Imaynatan atipasunman wasin-wasin predicayninchispi sasachakuykunata

“Diosninchismi kallpachawarqanku, hinan qatiykachakuyña kashaqtinpas mana mancharispa Diospa allin willakuyninkunata willarqaykichis.” (1 TES. 2:2.)

1. ¿Ima pruebakunapin Jeremías tarikuran? ¿Imaynatan chaykunata atiparan?

JEREMIASQA ñoqanchis hina runan karan. Jehová Dios Jeremiasta ‘hatun suyukunapaq profeta kananpaq’ akllaqtinmi payqa niran: “¡Ay, Apu Señor Diosníy! Sinchi waynallaraqmi kani, manan rimaytapas yachaniraqchu”, nispa. Chaywanpas Diosmanmi hap’ipakuran, hinaspa Diospa kamachisqanta kasukuran (Jer. 1:4-10). Tawa chunka wata masraqmi runakuna payta mana uyarirankuchu, paypaq phiñakuranku, asipayaranku, mayninpiqa maqaranku imaraq (Jer. 20:1, 2). Chaymi Jeremiasqa mayninpi mana munaranñachu Diospa profetan kayta, chhaynapiña tarikuspapas predicashallaranmi Diospa siminta, yaqa llapan judiokunaña mana uyariyta munarankuchu chaypas. Jehová Diosmi chay llank’ayta hunt’ananpaq Jeremiasta yanaparan, payllamantaqa manan hunt’ayta atinmanchu karan (leeychis Jeremías 20:7-9).

2, 3. Jeremías hina, ¿ima sasachakuykunapin Diosta serviqkuna tarikunchis?

² Kunan tiempopi askha Dios serviq cristianokunapas Jeremías hinan sientekunchis. Wasin-wasinta predicananchista yachaspan wakinninchisqa niranchis: “Manan hayk’aqpas chaytaqa ruwaymanchu”, nispa. Qhepamanmi ichaqa entienderanchis chay ruway Jehová Diospa munaynin kasqanta, chaymi mana manchakuspa predicayta qallariranchis. Wakinninchismi ichaqa predicasqanchisrayku imaymana sasachakuykunapi tarikuranchis. ¿Imarayku? Wasin-wasinta predicayta qallariyqa manapunin facilchu, astawanqa kay  pacha tukukunankama predicashallayqa (Mat. 24:13).

³ ¿Tiempoñachu Jehová Diospa testigonkunawan estudiashanki huñunakuykunamanpas rishanki? Ichaqa ¿manaraqchu decidikunki wasin-wasinta predicanaykipaq? Bautizasqaña kashanki chayqa, ¿sasachu qanpaq wasin-wasinta predicay manaña imamantapas onqoshankichu chaypas? Pachantinpi askha wayqe pananchiskunan wasin-wasin predicayninkupi sasachakuykunata atiparanku. Qanpas Jehová Diospa yanapayninwanqa atiwaqmi wasin-wasin predicayta.

Kallpata hap’isun

4. ¿Iman apóstol Pablota yanaparan kallpawan allin willakuykunata willananpaq?

⁴ Lliw cristianopas yachanchismi, pachantinpi allin willaykunata runakunaq uyarisqanqa mana runakunaq yachayninmantachu otaq kallpanmantachu kasqanta. Aswanpas chay llank’ayqa ruwakushan Diospa espiritunpa yanapayninwanmi (Zac. 4:6). Kaqllataqmi suceden sapanka cristianoq predicasqanwanpas (2 Cor. 4:7). Apóstol Pablomanta rimasunchis. Huk kutinmi paypas puriqmasin cristianopas hark’akuq runakunaq maqasqan karanku, chayta yuyarispan cristianokunaman kayta qelqaran: “Yachallankichistaqmi ñawpaqta Filipos llaqtapi muchusqaykuta, k’amisqa kasqaykuta, chaywanpas Diosninchismi kallpachawarqanku, hinan qatiykachakuyña kashaqtinpas mana mancharispa Diospa allin willakuyninkunata willarqaykichis”, nispa (1 Tes. 2:2; Hech. 16:22-24). Apóstol Pablo tukuy sonqowanña Diospa siminta willaran chaypas, mayninpiqa sasan paypaqpas karan chay llank’ayta hunt’ayqa. Ñoqanchis hinan apóstol Pablopas Jehová Diospa yanapayninta necesitaran kallpawan allin willakuykunata willananpaq (leeychis Efesios 6:18-20). ¿Imaynatan ñoqanchispas paypa yupinta qatikusunman?

5. ¿Iman yanapawasun kallpawan predicashanallapaq?

⁵ Kallpawan allin willakuykunata willanapaqqa Diosmantan mañakunanchis. Huk precursoran niran: “Diosmantan mañakuni runakunaman tukuy sonqowan predicanaypaq, sonqonkuta kuyurichinaypaq, kusisqa predicanaypaqpas. Kay llank’ayqa Jehová Diospan manan ñoqanchispachu. Chaymi Dios mana yanapawaqtinchisqa mana ima ruwaytapas atisunmanchu”, nispa (1 Tes. 5:17). Kallpawan predicashanallapaqqa llapanchismi sapa kutilla Diosmanta mañakunanchis santo espiritunta (Luc. 11:9-13).

6, 7. a) ¿Imatan huk rikhuriypi Ezequiel rikuran? ¿Imatan Jehová Dios chaywan qhawarichisharan? b) ¿Imatan yachanchis Ezequiel rikhuriypi rikusqanmanta?

⁶ Ezequiel libropi willasqanpas yanapawasunmi kallpawan predicanapaq. Jehová Diosmi huk rikhuriypi Ezequielman rikuchiran huk qelqa k’uyuta, chay qelqapin qelqasqa karan “sonqo nanay harawikuna, llakiy-llaki rimaykuna, anananaykuna ima”, chayta mikhunanpaqmi Jehová Dios kamachiran. Diosmi niran: “Kay qelqa qosqayta mikhuspa saksaykuy”, nispa. ¿Imatan Dios chay rikhuriypi rikuchisqanwan qhawarichisharan? Ezequielqa sonqonpin hap’inan karan Diospa yachachiyninkunata runakunaman willamunanpaq. Pay kikinmi niran: “Mikhuykuqtiytaq sumaq kasqa miel misk’i hina añakallaña”, nispa. Ezequielqa Diospa nisqanta Israel runakunaman willaspaqa anchatan kusikuran, miel misk’itapas mallishanman hinaraq. Ezequielqa ancha valorniyoqpaqmi qhawariran Diospa profetan kasqanta paypa munayninta hunt’aytapas. Hinaña willasqanta  Israel runakuna mana uyariyta munarankuchu chaypas (leeychis Ezequiel 2:8–3:4, 7-9).

⁷ ¿Imatan yachasunman Ezequielpa rikhuriypi rikusqanmanta? Ñoqanchispas Ezequiel hinallataqmi Diospa siminta willanchis mana uyarikuyta munaq runakunaman. Chayrayku predicayninchista ancha valorniyoqta qhawarinanchispaqqa Diospa Simin Qelqata estudiashanallanchispuni. Ichaqa, sichus maynillanpi Bibliata estudiasunchis chayqa, manan yachachikuykunata allintachu entiendesun nitaq sonqonchispipas hap’isunchu. ¿Kallpachakuwaqchu sapa kutilla aswan allinta Bibliata leenaykipaq estudianaykipaqpas? ¿Kallpachakuwaqchu sapa kutilla Biblia leesqaykipi yuyaymananaykipaq? (Sal. 1:2, 3.)

¿Imaynatan Bibliamanta parlayta qallarisunman predicacionpi?

8. ¿Imaynatan wakin cristianokuna wasin-wasinta predicaspa Bibliamanta parla tupachiyta qallariranku?

⁸ Askha wayqe pananchiskunan wasin-wasinta predicashaspa sinchita sasachakunku wasiyoqkunawan parlayta qallarinankupaq. Wakin llaqtakunapiqa aswan sasaraqmi chay ruwayqa. Wakin wayqe panakunaqa allintan qallarinku hukkunawan parlayta sichus allin yuyaymanasqata rimanku chayqa, chaymantataq huk tratadota wasiyoqman qonku, recuadroq nisqanpi hina. Yaqapaschá wasiyoqqa tratadoq titulonta otaq dibujonta qhawaspa astawan uyarikuyta munanman, hinaspa pisillapi willarisunman imarayku visitasqanchista, huk tapuytapas ruwallasunmantaq. Otaq wasiyoqwan Bibliamanta rimayta qallarinapaq kinsa otaq tawa tratadokunata qhawachispa tapusunman: “¿Mayqenkaqmi gustasunki?”, nispa. Ichaqa manan tratadokunata rakispachu purinchis aswanpas kallpachakunchisqa runakunawan Bibliamanta parla tupachiytan, chhaynapi paykunawan Bibliamanta estudiayta qallarinapaq.

9. ¿Imanaqtinmi allinta preparakunanchis?

⁹ Imaynataña predicayta qallarisun chaypas, manan kayta qonqananchischu: sichus allinta preparakusunchis chayqa, mana iskayaspan kusisqa wasin-wasinta predicasun. Huk precursormi niran: “Imaynata predicanaypaq preparakamusqaytan sapanka wasipi rimani, chayta ruwaspan kusisqa predicani”, nispa. Huk precursorpas nillarantaq: “Sichus allinta yachani runakunaman saqenaypaq qelqa imamanta rimasqanta chayqa, tukuy sonqon chay qelqaq nisqanmanta rimani”, nispa. Imayna predicananchispaq umallanchispi ensayayqa allinmi kanman. Ichaqa askha cristianokunan kunkayoqta rimaspa ensayanku. Chayta ruwaspan paykunaqa aswan allinta predicanku (Col. 3:23; 2 Tim. 2:15).

10. ¿Imatan predicacionta umalliqkuna ruwananku wayqe panakunata allinta yanapanankupaq?

¹⁰ Predicayta qallarinapaq huñunakuykuna ruwakusqanqa allinpunin, chaypin allin yachachikuykunata qokun, chhaynapi wayqe panakuna allin preparasqa kusisqa wasin-wasinta predicanankupaq. Sichus predicasqanchis p’unchaypaq Examinando las Escrituras diariamente nisqa folleto predicacionmanta rimashan chayqa, leekunmanmi, hinaspa pisillapi rimarikunman chaypi imanisqanta. Predicacionta umalliqqa allintan wayqe panakunata yacharichinan chay p’unchay imayna predicanankupaq, otaq huk demostracionta ruwachispa qhawarichinman imaynatas wasiyoqkunawan rimayta qallarinkuman chayta. Ichaqa chay llaqtapi tiyaq runakuna uyarinankupaq hinan kanan.  Chhaynapin wayqe panakunaqa aswan preparasqa kashanqaku predicanankupaq. Sichus predicacionpi umalliqkuna allinta preparakamunqaku chayqa, yanapanqakun wayqe panakunata allin preparasqa predicacionman lloqsinankupaq, tiempollapitaq huñunakuytapas tukunqaku (Rom. 12:8).

Uyariyqa ancha allinmi

11, 12. ¿Imaynatan iskay pananchiskuna huk warmita yanaparanku? ¿Imatan chaymanta yachanchis?

¹¹ Predicacionpi runakunawan parlayta qallarispa sonqonkuman chayayta munanchis chayqa manan preparakunallanchischu, aswanpas cheqaqtapunin paykunapi interesakunanchis. ¿Imaynatan paykunapi interesakusunman? Paykunaq rimasqanta makilla uyarispa. Congregacionkunata watukuq superintendenten niran: “Sichus pacienciawan makilla runakunata uyarinchis chayqa, paykunaqa astawanmi yachayta munanku. Chhaynata uyariqtinchismi reparanku, paykunapi interesakusqanchista”, nispa. Sichus khuyapayaspa runakunata uyarisun chayqa, interesakunqakun willasqanchispi. Chaypaq huk pananchiskunamanta yachasunchis.

 ¹² Francia nacionmanta Le Progrès nisqa periodicon publicaran huk warmiq carta qelqasqanta, chay warmiq wawanmi kinsa killayoq kashaspa wañupusqa. Chay cartapin kayta qelqaran: “Waway wañupusqan qhepallamanmi iskay warmikuna punkuyta takamuranku, paykunata rikuspaymi ratulla repararani Jehová Diospa testigonkuna kasqankuta, chaymi ñoqaqa sumaqllata nirani: ‘Manan chaykunaqa interesawanchu’, nispa. Ichaqa paykunan huk folletota qhawachiwaranku, chaypin nisqa: ¿Imaraykun Dios hinallata qhawashan ñak’ariykuna kananta?, nispa. Chaymi wasiyman pasaychirani, ichaqa yuyaykurani: ‘Ima niwasqankutapas yanqa kasqantan sut’iman horqosaq’, nispa. [...] Huk hora masraqmi paykunawan parlarayku hinaspa khuyapayaspa willasqayta uyariwaranku. Pasapunankupaqqa allinñan sientekusharani, chaymi munarani hukpi kutimunankuta”, nispa (Rom. 12:15). Tiempowanmi kay warmiqa Bibliamanta estudiayta qallariran. Payqa astawanqa yuyariran pananchiskunaq khuyapayaspa uyarisqankutan, manan imata nisqankutachu.

13. ¿Imaynatan runakunaq uyarinanpaq hina predicasunman?

¹³ Runakuna llakikuyninkuta willawaqtinchis khuyapayaspa uyarisun chayqa, allintan yachachisunchis Diospa Reinon sasachayninkuta allichananmanta. Allin predicaqkunata qhawaspaykiqa repararankichá paykunaqa runakunaq rimasqanta makilla uyarisqankuta (Pro. 20:5). Chay wayqe panakunaqa cheqaqtapunin visitasqanku runakunapi interesakunku. Manan chay runakunaq sutinta maypi tiyasqallankutachu qelqanku, aswanpas imakunapis interesakunku imakunatas necesitanku chaykunatapas qelqallankutaqmi. Pipas ima sasachakuyninmantapas willaqtinqa, qelqanchiskunapin maskhanku chaypaq hina allin yachachikuykunata hinaspa chay p’unchaykunallapi aparunku. Apóstol Pablo hinan predicasqanku runakunaq uyarinanpaq hina rimanku (leeychis 1 Corintios 9:19-23). Chay hinata runakunapi interesakuqtinkun runakunaqa astawan Diospa siminmanta yachayta munanku. Chhaynapin chay wayqe pananchiskunaqa sut’ita rikuchinku ‘Dios ancha khuyapayakuq’ kasqanta (Luc. 1:78).

Tukuy sonqowan llank’ashallasun

14. Jehová Diosman rikch’akusqanchista rikuchinapaq, ¿imaynatan runakunaman predicananchis?

¹⁴ Jehová Diosqa munasqanchisman hina decidinanchispaqmi kamawaranchis, chaypin yachanchis anchata valorawasqanchista. Tukuy Atiyniyoqña chaypas manan pitapas obliganchu servinanpaqqa, aswanpas munakuywanmi llaqtanman pusamun. Jehová Diospa tukuy imaymana qosqanta agradecekuqkunataq askha allinkunata chaskinku (Rom. 2:4). Diosta serviqkunataq kanchis chayqa, allin willakuykunata runakunaman willaspaqa sumaqtan paykunata tratananchis, chhaynapin rikuchisunchis Jehová Diosqa sumaq khuyapayakuq kasqanta (2 Cor. 5:20, 21; 6:3-6). Chaypaqmi llaqtanchispi runakunata tukuy sonqowan predicananchis, ichaqa ¿iman yanapawasun chhaynata predicananchispaq?

15. a) ¿Imatan Jesuspa apostolninkuna ruwananku karan predicasqankuta mana uyarikuqtinku? b) ¿Imatan ruwasunman allin uyarikuq runakunata tarinapaq?

¹⁵ Jesusmi apostolninkunata niran: ‘Sichus pi runapas predicasqaykichista mana uyarinqachu chayqa, ama nishutaqa llakikuychischu, aswanpas maskhaychis pichus allin runa kasqanta’, nispa (leeychis  Mateo 10:11-15). ¿Imaynatan ñoqanchispas apostolkuna hina ruwasunman? Predicacionpi ima ruwaykunatapas aypayta munanchis chayqa, chay yuyaywanmi llank’ananchis. Huk wayqenchismi nin: “Qori maskhaqpas kayman hinan yuyaykuni, chayrayku sapa predicacionman lloqsispay tapukuni: ‘¿Kunan p’unchay qorita tarisaqchu icha manachu?’”, nispa. Huk wayqenchismi nillantaq: “Sapa semanan kallpachakuni hukllatapas Bibliamanta yachay munaq runata tarinaypaq, hinaspa chay p’unchaykunallapi hukmanta visitanaypaq chhaynapi Bibliamanta astawan yachananpaq”, nispa. Wakin wayqe panakunataq kallpachakunku Bibliamanta huk textollatapas sapanka wasipi leenankupaq. ¿Predicacionpi ima ruwaykunata aypanaykipaqmi qanpas kallpachakuwaq?

16. ¿Imaraykun Diospa siminta mana pisipaspa willashanallanchis?

¹⁶ Wasin-wasinta predicasqanchis allin kasqanqa manan runakunaq uyarikusqallankumantachu. Predicasqanchista uyarikuspaña allin sonqoyoq runakuna qespikunqaku chaypas, manan chayraykullachu predicanchis. Chhaynaqa, ¿ima allinkunatawantaq ruwanchis predicaspa? Jehová Dios munakusqanchistan rikuchishanchis (1 Juan 5:3). Chaymantapas runakuna wañuypaq huchachasqa kanankumanta manaña huchayoqchu kanchis (Hech. 20:26, 27). Predicaspaqa mana allin runakunamanpas willashanchismi: ‘Diospa juzganan p’unchaymi chayaramunña’, nispa (Apo. 14:6, 7). Astawanqa predicanchis Diospa sutin pachantinpi yupaychasqa otaq hatunchasqa kananpaqmi (Sal. 113:3). Chayrayku runakuna mana uyariqtinkupas ñoqanchisqa predicashanallanchis Diospa Reinonmanta. Jehová Diosqa anchatan valoran allin willakuykunata willananchispaq kallpachakusqanchista (Rom. 10:13-15).

17. ¿Imatan runakuna pisi tiempollamanta yachanqaku?

¹⁷ Yaqa llapa runakunaña predicasqanchista mana uyarikuyta munankuchu chaypas, pisi tiempollamantan reparanqaku mana allin ruwasqankuta (Mat. 24:37-39). Ezequielmi mana kasukuq Israel runakunaman willaran Jehová Diospa k’arak phiñakuyniy p’unchay paykunaman chayananta, chayta willashaqtinmi Jehová Diosqa Ezequielta niran: ‘Chay p’unchay chayamuqtinmi chay runakunaqa yachanqakupuni paykuna ukhupi huk profetaq kasqanta’, nispa (Eze. 2:5). Chay hinallataqmi, Jehová Dios kay pachaman k’arak phiñakuyninta chayachimuqtinpas runakunaqa yachanqaku Jehová Diospa testigonkunalla cheqaq Diosta servisqankuta. Yachallanqakutaqmi maypipas tarikuspa otaq wasin-wasintapas predicasqankuqa Diosmantapuni hamusqanta. ¡Anchatan kusikunchis Jehová Diospa sutinta apasqanchismanta, kunan tiempopi paymanta runakunaman willasqanchismantapas! Chay hinaqa, Diospa yanapayninwan wasin-wasinta predicashallasun ima sasachaytapas atipaspa.

¿Imanispan kutichiwaq?

• ¿Imakunatan ruwasunman kallpawan predicashanallapaq?

• ¿Iman yanapawasunman wasin-wasinta predicaspa runakunawan parlayta qallarinapaq?

• ¿Imaynatan rikuchinchis cheqaqtapuni runakunapi interesakusqanchista?

• ¿Imatan ruwasunman tukuy sonqowan predicanapaq?

[Tapuykuna]

[15 paginapi foto recuadropiwan]

Runakunawan Bibliamanta parlayta qallarinapaq yanapaykuna

Qallarinapaq:

▪ Wasiyoqta napaykuspa, niwaq: “Ratullan visitamushayki kay tratadoq yachachisqanmanta huk sumaq willakuyta willarinaypaq”, nispa, hinaspa chay tratadota qowaq.

▪ Otaq tratadota qospa kayta niwaq: “Imaninkin kay tratadopi nisqanmanta”, nispa.

Tratadota chaskikuqtintaq:

▪ Kayta tapuy: “¿Imaninkin kay tratadoq yachachisqanmanta?”, nispa.

▪ Makilla uyariy kutichisqanta, ima nisqanta allinta entiendenaykipaq. Agradecekuytaq kutichisqanmanta, amataq qonqaychu imakunatachus yuyaykun chayta.

Astawan rimanaykipaq:

▪ Bibliamanta hukta otaq iskay textokunata leespa t’aqwiriychis. Imakunachus payman interesan chayman hina rimay.

▪ Sichus astawan yachayta munan chayqa, Bibliamanta huk qelqata qowaq, hinaspa qhawarichiwaq imaynatas Bibliamanta estudiota apakun chayta. Niwaqtaq, huk p’unchay kutimusaq, nispa.