Jesucriston lliwmanta aswan allin misionero

“Ñoqaqa payta reqsinin paymanta hamusqayrayku, paytaqmi kachamuwanpas.” (JUAN 7:29.)

1, 2. ¿Pitan nikun misionero nispa? ¿Pitaq aswan allin misionerori?

MISIONERO simita uyarispa, ¿imapin yuyaykunki? Wakin runakunaqa yuyaykunku cristianon kayku niq religionkunaq misioneronkunapin, paykunamanta askhan mich’ukunku servisqanku llaqtapi kamachikuqkunawan, hinallataq llaqtaq ruwayninkunamanpas. Jehová Diospa testigonkunan ichaqa misionero simita uyarispa yuyaykunchis Umalliq T’aqa (Jehová Diospa testigonkunata pusariqkuna) lliw llaqtakunaman allin willakuykuna willamunankupaq kachasqan misionerokunapi (Mateo 24:14). Kay cristianokunaqa tiempota hap’ispan tukuy sonqowan runakunata yachachinku Jehová Diosta reqsinankupaq payman achhuykunankupaqpas (Santiago 4:8).

² Misionero nisqa simiqa manan rikhurinchu Diospa Simin Qelqapiqa. Ichaqa Bibliaq qelqakusqan griego rimaypi “allin willakuykuna willaq” nisqa simiqa t’ikrakullanmantaqmi “misionero” nispa. Jehová Dios allin willakuykuna willaqkunamanta aswan hatun willaqña chaypas, payqa manan misionero nisqachu kanman, ¿imarayku? Misioneroqa kamachita hunt’ananpaq kachasqa runan; Jehová Diostaqa manan pipas kacharanchu kamachita hunt’ananpaqqa. Jesusmi ichaqa niran: “Ñoqaqa payta reqsinin paymanta hamusqayrayku, paytaqmi kachamuwanpas”, nispa (Juan 7:29). Runakunata anchata munakuspan Jehová Diosqa sapan Churinta kay pachaman kachamuran (Juan 3:16). Chaymantapas Jehová Diosqa Jesusta kay pachaman kachamuran ‘cheqaq kayta willananpaq’ (Juan 18:37). Chayraykun nisunman: Jesusqa lliw misioneromantapas aswan allin misioneron, nispa. Diospa Reinonmanta allin willakuykuna willasqanqa askha runakunatan yanaparan; ñoqanchistapas yanapawashanchismi. Ejemplopaq, misioneroña kanchis otaq manaña chaypas, Jesuspa imayna yachachisqanta hinan ñoqanchispas yachachillasunmantaq.

3. ¿Ima tapuykunatan kay estudiopi kutichisunchis?

³ Jesuspa allin willakuykuna willasqanmantan kay tapuykuna kan: ¿Imakunamanmi kay pachaman hamuspa yachakunan karan Diospa munayninta hunt’ananpaq? ¿Imanaqtinmi Jesuspa yachachiynin allinpuni karan? ¿Imanaqtinmi askha runakuna Jesuspa yachachisqanta uyarikuranku?

Jesusqa tukuy sonqon kay pachaman hamuran Diospa munaynin hunt’aq

4-6. ¿Imakunamanmi Jesús yachakunan karan kay pachapi kashaspa?

⁴ Kunan tiempopi askha misionerokuna, predicaypi yanapanankupaq wak llaqtakunaman astakuq cristianokunapas, imaymana kaqninkuta saqespan pisi kaqllawan kawsayta yachanku predicasqanku llaqtakunapi. Ichaqa chay ruwasqankuqa manan imapaschu Jesuspa hanaq pachapi imaymana saqesqanwan tupanachisqaqa. Hanaq  pachapiqa Taytanpa ladonpi kawsaran tukuy sonqowan Taytanta serviq angelkunawan kuska (Job 38:7). Kay pachapi kawsasqanmi ichaqa hukniraypuni karan hanaq pachapi kawsasqanmantaqa: kay pachapiqa huchasapa runakunawanmi kawsaran (Marcos 7:20-23.) Chaymantapas aguantaranmi ancha munasqan qatikuqninkuna paykuna pura phiñachinakusqankutapas (Lucas 20:46; 22:24). Chaywanpas Jesusqa allintan tukuy imatapas ruwaran.

⁵ Hanaq pachapi kashaspan Jesusqa angelkunata kamachiran, ichaqa kay pachapi runa hina naceqtinmi huk wawakuna hina pisi pisimanta rimayta yachanan karan. Chaymantapas kay pachapi kashaspan Jesusqa ‘runakunaq rimayninta’ rimaran, chayqa hukniraypunin karan ‘angelkunaq rimayninmantaqa’ (1 Corintios 13:1). Chhaynaña kaqtinpas, manan mayqen runapas pay hinaqa sumaqta rimaranchu (Lucas 4:22).

⁶ ¿Imakunamanraqmi Diospa Churin yachakunan karan kay pachapi kashaspa? Jesusqa manaña huchayoqchu karan chaypas, hanaq pachapaq akllasqa “wawqenkuna” hina runa karan (leeychis Hebreos 2:17, 18). Ñawpaqpiña payqa angelkunata kamachiran Arcangel Miguel kashaspa chaypas, hap’isqanku tutaqa Jesusqa manan Taytanmanta mañakuranchu “waranqa-waranqa angelkunata” yanapaqnin kachamunanpaq (Mateo 26:53; Judas 9). Hinaspapas, Jesús kay pachapi kashaspa milagrokuna ruwasqanmantaqa aswan askhataraqmi ruwanman karan hanaq pachapi kashaspaqa.

7. ¿Hunt’arankuchu judiokuna Kamachikuy Simita?

⁷ Jesusqa hanaq pachapi ‘Simi’ nisqan karan, paymi kanman karan Israel runakunata ch’inneq pampanta pusaq Jehová Diospa kachamusqan ángel (Juan 1:1; Éxodo 23:20-23). Israel runakunaqa ‘Diospa angelninkunawanmi kamachikuy simita chaskiranku, ichaqa manan chayta kasurankuchu’ (Hechos 7:53; Hebreos 2:2, 3). Ñawpaq siglopi judío religionpi umalliqkunaqa manan allintachu yachachiranku Kamachikuy Simita. Ejemplopaq, mana allintan yachachiranku samana p’unchaymanta (leeychis Marcos 3:4-6). Kamachikuy simita yachachiqkunapas fariseokunapas ‘Diospa kamachikuy siminmanta aswan chaniyoq kaqtan qonqapuranku: Chanin-kayta, khuyapayakuyta, hunt’aq-kaytawan’ (Mateo 23:23). Chaywanpas Jesusqa manan pisiparanchu, aswanpas willashallaranmi Diospa siminta.

8. ¿Imaraykun Jesús ñoqanchista yanapawasunman?

⁸ Jesusqa runakunata munakuspan paykunata yanaparan, tukuy sonqowantaq allin willakuykunatapas willaran. Kay pachapi Jehová Diospaq hunt’aq kasqanraykun “payqa lliw kasukuqninkunapaq wiñaypaq qespichiqninku kapurqan”. Chaymantapas “pay kikinmi ñak’arirqan wateqasqa [otaq probasqa] kaspa, chayraykun payqa wateqasqakunatapas yanapayta atin” (Hebreos 2:18; 5:8, 9).

Jesusqa allin preparasqa yachachiqmi karan

9, 10. ¿Imaynatan Jehová Dios Jesusta prepararan kay pachaman hamunanpaq?

⁹ Umalliq T’aqa allintan misionerokunata preparan huk nacionkunaman predicaq kachananpaq. Jesuspas allin preparasqan karan manaraq santo espirituwan Mesías kananpaq hawisqa kashaspaqa. Ichaqa manan kamachikuy simita yachachiqkunaq escuelanpichu preparakuran, nitaq judío religionmanta allin reqsisqa umalliqchu paytaqa prepararan (Juan 7:15; tupanachiy Hechos 22:3 textowan). Chhaynaqa, ¿pitaq payta prepararan?

¹⁰ Mamitan María taytan Josepas yachachirankuña chaypas, Tukuy yachayniyoq Jehová Diosmi Jesustaqa prepararan. Chayraykun Jesús niran: “Manan ñoqaqa kikillaymantachu rimani, aswanpas kachamuwaqniy Yayan kamachiwarqan imaynatachus rimanayta imatachus ninaytapas”, nispa (Juan 12:49). Qhawasqanchispas hina, Diosmi Jesustaqa yachachiran imatachus yachachinanta. Manaraq Jesús kay pachaman hamushaqtinqa, unaytachá Jehová Diosqa payta yachachiran. ¡Manan pipas Jehová Diosmanta aswan allin yachachiqqa kanmanchu!

11. ¿Maytukuytan Jesús Taytanman rikch’akuran runakuna munakuypi?

¹¹ Kamasqa kasqanmantapachan Jesusqa hanaq pachapi sumaqta Jehová Dioswan kawsaran. Rikurantaq Taytan may tukuyta runakunata munakusqanta. Chaymi Jesuspas Taytan hina runakunata munakuran. Jesustaqa sutichakullantaqmi yachay nisqa simiwan, ñawpaqpin payqa nisqa:  “Runa miraymi kusichiwarqan”, nispa (Proverbios 8:22, 31).

12, 13. a) Israel runakunata Jehová Dios imayna tratasqanta qhawarispa, ¿imatan Jesús yacharan? b) Taytanpa yachachisqan hina, ¿imatan Jesús ruwaran?

¹² Jesusqa rikuranmi Jehová Dios mana kasukuqkunata imayna tratasqanta, chhaynapin yacharan Jehová Dios hina tratayta. Ejemplopaq, rimasunchis mana kasukuq k’ullu Israel runakunamanta. Nehemías 9:28 texton nin: “Pisi tiempollaraq thak-kaypi kawsaspankun wakmanta qan contra mana chaninta ruwarqanku. Hinan awqankuq makinman saqepurqanki, paykunata munaychakunankupaq. Wakmanta qanman waqyakamuqtinkutaq, anchata khuyakuspa hanaq pachamanta uyarimurqanki, askha kutitan qespichirqanki”, nispa. Jesusqa Taytanwan kuskataq hanaq pachapi llank’aran chayqa, rikuranmi runakunata imayna tratasqanta, chaymi paypas Taytan hina khuyapayaran runakunata (Juan 5:19).

¹³ Jesusqa Taytanpa yachachisqanman hinan khuyapayaran qatikuqninkunata. Wañuchinankupaq hap’isqanku tutan munakusqan apostolninkuna “sapallanta Jesusta saqerparispa ayqerqanku” (Mateo 26:56; Juan 13:1). ¡Apóstol Pedropas kinsa kutitaraqmi Jesusta negaran! Chaywanpas Jesusqa manan paykunapaq phiñakuranchu. Aswanpas Pedrota niran: “Ñoqan qanpaq mañakuniña iñiyniyki mana pisiyananpaq. Ñoqaman kutirikampuspaykitaqmi wawqeykikunata kallpachanki”, nispa (Lucas 22:32). Diospa cheqaq Israel llaqtanqa hunt’aq ‘apostolkunawanmi’ qallariran. Hinaspapas Mosoq Jerusalén llaqtaq muyuriq perqanqa chunka iskayniyoq rumi teqsiyoqmi kashan, chaykunapin Corderoq apostolninkunaq sutin qelqasqa kashan. Kunan tiempopiqa hanaq pachapaq akllasqa cristianokunan ‘wak ovejakunawan’ kuska huk nisqalla llank’ashanku Reinomanta allin willakuykunata willaspa; tukuy atiyniyoq Diostaq Churin Jesucristopiwan paykunata yanapashanku (Efesios 2:20; Juan 10:16; Apocalipsis 21:14).

¿Imaynatan Jesús yachachiran?

14, 15. ¿Imakunapin Jesuspa yachachiynin hukniraypuni karan fariseokunaq kamachikuy simi yachachiqkunaq yachachiyninmanta?

¹⁴ Jesusqa Taytanpa yachachisqanman hinan runakunata yachachiran. Jesuspa yachachiyninta judío religionpi umalliqkunaq yachachiyninwan tupanachispaqa, sut’itan rikukun Jesuspa yachachiynin aswan allin kasqanta. Kamachikuy simita yachachiqkuna fariseokunapas ‘ñawpa runakunaq yachachisqanta ruwaspan Diospa kamachikuyninta p’akiranku’. Jesusmi ichaqa mana hayk’aqpas yuyaykusqanman hinachu yachachiran, aswanpas Taytanpa yachachisqallantan yachachiran (Mateo 15:6; Juan 14:10). Ñoqanchispas kaqllatataqmi ruwananchis.

¹⁵ ¿Imapiraqmi Jesuspa yachachiynin hukniraypuni karan judío religionpi umalliqkunaq yachachiyninmanta? Jesusmi fariseokunamanta kamachikuy simi yachachiqkunamantapas niran: “Chay hinaqa tukuy ima nisqasuykichista allinta ruwaychis. Ichaqa ama paykuna hinachu kaychis, paykunaqa yachachishaspapas manan ruwankuchu”, nispa (Mateo 23:3). Jesusmi ichaqa yachachisqanman hina ruwaran. Chaymanta huk ejemplota qhawarisun.

16. ¿Imaynapin yachanchis Jesús Mateo 6:19-21 textopi yachachisqanman hina kawsasqanta?

¹⁶ Jesusmi qatikuqninkunata niran: “Qhapaq kaykunataqa hanaq pachapi huñukuychis”, nispa (leeychis Mateo 6:19-21). Jesusqa chay yachachisqanman hinan kawsaran. Chaymi pay kikinmanta rimaspa niran: “Atoqkunapas t’oqoyoqmi, phalaq animalkunapas q’esayoqmi, Runaq Churinpaqmi ichaqa mana kanchu maypi puñuykunallanpaqpas”, nispa (Lucas 9:58). Jesusqa kapuqnillanwanmi kawsaran; paypaqqa Reinomanta allin willakuykuna willaymi aswan chaniyoqqa karan.  Chhaynapin rikuchiran kay pachapi qhapaq kayta mana maskhaspalla kusisqa kawsay atikusqanta. Hinaspapas Jesusqa qatikuqninkunata kallpacharan qhapaq kaykunataqa hanaq pachapi huñunankupaq, “chaypiqa thutapas manan thutanchu, qhoqayaypas manan ismuchinchu, manallataq suwapas wasita haykuspa suwakunñachu”. ¿Chay nisqanman hinachu ñoqanchispas kawsashanchis?

¿Imanaqtinmi runakuna Jesusta munakuranku?

17. ¿Imaraykun Jesús allin willakuykunamanta allin yachachiq karan?

¹⁷ Jesusqa allin willakuykunamanta allin yachachiqmi karan runakunata sumaqta qhawarisqanrayku. Jesusqa Taytan hinan llamp’u sonqo, munakuq, khuyapayakuq ima karan. Kunanqa rimasun chhayna sumaq kasqanmanta.

18. ¿Imaynatan Jesús rikuchiran huch’uyyaykukuq kasqanta?

¹⁸ Kay pachapi Diospa munayninta hunt’ananpaqmi Jesusqa “qhapaq-atiyninta saqespa, runa hina nacerqan kamachi runa hina kananpaq” (Filipenses 2:7). Chhaynapin huch’uyyaykukuq kasqanta rikuchiran. Chaymantapas mana pitapas pisicharanchu, nitaq niranchu: ¡Ñoqaqa hanaq pachamantan urayamuni, chayrayku uyariwaychis! nispaqa. Jesusqa manan mesiasmi kani niq runakuna hinachu lliwman willaran Mesías kasqanta. Aswanmi mayninpiqa runakunata kamachiran pi kasqanta imakuna ruwasqantapas hukkunaman mana willanankupaq (Mateo 12:15-21). Jesusqa munaran sapanka runa paypa ruwasqanta rikuspa kikillankumanta qatikunankuta. Chaymantapas, Jesusqa manan hayk’aqpas qatikuqninkunata niranchu: Hanaq pacha angelkuna hina mana pantaq kanaykichis, nispa.

19, 20. ¿Imatan Jesús ruwaran runakunata munakuspa khuyapayaspa ima?

¹⁹ Jesusqa Taytan hinan runakunata munakuran; Taytanqa munakuq kayninpin aswan allintaqa reqsichikun (1 Juan 4:8). Jesusqa runakunata munakuspan paykunata yachachiran. Huk kutinmi huk qhapaq umalli wayna Jesusman achhuykuran (leeychis Marcos 10:17-22). Jesusqa waynatan ‘munakuywan qhawaykuran’ hinaspa yanapayta munaran; chay waynan ichaqa mana munaranchu lliw kaqninkunata saqespa Jesusta qatikuyta.

²⁰ Chaymantapas runakunaqa Jesusta munakuranku khuyapayakuq kasqanrayku. Jesuspa  predicasqanta uyariq runakunaqa huchayoq kayninkupin imaymana llakikuyniyoq karanku. Chayta yachaspanmi Jesusqa paykunata khuyapayaspa yachachiran. Huk kutinmi Jesús apostolninkunapas askha ruwanayoq kasqankurayku tiemponku mana aypasqachu mikhunankupaqpas. Chhaynapi kashaspapas, ¿imatan Jesús ruwaran askha runakunata rikuspa? “Paykunata khuyapayaykurqan, mana michiqniyoq ovejakuna hina kaqtinku, chaymi imaymanata paykunaman yachachiyta qallarirqan” (Marcos 6:34). Jesusqa repararanmi predicasqan runakuna khuyapayanapaq hina kasqankuta, chaymi kallpachakuran paykunata yachachinanpaq, milagrokunatapas ruwaran paykunaq allinninpaq. Jesús imayna kasqanta qhawarispanku sumaq yachachisqanta uyarispankun wakin runakunaqa qatikuqnin kapuranku.

21. ¿Imamanta yachasunchis qatimuq estudiopi?

²¹ Qatimuq estudiopin astawanraq yachasunchis Jesús allin willakuykunata imayna willasqanmanta. Chaypin yachasunchis imakunapiraq aswan allin misionero Jesús hina kasunman chayta.

¿Imanispan kutichiwaq?

• ¿Imaynatan Jehová Dios Jesusta prepararan kay pachaman kachamunanpaq?

• ¿Imaraykun Jesuspa yachachiynin aswan allin karan fariseokunaq kamachikuy simi yachachiqkunaq yachachiyninmanta?

• ¿Imanaqtinmi runakuna Jesusta munakuranku?

[Tapuykuna]

[22 paginapi dibujo]

¿Imaynatan Jesús runakunata yachachiran?