“Qhawashallaypuni Señormanta chaskisqayki llank’ayta”

“Qhawashallaypuni Señormanta chaskisqayki llank’ayta, hunt’anaykipaq.” (COLOSENSES 4:17, NM.)

1, 2. ¿Imatan ruwananchis runamasinchis qespichisqa kananpaq?

CRISTIANOKUNAQA ancha importante willakuykunatan runakunaman willananchis, chay willakuykunata imayna chaskisqankumantan kanqa kawsanankupaq otaq wañunankupaqpas ‘manchay ñak’ariy’ tiempo chayamuqtin (Apocalipsis 7:14). Proverbios qelqan willawanchis: ‘Wañuchinapaq huchachasqakunata qespichiy, wañuchinapaqña nisqakunatapas kacharichiy’, nispa. ¡Ancha importante llank’aymantan kay textoqa willawashanchis! Sichus runakunaman allin willakuykunata mana willamusunchu chayqa, ñoqanchismi huchayoq kasun wañuypaq huchachasqa kanankumanta. Proverbios qelqaqa kaytawanmi nin: “Manapunin yacharqaykuchu, nispachus ninki chayqa, ¿manachu sonqokunata taripaqqa chayta reparan? ¿Manachu waqaychaqniykiqa chayta yachan? Paymi sapanka runaman ruwasqanman hina qopunqa”, nispa. Qhawasqanchispas hina, cristianokunaqa mana nisunmanchu: “Manapunin yacharqaykuchu” kay pachapi runakuna peligropi kasqankuta, nispaqa (Proverbios. 24:11, 12).

² Jehová Diospaqqa ancha valorniyoqmi runaq kawsayninqa, chaymi serviqninkunata kamachin tukuy atisqankuta ruwaspa llapa runaman Bibliamanta yachachimunankupaq, chhaynapi askha runa qespichisqa otaq salvasqa kanankupaq. Imaynan ñawpaq tiempopi llaqta qhawaqqa runakunaman willanan karan ima peligromantapas, chay hinallataqmi ñoqanchispa llank’ayninchispas. Manan munasunmanchu runakuna wañunanmanta “huchayoq” kayta (Ezequiel 33:1-7). Chayrayku kallpachakushallasun ‘Diospa siminta willamunapaq’ (leeychis 2 Timoteo 4:1, 2, 5).

3. ¿Imatan yachasunchis kay estudiopi, qatimuq estudiokunapipas?

³ Kay estudiopin yachasun imaynatan Diospa siminta willamunapaq hark’awaqninchis sasachakuykunata atipasunman chayta, imaynatataq aswan askha runakunata yanapasunman chaytapas. Iskay kaq estudiopitaq yachasunchis imatan ruwasunman Bibliamanta allin yachachiq kanapaq chayta. Kinsa kaq estudiopitaq yachasun pachantinpi predicaqmasinchiskunaq llank’asqanmanta sumaq willakuykunata. Ichaqa ñawpaqta yachasun imarayku kay tiemponchispi askha sasachakuykuna kashan chaytaraq.

¿Imanaqtinmi runakuna mana suyakuyniyoq kawsanku?

4, 5. ¿Imakunan pachantinpi sucedeshan? ¿Imaynatan runakuna kawsanku chaykunata rikuspa?

⁴ Kay pachantinpi imaymana sucedesqanta qhawarispan yachanchis ‘kay tiempo p’uchukapunanpaqña kashasqanta’. Jesuspas qatikuqninkunapas willarankuñan kay pachapi lliw imaymana mana allinkuna pasananmanta, chhaynapi yachallanchistaq ‘tukukuy qaylla p’unchaykunapiña’ kawsasqanchista. Imaymana ‘nanaykunan’ runakunata ñak’arichishan: guerrakuna, yarqaykuna, pacha chhaphchiykunapas. Chaymantapas, hinantinpin mast’arisqa kashan payllapaq munaq runakuna, mana kasukuqkuna, Diosta mana manchakuqkunapas. Lliw runakuna, Diospa munasqanman hina kawsaqkunapas ‘sasa tiempokunapin’ kawsashanchis (Mateo 24:3, 6-8, 12; 2 Timoteo 3:1-5).

⁵ Ichaqa yaqa llapan runakunan mana yachankuchu imarayku chaykuna sucedesqanta. Chayrayku, askha runakuna sinchita llakikunku  familiankuta mana imapas sucedenanmanta, sinchi nanaypitaq tarikunku mayqen familiankupas wañupuqtin, otaq hatun llakipipas rikukuqtinku. Paykunaqa manan entiendenkuchu imarayku chaykuna sucedesqanta, nitaq imayna allichakunantapas, chaymi mana ima suyakuyniyoq kawsanku (Efesios 2:12).

6. ¿Imanaqtintaq ‘Hatun Babiloniaqa’ mana atinchu runakuna yanapayta?

⁶ “Hatun Babilonia” otaq pachantinpi pantasqa religionkunaqa mana imapipas runakunata yanapanchu, aswanpas ‘qhelli huchapi puriyninwanmi’ runakunata pantachin, chaymi runakunaqa mana yachankuchu Jehová Diosman imayna achhuykuyta. Qhelli warmi hinan payqa ‘kay pachapi reykunaq’ sonqonta munayllata suwaran paypa munayninman hina ruwanankupaq. Pantasqa yachachikuyninkunawan layqakuyninkunawan iman runakunata q’oturan llaqta kamachikuqkunata ch’inlla kasukunankupaq. Pantasqa religionkunaqa kay pachapi atiyniyoq kanankuraykun cheqaq yupaychayta qhepancharanku (Apocalipsis 17:1, 2, 5; 18:23).

7. ¿Iman sucedenqa yaqa llapa runakunata? Chayrayku, ¿imaynatan paykunata yanapasunman?

⁷ Jesuspa nisqan hina, yaqa llapan runakunan wañuyman apaq hatun ñanninta rishanku (Mateo 7:13, 14). Wakin runakunaqa Bibliaq nisqanta yuyaypipuni mana kasukuyta munaspa chay hatun ñanninta purishanku. Ichaqa askha runakunan chay hatun ñanpi tarikunku q’otusqa kasqankurayku, paykunatan creechiranku kawsayninku Diospaq allin kasqanta. Chhaynapi tarikuspapas wakinqa yaqapaschá Bibliamanta cheqaq yachaykunata yachaspanku kawsayninkuta cambiankuman. Ichaqa pantasqa religionkunamanta mana lloqsiyta munaspa Bibliaq yachachikuyninkunata mana kasukuqqa, wañunqan ‘manchay ñak’ariy’ chayamuqtin (Apocalipsis 7:14).

Mana sayk’uspa predicashallasun

8, 9. ¿Imatan ñawpaq siglopi cristianokuna ruwaranku sinchi qatiykachasqa rikukuspanku? ¿Imanaqtinmi chayta ruwaranku?

⁸ Jesusmi qatikuqninkunata niran: Reinomanta allin willakuykunata lliw runaman willamuychis, yachachimuychistaq qatikuqniy kanankupaq, nispa (Mateo 28:19, 20). Cheqaq cristianokunaqa predicasqankuwanmi reqsichikunku Dios sonqo kasqankuta, iñiyniyoq kasqankutapas. Chayraykun ñawpaq siglopi cristianokunaqa tukuy sonqo predicashallaranku qatiykachasqa kaspapas. Paykunaqa Jehová Diosmanta kallpata mañakuranku ‘mana manchakuspa siminta willashanallankupaq’. Jehová Diostaq mañakuyninkuta uyarispa santo espiritunta paykunaman qoran Diospa siminta mana manchakuspa willamunankupaq (Hechos 4:18, 29, 31).

⁹ ¿Pisiparankuchu Jesuspa qatikuqninkuna sinchi qatiykachasqa kaspanku? Manapunin. Qhawarisun huk kutipi ima sucedesqanta. Judío umallikunan phiñasqa kasharanku apostolkunaq predicasqanwan, chaymi paykunata hap’ispanku sinchita amenazaranku hasut’iranku ima.  Chaywanpas apostolkunaqa ‘sapa p’unchaymi yachachishallaqkupuni Jesús Cristo kasqanmanta allin willakuykunata’. Paykunaqa allintan entienderanku ‘Diosta ñawpaqta kasunankuta, mana runakunatachu’ (Hechos 5:28, 29, 40-42).

10. ¿Ima pruebakunapin cristianokuna tarikunchis? ¿Imatan wakin runakuna ruwankuman allin ruwayninchista qhawaspanku?

¹⁰ Kay tiempopiqa pisi cristianokunallatan maqanku carcelmanpas wisq’anku allin willakuykunata willasqankurayku. Ichaqa llapanchismi ima pruebapipas ima sasachakuypipas tarikunchis. Ejemplopaq, runakunaqa manapaschá allinpaqchu qhawariwanchis Diospa kamachisqanman hina kawsasqanchisrayku. Llank’aqmasinchiskuna wasimasinchiskunapas hukniraytapaschá qhawariwanchis Bibliaq kamachikuyninkunata kasukusqanchisrayku. Chhayna kaqtinpas manan pisipananchischu. Cristianokunaqa ‘k’anchaq ch’askakuna hinan k’ancharinanchis’ kay tutayaq pachapi (Filipenses 2:15). Yaqapaschá wakin runakunaqa allin ruwasqanchista sumaqta qhawarispanku Jehová Diosta yupaychankuman (leeychis Mateo 5:16).

11. a) ¿Imatan wakin runakuna ruwankuman predicayninchista saqenanchispaq? b) ¿Imatan Pablota ruwaranku predicasqanrayku? Chaywanpas, ¿imatan ruwashallaran?

¹¹ Diospa Reinonmanta willakuykunata mana sayk’uspa willashanallanchispaqqa mana manchakuqmi kananchis. Yaqapaschá wakin runakuna, kikin familianchiskunapas burlakunkuman otaq imatapas ruwankuman predicayninchista saqenanchista munaspanku (Mateo 10:36). Apóstol Pablotan askha kutipi varakunawan waqtaranku Diospa siminta willasqanrayku. Chaywanpas Pabloqa kayta niran: “Yachallankichistaqmi [...] muchusqaykuta, k’amisqa kasqaykuta, chaywanpas Diosninchismi kallpachawarqanku, hinan qatiykachakuyña kashaqtinpas mana mancharispa Diospa allin willakuyninkunata willarqaykichis”, nispa (1 Tesalonicenses. 2:2). Huk kutinmi Pablota cheqnikuqninkuna hap’iranku, p’achanta ch’utispankutaq varakunawan p’anaranku, carcelmanpas wisq’aranku; chhaynatataq ñak’arichisharanku chayqa, apóstol Pablopaqqa sasapunichá kanman karan Diospa siminta willashallayqa (Hechos 16:19-24). ¿Imanaqtintaq mana manchakuspa predicashallaran? Payqa hunt’aytapunin munaran Diospa qosqan llank’anata (1 Corintios 9:16).

12, 13. ¿Imanaqtinmi wakin iñiqmasinchiskuna pisipankuman? ¿Imaynatan kallpachakunkuman?

¹² Chaymantapas yaqapaschá predicayninchispi pisipasunman runakuna mana uyariwaqtinchis, otaq sapa kutilla runakunata wasinkupi mana tariqtinchis. Chhaynaqa, ¿imatan ruwasunman? Kallpachakusunmanmi maypipas tarikuspa predicanapaq. Chaymantapas, horarionchista allichakusunman wasinkupi kasqanku horata predicananchispaq, otaq maypichus aswan askha runakunata tarinchis chaykunapi astawan predicasunman (kay textokunawan tupachiy Juan 4:7-15; Hechos 16:13; 17:17).

¹³ Chaymantapas askha iñiqmasinchiskunan manaña nishutachu predicayta atinku kuraqña kasqankurayku, otaq onqosqa tarikusqankuraykupas. Sichus chhaynapi tarikunki chayqa, ama llakikuychu. Jehová Diosqa allintan yachan imaynapi tarikusqaykita, anchatataq kusikun atisqaykiman hina ruwasqaykiwan (leeychis 2 Corintios 8:12). Qatiykachasqaña kaspapas, manaña runakuna uyarikuqtinpas, onqosqaña kashaspapas, atisqaykiman hina kallpachakuy allin willakuykunata willamunaykipaq (Proverbios 3:27; Marcos 12:41-44 textowan tupachiy).

‘Qhawashallasunpuni llank’ayninchista’

14. ¿Imapin Pablo allin ejemplo karan iñiqmasinkunapaq? ¿Imanispan Arquipota kallpacharan?

¹⁴ Apóstol Pabloqa tukuy sonqonwanmi Diospa siminta willaran, iñiqkunatapas kallpacharanmi kaqta ruwanankupaq (Hechos 20:20, 21; 1 Corintios 11:1). Huk kutinmi apóstol Pabloqa Colosas llaqtapi tiyaq cristianokunaman cartata qelqaspa sumaqta kallpacharan Arquipo sutiyoq cristianota. Niranmi: “Arquipota niychis: ‘Qhawashallaypuni Señormanta chaskisqayki llank’ayta, hunt’anaykipaq’”, nispa (Colosenses 4:17, NM). Bibliaqa manan astawanqa willanchu Arquipomanta; predicanapaq llank’ayta chaskikusqallanmantan willan. Sichus ñoqanchispas Jehová Diosman qokuranchisña chayqa, chaskillaranchistaqmi predicanapaq llank’ayta.  ¿‘Qhawashallanchischu’ chay llank’ayninchista allintachus hunt’ashanchis chayta?

15. ¿Imanispan Jehová Diosman qokuranchis? ¿Imatan chaymanta tapukusunman?

¹⁵ Manaraq bautizakushaspan Jehová Diosman mañakuypi qokuranchis: Qanpa munayniykitapunin ruwasaq tukuy kawsasqay p’unchaykuna, nispa. Chayraykun tapukunanchis: “¿Kawsayniypi Diospa munaynintachu ñawpaqman churani?” nispa. Familianchista uywanapaq llank’ashanchis chayqa allinmi, chaytapunin Jehová Diosqa munan ruwananchista (1 Timoteo 5:8). Ichaqa, ¿horqonchischu tiempota servicionchista hunt’anapaq? ¿Imataq ñoqanchispaq aswan valorniyoqri? (Leeychis 2 Corintios 5:14, 15.)

16, 17. ¿Imatan wayna sipaskuna, mana nishu ruwanayoq kuraq wayna sipaskunapas ruwankuman?

¹⁶ Sichus 18 watamanña chayashanki, Jehová Diosmanpas qokurankiña, colegioykitapas tukurankiña otaq tukunaykipaqña kashanki chayqa, manapasraqchá familiaykipaq llank’anaykichu kashan. ¿Ima llank’aytan akllankunki? Jehová Diospa munayninta ruwanaykipaq prometekurankiñataq chayqa, ¿imatan ruwawaq chayta hunt’anaykipaq? Askha wayna sipaskunan tiemponkuta ruwayninkutapas allicharanku precursor kanankupaq, chay ruwasqankuwantaq ancha kusisqa kawsashanku (Salmo 110:3, NM; Eclesiastés 12:1).

¹⁷ Yaqapaschá qanqa kuraq waynaña kanki otaq kurak sipasña kanki, ch’isiyaqtaq llank’ankipas, ichaqa mana pitapas manteninayki kanchu. Kusikunkichá atisqaykiman hina congregacionniykiwan llank’aspa. Ichaqa, ¿munawaqchu astawan kusikuyta? ¿Munawaqchu servicioyki yapayta? (Salmo 34:8; Proverbios 10:22.) Wakin llaqtakunapiqa askharaqmi ruwana kashan lliw runaman allin willakuykunata yachachimunapaq. ¿Imatan ruwawaq servicioykita yapanaykipaq? Yaqapaschá astakuwaq maypichus astawan predicanapaq necesitakushan chay llaqtakunaman (leeychis 1 Timoteo 6:6-8).

18. ¿Imatan Kevinwan Elenawan ruwaranku servicionkuta yapanankupaq? ¿Imaynatan kunan kawsashanku?

¹⁸ Yachasunchis Kevinmanta Elenamantawan, paykunan warmi qhari kanku, Estados Unidospitaq tiyankupas. * Llaqtamasinkunaq costumbrenkuman hinan paykunapas casarakusqanku qhepallaman wasita rantikuranku. Iskayninkun ch’isiyaq llank’aranku, chaymi imankupas hunt’asqa karan. Ch’isiyaqtaq llank’aranku, wasinkupipas imaymana ruwanataq karan chayqa, pisillan tiemponku karan predicanankupaq. Tiempowanmi cuentata qokuranku yaqa llapan tiemponkuta kallpankutapas qhapaq kay  maskhayman qoshasqankuta. Huk casado warmi qhari precursorkunata kapuqnillankuwan ancha kusisqa kawsasqankuta rikuspankun entienderanku kawsayninkupi imakunata ñawpaqman churanankuta. Jehová Diospa yanapayninta mañakuspataq wasinkuta vendespanku huk huch’uy wasillaman astakuranku. Elenaqa pisi tiempollata llank’ayta qallariran precursora kananpaq. Kevinpas esposanpa llank’asqanta qhawaspan kallpachakuran, chaymi ñawpaq llank’ananta saqepuspa precursor kapuran. Chaymantataq pisi tiempollamanta sudamericaq huknin nacionman ripuranku predicaq, chaypin necesitakuran Diospa Reinonmanta willaqkunata. Kevinmi nin: “Esposaywanqa kusisqallapunin kawsarayku, ichaqa Diospaq servicioykuta astawan yapasqaykumantapachan aswan kusisqa kawsayku”, nispa (leeychis Mateo 6:19-22).

19, 20. ¿Imanaqtinmi allin willakuykunata willay aswan valorniyoq ima llank’aymantapas?

¹⁹ Kay tiempopi ancha valorniyoq llank’ayqa allin willakuykunata willaymi (Apocalipsis 14:6, 7). Chay llank’aywanmi yanapakushanchis Jehová Diospa sutin yupaychasqa otaq ch’uyanchasqa kananpaq (Mateo 6:9). Chaymantapas, Bibliamanta willasqanchisqa allinyachinmi runakunaq kawsayninta, yanapantaq wiñay kawsayman aypanankupaqpas. Sapa watanmi waranqanpi runakuna chay willakuyta uyarispa kasukushanku. Ichaqa, apóstol Pabloq tapusqan hina: “¿Imaynatan uyarinkuman pipas paykunaman mana willashaqtinqa?” (Romanos 10:14, 15). Manan atinkumanchu uyariyta. Chayrayku, ¿kallpachakusunmanchu servicionchista hunt’anapaq?

²⁰ Qhawasqanchis hina, runakunaqa entiendenankun imarayku sasa tiempokuna kasqanta, entiendenallankutaqmi kunan tiempo decidisqankumanta kawsanankupaqpas wañunankupaqpas kasqanta. Chayrayku, ¿imatawan ruwasunman paykunata yanapananchispaq? Kallpachakunanchismi allin yachachiq kanapaq. Qatiqnin estudiopi chaymanta yachasun.

[Uranpi willakuy]

¿Imanispan kutichiwaq?

• ¿Imatan ruwananchis runamasinchis qespisqa kananpaq?

• ¿Imatan ruwasunman predicayninchispi kaq sasachakuykunata atipanapaq?

• ¿Imaynatan hunt’asunman Señormanta chaskisqanchis llank’ayta?

[Tapuykuna]

[11 paginapi dibujo]

Hark’akushaqtinkupas predicashanallapaqqa mana manchakuqmi kananchis

[13 paginapi foto]

Sapa kutilla mana pitapas wasinkupi tarispa, ¿imatan ruwasunman?