“Wiñay kawsaypaq sonqoyoq” runakunan allin willakuykunata uyarikushanku

“Llapan wiñay kawsaypaq sonqoyoq runakunan iñiranku.” (HECHOS 13:48, NM.)

1, 2. ¿Imaynatan ñawpaq siglopi cristianokuna Jesuspa kamachisqanta hunt’aranku?

HECHOS libropin willakushan imaynata ñawpaq siglopi cristianokuna Jesuspa kamachiyninta kasukuspa pachantinpi allin willakuykuna willamusqankumanta (Mateo 24:14). Jesuspa wakin qatikuqninkunan tukuy sonqo predicaranku, chayta qhawarispankun hukkunapas kaqllatataq ruwaranku. Jesuspa qatikuqninkuna tukuy sonqowan Jerusalenpi predicasqankuraykun waranqanpi runakuna ‘askha sacerdotekunapas’ Jesuspa qatikuqninman tukupuranku (Hechos 2:41; 4:4; 6:7).

² Ñawpaq siglopi misionerokunan askha runakunata yanaparanku cristianoman tukupunankupaq. Ejemplopaq, Felipen Samaria llaqtata riran, chaypin askha runakuna allinta uyarikuranku predicasqanta (Hechos 8:5-8). Apóstol Pablotaq wakin iñiqkunawan kuska karu llaqtakunaman predicaq riranku, chay llaqtakunan karan Chipre, Asia Menor, Macedonia, Grecia, Italiapiwan. Chhaynapin chay llaqtakunapi tiyaq askha judío runakuna griego runakunapas Jesuspa qatikuqninman tukupuranku (Hechos 14:1; 16:5; 17:4). Titopas allintan hunt’aran Diospa qosqan llank’anata Creta llaqtapi (Tito 1:5). Pedropas Babilonia llaqtapin predicallarantaq; ñawpaq cartanta qelqananpaqqa ñan allin willakuykunata willakusqaña Ponto, Galacia, Capadocia, Asia, Bitinia llaqtakunapi, chay cartatan qelqaran 62-64 watakuna ukhupi (1 Pedro 1:1; 5:13). ¡Anchatachá chay cristianokunaqa kusikuranku chhayna llank’asqankuwan! Paykunaqa tukuy sonqowanmi Diospa siminta willaranku, chaymi paykuna contra hatariqkunapas niranku: ‘Pachantinpi tiyaqkunatan ch’aqwachishanku’, nispa (Hechos 17:6; 28:22).

3. ¿Ima sumaq willaykunan kan kunan tiempopi Diospa llaqtan askhayasqanmanta? ¿Imaynan sientekunki chaykunata yachaspayki?

³ Kunan tiemponchispipas Diospa llaqtanqa astawanmi askhayashan. 2007 servicio watapi pachantinpi predicakusqanmanta willaykunata leespaqa anchatan kusikunchis. Chay watapin soqta millontaraq wasaparanchis Bibliamanta estudiokunata qospa, ¿manachu chayta yachaspa kusikunchis? Chaymantapas qayna wataqa chunka millón runakunan predicasqanchista uyarispanku Jesuspa wañupusqan yuyarina huñunakuyman hamuranku. Chaywanmi yachanchis askharaq llank’ananchis kasqanta.

4. ¿Pikunan uyarikushanku Diospa Reinonmanta allin willakuykunata?

⁴ Ñawpaq siglopi hinan kunanpas “llapan wiñay kawsaypaq sonqoyoq runakunan” allin willaykuna willasqanchista uyarishanku (Hechos 13:48, NM). Jehová Diosmi chay runakunata llaqtanman pusamushan (leeychis Ageo 2:7). Chay llank’aypi allinta  yanapakunanchispaq, ¿imaynatan predicananchis?

Lliw runaman predicasun

5. ¿Imatan pipas ruwanan Dioswan allinpi kananpaq?

⁵ Ñawpaq siglopi cristianokunaqa entienderankun, “Diosqa manan mayqen runatapas rikch’ayninta qhawaspachu akllan, aswanpas may suyupipas payta yupaychaspa chanin-kayta ruwaqtaqa chaskinmi” (Hechos 10:34, 35). Pipas Jehová Dioswan allinpi kayta munaqqa iñinanmi Jesuspa sacrificakusqanpi (Juan 3:16, 36). Jehová Diosqa “munanmi llapan runakuna qespichisqa kanankuta, cheqaq-kayta reqsinankutapas” (1 Timoteo 2:3, 4).

6. ¿Imatan Reinomanta willaqkuna mana ruwananchischu? ¿Imarayku chayta mana ruwananchischu?

⁶ Sichus wakin runakunata mana predicasunmanchu wak llaqtayoq kaqtinku, qhapaq otaq wakcha kaqtinku, hukniray rikch’ayniyoq kaqtinku, huk religionniyoq kaqtinku, otaq imaraykupas chayqa, manapunin chayqa allinchu kanman. Kaypi yuyaykusun, Bibliamanta willawaqninchis cristianoqa manan imayna kasqanchista qhawarispachu manaña predicawaranchis, aswanpas yanapawaranchismi Jehová Diosta reqsinapaq. Chayraykun ñoqanchispas, lliw runaman willananchis wiñay kawsayman apaq willakuykunata (leeychis Mateo 7:12).

7. ¿Imanaqtinmi predicasqanchis runakunata mana juzgananchischu?

⁷ Jehová Diosqa Jesustan akllaran Juez kananpaq, chayrayku ñoqanchisqa mana mayqen runatapas juzgananchischu. Runakunaqa ‘ñawiq rikusqanman hinalla’ otaq ‘rimayta uyarispallan’ juzganchis, Jesusmi ichaqa yachan yuyaykusqanchista, sonqonchispi ima kasqantapas (Isaías 11:1-5; 2 Timoteo 4:1).

8, 9. a) ¿Imayna runan karan Saulo manaraq cristiano kashaspa? b) ¿Imatan yachanchis apóstol Pabloq kawsayninmanta?

⁸ Mayqen runapas ñawpa kawsayninta saqespaqa Jehová Diosta servinmanmi. Chaytan ruwaran Tarso llaqtayoq Saulo runa, paymi qhepaman apóstol Pablo sutiwan reqsisqa kapuran. Sauloqa fariseo runan karan, sinchita ñak’arichispataq cristianokunata qatiykacharan, paypa yuyaykusqanman hinaqa cristianokunaqa manan Jehová Diostachu yupaychasharanku (Gálatas 1:13). Runaq qhawarinanpaqqa Sauloqa manan cristianoman tukunmanchu karan. Jesusmi ichaqa allin sonqoyoq kasqanta qhawariran, chaymi Saulota akllaran huk hatun kamachita hunt’ananpaq. Tiempowanmi Sauloqa ñawpaq siglo congregacionpi tukuy sonqowan allin willakuykunata willaran.

⁹ ¿Imatan yachanchis apóstol Pabloq kawsayninmanta? Kunanpas askha runakunan Saulo hina mana allinpaqchu qhawarinku allin willakuykuna willasqanchista. Yuyaykusunmanña: Chay runakunaqa manan Diostaqa servinkumanchu nispa chaypas, kallpachakunanchismi paykunawan rimananchispaq. Mayninpiqa mana yuyaykusqanchis runakunaraqmi Diospa siminta uyarikunku. Diospa kamachisqanta hunt’anapaqqa llapa runamanmi allin willakuykunata ‘willashanallanchispuni’ (leeychis Hechos 5:42).

Reinomanta ‘willashallaqkunataqa’ Diosmi yanapashan

10. ¿Imanaqtinmi phiña runakunamanpas predicananchis? Chhayna runakunaman llaqtaykipi predicasqankumanta willay.

¹⁰ Mayninpiqa mana yuyaykusqanchis runakunaraqmi Diospa siminta uyarikunku. Ejemplopaq, Ignaciomanta * rimasunchis, paymi sudamericaq huknin nacionpi carcelpi kasharan, chaypitaq Biblia estudiayta qallariran Jehová Diospa testigonkunawan. Ignacioqa millay maqakuq runan karan, lliwmi payta manchakuranku. Chaymi carcelpi kaq presokunapas payta valekuqku vendesqanku manuta cobrapunanpaq. Bibliata estudiasqanman hina Diospa kamachisqanta kasukuyta qallariran, chaymi pisi pisimanta millay maqakuq runa kasqanmanta samp’aman tukupuran. Kunanqa manañan pipas manuta cobrananpaq payta valekunchu. Ignaciotaqa Bibliapi yachasqanpas Diospa espiritunpas allintan yanaparan allin runaman tukupunanpaq, chaywanmi payqa kusisqa kashan. Chaymantapas kusikunmi yachachiqnin cristiano yanapasqanmanta, yachachiqninqa manan imayna kasqanta qhawaspachu manaña yachachiran.

11. ¿Imanaqtinmi sapa kutilla runakunaman predicananchis?

¹¹ Runakunaq kawsayninkupas yuyaykusqankupas mayninpiqa cambianmanmi, chayrayku sapa  kutilla runakunaman predicananchis. Yaqapaschá predicasqanchis qhepaman wakin runakunaqa sinchita onqonkuman, mana llank’anayoq qhepapunkuman, otaq mayqen familianpas wañupunman (leeychis Eclesiastés 9:11). Otaq kay pachapi imaymana sucedesqanta qhawarispanku llakisqa kashankuman qhepaman imakuna kananmanta. Chay sasachakuykunapi rikukuspankun wakin runakunaqa allin willakuykunata uyarikunkuman, manaña ñawpaqpi uyariyta munarankuchu otaq hark’akuqña karanku chaypas. Chay hinaqa, maypiña imaynaña tarikuspapas allin willakuykunata willashallasun.

12. ¿Imaynatan qhawarinanchis predicasqanchis runakunata? ¿Imaraykun chhaynata qhawarinanchis?

¹² Runakunaqa manaraq allinta yachashaspan imaymanataña hukkunamanta rimashanku. Jehová Diosmi ichaqa sapanka runata allinta reqsin, qhawantaq sonqonkupi ima allinkuna kasqantapas (leeychis 1 Samuel 16:7). Ñoqanchispas Jehová Dios hinan predicasqanchis runakunata qhawarinanchis. Askha kutipin iñiqmasinchiskuna repararanku: predicasqanku runakunata allinpaq qhawarinku chayqa, paykunaqa aswan allintan Diospa siminta uyarikunku.

13, 14. a) ¿Imanaqtinmi Sandra manaña munaranchu Ruthta Bibliamanta yachachiyta? b) Sandra hina, ¿imatan mana ruwananchischu?

¹³ Caribeq huknin islapin Sandra sutiyoq precursora iñiqmasinchis wasin wasinta predicashaspa Ruth sutiyoq warmita tariran. Ñawpaqpin Ruthqa participaqpuni karan carnaval fiestakunapi, iskay kutipitaqmi reina nacional del carnaval nisqapaq akllasqaku. Ruthqa allinta uyarikuran Sandraq predicasqanta, chaymi Sandraqa niran: Huk p’unchay kutimusaq Bibliamanta astawan rimananchispaq, nispa. ¿Iman sucederan Ruthpa wasinman kutiqtin? Sandra willakun: “Wasinman kutispaymi cuartonpi rikurani Ruthpa hatun fotonta carnaval p’achawan p’achasqata. Rikullaranitaqmi premiokuna chaskisqantapas. Chaymi yuyaykurani: Kay warmiqa manan saqenmanchu costumbrenkunataqa, yanqañan kutimuymanpas, nispa; chaymi manaña kutiraniñachu Bibliamanta yachachiq”, nispa.

¹⁴ Pisi tiempollamantan Ruthqa Huñunakuy Wasita riran, huñunakuy tukuytataq Sandrata tapuran: “¿Imanaqtintaq manaña kutimurankichu Bibliamanta yachachiwanaykipaq?” nispa. Sandraqa disculpakuspan Ruthwan hukmanta estudiayta qallarinanpaq rimanakuran. Ruthqa pisi tiempollapin costumbrenkunata saqespa Diospa munayninman hina kawsayta qallariran. Carnaval fotonkunata wikch’uspan huñunakuykunaman riyta qallariran, tiempowantaq predicayta qallariran, chaymantataq Diosman qokuspa bautizakuran. Chaykunata rikuspan Sandraqa cuentata qokuran ñawpaqpi yuyaykusqan mana allin kasqanta.

15, 16. a) ¿Imaynatan huk iñiqmasinchis yanaparan cuñadonta? b) Wakin familianchiskuna mana allintaña kawsankuman chaypas, ¿imanaqtinmi mana sayk’uspa predicashanallanchis?

¹⁵ Chaymantapas askha iñiqmasinchiskunan mana iñiq familiankuta yanaparanku Diosta servinankupaq, manaña cambianankupaq yuyaykurankuñachu chaypas. Estados Unidos llaqtayoq Joyce iñiqmasinchismanta rimasunchis. Kay iñiqmasinchispa cuñadonmi waynacha kasqanmantapacha askha kutipi carcelman haykusqa. Kay iñiqmasinchismi nin: “Cuñadoyqa drogakunata vendeq, suwakuq karan, huk millay ruwaykunapi ima puriq, chaymi runakunapas niranku: Manan payqa hayk’aqpas cambianmanñachu, nispa. Chaywanpas ñoqaqa payman rimapayaqpuni kani Bibliamanta. Kinsa chunka qanchisniyoq watantinmi rimapayallarani”, nispa. Tiempowanmi Joycepa cuñadonqa Jehová Diospa testigonkunawan Bibliata estudiayta  qallariran, ñawpa kawsaynintapas saqepuran. Qaynallan bautizakapuran 50 watanpi kashaspa California llaqtapi distrito asambleapi. Joycemi nin: “Kusikuymanta waqarani cuñadoypa bautizakusqanta rikuspa. ¡Anchatan kusikuni cambiananpaq mana sayk’uspa rimapayasqaymanta!” nispa.

¹⁶ Mayninpiqa manapaschá munasunmanchu wakin familianchisman predicayta mana allinta kawsasqankurayku. Joycemi ichaqa mana chaywan hark’achikuranchu, aswanmi mana sayk’uspa predicashallaran cuñadonta. Sichus chhayna familianchiskunaman mana predicasunmanchu chayri, ¿imaynapitaq yachasunman imachus sonqonkupi kasqanta? Yaqapaschá chay familianchiskunaqa tukuy sonqo maskhashankuman cheqaq yupaychayta. Chhayna kaqtinqa yanapasun cheqaq yupaychayta tarinankupaq (leeychis Proverbios 3:27).

Bibliamanta allinta yachachinapaq libro

17, 18. a) ¿Imaynatan pachantinpi iñiqmasinchiskuna lliw runakunata yanapashanku ¿Imatapunin Biblia yachachin? nisqa librowan? b) Willay imaynata kay librowan runakunata yanapashanki chayta.

¹⁷ Pachantinpi iñiqmasinchiskunaq willasqan hina, ¿Imatapunin Biblia yachachin? nisqa libroqa askha runakunatan kusata yanapashan. Estados Unidosmanta Penni sutiyoq precursoran askha estudiokunata qallariran chay librowan. Iskay yachachisqan runakunan kuraqña karanku, religionninkumanpas ancha hap’ipasqa karanku, chaymi Penniqa llakikusharan imaynata chay libroq yachachisqanta chaskinankumanta. Ichaqa Penniq nisqan hina ‘chay libroqa llapan yachachikuykunatan willashan pisi rimayllapi entiendey atiyllata, chaymi chay yachachisqan kuraq runakunaqa mana sasachakuspalla entiendesqaku, chayman hinataq kawsayninkutapas allichasqaku’.

¹⁸ Gran Bretaña nacionmanta Pat sutiyoq iñiqmasinchismi Bibliamanta estudiota qoyta qallariran Asia continenteq huknin nacionmanta ayqekamuq warmiman. Manaraq llaqtanmanta ayqemushaspan chay warmiqa sinchi llakikuykunapi tarikusqa. Huk soldadokunas qosanta wawankunatawan apapusqaku, manañataq hayk’aqpas paykunata rikusqañachu. Wañuy patapis tarikusqa, wasintapas kanapusqaku, huk kutipitaq askha runakuna violasqaku. Chaykunata pasaspanmi manaña kawsayta munasqañachu, askha kutipis wañuchikuytapas yuyaykusqa. Ichaqa Bibliamanta yachasqanmi sumaq suyakuyta qoran. Patmi nin: “¿Imatapunin Biblia yachachin? nisqa libropi yachasqanmi sonqonman chayaran; chay libroqa entiendey atiyllatan chayachin”, nispa. Chay warmiqa ratullan Diospa kamachikuyninkunata hunt’aran predicayta qallarinanpaq, hamuq asambleapi bautizakunanpaqtaq willaranña ancianokunaman. ¡Anchatan kusikunchis allin sonqoyoq runakunata yanapaspa sumaq suyakuyniyoq kanankupaq!

“Amayá allinkaqta ruwaspaqa sayk’usunchu”

19. ¿Imanaqtinmi mana pisipaspa predicamunanchis?

¹⁹ Kunan tiemponchispiqa mana pisipaspan runakunaman Diospa siminta willamunanchis yachachimunanchispas.  Sapa watan waranqanpi ‘wiñay kawsaypaq sonqoyoq runakuna’ allin willakuykunata uyarikushanku. “Señor Diospa hatun p’unchayninqa qayllaykamushanñan”, chaymi Diostapas munaynintapas mana reqsiqkunaqa ‘wañuchinapaq nisqaña’ kashanku (Sofonías 1:14; Proverbios 24:11).

20. ¿Imakunata ruwananchispaqmi kallpachakunanchis?

²⁰ Ichaqa yanapasunmanraqmi chay runakunata. Chaypaqmi ñawpaq siglopi cristianokuna hina llank’amunanchis, paykunaqa mana sayk’uspan “Jesusqa Cristo kasqanmanta allin willakuykunata willashallaqkupuni” (Hechos 5:42). Chay hinaqa, ñawpaq siglopi cristianokuna hina predicashallasun sasachakuykuna kaqtinpas, kallpachakusuntaq “allin yachachiq” kanapaq, allin willakuykunatapas lliwman willamunapaq. “Chay hinaqa, amayá allinkaqta ruwaspaqa sayk’usunchu”, manachus pisi kallpayasun chayqa, Diosninchismi sumaqta qhawariwasun, tukuy imaymana allinkunatataq qowasunpas (2 Timoteo 4:2, NM; leeychis Gálatas 6:9).

[Uranpi willakuy]

¿Imanispan kutichiwaq?

• ¿Pikunan allin willakuykunata uyarikushanku?

• ¿Imanaqtinmi mana juzgananchischu predicasqanchis runakunata?

• ¿Imaynatan runakunata yanapakushan ¿Imatapunin Biblia yachachin? nisqa librowan?

[Tapuykuna]

[19 paginapi fotokuna]

Waranqanpi allin sonqoyoq runakunan allin willakuykunata uyarikushanku

[21 paginapi dibujokuna]

¿Imatan yachanchis apóstol Pablo cristianoman tukupusqanmanta?

[22 paginpi foto]

Allin willakuykunata willaqkunaqa lliw runamanmi predicanku