¿Imaynatan llakikuyniykita pisiyachiwaq?

“Llapa churinkuna llapa ususinkuna [Jacobta] sonqochayta [kallpachayta] munarqanku, paytaq ichaqa mana sonqochasqa kayta munarqanchu, aswanpas nirqanmi: –Wawaypa kasqan Wañuy pachakaman llakisqa uraykusaq, nispa. Hinaspanmi taytanqa Josemanta waqaykurqan.” (GÉNESIS 37:35.)

JACOBQA sinchitan llakikuran wawayki wañupun niqtinku, chaymi niran: ‘Wawaymanta waqasaq wañunay p’unchaykama’, nispa. Qanpas Jacob hinapaschá llakikushanki familiayki wañupusqanmanta, ¿Diospi mana iñisqaykiraykuchu chhaynata llakikunki? Manan.

Biblian willawanchis Jacob tukuy sonqowan Diospi iñiq kasqanta. Taytan Isaacpas abuelon Abrahampas chhaynan karanku (Hebreos 11:8, 9, 13). Huk kutinmi Jacobqa huk angelwan tutantin hap’inakuran Diospa saminchayninta otaq bendicionninta chaskinanpaq (Génesis 32:24-30). Chaymi rikuchin Jacob Dios sonqo kasqanta. ¿Imatan Jacobpa llakikuyninmanta yachanchis? Allin iñiyniyoqña kanchis chaypas llakikunchismi familianchis otaq amigonchispas wañupuqtin. Lliwpas chhaynan kanchis.

Wañuqpa familiankunaq llakikuyninmanta

Runakunaqa imaymanatan ruwanku familianku wañupuqtin, manaña kaqllatachu ruwanku chaypas lliwmi sonqo nanayta llakikunku. Leonardomanta rimasun, chunka tawayoq watanpi kashaqtinmi taytanqa wañupuran qonqaylla sonqon sayarapuqtin. Paypa tianmi willaran: “Papayki wañukapun” nispa, ichaqa manan creeyta munaranchu. Rikuranña papanta p’ampashasqankuta chaypas mosqokushanmanpas hinallan paypaqqa karan. Chaymi payqa soqta killantin mana pisichallatapas waqaranchu. Sapa kutillanmi papanta suyaran llank’ananmanta chayamunanta. Huk watamantañan entienderan papan wañupusqanta, chayraq sinchita llakikuran papanmanta. Wasinman kutispa mana pitapas chaypi tarispan payqa yuyariq papan wañupusqanta, hinaspan sonqo nanayta waqaq. ¡Maytapunin papanta yuyarikuran!

Leonardo hinaña sinchita llakikushanki chaypas, pisiyachiwaqmi chay llakikuyniykita. Imaynan k’iripas unaypi thanipun chay hinallataqmi llakikuypas unay tiempomanta pisiyapunqa. Tiempoq pasasqanman hina pisi pisimantan llakikuyniyki pasapunqa, manañataq qallariypi hinañachu llakikunki.

Chaykamaqa sinchitaraqmi llakikunki, ichaqa pisi pisimantan allinyapunki, yachakunkitaq manaña wañupuq familiaykiwan kuska kawsanaykipaq. Ñawpaqqa chay familiayki ladoykipi kasharan, kunanqa wañupuntaq chayqa mana payllawanña kawsayta yachanayki. Chaypaqqa kallanqapuni llakikuy, mana llakikuspaqa manan sonqoykimanta nanayniykita lloqsichiwaqchu. Manaña llapanchischu kaqllata llakikuyninchista lloqsichinchischu chaypas, lloqsichinanchispunin; mana chayqa mana allinninchispaqmi kanman, onqochiwasumanraqtaq kanpas. Chhaynaqa, ¿imaynatan llakikuyniykita lloqsichiwaq? Chaypaqmi Biblia yanapasunki.

¿Imaynatan llakikuyniykita pisiyachiwaq?

Llakikuyniykimanta rimay. Askha runakunan llakikuyninkumanta rimaspa sonqonkuta huk chhikanta tiyaykachinku. Jobpas sinchita llakikuran chunka wawankuna wañupuqtin, chaymi khaynata niran: “Manapuniñan kawsaymanchu, chayraykun quejakuspa ima atisqayta rimasaq, nanaymanta llakikuspaymi ima munasqayta rimasaq”, nispa (Job 1:2, 18, 19; 10:1). Jobqa pisiyachiytapuni munaran llakikuyninta. Chaypaqqa rimaytapuni munaran llakikuyninmanta.

Maman wañupuqtinmi Paulo niran: “Mamaymanta hukkunawan rimayqa yanapawanmi amaña sinchita llakikunaypaq”, nispa. Qanpas amigoykiman willakuwaq imayna sientekusqaykita, chaymi yanapasunkiman llakikuyniyki pisiyananpaq (Proverbios 17:17). Maman wañupuqtinmi Yone sutiyoq warmipas iñiqmasinkunata niran: “Watukamuwallankichis”, nispa. Paykunawan rimaspan kallpachakuran manaña nishuta llakikunanpaq. Sichus qanpas allin uyarikuqman willanki imayna sientekusqaykimanta chayqa pisiyachiwaqmi llakikuyniykita.

Qelqay imayna sientekusqaykimanta. Chaypas yanapasunkimanmi llakikuyniykita pisiyachinaykipaq.  Wakinqa mana llakikuyninkumanta rimayta munankuchu, ichaqa munankumanmi llakikuyninkumanta qelqayta. Rey Davidpas huk llakikuy takitan qelqaran Saulwan Jonatanwan wañupuqtinku, chaywanmi pisiyachiran llakikuyninta. Chay takitan qelqakuran Bibliapi segundo de Samuel nisqa libropi (2 Samuel 1:17-27).

Waqaypas pisiyachinmanmi llakikuyniykita. Biblian nin: “Kanmi waqana tiempo”, nispa (Eclesiastés 3:1, 4). Familianchis wañupuqtinqa ‘waqana tiempon’. Chayrayku manan p’enqakunanchischu waqayta. Biblian willawanchis Dios sonqo qharikunapas warmikunapas sinchi llakikuyninkupi waqasqankuta (Génesis 23:2; 2 Samuel 1:11, 12). ‘Jesuspas waqarqanmi’ amigon Lazarota p’ampasqanku cheqasman asuykuqtin (Juan 11:33, 35).

Llakikuyniykiqa manan usqhayllachu pisiyanqa, mayninpiqa kusisqa kashaqtiyki qonqaylla llaki ñit’isunkiman, chayrayku pacienciakunayki, manataq p’enqakunaykichu waqayta. Dios sonqo runakunapas yachankun chhayna llakikuypi tarikuspa lliwpas waqaqpuni kasqanta, yachallankutaqmi llakikuy pisiyachinapaq waqay allin kasqantapas.

Diosman asuykuy

Biblian niwanchis: “Diosman asuykuychis, hinan payqa asuykamusunkichis”, nispa (Santiago 4:8). Sichus Diosta tukuy sonqowan mañakuypi rimapayasun chayqa paymanmi asuykushanchis. Chayrayku amapuni qonqaychu Diosmanta mañakuyta. Diospa Simin Qelqa nin: “Señor Diosqa llakisqa sonqoyoqkunaq qayllanpin kashan, payqa llakiq ñit’isqan sonqoyoqkunatan qespichin”, nispa (Salmo 34:18). Nillantaqmi: “Señor Diosman llakipakuyniykikunata saqey, paymi qaqata sayachisunki”, nispa (Salmo 55:22). Yuyaymanay chay textokunaq nisqanpi. Ñaqha yachasqanchis hina askha runakunan kallpachakushanku amigonkunawan llakikuyninkumanta rimaspa. Chayqa, ¡astawanraqchá kallpata hap’isunman llakikuyninchista Diosman willaqtinchisqa! (2 Tesalonicenses 2:16, 17.)

Ñaqha rimasqanchis Paulon nillarantaq: “Llakikuy sinchita ñit’iwaqtinmi qonqoriykukuspa Diospa yanapayninta mañakuq kani”, nispa.  Kunanmi pay nin: “Allinniypaqpunin karan Diosmanta mañakusqayqa”, nispa. Qanpas rikuwaqmi ‘tukuy imapi sonqochakuq Dios’ mañakusqayki kutichisqanta, paymi kallpachasunki ima llakikuypiña tarikuqtiykipas (2 Corintios 1:3, 4; Romanos 12:12).

Wañupuqkunan kawsarimunqaku

Jesusmi niran: “Ñoqan kawsarimpuypas kawsaypas kani. Ñoqapi iñiqqa, wañusqaña kashaspapas kawsanqan”, nispa (Juan 11:25). Biblian willawanchis wañupuqkuna kawsarimpunanta. * Jesusqa kay pachapi kashaspa atiyninta rikuchiran wañuqkunata kawsarichispa. Huk kutinmi 12 watayoq sipaschata kawsarichiran. Maytachá tayta mamanqa chaymanta kusikuranku. Bibliaq willasqan hina paykunaqa “manchayta muspharqanku” (Marcos 5:42). Jesucristo hanaq pachamanta kamachimuyta qallariqtinmi askha runakunata kawsarichinqa kay pachapi kusisqa thakpi kawsanankupaq (Hechos 24:15; 2 Pedro 3:13). ¡Maytachá kusikusunchis wañupuqkuna kawsarimpuqtinku familiankuwanpas kaqmanta tupaqtinku!

Chaytan Leonardopas suyakushan, payqa mosoq pachapi kawsarimuqta hinañan papanta rikushan. Kawsarimpuymanta yachaymi payta huk runakunatapas kallpachan. Qantapas kusichisunki chaymanta yachay.

[Uranpi willakuy]

[6 paginapi foto recuadropiwan]

‘Tukuy imapi sonqochakuq Dios’

“Yupaychasqa kachun Señorninchis Jesucristoq Yayan Diosqa, payqa khuyapayakuq Yayan, tukuy imapi sonqochakuq [kallpachakuq] Diostaq.” (2 Corintios 1:3)

Chay textoq nisqan hina, Jehová Diosqa yanapanmi tukuy sonqowan serviqninkunata ima sasachakuypiña tarikuqtinkupas. Yanapanmanmi amigonkunawan otaq iñiq familiankuwanpas.

Leonardo yuyarin wañupuq papanmanta llakikushaqtin imayna kallpachasqankuta. Huk kutinmi wasinman chayaspa mana pitapas tarisqachu, chaysi sonqo nanayta waqasqa papanta yuyarispa, hinan parqueman lloqsisqa, chaypi tiyaykuspataq Diospa yanapayninta mañakuyta qallariran. Chayllamanmi Leonardoq qayllanpi huk carro sayaykuran, chaymantataq uraykamuran Leonardoq iñiqmasin, payqa mayman rinanta mana asertaspas chay callenta carronpi risharan. Leonardoqa chay iñiqmasinta rikuspallaraqmi anchata kallpachakuran.

Huk wiraqochaq señoranmi wañupusqa chaymi payqa sinchi llakikuypi tarikuran. Sinchi llakiq nit’isqan kaqtinmi waqasparaq Diospa yanapayninta mañakuran. Manaraq mañakuyta tukushaqtintaq nietan telefonopi waqyamusqa. Chayta yuyarispan chay wiraqocha kayta willakun: “Nietaywan huk chhikallantapas rimaymi anchata kallpachawaran, kaywanmi reparani mañakusqayta Dios uyariwasqanta”, nispa.

 [5 paginapi dibujo recuadropiwan]

¿Hukkunata kallpachasunmanchu?

“Diosmi tukuy llakikuyniykupi sonqochawanku, ñoqaykupas ima llakipiña kaqkunatapas Diospa sonqochawasqanku sonqochaywan sonqochanaykupaq.” (2 Corintios 1:4.)

Askha cristianokunan rikuranku kay textoq nisqan cheqaqpuni kasqanta. Familianku wañupuqtin kallpachasqataq karanku chayqa, paykunapas kallpachaytan munanku llakikuypi kaqkunata.

Yachasun Claudete cristianamanta, payqa wasimasinkunaman willashallanmi Bibliamanta yachasqanta. Payqa huk señoraman watukullaqpuni karan; chay señoraq wawan leucemia onqoywan wañupusqa. Chay señoraqa Claudete willasqanta uyarikuranña chaypas, sonqonpi niq: “Manan hayk’aqpas llakikuyniytaqa entiendewanqachu”, nispa. Chaymantataq Claudeteq wawanpas wañupuran, chaymi chay señoraqa watukuq riran, hinaspa niran: “Wawayki wañupuntaq chayqa, ¿tukuy sonqoykiwanraqchu Diospi iñishanki?” nispa. Claudeteq iñiynin mana pisiyasqachu, chaymi chay señoraqa Biblia estudiayta qallariran, kunantaq Diospa Simin Qelqa allinta kallpachashan.

Papan wañupusqan qhepamanmi Leonardoqa yuyaykuran mana uyariy atiq runakunaman Bibliamanta yachachinanpaq. Chaypaqmi kallpachakuran makiwan rimayta yachananpaq, chaymi yanaparan llakikuynin pisiyananpaq. Paymi nin: “Llakikuyniy pisiyananpaqmi mana uyariy atiq runakunata yanaparani Diosta reqsinankupaq. Chayta ruwanaypaqmi anchata kallpachakurani, ichaqa maytapuni kusikurani Bibliamanta huknin estudiachisqay bautizakapuqtin, chaywanmi llakikuyniy pisiyapuran. Chayraqmi kusikuyta tarirani manañataq papay wañupusqanmanta llakikuranichu”, nispa (Hechos 20:35).

[4, 5 paginakunapi dibujo]

Jesusqa paypi iñiqkunatan kawsarichinqa