Kallpachakusun “allin yachachiq” kanapaq

“Tukuy pacienciawan allin yachachiq kaspa Diospa siminta willay, [...] anyay, wanachiy, kallpachay ima.” (2 TIMOTEO 4:2, NM.)

1. ¿Imatan Jesús qatikuqninkunata kamachiran? ¿Ima ejemplotan paykunaman saqeran?

KAY pachapi kashaspa askha milagrokunataña Jesús ruwaran chaypas, manan milagrokuna ruwasqanmantachu allin reqsisqa karan, aswanpas allin yachachiq kasqanmantan (Marcos 12:19; 13:1). Jesuspaqqa Diospa Reinonmanta willaymi aswan allin karan ima ruwaymantapas, kaqllataqmi ñoqanchispaqpas. Jesusmi cristianokunata kamachiwaranchis: Runakunata yachachimuychis qatikuqniykuna kanankupaq nispa; chayta hunt’ananchispaqmi runakunaman yachachimunanchis Jesuspa lliw kamachisqanta (Mateo 28:19, 20).

2. ¿Imatan ruwananchis Jesuspa kamachisqanta hunt’anapaq?

² Jesuspa kamachisqanta hunt’ananchispaqqa kallpachakushanallanchismi allin yachachiq kanapaq. Apóstol Pablo predicaqmasin Timoteoman cartata qelqasqanpi rikuchiran ancha importante allin yachachiq kay kasqanta. Niranmi: “Qan kikiykita allinta cuidakuy, hinallataq yachachikuyniykitapas, chaykunapi qaqata sayay. Chayta ruwaspaqa qan kikiykitan qespichikunki,  hinallataq uyariqniykikunatapas”, nispa (1 Timoteo 4:16). Yachachikuymanta rimaspaqa Pabloqa manan estudiaqpa yuyayninta yachaykunawan hunt’achinallamantachu rimasharan. Allin yachachiq cristianoqa yachachisqankunaq sonqonmanmi churan Diospa yachachiyninkunata, yanapantaq kawsayninkuta cambianankupaq. Chhaynaqa, ¿imaynatan “allin yachachiq” kasunman Diospa Reinonmanta allin willakuykunata willashaspa? (2 Timoteo 4:2, NM.)

Kallpachakusun “allin yachachiq” kanapaq

3, 4. a) ¿Ima kinsa ruwayta hunt’ananchis “allin yachachiq” kanapaq? b) ¿Imaynatan yanapawanchis Bibliamanta Allin Yachachiq Kanapaq Escuela?

³ Allin willakuykunata allinta yachachinapaqqa: estudiananchismi, hukkunaq yachachisqankuta qhawarinanchis, lliw chaykuna yachasqanchisman hinataq yachachinanchis. Kay kinsantin ruwaykunatan hunt’ananchis. Chayrayku estudiota qonapaqqa Diosmanta mañakuspa preparakunanchis, chhaynapi allinta entiendesun yachachinanchis temata (leeychis Salmo 119:27, 34). Chaymantapas allinta qhawarinanchis allin yachachiq cristianokunaq imayna yachachisqankuta. Kallpachakunanchistaq tukuy yachasqanchisman hina yachachinapaq, chhaynapin allin yachachiq kasun (Lucas 6:40; 1 Timoteo 4:13-15).

⁴ Jehová Diosmi Allin Yachachiqninchisqa, kay pachapi organizacionninwantaq llapa serviqninkunata yachachishan allinta predicanankupaq (Isaías 30:20, 21). Sapa semanan llapa congregacionkunapi ruwakun Bibliamanta Allin Yachachiq Kanapaq Escuela. Chay Escuelapi kaqkunatan allinta yanapakushan Diospa Reinonmanta allin yachachiq kanankupaq. Chay escuelapiqa Bibliatan astawanqa estudiakun. Diospa Simin Qelqaqa manan imamanta yachachinallanchistachu willawanchis, willawallanchistaqmi imayna yachachinanchistapas. Bibliamanta Allin Yachachiq Kanapaq Escuelapiqa sapa kutillanmi yuyarichiwanchis allin yachachiq kanapaq kaykuna ruwananchista: Bibliamantapuni yachachinata, allin yuyaywan tapuykuna ruwanata, entiendey atiyllata yachachinata, yachachisqanchiskunapi interesakunanchistapas. Kunanmi chaykunamanta yachasunchis. Yachallasuntaqmi imaynata yachachisqanchiskunaq sonqonman chayasunman chaytapas.

Diospa Simin Qelqamantapuni yachachisun

5. ¿Imamantan yachachinanchis? ¿Imanaqtinmi Bibliawanpuni yachachinanchis?

⁵ Allin yachachiq Jesusqa Bibliamantapunin yachachiran (Mateo 21:13; Juan 6:45; 8:17). Yuyaykusqanman hinalla yachachinanmantaqa Jehová Diospa nisqanman hinapunin yachachiran (Juan 7:16-18). Ñoqanchispas kaqllatataqmi ruwananchis. Chayrayku wasin wasinta predicaspapas estudiota qospapas Bibliaq nisqanman hinapuni rimananchis (2 Timoteo 3:16, 17). Allin yachayniyoqña yuyayniyoqña kasunman chaypas, manan yachayninchisqa Bibliaq yachachisqanmanta aswan allinqa kanmanchu. Diospa Simin Qelqaqa ancha atiyniyoqmi. Chayrayku, imamantaña yachachishaspapas, yachachisqanchis runaq allinta entiendenanpaqqa Bibliatapunin leechinanchis (leeychis Hebreos 4:12).

6. ¿Imaynata yachachisqanchiskunata yanapasunman estudiachisqanchista entiendenankupaq?

⁶ Ancha atiyniyoqña Biblia chaypas, preparakunanchismi  estudiota qonapaqqa. Allintan akllananchis mayqen textokunatan estudiopi leesunchis otaq leechisunchispas chayta. Astawanqa akllananchis mayqen textokunan yachachikuyninchiskunamanta sut’ita willashan chayta. Chaymantapas yachachisqanchiskunatan yanapananchis leesqanku textokunata allinta entiendenankupaq (1 Corintios 14:8, 9).

Allin tapuykunata ruwasun

7. ¿Imanaqtinmi allin tapuykunata ruwananchis?

⁷ Allin tapuykunata ruwaqtinchisqa yachachisqanchiskunatan allinta yuyaymanachisun, sonqonkumanpas chayasunchis. Ejemplopaq, Bibliamanta huk textota leespanchismi tapuykunata ruwasunman pay kikin textoq nisqanta willawananchispaq. Mayninpiqa huk tapuyllata ruwasunman entiendenanpaq, mayninpin ichaqa askha tapuykunata ruwananchis kanqa entiendechinapaq. Sichus yachachisqanchista yanapasun ama uyariqllachu kananpaq, aswanpas tapuykunata kutichinanpaq chayqa, aswan allintan entiendenqa, pay kikinpunitaq convencekunqa yachasqanmanta (Mateo 17:24-26; Lucas 10:36, 37).

8. ¿Imaynatan yachasunman yachachisqanchiskunaq ima yuyaykusqankuta?

⁸ Qelqanchiskunataqa tapuywan kutichiywanmi estudiakun. Yaqa llapan yachachisqanchiskunan mana sasachakuspalla parrafokunapi tapuykunaman kutichiyta tarinku. Chaywanpas allin yachachiqqa manan tapuykunaman kutichinallantachu suyan. Ejemplopaq, ¿imaninmi Biblia qhelli huchamanta? nispa tapuqtinchis, yachachisqanchis runaqa allintapaschá kutichiwasunman (1 Corintios 6:18). Ichaqa, munayllata tapuspaqa yachasunmanmi qhelli hucha ruwaymanta ima yuyaykusqanta. Tapurisunman: “¿Imanaqtintaq Diosri mana munanchu qhelli hucha ruwananchista? ¿Imaninkin qan chaymanta? ¿Allinninchispaqchu kanman Diospa kamachikuyninkuna kasukuy?” nispa. Kay tapuykunata kutichisqanpi reparasunman imatapunichus yuyaykusqanta (leeychis Mateo 16:13-17).

Entiendey atiyllata yachachisun

9. ¿Imaynatan Bibliaq yachachikuyninkunata yachachinanchis?

⁹ Bibliaq yachachikuyninkunaqa yaqa llapanmi entiendey atiylla. Ichaqa yachachisqanchiskunaqa sasatapaschá chaykunata entiendenkuman pantasqa religionkunaq yachachikuyninkunata yachasqankurayku. Chayraykun Bibliamanta yachachinanchis entiendey atiyllata, allin sut’inchasqata, k’apakta ima. Chay hinatan allin yachachiqqa yachachin. Chhaynata yachachiqtinchisqa manan sasatachu entiendenqaku. Chayraykun estudiasqanchis temawan mana tupaqtaqa manaña rimanachu, nitaq leesqanchis textokunamantapas llapantachu rimana. Aswanpas, estudiasqanchiswan tupaq yachachikuykunallatan allinta yachachina. Pisi pisimantan astawan yachanqa Bibliaq aswan hatun yachachikuyninkunatapas (Hebreos 5:13, 14).

10. ¿Imaynatan yachasunman may tukuyta yachachisqanchiswan estudianata?

¹⁰ ¿Hayk’a parrafotan estudiana sapa estudiopi? Chaytaqa sapankanchismi qhawarinanchis. Wakin runakunawanqa tiemponkuq kasqanman hina atisqankuman hinan estudiasunman askhatapas otaq pisillatapas. Imaynaña kaqtinpas, ama qonqasunchu, runamasinchistaqa yachachishanchis  allin iñiyniyoq kanankupaqmi. Chayraykun yachachisqanchiskunaman necesitasqanku tiempota qonanchis Bibliaq yachachikuyninkunata leenankupaq, entiendenankupaq, chaykunapi iñinankupaqpas. May tukuy parrafokunata entiendeyta atin chaykamallan estudiachinanchis, ichaqa ama nishutaqa kaqllapiqa qhepasunchu. Sichus yachachisqanchista allintaña entienderun chayqa, qatiq parrafomanñataqmi pasananchis (Colosenses 2:6, 7).

11. ¿Imaynatan apóstol Pablo hina yachachisunman?

¹¹ Apóstol Pabloqa entiendey atiyllatan allin willakuykunata willaran. Allin educacionniyoqña karan chaypas, manan sasa entiendey rimaypichu yachachiran (leeychis 1 Corintios 2:1, 2). Allin sonqoyoq runakunaqa Bibliaq yachachisqanta yachayta munanku chay yachachikuykuna entiendey atiylla kasqanrayku; manan allin yachayniyoqraqchu kana chaykunata entiendenapaqqa (Mateo 11:25; Hechos 4:13; 1 Corintios 1:26, 27).

Allinninkupaq kasqanta reparachisun

12, 13. ¿Imatan ruwasunman yachachisqanchiskuna Bibliaq nisqanman hina kawsanankupaq? Huk ejemplota willay.

¹² Yachachisqanchis runa iñiyninpi wiñananpaqqa sonqonmanmi chayananchis. Yachachisqanchisqa entiendenanmi Bibliapi tukuy yachasqan allinninpaq kasqanta, Bibliaq nisqanman hina kawsaypas allinninpaq kasqanta (Isaías 48:17, 18).

¹³ Ejemplopaq, yachachisqanchiswan qhawarishanchis Hebreos 10:24, 25 textota, chaypin cristianokunata kamachikushan huñunakuykunaman rinanchispaq, iñiyninchispi kallpachakunanchispaq, wayqe pananchiskunawanpas aswanta munanakunanchispaq. Sichus yachachisqanchis runa manaraq huñunakuykunaman hamushanchu chayqa, pisillapin willasunman imaynachus huñunakuyninchiskuna kasqanta imakunamanta yachamusqanchistapas. Chaymantapas nisunmanmi: Huñunakuykunaman rispaqa Diostan yupaychanchis, hinaspapas chaypi yachasqanchisqa allinninchispaqmi, nispa. Chaymantataq invitasunman ñoqanchiswan kuska huñunakuyman rinanpaq. Ichaqa, Diosta kusichiyta munaspankun Bibliaq nisqantaqa kasukunanku, manan munayninchista ruwanankuraykuchu (Gálatas 6:4, 5).

14, 15. a) ¿Imatan yachachisqanchis runakuna yachankuman Jehová Diosmanta? b) ¿Imaynatan yachachisqanchiskunata yanapanman Diosta reqsisqanku?

¹⁴ Sichus yachachisqanchis runakuna Bibliapi yachasqankuman hina kawsanqaku chayqa, Jehová Diosninchistan allinta reqsinqaku, anchatataq munakunqakupas (Isaías 42:8). Jehová Diosqa ancha munakuq Taytan, payllan Kamaqqa, tukuy imapas paypan. Chaymantapas, Jehová Diosqa munakuqninkunaman serviqninkunamanqa, astawanmi willan imayna Dios kasqanta, imaymana ruway atisqanmantapas (leeychis Éxodo 34:6, 7). Manaraq Israel llaqtanta Egiptomanta horqoshaqtinmi Jehová Diosqa Moisesman kayta niran: “Ñoqan kasaq munasqayman hina”, nispa (Éxodo 3:13-15, NM). Jehová Diosqa ima munasqanmanmi tukunan karan Israel llaqtanpaq munasqanta hunt’ananpaq. Chayrayku Jehová Diosqa Israel runakunarayku tukuran Qespichiqman, Maqanakuqman, necesitasqankuta Qoqman, promesakuna Hunt’aqman, hukkunamanpas, chaykunata rikuspankun Israel runakunaqa Jehová Diosta allinta reqsiranku (Éxodo 15:2, 3; 16:2-5; Josué 23:14).

¹⁵ Yachachisqanchiskunaqa manan rikunkumanchu Moisespa rikusqan milagrokunata. Ichaqa, maypachachus iñiyninku astawan wiñanqa, Bibliaq yachachikuyninkunatapas aswan valorniyoqta qhawarinqaku, chayman hinataq kawsaytapas qallarinqaku chayqa, reparanqakun Diospa kallpachayninta yachayninta yanapaynintapas necesitasqankuta, hinaspa Diosmanta mañakunqaku. Diospa kutichiyninta rikuspankutaq payta reqsinqaku: Waqaychaqninku kasqanta, Qoykukuq kasqanta, allin Yuyaychaq kasqantapas (Salmo 55:22; 63:7; Proverbios 3:5, 6).

Tukuy sonqo hukkunapi interesakusun

16. ¿Imanaqtinmi mana allin yachayniyoqraqchu ni kusa rimaqraqchu kananchis allin yachachiq kanapaq?

¹⁶ Manapaschá allin yachachiqta hinachu qhawarikunchis, ichaqa ama chaywan llakikusunchu.  Jehová Diosmi Jesuspiwan qhawarishanku teqsimuyuntinpi yachachisqanchista (Hechos 1:7, 8; Apocalipsis 14:6). Paykunan yanapawasun yachachiypi, chhaynapin yachachiyninchisqa runakunaq sonqonman chayanqa (Juan 6:44). Manaña kusa rimaq allin yachayniyoqchu kasunman chaypas, munakuyninchismi cheqaq interesakuyninchispiwan yachachisqanchiskunata yanapanqa. Apóstol Pabloqa yacharanmi munakuy ancha importante kasqanta, chayraykun yachachisqan runakunata munakuran (leeychis 1 Tesalonicenses 2:7, 8).

17. ¿Imaynatan sapanka yachachisqanchiskunapi interesakusunman?

¹⁷ Yachachisqanchiskunapi interesakusqanchistan rikuchisunman paykunata reqsinapaq tiempota t’aqaspa. Estudiota qosqanchisman hinan astawan reqsisun yachachisqanchis runakunata. Diospa wakin kamachikuyninkunataqa yaqapaschá hunt’ashankuña kawsayninkupi, wakintataq ichaqa manaraq hunt’ashankumanraqchu. Sichus qhawarichisun Diospa kamachikuyninkunata imayna hunt’anankuta chayqa, rikuchishanchismi paykuna munakusqanchista, yanapashanchistaq Cristota qatikunankupaq.

18. ¿Imanaqtinmi yachachisqanchiswan kuska mañakunanchis? ¿Imanaqtinmi paypaq mañakunanchis?

¹⁸ Chaymantapas, yachachisqanchiswan kuska Diosmanta mañakunanchispuni, mañakushaspataq paypaq mañapunallanchistaq. Yachachisqanchis runaqa sut’itan reparanan Jehová Diosta allinta reqsinanpaq, payman achhuykunanpaq, kamachikusqanta kasukunanpaq yanapay munasqanchista (leeychis Salmo 25:4, 5). Sichus yachachisqanchiswan kuska Jehová Diosmanta mañakushaspa ninchis: Yachachisqayta yanapay Bibliapi yachasqanman hina kawsananpaq nispa chayqa, yachachisqanchisqa kallpachakunqan ‘Diospa siminta hunt’ananpaq’ (Santiago 1:22). Tukuy sonqo Diosmanta mañakusqanchista uyarispan yachachisqanchispas yachanqa Diosmanta mañakuyta. Chhaynapin paykunata yanapashanchis Diosman achhuykunankupaq, chayta ruwaspaqa anchatan kusikunchis.

19. ¿Imamantan yachasunchis qatimuq estudiopi?

¹⁹ Kay pachantinpi soqta millonmanta aswanraq Jehová Diospa testigonkuna kallpachakushanku “allin yachachiq” kanankupaq, chhaynapin allin sonqoyoq runakunata yanapashanku Jesuspa qatikuqnin kanankupaq, chay yachaymi anchata kallpachawanchis. ¿Ima sumaq willakuykunan kan tukuy sonqo predicasqankumanta? Qatimuq estudiopin chaymanta yachasunchis.

¿Yuyarishankichu?

• ¿Imanaqtinmi “allin yachachiq” kananchis?

• ¿Imakunatan ruwasunman allin yachachiq kanapaq?

• Manaña kusa rimaq allin yachayniyoqchu kasunman chaypas, ¿iman yanapawasun allin yachachiq kanapaq?

[Tapuykuna]

[15 paginapi foto]

¿Bibliamanta Allin Yachachiq kananpaq Escuelapiñachu kashanki?

[16 paginapi foto]

¿Imanaqtinmi estudiota qoshaspa Bibliata leechinanchis?

[18 paginapi foto]

Yachachisqaykiwan kuska mañakushaspa paypaq mañapullaytaq