Allinpaq hap’isqa kanku kawsay unu pukyukunaman pusachikunankupaq

“Corderon paykunataqa michinqa, kawsay unu pukyukunamantaqmi paykunataqa pusanqa.” (APOCALIPSIS 7:17.)

1. ¿Ima sutiwanmi Biblia sutichan hawisqa cristianokunata? ¿Ima llank’aytan Jesús paykunaman saqeran?

KAY pachapi hawisqa cristianokunan Cristoq kaqninkunata qhawarishanku, paykunatan Biblia sutichan “allin yuyayniyoq hunt’aq kamachi”, nispa. 1918 watapin ‘kamachiq’ Patronnin Jesusqa kamachiq llank’ayninta qhawariran; kay kamachiqa allintan llank’asharan ‘tiempollanpi mikhunata qospa’, chaymi Jesusqa payta churaran “tukuy kaqninkunata qhawananpaq” (leeychis Mateo 24: 45-47). Chayraykun hawisqa cristianokunaqa wak ovejamanta kaq cristianokunata servinku manaraq hanaq pachaman rishaspa.

2. ¿Mayqenkunataq Jesucristoq kaqninkunari?

² Patronqa munasqanman hinan kaqninkunawan imatapas ruwan. Jehová Diospa churasqan Rey Jesucristoq kaqninkunaqa Reinopaq tukuy imaymana ruwaykuna kaqkuna iman. Apóstol Juanpa rikhuriypi rikusqan ‘ancha askha runakunapas’ Cristoq kaqninkunallataqmi, Juanmi chay runakunamanta niran: “Chaykuna qhepatataq qhawarispa rikurqani mana piqpa yupay atinan ancha askha runakunata. Paykunan karqan llapa suyukunamanta, ayllukunamanta, llaqtakunamanta, tukuy rimaykunamantawan, hinaspan kamachikuy tiyanaq ñawpaqenpi Corderoq ñawpaqenpiwan sayasharqanku, yuraq p’achawan p’achasqakama, palmera k’allma hap’iykusqakama”, nispa (Apocalipsis 7:9).

3, 4. Ancha askha runakuna, ¿imaynapin Dioswan kashanku, ima suyakuyniyoqtaq kanku?

³ Ancha askha runakunaqa ‘wak ovejakuna’ ukhupin tarikunku, paykunaqa kay pachapi wiñaypaq kawsaytan suyakushanku (Juan 10:16). Chay ancha askha runakunaqa yachankun Jesús ‘kawsay unu pukyukunaman pusananta’, Diosninkutaq ‘paykunaq lliw weqenkutapas pichananta’. Chaymi paykunaqa ‘p’achankuta t’aqsaspa Corderoq yawarninpi yuraqyachiranku’ (Apocalipsis 7:14, 17). Paykunaqa Jesuspa sacrificakusqanpin iñinku, chayraykun Diospa qhawarinanpaqqa yuraq p’achawanpas churasqa kashankuman hina kanku. Abrahamta hinan Diosqa paykunata chaninpaq hap’in, amigonkunata hinataq qhawarinpas.

⁴ Chaninpaq hap’isqataq kanku chayqa, ancha askha runakunaqa seguron kashanku manchay ñak’ariypi kay millay pacha ch’usaqyachisqa kaqtin mana wañunankumanta (Santiago 2:23-26). Paykunaqa Jehová Dioswanmi allinpi kashanku, chaymi yachanku Armagedón guerra chayamuqtin kawsashaqlla pasanankuta (Santiago 4:8; Apocalipsis 7:15). Ichaqa manan sapaq t’aqachu kanku. Aswanpas tukuy sonqon Jehová Diosta servinku Rey Jesuspa kamachiyninta kasukuspa, kay pachapi qhepaq Jesuspa wayqenkunatapas kasuspa.

5. ¿Imaynatan ancha askha runakuna Cristoq wayqenkunata yanapanku?

⁵ Satanaspa kamachisqan kay pachapi runakunaqa sapa kutillanmi hawisqa cristianokuna contra hatarinku. Ichaqa wak ovejakunamanta kaq cristianokunan hawisqa cristianokunata yanapashanku. Hawisqa cristianokuna pisillaña kay Hallp’api kashanku chaypas, ancha askha runakunamanqa sapa watanmi yapakushan waranqanpi runakuna. Pachantinpiqa pachak waranqa congregacionkunañan kan, chaymi hawisqa cristianokunallaqa  mana llapan congregacionpi kayta atinkumanchu iñiqkunata qhawarinankupaq. Chayraykun ancha askha runakuna ukhumanta wakin poqosqa cristianokunata akllakun congregacionkunata qhawarinankupaq. Kay akllasqa cristianokunataq ‘allin yuyayniyoq hunt’aq kamachita’ yanapanku teqsimuyuntinpi lliw cristianokuna qhawariypi.

6. ¿Imaynatan willakuranña wak ovejakuna hawisqa cristianokunata yanapanankumanta?

⁶ Wak ovejakuna, hawisqa cristianokunata yanapanankumantan profeta Isaías willaranña: “Egipto llaqtayoq mana pagollapaq llank’aqkuna, Etiopía llaqta qhatuqkuna, Sabá llaqta hatunkaray runakunan paykunallamanta qanman chayamunqa, hinaspan qanpa kapunqaku. Chay runakunaqa qhepaykitan purinqaku”, nispa (Isaías 45:14, NM). Kay Hallp’api wiñay kawsayta suyakuq cristianokunaqa, allin yuyayniyoq hunt’aq kamachitan, Kamachiq T’aqatawan kasukunku, qhepankutapas purishankuman hina. “Mana pagollapaq llank’aqkuna” hinan wak ovejakunaqa kallpankuta kaqninkutapas qospa tukuy sonqowan hawisqa cristianokunata yanapashanku predicaypi, chay llank’aytan Cristo hawisqakunaman saqeran (Hechos 1:8; Apocalipsis 12:17).

7. ¿Ima ruwanankupaqmi preparakushanku ancha askha runakuna?

⁷ Hawisqa cristianokunata yanapaspan ancha askha runakunaqa allinta preparakushanku Armagedón qhepata mosoq pachapi kawsanankupaq. Chayraykun ancha askha runakunaqa Cristoq kamachisqanta mana kasuyllachu kasunanku, aswanpas tukuy sonqo kasukuyta yachananku. Chayraykun llapanchis kasukuq kananchis Rey Jesucristo kamachikamuqtin allinta servinanchispaq. Sichus kunan allin iñiyniyoq kasun, Diospaq hunt’aqtaq kasunpas chayqa, mosoq pachapipas kasukullasuntaqmi Jesucristoq lliw kamachiyninkunata.

Ancha askha runakuna iñiyninkuta qhawarichinku

8, 9. ¿Imaynatan ancha askha runakuna iñiyninkuta rikuchinku?

⁸ Wak ovejamanta kaq cristianokunaqa askhapin rikuchinku iñiyninkuta. Hukpi, hawisqa cristianokunatan yanapanku Diospa Reinonmanta allin willakuykuna willaypi (Mateo 24:14; 28:19, 20). Iskaypi, Kamachiq T’aqatan tukuy sonqo kasukunku (Hebreos 13:17; leeychis Zacarías 8:23).

⁹ Kinsapitaq, Diospa kamachikuyninman hina kawsanku, chhaynapin hawisqa cristianokunata yanapanku. Kallpachakunkun kawsayninkupi kaykunata ruruchinankupaq: “munakuyta, q’ochukuyta, sumaq kawsayta, pacienciayoq-kayta, sumaq sonqo-kayta, allin runa-kayta, rimasqanta hunt’aq-kayta [“iñiyniyoq kayta”, NM], llamp’u sonqo-kayta, cuerpo kamachiq kaytawan” (Gálatas 5:22, 23). Kunan tiempopiqa manañan runakunapi rikukunñachu chay sumaq kaykunata, aswanpas ‘runaq millay munasqan ruwaykunallatan’ rikukun. Chhaynaña kay pacha kaqtinpas, wak ovejamanta kaq cristianokunaqa manapunin urmayta munankuchu ‘wasanchaykunaman, qhelli huchapi puriykunaman, millay viciokunapi kawsaykunaman, ídolo yupaychaykunaman, layqakuykunaman, cheqninakuykunaman, quejanakuykunaman, lerq’opayanakuykunaman, k’arak phiñakuykunaman, payllapaq kananta munaykunaman, ch’eqechinakuykunaman, wak t’aqata hatarichiykunaman, envidiakuykunaman, runa wañuchiykunaman, machaykunaman, aycha kusichiypi waqlliykunaman, chaykunaman rikch’akuq ruwaykunamanpas’ (Gálatas 5:19-21).

10. ¿Ima ruwananchispaqmi ancha askha runakuna kallpachakunchis?

¹⁰ Huchayoq runa kasqanchisraykun sasa ñoqanchispaq santo espirituq rurunman hina kawsay, runaq millay munasqan ruwaykunamanta karunchakuy, Satanaspa kamachisqan pachapi Diospaq hunt’aq sonqo kaypas. Chhaynaña kaqtinpas kallpachakushanallanchismi. Mayninpi pisi kallpayanchisña, pantanchisña, onqonchisña chaypas, iñiyninchispiqa manapunin pisipananchischu, Jehová Dios munakuyninchispas manapunin chiriyananchu. Manan iskayanchischu, Jehová Diosqa waqaychanqan ancha askha runakunata manchay ñak’ariy chayamuqtin.

11. ¿Imakunatan Satanás ruwaran cristianokunaq iñiyninta waqllichiyta munaspa?

¹¹ Ichaqa rikch’asqallan kashananchis, yachanchismi Saqraqa contranchispi hatarisqanta, payqa manan fácil atipayllachu (leeychis 1 Pedro 5:8). Ejemplopaq Saqraqa Diospa llaqtanmanta t’aqakuq runakunatan kallpachan allin yuyayniyoq hunt’aq kamachiq yachachiyninkuna pantasqa kasqanta creechiwananchispaq, hukkunatapas kallpachallantaqmi chayta ruwanankupaq. Ichaqa chaykunawanqa Saqraqa manan cristianokunata waqllichiyta atiranchu. Chaymantapas, cristianokuna contra qatiykachaykunata hatarichispa  predicacionta hark’ayta munaran, ichaqa imaymana sasachakuykunamanña iñiqmasinchiskunata churaran chaypas, manan atiranchu hark’ayta, aswanmi iñiqmasinchiskunaqa astawan kallpachakuranku iñiyninkupi. Chayraykun Satanasqa pisi kallpayaywanñataq urmachiyta munawanchis. Chaywanmi payqa munan iñiyninchis waqllichiyta. Ñawpaq siglopi cristianokunaqa yacharankun pisi kallpayay waqllichiqpuni kasqanta. Chayraykun apóstol Pablo iñiqkunata kallpacharan: “Jesusqa huchasapakunaq cheqnipakusqan kaspan sinchita muchurqan, chayrayku paypi allintapuni yuyaykuychis”, nispa. ¿Imaraykun Jesuspi allinta yuyaykunanku karan? ‘Mana sayk’unankupaq, manallataq pisi kallpayanankupaqpas.’ (Hebreos 12:3.)

12. ¿Imatan ruwananchis mana pisi kallpayanapaq?

¹² ¿Hayk’aqllapas yuyaykurankichu Dios serviyniyki saqeyta? ¿Mayninpi yuyaykurankichu Diospaq llank’asqayki yanqapaq kasqanta? Chhayna yuyaykuykunawanmi Satanasqa Dios serviyniykipi pisipachisunkiman, ichaqa amapuni chaywanqa hark’achikuychu. Tukuy yuyaywan Bibliata estudiay, tukuy sonqo Diosmanta mañakuy, llapa huñunakuykunaman rillaypuni, iñiqmasiykikunawanpas astawan hukllachakuy. Chaymi yanapasunki ‘mana pisi kallpayanaykipaq’. Jehová Diosmi prometewanchis kallpachawananchispaq, paypa rimasqanqa hunt’akunpunin (leeychis Isaías 40:30, 31). Diospa Reinonmanta willashallaypuni; ama yanqa ruwaykunapi tiempoykita usuchiychu, aswanpas tiempoykita qoy runakunata yanapanaykipaq. Chhaynapin mana pisi kallpayankichu (Gálatas 6:1, 2).

Manchay ñak’ariymanta lloqsispa mosoq pachaman haykunku

13. ¿Imatan ruwanqaku Armagedón guerrata kawsashaqlla pasaqkuna?

¹³ Armagedón guerra qhepamanmi waranqanpi lliw mana chanin runakuna kawsarimpunqaku, paykunamanmi Diospa munayninmanta yachachinanchis kanqa (Hechos 24:15). Manan Jesuspa runakunarayku sacrificakusqallanmantachu willananchis kanqa, aswanpas chay sacrificiopi iñinankupaqmi yanapananchis kanqa, chayta ruwallaqtinkun Jesuspa sacrificakusqanqa allinninkupaq kanqa. Ñawpa kawsayninkuta ima creenciankutapas saqepunankun kanqa. Chaymantapas cheqaq cristianokuna hinan mosoq runa kaywan churakunanku kanqa (Efesios 4:22-24; Colosenses 3:9, 10). Armagedón guerrata kawsashaqlla pasaqkunapaqqa askhan ruwana kanqa. Manañan imapas hark’awasunñachu Jehová Diospaq servicionchista hunt’ananchista, ¡ancha kusikuymi chayqa kanqa!

14, 15. ¿Imatan chanin kawsarimpuqkunaman yachachisun? ¿Imatan paykunamanta ñoqanchispas yachasun?

¹⁴ Diospa askha kamachinkunan wañuranku manaraq Jesús kay pachaman hamushaqtin. Paykunapas kawsarimpuspaqa askhatan yachanqaku. Yachanqakun pichus Mesías kasqanta, kawsasqanku tiempopi anchataña suyaranku Mesiasta chaypas manan yacharankuchu pi kananta. Ñawpaq kawsayninkupin paykunaqa Jehová Dioswan yachachikullaqkupuni karanku. ¡Anchatachá kusikusunchis paykunata yachachispaqa! Ejemplopaq, Danielta yachachisunman paypa qelqasqan profeciakuna imayna hunt’akusqanta (Daniel 12:8, 9).

¹⁵ Kawsarimpuq chanin runakunaman askhataña yachachisunchis chaypas, ñoqanchispas askhatan paykunamanta yachasunchis. Biblian wakin willakuykunamanta pisillata willawanchis, ichaqa chay kawsarimpuqkunaqa llapantachá willawasunchis. Ejemplopaq, ¡imakunataraqchá Bautizaq Juanqa willawasunchis primon Jesusmanta! Kawsarimpuqkunaq willawasqanchisqa anchatachá yanapawasun Diospa Simin Qelqata aswan allinta entiendenanchispaq. Ñawpaq tiempo Diospa kamachinkuna, tukukuy qaylla p’unchaykunapi wañupuq cristianokunapas, “aswan allin kawsarimpuyta” aypanqaku. Ñawpaqpin paykunaqa Satanaspa kamachisqan pachapi Diospa munayninta ruwaranku. ¡Ancha kusisqachá sientekunqaku  mosoq pachapi Jehová Diosta servispanku! Chaypiqa manañan imapas Dios serviyninkuta hark’anqañachu (Hebreos 11:35; 1 Juan 5:19).

16. Bibliaq nisqan hina, ¿imakunan sucedenqa Juicio P’unchaypi?

¹⁶ Juicio P’unchay tiempopin mosoq librokuna kicharikunqa, chay librokunatan Bibliatawan qhawarikunqa Juicio P’unchaypi kawsaq runakunata juzgakunanpaq. Chhaynapin yachakunqa wiñay kawsaypaq hinachu kashanku icha manachu chayta (leeychis Apocalipsis 20:12, 13). Juicio P’unchaypi kawsaqkunapaqqa askhan tiempo kanqa Jehová Diospa kamachikuq kasqanta respetanqakuchus icha manachus chayta qhawarichinankupaq. Sapankan decidenanku kanqa Diospa Reinon kasukuyta, Corderowan ‘kawsay unu pukyukunaman pusachikuytapas’, otaq Diospa Reinon contra hatarispachu manaña kasukuyta munanqaku chaytapas (Apocalipsis 7:17; Isaías 65:20). Juicio P’unchay tukuypaqqa lliw runan mana huchayoqña kanqa, kay millay pachapas manaña kanqañachu, lliw runataq decidisqaña kashanqa Dios kasukunankupaq otaq manapas. Chaymi waranqa wata tukuyta Dios runakunata juzgaqtinqa mana pipas ninqachu: Diospa juzgasqanqa manan chaninchu nispaqa. Manapuni kasukuyta munaqkunallan wiñaypaqqa wañuchisqa kanqaku (Apocalipsis 20:14, 15).

17, 18. ¿Imanaqtinmi hawisqa cristianokuna, ancha askha runakunapas kusisqallaña Juicio P’unchayta suyakushanku?

¹⁷ Kay tiemponchispi hawisqa cristianokunaqa allinpaq hap’isqa kanku Diospa Reinonpi kamachimunankupaq, chaymi kusisqa suyakushanku Juicio P’unchay tiempo chayamunanta kay pachapi kawsaqkunata kamachinankupaq. ¡Anchatachá kusikunqaku chay tiempo chayamuqtinqa! Chayrayku paykunaqa kasukunku apóstol Pedro hawisqa cristianokunaman kallpachasqanta, paymi niran: “Chayrayku, wawqe-panaykuna, astawanraq kallpachakuychis, Diospa waqyasqan kasqaykichispipas paypa akllasqan kasqaykichispipas allin takyasqa kanaykichispaq. Chaykunatachus ruwankichis chayqa, manan hayk’aqpas urmankichischu. Chay hinapin, Señorninchis Qespichiqninchis Jesucristoq wiñay qhapaqsuyunman sumaq chaskiykusqa haykuykapunkichis”, nispa (2 Pedro 1:10, 11).

¹⁸ Ancha askha runakunaqa anchatan kusikunku hawisqa wayqe panankuna chay suyakuyniyoq kasqankumanta, chaymi tukuy sonqo paykunata yanapashanku. Ancha askha runakunaqa Diospa amigon kasqankuraykun tukuy atisqankuta ruwashanku Diosta servinankupaq. Juicio P’unchay tiempopin kawsay unu pukyukunaman Jesuswan pusachikuspanku, tukuy sonqo Diospa kamachikuyninkunata kasunqaku. Chaymantataq paykunaqa allinpaq hap’isqa kanqaku Jehová Diosta wiñaypaq kay Hallp’api servinankupaq, ¡anchatachá kusikunqaku chay sucedeqtin! (Romanos 8:20, 21; Apocalipsis 21:1-7.)

¿Imanispan kutichiwaq?

• ¿Mayqenkunataq Jesuspa kaqninkunari?

• ¿Imaynatan ancha askha runakuna yanapanku hawisqa cristianokunata?

• ¿Ima sumaq ruwaykunatan ancha askha runakuna ruwashanku? ¿Ima suyakuymi paykunapaq kan?

• ¿Imaynan sientekunki Juicio P’unchaypi yuyaykuspa?

[Tapuykuna]

[28 paginapi dibujo]

Ancha askha runakunaqa p’achankuta t’aqsaspan Corderoq yawarninpi yuraqyachinku

[31 paginapi dibujo]

¿Imatan tapuyta munawaq kawsarimpuq chanin runakunata?