4; 14:1).

⁷ Diospa Simin Qelqa nin: “Abramqa Señor Diospi iñirqan, chaymi Señor Diosqa payta chaninpaq hap’irqan”, nispa (Génesis 15:5, 6). Yachasqanchis hina manan mayqen runapas chaninpuniqa kanmanchu (Santiago 3:2). Chaywanpas Jehová Diosqa chaninpaqmi Abrahamta hap’iran, amigonta hinataq qhawariranpas. ¿Imarayku? Diospi anchata iñisqanrayku (Isaías 41:8). 144.000 hawisqa cristianokunapas Abraham hina chaninpaq hap’isqa kanku, paykunan ichaqa Abrahammanta aswan askha allinkunataraq chaskinku.

8. ¿Imakunatan Jehová Dios ruwan Abrahampa miraynin hawisqa cristianokunapaq?

 ⁸ Jesuspa sacrificakusqanpi iñisqankuraykun hawisqa cristianokunaqa chaninpaq hap’isqa kanku (Romanos 3:24, 28). Jehová Dios qhawarinanpaqqa huchankumanta ch’uyanchasqaña kapunku, chaymi santo espirituwan hawisqa kanku Diospa wawankuna kanankupaq, Jesuspa wayqenkuna kanankupaqpas (Juan 1:12, 13). Chaymantapas, mosoq rimanakuymanmi haykunku, ‘Diospa cheqaq Israel llaqtantaq’ kapunkupas (Gálatas 6:16; Lucas 22:20). ¡Ancha kusisqan sientekunku paykunapaq Jehová Dios chaykuna ruwapusqanmanta! Chayraykun hawisqa cristianokunaqa manaña suyankuchu kay Hallp’api wiñaypaq kawsayta. Aswanpas paykunaqa kusisqa suyanku Jesuswan kuska hanaq pachamanta Juicio P’unchaypi kamachikamunankuta (leeychis Romanos 8:17).

9, 10. a) ¿Hayk’aqmi cristianokunata santo espirituwan hawikuyta qallariran? ¿Imatan Satanás chaymantapacha ruwaran? b) ¿Imaynatan Jehová Dios paykunata yanaparan?

⁹ 33 wata Pentecostés fiestapin pachak iskay chunka cristianokuna santo espirituwan hawisqa karanku Juicio P’unchaypi Jesuswan kuska kamachikamunankupaq. Llapankun chay cristianokunaqa santo espirituwan bautizasqa karanku, paykunawanmi qallarikuran hawisqa cristianokuna akllay. Ichaqa hanaq pachapi kamachinankupaqqa askhataraqmi ruwananku karan. Chaymantapachan Satanasqa imaymana pruebakunata paykunaman churaran, paykunataq Jehová Diospaq hunt’aq kananku karan. Wiñay kawsay coronata chaskinankupaqqa wañunankukaman Diospaq hunt’aq kananku karan (Apocalipsis 2:10).

¹⁰ Iñiyninkupi allinta sayanankupaqmi Jehová Diosqa hawisqa cristianokunata yuyaycharan kallpacharan ima, chaytaqa ruwaran huñunakuykunawan Simin qelqawanpas. Ejemplopaq, apóstol Pablo hawisqa cristianokunaman kayta qelqaran: “Yachallankichistaqmi sapankaykichista kallpachasqaykutapas sonqochasqaykutapas, imaynan taytaqa wawankunapaq ruwan hinata. Qankunatan kallpacharqaykichis Diospa sonqonman chayaqtapuni kawsanaykichispaq. Diosmi waqyasunkichis qhapaqsuyunpi paywan kuska hatunchasqa kanaykichispaq”, nispa (1 Tesalonicenses 2:11, 12).

11. ¿Ima qelqakunatan Jehová Dios qoran ‘cheqaq Israel llaqtanman’?

¹¹ Hawisqa cristianokunata akllakuyta qallarisqan qhepamanmi Jehová Diosqa Jesús Reinomanta predicaspa imaymana ruwasqanta qelqachiran. Chaymantapas Diosqa qelqachillarantaqmi cristianokunata imayna yanapasqanta yuyaychasqantapas. Chayrayku Griego Simipi Qelqakunata (Nuevo Testamento) qelqachiran, chay qelqakunan Hebreo Simipi Qelqakunaman (Antiguo Testamento) yapakuran. Hebreo Simipi Qelqakunaqa Israel runakunallapaqmi qallariypiqa qelqakuran, Israel llaqta Dioswan allinpi kasqan tiempopi. Griego Simipi Qelqakunataq ‘Diospa cheqaq Israel llaqtanpaq’ qelqakuran, paykunan hawisqa kanku Cristoq wayqenkuna kanankupaq Diospa wawankuna kanankupaq ima. Imaynan wak llaqtayoq runakunapaqpas Hebreo Simipi Qelqakunaqa allinninpaq karan, chhaynallataqmi mana hawisqa cristianokunapas Griego Simipi Qelqakunata t’aqwirispa, kamachikusqanman hina kawsaspankuqa allinta kawsanku (leeychis 2 Timoteo 3:15-17).

12. ¿Imatan apóstol Pablo yuyarichiran hawisqa cristianokunata?

¹² Ñawpaq siglopi cristianokunaqa chaninpaq hap’isqan karanku santo espirituwanpas hawisqa karanku qhepaman hanaq pachapi rey kanankupaq, ichaqa kay Hallp’apiraq kashaspankuqa manan reyraqchu karanku. Wakinmi ichaqa rey kasqankutaña yuyaykuspanku cristianomasinkuta kamachiyta munaranku. Chayrayku apóstol Pablo paykunata niran: “Qankunaqa yuyankichis qhapaqña kasqaykichistan, tukuy imaymanayoqña kasqaykichistan, mana ñoqaykuwan kashaspalla rey hinaña kamachikushasqaykichistawan. ¡Allinchá kanman cheqaqtapuni rey hina kamachikuwaqchis chayqa, ñoqaykupas qankunawan kuska kamachikunaykupaq!” nispa (1 Corintios 4:8). Chaymantapas apóstol Pablo hawisqa cristianokunata niran: “Iñiyniykichispi mana kamachikuytachu munayku, aswanpas kusikunaykichispaqmi yanapaykuyta munayku”, nispa (2 Corintios 1:24).

Imaynatan 144.000 hawisqa cristianokunata huñukun

13. ¿Imaynatan hawisqakunata huñukuran 33 watamantapacha?

¹³ Ñawpaq siglopiqa manan 144.000 hawisqa cristianokunataqa llapantachu huñukuran.  Apostolkunaq tiemponpin qallariran hawisqa cristianokuna akllay. Chay tiempopiqa askha cristianokunatan Dios akllaran hanaq pachapaq, ichaqa apostolkunaq wañupusqanku qhepamanqa pisillan akllasqa karanku. Chaywanpas Diosqa akllashallaranmi hawisqakunata kunan tiemponchiskama (Mat. 28:20). 1914 watapi Jesús kamachiyta qallarisqan qhepallamanmi imaymana sucederan.

14, 15. ¿Imaynatan kunan tiemponchispipas hawisqakunata waqyakuran?

¹⁴ Ñawpaqtaqa Jesusmi Satanasta supaykunatapas hanaq pachamanta qarqonpuran (leeychis Apocalipsis 12:10, 12). Chaymantataq Jesusqa kay pachapi qhepaq hawisqakunata huñuyta qallariran 144.000 hawisqakuna hunt’asqa kananpaq. 1935 watapaqqa yaqa llapankutañan huñuran, chayrayku Diospa llaqtanman haykumuq runakunaqa manaña hanaq pachapaq waqyasqachu karanku. Santo espirituqa manan chay cristianokunaman willasharanchu Diospa wawankuna kasqankuta (Romanos 8:16 textowan tupachiy). Aswanmi paykunaqa ‘wak t’aqa ovejamanta’ karanku, chay t’aqamanta kaqkunaqa kay Hallp’api wiñaypaq kawsanankupaq suyakuyniyoqmi kanku (Juan 10:16). Chayraykun 1935 watamantapacha “ancha askha runakunata” huñukuyta qallarikuran. Apóstol Juanpa nisqan hina, paykunan “manchay ñak’ariymanta” lloqsinqaku (Apocalipsis 7:9, 10, 14).

¹⁵ Chaywanpas 1935 wata qhepamanqa waqyakuranraqmi wakin cristianokunata hanaq pachapaq. Yaqapaschá wakintaqa waqyakusharan Diospa llaqtanmanta t’aqakuq hawisqakunaq rantinta haykunankupaq (Apocalipsis 3:16 textowan tupachiy). Apóstol Pablopas rikuranmi wakin cristianokuna Diospa llaqtanmanta t’aqakusqankuta (Filipenses 3:17-19). Ichaqa, ¿mayqen cristianokunatan Jehová Dios akllanman paykunaq rantinta? Chay ruwayqa Diosllamanmi tupan. Ichaqa manachus hina Diosqa akllanmanchu mosoqkunataqa, aswanpas askha wataña pruebakunata atipaspa Dios serviqkunatachá akllanman. Jesuspa yachachisqankunapas unayñan Diosta servisharanku, chaymi Jesusqa paykunawan rimanakuran wañupunanpaq pisillaña kashaqtin (Lucas 22:28). *

16. ¿Jehová Diospa ima munasqanmantan agradecesqa kashanchis? ¿Imakuna sucedenanmanta seguro kashanchis?

¹⁶ Chaywanpas, 1930 watakuna qhepamanqa Diosqa manan llaqtanmanta t’aqakuqkunaq rantinta churanallanpaqchu wakin cristianokunata santo espiritunwan hawinman karan. Aswanpas Jehová  Diosqa munan tukukuy qaylla p’unchaykuna tukukunankama hawisqa cristianokuna kay pachapi kashanankuta, “Hatun Babilonia” tukuchisqa kanankama (Apocalipsis 17:5). * Seguron kashanchis, Jehová Diosqa churasqan tiempopin llapan hawisqa cristianokunata huñunqa hanaq pacha gobiernopi kanankupaq. Chaymantapas yachanchismi, Bibliaq willasqan hina, ancha askha runakuna huk nisqalla Diospaq hunt’aq kanankuta. Pisi tiempollamantan Satanaspa kamachisqan pachaman ‘manchay ñak’ariy’ chayamunqa, ancha askha runakunataq chaymanta ‘lloqsinqaku’, ancha kusisqataq mosoq pachaman haykunqaku.

¡Hanaq pacha gobiernopi kamachikuqkunataqa yaqa llapantañan huñukushan!

17. 1 Tesalonicenses 4:15-17, Apocalipsis 6:9-11 nisqan hina, ¿maypiñan kashanku wañupuq hawisqa cristianokuna?

¹⁷ 33 watamantapacha waranqanpi hawisqa cristianokunaqa iñiyninkupi allinta sayaspa wañunankukama Diospaq hunt’aq karanku. Diosmi paykunataqa allinpaqña hap’in Reinonpi kamachikamunankupaq. Paykunaqa kawsaripunkuñan hanaq pachaman, Cristoq kutimuynin otaq qayllaykamuynin tiempo qallarisqan qhepa watakunallaman (leeychis 1 Tesalonicenses 4:15-17; Apocalipsis 6:9-11).

18. a) ¿Imamantan kay pachapi qhepaq hawisqakuna seguro kashanku? b) ¿Imaynatan wak ovejakuna qhawarinku hawisqakunata?

¹⁸ Kay Hallp’api qhepaq hawisqa cristianokunaqa seguron kashanku sichus Dios serviyninkupi allinta sayanqaku chayqa, pisi tiempollamantan hanaq pachapi kamachikamunqaku. Wak t’aqa ovejamanta kaqkunataq hawisqa cristianokunaq allin llank’asqanta qhawaspanku, apóstol Pabloq nisqanta yuyarinku, paymi Tesalónica cristianokunaman niran: “Diospa iglesiankuna ukhupi qankunamanta kusisqa rimariyku, tukuy qatiykachaykunatapas sinchi llakikunatapas ancha pacienciawan iñiywan muchushasqaykichismanta. Chaykunan sut’inchan Diosqa chaninninpi juzgaq kasqanta, ahinapin Diosqa allinpaq hap’isunkichis qhapaqsuyunpi kanaykichispaq, chayraykutaqmi muchushankichispas”, nispa (2 Tesalonicenses 1:3-5). Manan yachanchischu hayk’aqchus kay pachapi mana ni huk hawisqallapas qhepanqachu chayta, ichaqa maypachachus chay sucedenqa chayqa, hunt’asqañan kanqa hanaq pacha gobiernopi kamachikuqkunaqa. ¡Maytachá kay pachapi kaqkuna hanaq pachapi kaqkunapas kusirikunqaku chay sucedeqtin!

[Uranpi willakuykuna]

¿Imaynatan kutichiwaq?

• Juicio P’unchay kananta preparaspa, ¿imatan Dios prometeran Abrahamman?

• ¿Imanaqtinmi Abraham chaninpaq hap’isqa karan?

• ¿Imakunatan Dios ruwan Abrahampa miraynin hawisqakunapaq chaninpaq hap’isqa kasqankurayku?

• ¿Imamantan seguro kashanchis llapa cristianokuna?

[Tapuykuna]

[23 paginapi dibujo]

Jesusmi qatikuqninkunata niran: Kallpachakuychis Diospa Reinonpi kanaykichispaq, nispa

[24 paginapi dibujo]

33 wata Pentecostés fiestapin Jehová Dios akllayta qallariran Abrahampa miraynin hawisqa cristianokunata

[26 paginapi fotokuna]

Wak ovejakunaqa agradecesqan kashanku tukukuy p’unchaykunapi hawisqa cristianokunawan llank’asqankumanta