¿Iman Diospa Reinon?

¿IMAMANTAN wiraqocha Jesús predicaran? Diospa Reinonmantan, chaymantan runakunaman yachachiran (Lucas 4:43). Runakunawan rimasqanpin Reinomanta rimaqpuni. ¿Musphariranchu runakuna chayta uyarispa? ¿Tapurankuchu chay Reinomanta? Manan. Evangelio qelqakunaqa manan chaymanta willanchu. Chhaynaqa, ¿yacharankuñachu chay runakuna Diospa Reinonmanta?

Judiokunaq respetasqan ñawpa Qelqakunapiqa willaranñan chay Reinomanta. Chay Qelqakunaqa sut’intan willaran ima kasqanta imakuna ruwanantapas. Kunanpas astawanmi chay Reinomanta yachasunman paykuna hina Bibliata t’aqwispa. Bibliapi kaq qanchis sut’inchaykunamanta yachasun. Jesuspa tiemponpi judiokuna paykunamanta ñawpaq tiempopi judiokunapas yacharankuñan ñawpaq kinsa sut’inchaykunata. Kinsa sut’inchaykunatataq Cristo apostolninkunapiwan rikuchiranku. Qanchiskaqtaq sut’inchakun kay tiempopi.

1. Diospa Reinonqa cheqaqmi kamachikuyninpas wiñaypaqmi kanqa. Bibliapi ñawpaqkaq profecian willaran Dios, kasukuq runakunapaq huk qespichiqta kachamunanmanta. Chay qespichiqtan sutichakuran ‘miray’ nispa, willarantaqmi Satanaspa, Adanpa, Evapa mana kasukusqankumanta millay kawsay paqarimusqanta ch’usaqyachinanta (Génesis 3:15). Askha watakuna qhepamantaq Jehová Dios hunt’aq kamachikuq Davidman kusikunapaq willakuyta willachiran: chay ‘miray’ otaq Mesías Reinopi kamachikuq kananta, chay kamachikuy hukkunamantaqa wiñaypaq kanantawan (2 Samuel 7:12-14).

2. Kay pachapi kamachikuqkunatan Diospa Reinon chinkachinqa. Profeta Danielmi huk rikhuriypi rikuran kay pachapi hatun kamachikuqkunata chay tiempokunamanta kay tiempokama qayllallamanta rikhurimuqta. Willarantaqmi chay rikhuriypi rikusqan khaynapi tukukunanta: “Chay [qhepakaq] reykuna kamachikushaqtinmi, Hanaq Pacha Diosqa mana hayk’aq thunikuq suyuta sayarichinqa, manataqmi wak suyuqa chayta kamachinqachu, aswanpas llapa suyukunatan ñut’uspa tukunqa, wiñaypaqtaq kanqapas”. Arí, kay pachapi llapa kamachikuqkunan —hatun maqanakuykuna, millay ruwaykuna, mana chanin ruwaykunapas— wiñaypaq ch’usaqyachisqa kanqa. Chay profeciapi nisqan hina Diospa Reinonqa hanaq pachapin kashan as pisi tiempomantataq kay Hallp’ata kamachimunqa (Daniel 2:44, 45). Chayqa cheqaq kamachikuymi hinaspapas sapallanmi wiñaypaq kamachikunqa.

3. Diospa Reinonmi chinkachinqa hatun maqanakuykunata, onqoyta, yarqayta, wañuytapas. Bibliapi profeciakunan willan Diospa Reinon kay Hallp’apaq sumaqkuna apamunanmanta. Kay pachapi kamachikuqkunaq mana ruway atisqantan chay Reino ruwanqa. Kaypi yuyaykuy: ¡maqanakunapaq llapa armakunan ñut’usqa kanqa! Biblia nin: “[Diosmi] teqsimuyuntinpi awqa-tinkuykunata qolluchin”, nispa (Salmo 46:9). Onqoykuna manaña kapusqanraykun manaña necesitasunchu medicokunata hospitalkunatapas. “Manan mayqellanpas: ‘Onqosqan kani’, ninqachu.” (Isaías 33:24.) Manañan pipas yarqaymanta onqonqachu nitaq yarqaymanta wañunqachu. ‘Suyupin askhallaña trigo kanqa.’ (Salmo 72:16.) Manañan kanqachu wañusqakunata p’anpay, wañupuqkuna velay, panteonkuna, morgue nisqakunapas nitaqmi llakikuypas kanqachu. Chhaynapin wañuyqa hukpaqkama chinkapunqa. Kamaqninchisqa “wiñaypaqmi wañuytapas chinkachinqa, llapaq ñawinmantan waqaytapas ch’akichinqa” (Isaías 25:8).

4. Reinopi Kamachikuqtaqa Dios kikinmi akllan. Mesiasqa manan pay kikinchu akllakuran nitaqmi kay pachapi huchasapa runakunachu. Aswanpas Jehová Dios kikinmi akllaran. Chaytan rikuchin Mesías, Cristo titulokuna, chay titulokunaqa “hawisqa” (akllasqa) ninanmi. Arí, Jehová Diosmi Jesustaqa hawiran otaq akllaran Reinonpi kamachikuq kananpaq. Pay kikinpunin khaynata niran: “Kayqa kamachiymi, ñoqan payta kallpachani, paymi akllakusqay, paymi kusichiwan. Paytan Espirituywan hunt’aykuni, hatun suyukunamanmi chanin-kayta willanqa”, nispa (Isaías 42:1; Mateo 12:17, 18). Jehová Diosllan yachan imayna kamachikuq necesitasqanchista.

5. Diospa Reinonpi Kamachikuqqa rikuchinñan kamachikunanpaq hina  kasqanta. Arí, Nazaret llaqtayoq Jesusmi prometesqa Mesías karan. Jehová Diospa akllasqan miraymantan hamuran (Génesis 22:18; 1 Crónicas 17:11; Mateo 1:1). Pachaq-pachaq watakuna ñawpaqpi profeciakunan paypi hunt’akuran kay Hallp’api kashaqtin. Hinaspapas hanaq pachamantapachan reqsichiranku pay Mesías kasqanta. ¿Imaynata? Dios kikinmi hanaq pachamanta rimamuran, reqsikurantaq Churinpuni kasqanta, angelkunataqmi willaranku prometesqa Mesías kasqanta. Jesuspunin milagrokunata ruwasqanpi rikuchiran paypi Diospa atiynin kasqanta, chaytan askha kutipi ruwaran waranqanpi runakuna rikushaqtin. * Jesucristoqa sapa kutinmi rikuchiran imayna kamachikuq kananta. Payqa manan hawa sonqollachu runakunata atiyninwan yanaparan aswanpas tukuy sonqowanmi yanapaq (Mateo 8:1-3). Payqa qoykukuq, khuyapayakuq, mana manchakuq, k’umuykukuqmi karan. Llapallanchismi Bibliapi yachasunman kay Hallp’api tukuy ima ruwasqanmanta.

6. Diospa Reinonpiqa pachak tawa chunka tawayoq waranqa akllasqa runakunan Cristowan kuska kamachikamunqaku. Jesusmi willaran apostolninkunawan huk runakunawan ima hanaq pachamanta kamachikamunankuta. Paykunatan suticharan “pisi t’aqa oveja” nispa (Lucas 12:32). Qhepamantaq apóstol Juanman Dios willachiran chay pisi t’aqa, pachak tawa chunka tawayoq waranqa kamachinkuna kasqanta. Paykunan huk sumaq llank’anata chaskinqaku: Cristowan kuskan reykuna hina kamachikamunqaku sacerdotekuna hinataq llank’anqaku (Apocalipsis 5:9, 10; 14:1, 3).

7. Diospa Reinonqa hanaq pachapin kamachikushanña, kay pachatapas ñan kamachikamunqaña. Chay qanchiskaq sut’inchayqa muspharinapaqmi. Bibliapiqa askha pruebakunan kan Jesús hanaq pachapi kamachikunanpaq atiy chaskisqanmanta. Kunanqa chaypin kamachikushanña as pisi tiempomantataq teqsimuyuntinta kamachimunqa, ñawpaqpi qhawarisqanchis sumaq profeciakunatataq hunt’anqa.

Qanri, ¿munawaqchu Diospa Reinonpi saminchaykuna chaskikuyta?

Jesusqa mana hayk’aq suyakusqanku sumaq suyakuymantan predicaran. Jehová Diosqa munaynin hunt’ananpaqmi Adanpa huchallikusqanmantapacha prometeran huk kamachikuq kachamunanta. ¿Imatan Dios munan? Payqa munan kay Hallp’a paraisoman tukunantan, kasukuq runakuna chaypi wiñaypaq tiyanankutawan. ¿Manachu kusikunki chay ñawpa tiempomantaraq prometesqa kamachikuq hanaq pachapi kamachikushasqantaña yachaspa? Arí, Diospa Reinonqa manan rimayllachu nitaqmi sinchi karupichu kashan, chay Reinoqa cheqaqpunin.

Diospa churasqan Kamachikuqqa kunanpunin awqankunaq chawpinpi kamachikushan (Salmo 110:2, NM). Diosmanta karunchakuq millay runakuna ukhupiña kashanchis chaypas, Taytanpa munayninta hunt’aspan Mesiasqa Diosta reqsispa ‘espiritupi cheqaq-kaypiwan’ yupaychay munaqkunata maskhashan (Juan 4:24). Diosmi llapa ayllumanta runakunaman, huch’uyman hatunman, qhapaqman wakchaman munachin Reinonpi wiñay tiyanankupaq (Hechos 10:34, 35). Qanpas, kunanmantapacha kallpachakuy chay sumaq kawsayman aypanaykipaq. Arí, Diospa Reinonmanta astawan yachay, chayta ruwaspaykin wiñaypaq kamachikuynin ukhupi tiyanki (1 Juan 2:17).

[Uranpi willakuy]