Aswan allin misioneroq ruwasqanta hina ruwasun
Aswan allin misioneroq ruwasqanta hina ruwasun
“Ñoqamanta yachaqakuychis, imaynan ñoqapas Cristomanta yachaqakuni hinata.” (1 CORINTIOS 11:1.)
1. ¿Imaraykun Jesús hina kananchis?
APÓSTOL Pabloqa aswan allin misioneroq ruwasqanta hinan ruwaran, chay misioneroqa Jesucriston. Chayraykun iñiqkunata kallpacharan: “Ñoqamanta yachaqakuychis, imaynan ñoqapas Cristomanta yachaqakuni hinata”, nispa (1 Corintios 11:1). Jesusmi apostolninkunata huch’uyaykukuyta yachachiran chakinkuta maqllispa, hinaspan paykunata niran: “Yachaqakunaykichispaqmi rikuchiykichis, imaynan ñoqa ruwani ahinata qankunapas ruwanaykichispaq”, nispa (Juan 13:12-15). Kunan tiempo cristianokunapas kallpachakunanchismi Jesús hina ruwananchispaq rimananchispaqpas (1 Pedro 2:21).
2. Manaña Umalliq T’aqa misionerokunata hinachu kachawasunman chaypas, ¿imayna sonqowanmi predicasunman?
2 Ñawpaq estudiopi yachasqanchis hina misioneroqa kasqa runakunaman allin willakuykunata willamunanpaq kachasqa runan. Allin willakuykuna willaymanta rimaspan apóstol Pablo askha tapuykunata tapuran (leeychis Romanos 10:11-15). Huk tapuyninmi karan: “¿Imaynatan uyarinkuman pipas paykunaman mana willashaqtinqa?”. Chaymantataq profeta Isaiaspa qelqasqanman hina niran: “¡Ima sumaqmi allin willakuykunata willaqkunaq puriyninqa!”, nispa (Isaías 52:7). Manaña misionerokunata hinachu karu llaqtakunaman kachawasunman chaypas, kallpachakusunmanmi Jesús hina tukuy sonqowan allin willakuykunata willamunanchispaq. Qayna watapi 6.957.852 cristianokuna ‘allin willakuykunata willaranku’ 236 nacionkunapi (2 Timoteo 4:5).
“Lliw imaymanaykuta saqespan qhepaykita hamuyku”
3, 4. ¿Imatan Jesús hanaq pachapi saqemuran? ¿Imatan ruwananchis qatikuqnin kananchispaq?
3 Jesús kay pachapi Diospa munayninta hunt’ananpaqmi hanaq pachapi “qhapaq-atiyninta saqespa, runa hina nacerqan kamachi runa hina kananpaq” (Filipenses 2:7). Diospa munayninta hunt’anapaq imapas saqesqanchisqa manan imapaschu Jesuspa hanaq pachapi saqesqanwan tupanachisqaqa. Chaywanpas Jesús hinan kasunman sichus mana munapayasunchu Satanaspa kamachisqan pachapi imaymana saqesqanchista chayqa (1 Juan 5:19).
4 Huk kutinmi apóstol Pedro Jesusta niran: “Ñoqaykuqa imaymanaykuta saqemuspaykun qanwan purishayku”, nispa (Mateo 19:27). Pedro, Andrés, Santiago, Juanpas challwana llikankuta saqerparispan Jesusta qatikuranku qatikuwaychis niqtin. Llank’ayninkuta saqespan Dios serviyta qallariranku. Lucas qelqapas willallantaqmi Pedroq nisqanta: “Ñoqaykuqa lliw imaymanaykuta saqespan qhepaykita hamuyku”, nispa (Lucas 18:28). Ñoqanchisqa manapaschá lliw imaymananchistachu saqeranchis Jesusta qatikunanchispaq, ichaqa ‘kikinchistan negakuranchis’ Jesuspa qatikuqnin kananchispaq, Jehová Diosta tukuy sonqo servinanchispaqpas (Mateo 16:24). Chay ruwasqanchismantan imaymana allinkunata Dios qowaranchis (leeychis Mateo 19:29). Sichus Cristo hina tukuy sonqo allin willakuykunata willasunchis chayqa kusisqan kawsasunchis. Kusikuyninchisqa aswanraqmi kanqa sichus pisillatapas runakunata yanapasunchis Diosta Churintawan reqsinankupaq chayqa.
5. ¿Imatan huk nacionkunaman riq runakuna ruwanku Bibliamanta yachaspanku? Huk ejemplota willay.
5 Brasil llaqtayoq Valmir runan Surinam nacionpi qori maskhaypi llank’aran, payqa machaq runan karan, qhelli huchapitaq puriranpas. Huk kutinmi Jehová Diospa testigonkuna payta predicaranku. Hinaspan huk iñiqmasinchiswan Biblia estudiayta qallariran, sapa p’unchaymi estudiaranku, ñawpa kawsayninta saqepuspataq pisi tiempollamanta bautizakapuran. Ichaqa llank’ayninmi sasachasharan Bibliapi yachasqanman hina kawsananpaq, chaymi llank’ananta saqepuspa Brasilman kutipuran familianta Bibliamanta yachachimunanpaq. Askha runakunan qhapaq nacionkunata llank’aq rinku, paykunamanta wakinmi Bibliamanta estudiota chaskispanku Jehová Diospa testigon kapunku. Chay testigokunamanta wakinmi llank’anankuta saqespa llaqtankuman kutipunku familiankuta huk runakunatapas Bibliamanta yachachimunankupaq. Chayta ruwaspankun paykunaqa tukuy sonqo allin willakuykunata willashanku.
6. Sichus mana atinchischu wak llaqtakunaman predicaq riyta chayqa, ¿imatan ruwasunman?
6 Askha testigokunan huk llaqtakunaman astakunku predicaypi yanapakunankupaq, wakintaq wak nacionkunamanraq rinku predicaq. Manaña ñoqanchis chay ruwayta atisunmanchu chaypas, kallpachakusunmanmi Jesús hina tukuy sonqo allin willakuykunata willamunanchispaq.
Jehová Diosmi preparawanchis
7. ¿Ima cursokunan preparawasunman Reinomanta allin willakuykunata willananchispaq?
7 Imaynan Jehová Diosqa Jesusta allinta prepararan, chay hinallatataqmi ñoqanchistapas preparawanchis. Jesusmi niran: “Profetakunaq qelqasqanpin nin: ‘Llapallanmi Diospa yachachisqan kanqaku’”, nispa (Juan 6:45; Isaías 54:13). Kunan tiempopiqa askha cursokunan kan Reinomanta willaqkunata preparanapaq. Llapanchistan yanapawanchis Bibliamanta Allin Yachachiq Kanapaq Escuela nisqa cursoqa. Precursorkunapaqpas kanmi Escuela del Servicio de Precursor nisqa curso, unayña precursor llank’aypi tarikuqkunaqa iskay kutitañan chay cursoman rinku. Ancianokunapaq siervo ministerialkunapaqpas kanmi Escuela del Ministerio del Reino nisqa curso, chaypin allinta preparakamunku wayqe panakunata yachachinankupaq qhawarinankupaqpas. Sichus soltero kanku chayqa, rinkumanmi Escuela de Entrenamiento Ministerial nisqa cursomanpas, chaypin paykunata allinta preparanku wayqe panakunata predicayninkupi yanapanankupaq. Chaymantapas askha wayqe panakunan Escuela Bíblica de Galaad de la Watchtower nisqa cursoman rinku misionero kanankupaq.
8. ¿Imakunatan wakin iñiqmasinchikuna saqeranku Jehová Diospa preparasqan kanankupaq?
8 Askha iñiqmasinchiskunan anchata kallpachakuranku chay cursokunaman rinankupaq. Ejemplopaq, Yugu sutiyoq iñiqmasinchismanmi llank’ananpi mana permisota qorankuchu Canadá nacionpi Escuela de Entrenamiento Ministerial cursoman rinanpaq, chaymi llank’ananta saqepuran. Paymi nin: “Manan ñakapakunichu llank’anayta saqesqaymantaqa, sichus permisota qowankuman karan chayqa, chay tumpallan unaypaq chay llank’anapi qhepachiwankuman karan. Kunanqa manan imapas hark’awanchu Jehová Dios may kachawasqanmanpas rinaypaq”, nispa. Qhawasqanchispas hina, askha iñiqmasinchiskunan imaymanankuta saqeranku Diospa preparasqan kanankupaq (Lucas 5:28).
9. Bibliaq yachachiyninqa yanapanmanmi runakunata anchata kallpachakuqtinkuqa, ¿imaynatan Sauloq ejemplon chayta rikuchin?
9 Bibliaq yachachiyninqa yanapanmanmi runakunata anchata kallpachakuqtinkuqa (2 Timoteo 3:16, 17). Saulomanta rimasunchis, kay wawaqa Guatemala nacionmantan, paymi yuyayninpi mana normalchu naceran, chayraykun sasachakuran imatapas yachananpaq. Sauloq profesoranmi mamanta niran: Ama wawaykita mat’ipayankichu leeyta yachananpaq, chayta ruwanki chayqa astawanmi mana leeyta atinqachu, nispa. Chayraykun Sauloqa escuelanta saqepuran manaraq leeyta yachashaspa. Ichaqa, huk iñiqmasinchismi yachachiran leeyta Kallpachakuy leenaykipaq qelqanaykipaq nisqa folletowan. Tiempowanmi Sauloqa allinta yacharuran leeyta, chaymi Bibliamanta Allin Yachachiq Kanapaq Escuelapipas discurso qoyta qallariran. Huk p’unchaymi Sauloq mamitan wasin wasinta predicashaspa chay profesoranwan tuparuran. Chaymi profesoranman willaran: Sauloqa ñan leeyta yachanña nispa, profesorataq niran: Huk kaq semanata Saulowan wasiyta hamunkichis, nispa. Profesoraq wasinta kutiqtinkun profesoraqa Saulota tapuran: “¿Imatan yachachiwanki?” nispa. Hinan Sauloqa ¿Imatapunin Biblia yachachin? nisqa libromanta huk parrafota leeran, chaymi profesoraqa ancha kusisqa niran: “¡Manapunin creeymanchu, ñoqa yachachinaymantaqa qanmi kunan yachachiwashanki!” nispa. Profesoraqa kusikuymanta waqaspan Saulota marq’aykuran.
Bibliaq yachachiyninqa runakunatan yanapan cambianankupaq
10. ¿Ima libron allinta yanapawanchis Bibliamanta yachachinapaq?
10 Jesusqa runakunatan yachachiran Taytanpa yachachisqanman hina, Diospa Simin Qelqakunaq nisqanman hinapiwan (Lucas 4:16-21; Juan 8:28). Jesús hina ruwananchispaqqa paypa nisqantan kasunanchis Bibliaq nisqanman hinataq yachachinanchispas. Chhaynapin llapanchis kaqllata yachachisunchis huk yuyaynillayoqtaq kasunchispas, chaymi yanapawasun huk nisqalla kawsananchispaq (1 Corintios 1:10). ‘Allin yuyayniyoq hunt’aq kamachiqa’ Bibliamanta qelqakunata ruwamun teqsimuyuntinpi kaqllata yachachinanchispaq predicay llank’ayninchistapas hunt’ananchispaq. ¡Ancha agradecesqan kashanchis chaymanta! (Mateo 24:45; 28:19, 20.) Chay qelqakunamanta hukninmi ¿Imatapunin Biblia yachachin? nisqa libro, kay libroqa 179 rimaykunapiña kashan.
11. ¿Imaynatan iñiqmasinchis Lula huk hark’akuq warmiq yuyaykusqanta cambiaran ¿Imatapunin Biblia yachachin? nisqa librowan?
11 ¿Imatapunin Biblia yachachin? nisqa librowan Biblia estudiayqa, contranchispi churakuq runakunatapas cambianmanmi. Etiopía nacionmanta Lula sutiyoq precursora iñiqmasinchismi Bibliamanta estudiota qosharan, hinaspan estudianteq familiarnin phiñasqallaña estudiasqankuman haykuspa niran: ¡Ñoqaykuqa manan chaykunamanta yachanaykuchu! nispa. Chaymi Lulaqa munayllata warmita rimapayaran pantasqa religión falsificasqa qolqewan imayna tupasqanmanta, chay rikch’anachiymi tarikun ¿Imatapunin Biblia yachachin? nisqa libropi 15 capitulopi. Hinan warmiq sonqon tiyaykuran hinaspa ripuran. Huk semanamanta Lula kutiqtinmi chay warmiqa chaypi kashasqa, hinaspa Lulata valekuran estudiota qonanpaq, qolqetaraqmi pagaytapas munaran yachachinanpaq. Pisi tiempollapin chay warmiqa semanapi kinsa kutitaraq estudiasharan, Bibliapi yachasqanman hinataq kawsaytapas qallariran.
12. ¿Imaynapin yachanchis wayna sipaskunapas Bibliamanta yachachiy atisqankuta? Huk ejemplota willay.
12 Wayna sipaskunapas yanapankumanmi runakunata ¿Imatapunin Biblia yachachin? nisqa librowan. Hawai llaqtapin 11 watayoq Keanu sutiyoq waynacha escuelanpi leesharan chay librota, hinaspan huk yachaqmasin tapuran: “¿Imanaqtinmi mana ñoqayku hinachu fiestakunata ruwanki?” nispa. Keanuqa chay libromanta huk yachachikuykuna (apéndice) nisqa t’aqapin qhawachiran “¿Ruwanachu fiestakunata?” nisqa yachachikuyta. Chaymantataq libroq capitulonkunamanta listata qhawachispa tapuran: ¿Mayqenmantan yachayta munawaq? nispa. Chhaynapin estudio qoyta qallariran. Qayna watan Jehová Diospa testigonkunaqa 6.561.426 estudiokunata qoranku, askhan yachachiranku ¿imatapunin Biblia yachachin? nisqa librowan. Qanpas ¿chay librowanchu estudiokunata qoshanki?
13. ¿Imaynatan runakunata yanapanman Bibliamanta yachasqanku?
13 Diospaq hina kawsay munaq runakunataqa anchatapunin yanapanman ¿Imatapunin Biblia yachachin? nisqa librowan Biblia estudiayqa. Noruega nacionpi warmi qhari precursor especial iñiqmasinchiskunan estudiota qoranku Zambia llaqtayoq warmi qharita kinsantin wawakunantinta. Kay casado warmi qhariqa manañan munarankuñachu aswan wawayoq kayta, chaymi warmin onqoq karuqtin abortananpaq rimanakuranku. Ichaqa manaraq abortachishaspa “Dios hina kawsayta qhawariy” nisqa capitulota estudiaranku. Chaypin rikuranku mamanpa wiksanpi huk wawachaq fotonta, chay rikusqankun sonqonkuta nanachiran hinaspa manaña wawankuta abortayta munarankuñachu. Iskayninkun Diospa munayninman hina kawsayta qallariranku, wawachanku naceqtintaq estudio qoq iñiqmasinchispa sutinwan suticharanku.
14. ¿Imaynatan runakuna qhawariwanchis yachachisqanchisman hina kawsaqtinchis? Huk ejemplota willay.
14 Jesusqa yachachisqanman hinan kawsaran. Jehová Diospa testigonkunaqa Jesusta qatikusqanchisraykun sumaqta kawsanchis, chaytan runakunapas reparanku. Ejemplopaq, Nueva Zelanda nacionpin huk negocioyoq runaq maletinninta suwarusqaku carronpa punkunta kicharuspa. Chay runaqa puestoman rispan denunciata churaran suwasqankumanta, chaypitaq huk guardia payta niran: “Jehová Diospa testigon tarillaqtinmi maletinniykitaqa kutichipusunkiman”, nispa. Periodicota wasin wasinta rakiq iñiqmasinchismi chay maletinta tarikuran. Chayta yacharuspanmi chay runaqa iñiqmasinchispa wasinta riran, anchatataq kusikuran huk importante documenton mana chinkasqanmanta. Hinan iñiqmasinchisqa niran: “Ñoqaqa kutichipunaypunin karan, Jehová Diospa testigon kasqayrayku”, nispa. Chay runaqa manan creeytapas atiranchu, payqa yuyarisqan chay tutamanta guardiaq nisqanta. Qhawarisqanchispas hina, Jesuspa cheqaq qatikuqninkunaqa paypa kawsasqanta hinan kawsashanku Diospa kamachikuyninkunata kasuspa (Hebreos 13:18).
Jesús hina runakunata qhawarisun
15, 16. ¿Imaynatan runakunata yanapasunman allin willakuykuna willasqanchista uyarinankupaq?
15 Jesuspa imayna kasqanta qhawarispan askha runakuna paypa yachachisqanta uyariranku. Jesusqa munakuqmi huch’uyyaykukuqmi karan, chaymi llamp’u sonqo runakunaqa payta qatikuranku. Payqa khuyapayakuqmi karan, chaymi llakisqa runakunata kallpacharan sumaqta rimapayaspa, askha runatataq qhaliyachiranpas (leeychis Marcos 2:1-5). Ñoqanchisqa manan milagrokunata ruwasunmanchu, ichaqa atisunmanmi munakuq kayta, huch’uyyakukuq kayta, khuyapayakuq kaytapas, chhayna kaqtinchisqa runakunan uyariwasun allin willakuykuna willasqanchista.
16 Kiribati islapi Tariua sutiyoq precursora especialmi Beere sutiyoq kurak runata predicaran. Qallariypin kay runaqa mana uyariyta munaranchu iñiqmasinchispa predicasqanta. Iñiqmasinchismi ichaqa repararan chay runa chhikan such’u kasqanta, hinan khuyapayaspa runata tapuran: “¿Uyarirankichu kurakkunapaq onqosqakunapaqpas Diospa promesanta?” nispa. Chaymantataq Isaías qelqamanta huk textota leeran (leeychis Isaías 35:5, 6). Runataq ancha kusisqa niran: “Askha watañan Bibliata leeshani, religionniymanta misionerokunapas visitamuwashankun, ichaqa manan hayk’aqpas kay textota leeranichu”, nispa. Chay runaqa Biblia estudiaytan qallariran, chaypi yachasqanman hinataq kawsaytapas qallariran, tiempowantaq bautizakapuran. Ñawpaqpiña sinchi onqosqa kasharan chaypas, kunanqa Beereqa tiyasqanmanta karupi kaq grupotan yanapashan, chaymantapas islantintan chakillapi purin allin willakuykunata willaspa.
Cristoq ruwasqanta hina ruwashallasun
17, 18. a) ¿Imatan ruwananchis allin predicaq kananchispaq? b) ¿Imakunatan chaskinqaku tukuy sonqowan Diospa siminta willaqkuna?
17 Sichus Jesús hina kasun munakuq, huch’uyyaykukuq, khuyapayakuq ima chayqa, allintan willasun allin willakuykunata, chaytan sapa kutilla rikukun iñiqmasinchiskunaq predicasqanpi. Chay hinaqa, allin Yachachiqninchis Jesusta qatikusun, tukuy sonqowantaq predicasun.
18 Ñawpaq siglopin wakin runakuna Jesuspa qatikuqnin kapuranku, chaymi Pedroqa Jesusta tapuran: “¿Imataq ñoqaykupaqri kanqa?” nispa. Hinan Jesusqa kutichiran: “Pipas wasintapas, wawqenkunatapas, panankunatapas, taytantapas, mamantapas, wawankunatapas, chakrankunatapas ñoqarayku saqemuqmanqa Diosmi pachak kutitawanraq qopunqa, hinallataq wiñay kawsaytapas qonqa”, nispa (Mateo 19:27-29). Chaytapunin ñoqanchispas chaskisunchis aswan allin misionero Jesusta qatikushallasun chayqa.
¿Imanispan kutichiwaq?
• ¿Imaynatan Jehová Dios preparawanchis allin willakuykunata willananchispaq?
• ¿Imaynatan ¿Imatapunin Biblia yachachin? nisqa libro allinta yanapawanchis allin willakuykuna willaypi?
• ¿Imayna runan kananchis Jesús hina runakunata qhawarinanchispaq?
[Tapuykuna]
[24 paginapi dibujo]
Pedrota, Andresta, Santiagota, Juantawan Jesús qatikuwaychis niqtinmi paykunaqa mana iskayaspa Jesusta qatikuranku
[26 paginapi foto]
¿Imatapunin Biblia yachachin? nisqa libron yanapawanchis pachantinpi kaqllata yachachinanchispaq