¿Imanaqtinmi kay tiemponchispi wasin-wasinta predicananchis?

“Dios yupaychana wasipipas iñiqkunaq wasinkunapipas [“wasin-wasintapas”, NM] sapa p’unchay yachachishallaqkupuni Jesusqa Cristo kasqanmanta allin willakuykunata.” (HECH. 5:42.)

1, 2. a) ¿Imayna predicasqanchiswanmi runakuna reqsiwanchis? b) ¿Ima tapuykunatan kunan kutichisunchis?

YAQA llapa llaqtakunapin iskay runakuna allin p’achasqa huk punkuta taqayuspanku chay wasipi tiyaq runaman Diospa Reinonmanta pisillapi willarinku. Chay runa astawan yachayta munaqtinqa rimanakunkun Bibliamanta gratislla estudianankupaq. Rimayta tukuspataq hukkaq wasimanñataq rinku. Qanpas, ¿yanapakushankichu chay llank’aypi? Chhayna kaqtinqa, runakunaqa yachankuñan Jehová Diospa testigon kasqaykita manaraq paykunata rimayshaqtiyki. Arí, Jehová Diospa testigonkunataqa wasin-wasinta predicasqanchiswanmi lliw runapas reqsiwanchis.

² Jesusmi kamachiwaranchis predicananchispaq, paypa qatikuqnin kanankupaq runakunata yachachimunanchispaqpas, chayta hunt’ananchispaqmi Jehová Diospa testigonkunaqa imaymana formapi predicanchis (Mat. 28:19, 20). Tukuypin predicanchis: mercadokunapi, callekunapi, huk cheqaskunapipas (Hech. 17:17). Predicallanchistaqmi telefonopi waqyaspa, cartakunata qelqaspapas, sichus llank’ananchispi pipas uyarikuyta munan chayqa, paykunamanpas predicallanchistaqmi. Internetpipas churanchismi Bibliamanta willaq qelqakunata kinsa pachak más rimaykunapiraq. * Chhayna predicasqanchisqa askha runakunatan yanapashan. Ichaqa lliw llaqtakunapipas wasin-wasintan aswantaqa predicanchis. ¿Imanaqtintaq wasin-wasintari predicanchis? ¿Imaynapin Jehová Diospa testigonkuna wasin-wasin predicayta qallariranku? ¿Imanaqtinmi kay tiemponchispi ancha importante chhayna predicay?

Apostolkunaq imayna predicasqan

3. ¿Imanispan Jesús apostolninkunata niran imayna predicanankumanta? ¿Imatan apostolkuna ruwananku karan chay nisqanta hunt’anankupaq?

³ Wasin-wasinta predicasqanchisqa Bibliaq nisqanman hinan kashan. Apostolninkunata predicaqta kachananpaqmi Jesusqa kaykunata niran: “May llaqtamanpas may ayllumanpas haykuspaykichisqa, maskhaychis pichus chaypi allin runa kasqanta”, nispa. ¿Imaynatan allin runakunata tarinkuman? Wasin-wasinta predicaspa. Jesusmi paykunata nillarantaq: “Wasiman haykuspaykichisqa napaykunkichismi chaypi kaqkunata. Wasipi kaqkunachus allin kanqa chayqa, chaypi kaqkunaman saminchayniykichis chayachun”, nispa. ¿Runakuna invitaqtinraqchu apostolkuna wasinkuman rinanku karan? Manan, chaytaqa yachanchis Jesuspa kay nisqanpin: “Pipas mana chaskisuqtiykichisqa,  manallataq rimasqaykichistapas uyarisuqtiykichisqa chay wasimanta otaq llaqtamanta lloqsispa, chakiykichispi hallp’atapas chhaphchirparinkichis”, nispa (Mat. 10:11-14). Chay nisqanwanmi yachanchis apostolkunaqa paykunallamanta runakunaq wasinman predicaq rinankuta, purisqankuman hinataq “lliw huch’uy llaqtakunata rirqanku allin willakuykunata willaspa” (Luc. 9:6).

4. ¿Ima textokunan willashan wasin-wasinta apostolkunaq predicasqankumanta?

⁴ Bibliaqa sut’itan willan wasin-wasinta apostolkunaq predicasqankumanta. Hechos 5: 42 textopin willashan imaynata cristianokuna predicaranku 33 watapi cristiana congregacionpa qallarisqan qhepata, chaypi nin: “Dios yupaychana wasipipas iñiqkunaq wasinkunapipas [“wasin-wasintapas”, NM] sapa p’unchay yachachishallaqkupuni Jesusqa Cristo kasqanmanta allin willakuykunata”, nispa. Iskay chunka wata qhepatan apóstol Pablo Éfeso llaqtapi cristiano umalliqkunata yuyarichiran: “Yachallankichistaqmi runa qayllapipas wasi-wasipipas imapas qankunapaq allin kaqtaqa yachachinaypaq listollapuni kashasqayta”, nispa. Chay hinaqa, ¿chay runakuna manaraq cristianoman tukupushaqtinku Pablo visitanmanchu karan wasinkuman? Arí visitaranmi, chayraykun ‘paykunata rimapayasqa huchata saqepuspa Diosman kutirikunankumanta, Señorninchis Jesucristopipas iñinankumanta’ hukkunamantapas (Hech. 20:20, 21). Archibald Thomas Robertsonmi Hechos 20:20 textomanta nin: “Diospa siminta willaq Pabloqa, wasin-wasintan predicaran”, nispa.

Kunan tiempopi ancha askha langostakuna

5. ¿Imawanmi profeta Joel rikch’anachiran kunan tiemponchispi allin willakuykuna willayta?

⁵ Apostolkunaq tiempopi predicakusqanmi rikuchiran kunan tiemponchispi astawanraq predicakunanta. Profeta Joelmi hanaq pachapaq akllasqa cristianokunaq predicasqanta rikch’anachiran sinchi askha langostakunaq ruwasqanwan (Joel  1:4). Hatun ejército hinan langostakunaqa ima hark’aqninkutapas atipaspa wasikunaman haykunku, hinaspa lliw tarisqankuta mikhunku (leeychis Joel 2:2, 7-9). Kay rikch’anachiymi sut’ita rikuchin Diospa llaqtan mana tiempota usuchispa tukuy sonqowan Diospa siminta willasqankuta. Hanaq pachapaq akllasqa cristianokuna ‘wak ovejakunawan’ kuska askha formapi predicasqankumantaqa, wasin-wasinta predicasqankun aswan importanteqa chayta ruwaspan hunt’ashanku profetaq willasqanta (Juan 10:16). ¿Imaynapin Jehová Diospa testigonkuna apostolkuna hina wasin-wasin predicayta qallariranchis?

6. ¿Imanispan cristianokunata yuyarichikuran 1922 watapi? ¿Imatan wakin cristianokuna ruwaranku?

⁶ 1919 watamantapachan llapa cristianokunata kallpachakuran predicanankupaq. Qhawarinapaq, 1922 watamanta 15 agosto killa The Watch Tower nisqa revistapin lloqsimuran “predicaypiqa llank’ananchispunin” nisqa tema, chay revistan hanaq pachapaq akllasqa cristianokunata yuyarichiran, “tukuy sonqowan Bibliamanta qelqakunata runakunaman qomunankupaq. Chaymantapas kallpacharanmi runakunaq wasinman rispa Diospa Reinon qayllaykamusqanmanta willamunankupaq”. Boletín (kunanqa Reinopaq Servicionchis) nisqapin lloqsimuran allinta predicanapaq yachachiykuna. Chaywanpas pisillan qallariypiqa wasin-wasinta predicaq lloqsiranku. Wakinqa wasin-wasin predicayta p’enqaypaq qhawarispankun imaymanata niranku mana predicanankurayku. Watakunaq pasasqanman hinaqa astawanmi cristianokunata kallpachakuran predicanankupaq, chaymi askha cristianokuna Diospa llaqtanmanta t’aqakapuranku.

7. ¿Imatan reparakuran 1950 watakunapi wasin-wasinta predicaq cristianokunapi?

⁷ Tiempowanqa astawanmi yapakamuran predicaqkuna. Ichaqa reparakuranmi askha cristianokuna wasin-wasinta predicanankupaq mana allin preparasqa kasqankuta. Yachanapaq, Estados Unidospin 1950 watakunapi pachak Testigomanta iskay chunka pusaqniyoq wayqepanakunalla qelqakunata rakiqku, esquinapi sayaspallataq revistakunata interesakuq runakunaman qoqku. Chaymantapas pachakmanta tawa chunka Testigokunaqa killantinpin mana predicaqkuchu, wakintaq askha killakunaraq. ¿Imatan ruwakuran llapa Testigokuna wasin-wasinta predicanankupaq?

8, 9. ¿Imaynatan 1953 watapi yanapakuran wayqe panakunata? ¿May tukuytan Diospa llaqtan wiñariran predicanankupaq yanapayta chaskisqankurayku?

⁸ 1953 watapin Estados Unidospi Nueva York llaqtapi askha nacionkunamanta Testigokuna huk hatun huñunakuyta ruwaranku, chay huñunakuypin llapallan cristianokunata hukmanta kallpachakullarantaq wasin-wasinta predicanankupaq. Nathan H. Knorr iñiqmasinchismi chay tiempopi umallisharan predicaypi, paymi niran: “Diospa llaqtanpi umalliqkunaqa llapa wayqe panakunatan yanapananku wasin-wasinta predicanankupaq. Llapa cristianokunan preparasqa kananku allin willakuykunata wasin-wasinta predicanankupaq”, nispa. Chaypachan pachantinpi wayqe panakunata yanapakuran allinta predicanankupaq. Chaymi manaraq wasin-wasinta predicaq wayqe panakunata yanapakuran allin preparasqa kanankupaq, chay yanapayta chaskisqankuraykun paykunaqa yacharanku wasiyoqkunawan Bibliamanta parla tupachiyta, paykunaq tapukuyninkumanpas  Bibliawan allinta kutichiyta.

⁹ Chhaynata wayqe panakunata yanapakusqanqa allinpunin karan. Manaraq chunka watapin pachak kutita hina predicaqkuna yapakuranku, yachay munaq runakunaq wasinkuman kutisqankupas pachak iskay chunka soqtayoq kutita hina yapakuran, Bibliamanta estudio qosqankupas pachak phisqa chunka kutita hinan yapakullarantaq. Kunanqa yaqa qanchis millón Testigokunañan allin willakuykunata pachantinpi willashanku. Chhaynataraq askhayasqankupin sut’ita yachanchis kayta: Jehová Diosqa yanapashanmi llaqtanta wasin-wasin predicasqankupi (Isa. 60:22).

Qespinapaq marca

10, 11. a) ¿Ima rikusqantan Ezequiel willan isqon capitulopi? b) ¿Imaynatan Ezequielpa rikusqan kay tiempopi hunt’akushan?

¹⁰ Wasin-wasinta predicasqanchis ancha importante kasqanta entiendenapaqqa, qhawarisun Ezequiel libropi isqon capitulota. Ezequielmi rikuran soqta runakunata q’asunayoqtakama otaq k’aspiyoqtakama. Chaymantan rikullarantaq huk runata linomanta yuraq qoysu p’achayoqta, chay runan cinturanpi apasqa huk qelqanata. Chay runatan Jehová Dios kamachiran: “Llaqtata puriykacharqamuy, hinaspataq mat’inpi marcamunki llapan millay qhelli mana chanin ruwasqakunamanta llakikuspa khuyay kaqkunata”, nispa. Marcayta tukuruqtinmi Jehová Diosqa kamachiran q’asunayoq soqta runakunata: ‘Wañuchimuychis llapa mana marcasqakunata’, nispa (leeychis Ezequiel 9:1-6).

¹¹ ‘Linomanta yuraq qoysu p’achayoq runata’ Ezequiel rikusqanqa kay pachapiraq kashaq hanaq pachapaq akllasqa cristianokunatan representan. Predicaspankun chay cristianokunaqa Jesuspa ‘wak ovejankunaman’ haykumuq runakunata huk marcata hina churanku (Juan 10:16). ¿Imataq chay marcari? Mat’inkupipas sut’i marcasqa kankuman hinan chay runakunaqa Jesuspa qatikuqnin kanku, paykunaqa ñan Diosman prometekurankuña servinankupaq, hinaspa bautizakuranku, mosoq runawanñataq p’achakurankupas (Efe. 4:20-24). Wak ovejamanta kaqkunaqa hanaq pachapaq akllasqa cristianokunawanmi ch’ulla t’aqalla kanku, chaymi paykunapas yanapanku runa marcayta (Apo. 22:17).

12. Ezequielpa rikusqanta t’aqwirispa, ¿imanaqtinmi usqhaylla ovejaman rikch’akuq llamp’u sonqo runakunata maskhananchis?

¹² Ezequielpa rikusqanpin yachanchis imarayku “llakikuspa khuyay kaqkunata” usqhaylla maskhananchista: mana marcasqakunaqa wañuchisqan kanqaku. Pisi tiempollamantan lliw mana marcasqakunata q’asunayoq soqta runakunaqa wañuchinqaku, paykunan representanku Diospa ejercitonta. Diospa k’arak phiñakuynin p’unchaymanta rimaspan apóstol Pabloqa niran: ‘Señorninchis Jesusmi hanaq pachamanta atiyniyoq angelninkunawan Diosta mana reqsiqkunata, Señorninchis Jesucristoq allin willakuyninkunatapas mana kasukuqkunatawan muchuchinqa’, nispa (2 Tes. 1:7, 8). Kay nisqanwanmi yachanchis runakuna allin willakuykunata imayna uyarisqankumanta juzgasqa kanankuta, chayraykun allin willakuykunataqa kay millay pacha tukukunankama tukuy sonqowan predicakunan (Apo. 14:6, 7). Chayraykun llapa cristianokuna allin willakuykuna willaytaqa usqhaylla hunt’ananchis (leeychis Ezequiel 3:17-19).

13. a) ¿Imatan apóstol Pablo hunt’aytapuni munaran? ¿Imanaqtinmi chayta hunt’ayta munaran? b) ¿Qanpas Pablo hinachu qhawarinki llaqtaykipi runakunata?

¹³ Apóstol Pabloqa allin willakuykunatan lliw runakunaman willaytapuni munaran, chaymi niran: “Ñoqaqa llapallan runamanmi willanay [“manun kani”, NM] mana judío runakunamanpas, ch’unchukunamanpas, yachayniyoqkunamanpas, mana yachayniyoqkunamanpas.  Chaymi ñoqaqa maytapuni munashani allin willakuykunata qankuna Roma llaqtapi tiyaqkunamanpas willayta”, nispa (Rom. 1:14, 15). Pabloqa ancha agradecesqan kasharan Dios payta khuyapayasqanmanta. Chayraykun payqa maytapuni munaran huk runakunapas Diospa khuyapayasqan kanankuta (1 Tim. 1:12-16). Pabloqa pi runawanpas reqsinakuspanqa chay runamanta manurakamunmanpas hinan sientekuran, chay manutaqa allin willakuykunata paykunaman willaspallan pagayta atinman karan. ¿Qanpas apóstol Pablo hinachu qhawarinki llaqtaykipi runakunata? (Leeychis Hechos 20:26, 27.)

14. ¿Imanaqtinmi astawanqa predicanchis maypi tarikuspapas wasin-wasintapas?

¹⁴ Runakunata qespinankupaq yanapayqa importanten, ichaqa kanmi aswan importante razón wasin-wasinta predicanapaqqa. Malaquías 1:11 textopin Jehová Dios willaranña: ‘Kay pachantin runakunan hatunchawanqaku. ch’uya ofrendakunatapas haywamuwanqakun. Sutiyqa suyukuna ukhupin ancha hatun kanqa’, nispa. Kay textoq nisqanta hunt’aspankun Jehová Diospa testigonkunaqa Diospa sutinta hatunchanku pachantinpi runakunaman predicaspa (Sal. 109:30; Mat. 24:14). Arí, maypi tarikuspapas wasin-wasintapas astawanqa predicanchis “Diosman yupaychay sacrificiota” siminchiswan haywayta munaspanchismi (Heb. 13:15).

¿Imakunan pisi tiempollamanta sucedenqaña?

15. a) ¿Imaynatan Israel runakuna qanchis kaq p’unchaypi ruwayninkuta yaparanku Jericó llaqtata muyuyshaspanku? b) Josuepa tiemponpi sucedesqan hina, ¿iman sucedenman predicacionwan?

¹⁵ ¿Imaynan hamuq tiempopi predicación kanqa? Josué libron willan Israel runakuna Jericó llaqtata muyuykusqankumanta, chay ruwasqankun rikch’akun hamuq tiempopi imayna predicación kananwan. Manaraq Jericó llaqtata thunishaqtinmi Jehová Diosqa Israel runakunata kamachiran: “Llaqtatan muyurinkichis huk kutita sapa p’unchay, soqta p’unchaynintin”, nispa. Ichaqa, qanchiskaq p’unchaymi Israel runakunaq ruwayninku yapakunan karan, Jehová Diosmi Josueta niran: “Qanchis kutita llaqtata muyurinkichis, sacerdotekunataq ñawpaqeykichista rinqa waqra pututunkuta tocakuspa. Aysarisqa tocasqankuta uyarispaykichistaq ichaqa, qankunapas kallpawan qaparinkichis, hinan llaqta muyuriq perqaqa paymantakama thunikamunqa”, nispa (Jos. 6:2-5). Kunan tiemponchispipas predicacionqa astawanraqchá yapakunqa. Kay pachaman Diospa phiñakuynin chayamuqtinqa mana hayk’aq predicakusqanta hinachá Diospa sutinmanta Reinonmantapas predicakunqaña.

16, 17. a) Manaraq kay pachaman Diospa phiñakuynin chayamushaqtin, ¿imamantan lliw runakuna yachanqaku? b) ¿Ima tapuykunatan qatimuq estudiopi kutichisun?

¹⁶ Hamuq tiempopi predicayninchisqa guerrapi ‘kallpawan qapariyman’ hinachá rikch’akunqa. Apocalipsis libron willashan Diospa juicionkuna runakunaman chayamunanmanta, chaykunatan rikch’anachin ‘sinchi manchay chikchikunawan’, chay chikchikunan “huk quintal hina llasallana”.  Chayrayku Apocalipsis 16:21 nin: ‘Chay ñak’ariyqa sinchipunin kanqa’ nispa. Manaraqmi yachanchischu tukukuy juiciokuna willaypi imaynata wasin-wasinta predicasqanchiswan participasunchis chayta. Ichaqa yachanchismi manaraq ‘manchay ñak’ariy’ tukushaqtin Diospa sutinqa mana hayk’aq willakusqan hina willasqa kananta (Apo. 7:14; Eze. 38:23).

¹⁷ Chaykuna sucedenanta suyananchiskamaqa Diospa Reinonmanta allin willakuykunata tukuy sonqo predicashallasun. Kunan yachasqanchis hina, chayta hunt’ananchispaqqa wasin-wasintan predicananchis. Ichaqa, ¿ima sasachakuykunapin rikukunchis wasin-wasinta predicaspa? ¿Imaynatan chaykunata atipasunman? Qatimuq estudiopi chaymanta yachasunchis.

[Uranpi willakuy]

¿Imanispa kutichiwaq?

• ¿Ima textokunapin Biblia willashan wasin-wasin predicaymanta?

• ¿Imaynatan Jehová Diospa testigonkunata kallpachakuran wasin-wasinta predicanankupaq?

• ¿Imanaqtinmi Jehová Diosta serviqkuna predicananchis?

• ¿Imakunan pisi tiempollamanta sucedenqa?

[Tapuykuna]

[8 paginapi dibujokuna fotokunapiwan]

¿Pablo hinachu qanpas lliw runakunaman predicayta munanki?

[9 paginapi foto]

1953 watapi iñiqmasinchis Knorr