Jehová Diosqa munakuywanmi yuyaqkunata cuidan

“Diosqa chaninpunin, payqa manan qonqanchu ruwasqaykichiskunataqa.” (HEB. 6:10.)

1, 2. a) ¿Pitan yuyarisunman yuraq chukchayoq iñiqmasinchista qhawarispa? b) ¿Imaynatan Jehová Dios qhawarin yuyaq cristianokunata?

YAQAPASCHÁ yuraq umayoq iñiqmasinchista qhawarispaqa yuyarinchis Jehová Diosmanta profeta Danielpa qelqasqanta. Paymi rikhuriypi rikusqanmanta khaynata qelqaran: “Qhawashaqtiymi, kamachikuy tiyanakunata churarqanku, Yuyaq Runataq tiyaykurqan. P’achanmi rit’i hina yuraq karqan, uma chukchanpas yuraq millma hinan karqan”, nispa (Dan. 7:9).

² Yuraq millmawanmi profeta Danielqa Diospa chukchanta rikch’anachiran. Arí, Danielmi Jehová Diosta rikuran soqo umayoq ‘Yuyaq Runata’ hina, chaywanmi yachanchis Diosqa unay tiempoña kawsaq kasqanta ancha yachayniyoq kasqanta, ancha respetanapaq kasqantapas. Ichaqa, ¿imaynatan Jehová Dios qhawarin yuyaq kamachinkunata? Diosmi niran: “Soqoyoq kayqa umatan munaychan sichus chanin ñanpi purinku chayqa”, nispa (Pro. 16:31, NM). Arí, Jehová Diosqa sumaqtan qhawarin tukuy sonqowan payta servispa machuyapuqkunataqa. Qanri, ¿pay hinachu machuyapuq wayqe panakunata qhawarishanki?

¿Imaraykun ancha munasqa kanku?

3. ¿Imanaqtinmi anchata munakunchis yuyaq wayqe pananchiskunata?

³ Yuyaq wayqe pananchiskuna ukhupin tarikun Umalliq T’aqapi kaq wayqenchiskuna, congregacionkunata visitaq wayqekuna otaq ñawpaqpi congregacionkunata visitaqkunapas, kashallantaqmi precursorkunapas wakin predicaqkunapas. Reqsinkichá unayña tukuy sonqowan allin willakuykunata predicaq wayqe panakunata, paykunaqa allin ejemplon kanku wayna sipaskunapaq. Wakinqa Diospa llaqtanpin hatun llank’aykunapi llank’aranku, qatiykachasqataq karankupas predicasqankurayku. Jehová Diospas ‘allin yuyayniyoq hunt’aq kamachipas’ anchatan agradecekunku yuyaq wayqe pananchiskunaq ñawpaqpi llank’asqankumanta kunan tiempopi llank’asqankumantapas (Mat. 24:45).

4. ¿Imaraykun yuyaq wayqe pananchiskunata respetananchis paykunapaq mañapunallanchistaq?

⁴ Chay wayqe pananchiskunataqa llapallanchismi munakunanchis respetananchispas. Moisesman Jehová Diospa qosqan Kamachikuymi niran: ‘Imaynan Jehová Diostapas manchakunkichis chhaynallatataqmi yuyaqkunatapas sumaqta respetanaykichis’, nispa (Lev. 19:32). Amayá qonqasunchu kay wayqe pananchiskunapaq mañapuytaqa, chaymantapas Jehová Diosta agradecekusun ancha munakuywan llank’asqankumanta. Apóstol Pabloqa lliw wayqe panakunapaqmi mañakuran, yuyaqkunapaqpas wayna sipaskunapaqpas (leeychis 1 Tesalonicenses 1:2, 3).

5. ¿Imanaqtinmi askhata yachasunman yuyaqkunamanta?

⁵ Yuyaq wayqe pananchiskunaqa ancha experienciayoqmi kanku, Bibliamantapas allintan yachanku, chaymi paykunamantaqa askhata yachasunman. Kay wayqe pananchiskunaqa pacienciayoq llamp’u sonqo kaytan yacharanku, paykunaqa kusikuywanmi qhepa wiñaykunaman yachachinku imachus yachasqankuta (Sal. 71:18). Wayna sipaskunaqa kallpachakunankun yuyaq wayqe panakunamanta  yachanankupaq, imaynata ukhu p’uytumantapas unuta wisinankupaq kallpachakunkuman hinata (Pro. 20:5).

6. ¿Imaynatan yuyaq wayqe pananchiskunaman rikuchisunman valorasqanchista?

⁶ ¿Imaynatan yuyaq wayqe pananchiskunaman rikuchisunman Dios hina valorasqanchista? Khaynatan nisunman: “Ancha allinmi Jehová Diosta tukuy sonqowan servisqaykichisqa, consejokuna qowasqaykichistapas allinpaqmi qhawariyku”, nispa. Consejawasqanchisman hina ruwaspataq rikuchisunman sonqomanta kallpachasqanchista. Paykunapas chhaynatan ruwaranku wayna sipasllaraq kashaspanku. Chayta ruwaspan kusisqa kawsaranku. *

¿Imakunata ruwaspan rikuchisunman munakusqanchista?

7. ¿Pikunan astawanqa cuidananku yuyaqkunata?

⁷ Jehová Diosqa yuyaqkunaq familiantan astawanqa kamachin paykunata cuidanankupaq (leeychis 1 Timoteo 5:4, 8). Payqa anchatan kusikun familianku yuyaqkunata cuidaqtinku pay hina valoraqtinkupas. Jehová Diosqa yanapanqan bendecinqataq yuyaq familiankuta cuidanankupaq kallpachakuqkunataqa. *

8. ¿Imanaqtinmi llapallanchis yanapananchis yuyaqkunata?

⁸ Hinaspapas, Jehová Diosqa kusikunmi mana piniyoq yuyaq wayqe panakunata llapallanchis yanapaqtinchisqa (1 Tim. 5:3, 5, 9, 10). Chhaynapin rikuchinchis chay wayqe pananchiskunata munakusqanchista khuyapayasqanchistapas (1 Ped. 3:8). Chhaynata yuyaq wayqe pananchiskunapi interesakusqanchismantan apóstol Pablo niran: “Cuerpoq huk miembronchus muchun chayqa, llapan miembrokunan chaywan kuska muchullantaq”, nispa (1 Cor. 12:26). Nillarantaqmi: “Ima sasachakuykunaña kaqtinpas hukkuna hukkunawan yanapaykunakuychis, ahinapin Cristoq kamachikuy siminta hunt’ankichis”, nispa; yuyaqkunata yanapaspaqa chay kamachikuytan hunt’ashanchis (Gál. 6:2).

9. ¿Ima ‘sasachakuykunapin’ yuyaqkuna tarikunku?

⁹ ¿Ima ‘sasachakuykunapin’ yuyaq wayqe pananchiskuna tarikunku? Sinchi yuyaqña kaqtinkun wakinpaqqa sasa doctorman riy, unumanta luzmanta pagay, wasinkuta pichay, wayk’ukuytapas manañan atinkuchu. Astawan machuyapusqankuman hinataq manaña sumaqtachu mikhunku ukyankupas, chaymi manaña allintachu alimentakunku. Chaymantapas manañan huñunakuykunaman riyta atinkuchu, nitaq Bibliatapas allinta estudiayta atinkuñachu. Wakin wayqe pananchiskunaq ñawinku arphayapuqtin ninrinkupas manaña uyariqtinmi sasachakunku qelqanchiskunata leenankupaq huñunakuykunapi uyarinankupaqpas. Wakinqa huñunakuyman rinankupaq alistakuspallaraqmi sayk’upunku. ¿Imaynatan paykunata yanapasunman?

¿Imaynatan yanapasunman?

10. ¿Imatan umalliqkuna ruwanku yuyaqkunata yanapanankupaq?

¹⁰ Askha congregacionkunan yuyaq wayqe pananchiskunata allinta cuidanku: ima necesitasqankutan rantinpunku, wasinkuta pichapunku, mikhunatapas wayk’upunku. Chaymantapas yanapanku Bibliata estudianankupaq, huñunakuykunaman rinankupaq, sapa kutilla predicanankupaqpas. Maytas riyta munanku chaymanpas pusallankutaqmi. Sichus manaña puriyta atinkuchu chayqa, huñunakuypi yachachikuytan grabapunku otaq telefonomanta uyarichinku. Umalliqkunaqa tukuy atisqankutan ruwanku yuyaqkunata yanapanankupaq. *

11. ¿Imaynatan huk familia yuyaq wayqenchista yanaparan?

¹¹ Chaymantapas, sapankanchismi yuyaq wayqe pananchiskunataqa yanapasunman. Ejemplopaq, huk yuyaq wayqenchispa warminmi  wañupusqa, chaymi payqa manaña alquilerta pagayta atisqachu huk sueldollataña chaskisqanrayku. Ñawpaqpin payqa esposanwan huk casado warmi qharita iskaynin ususikunantinta Bibliamanta yachachisqaku. Chhaynapi tarikusqanta rikuspan kay familiaqa yuyaq wayqenchista khuyapayaspa wasinkuman pusaranku, paykunaq wasinkun hatun karan hinaspa iskay cuartota qosqaku. Payqa chunka phisqayoq watatan paykunawan tiyaran allintataqmi yachakuran. Chay wayqenchispa iñiyninpas experiencianpas anchatan yanaparan chay familiaq ususinkunata, paypas kusikuranmi chay familiawan tiyaspaqa. 89 watanpi wañukapunankaman paykunawan tiyaran. Chay familiaqa anchatan Diosta agradecekuranku wasinkupi chay yuyaq iñiqmasinchis tiyasqanmanta. Kay familiaqa ñan premiota chaskinña chay iñiqmasinchista yanapasqankumanta (Mat. 10:42). *

12. ¿Imaynatan yuyaqkunaman rikuchisunman munakusqanchista?

¹² Manapaschá chay familiaq ruwasqanta hinachu ruwayta atisunman, ichaqa atisunmanmi paykunata huñunakuykunaman predicacionmanpas pusayta. Wasinchismanpas invitasunmanmi paseoman rispapas paykunatawan pusasunman. Onqosqa kashaqtinkupas wasillankupiña tiyaqtinkupas risunmanmi waturikuq. Imaynapiña tarikunkuman chaypas, sumaq respetowanmi tratananchis kurak runakuna kasqankurayku. Allin yuyayninkupiraq kashanku chayqa, imatapas decidiqtinkuqa uyarinanchismi. Pisiyapunmanña yuyayninku chaypas, yuyaq runakunaqa allinta reparanku sumaqtachus tratashanchis icha manachus chayta.

Jehová Diosqa manan qonqanqachu ruwasqankuta

13. ¿Imaraykun reparananchis yuyaq wayqe pananchiskunaq imayna sientekusqankuta?

¹³ Yuyaq wayqe pananchiskuna imayna sientekusqankutaqa reparananchismi. Mayninpiqa sinchitan llakikunku manaña wayna sipas kayninkupi hinañachu ruwasqankumanta. Huk pananchismi onqosqanrayku sasachakuran huñunakuykunaman rinanpaq, payqa  phisqa chunka wata masñan Jehová Diosta servisharan. Huk kutinmi yuyarisqa precursora regular kashaspa allinta llank’asqanta, chayta yuyarispan k’umuykuspa waqaran, khaynatataq ñakapakuran: “Kunanqa manañan ima ruwaytapas atiniñachu”, nispa.

14. ¿Imaynatan Salmo qelqa yuyaqkunata kallpachan?

¹⁴ Sichus yuyaqña kanki chayqa, ¿hayk’aqllapas chhaynata sientekurankichu? Yaqapaschá mayninpiqa yuyaykunki: “Jehová Diosqa qonqapuwanmi”, nispa. Davidpas sinchi yuyaqña kashaspaqa chhaynatapaschá sientekuran, chaymi Jehová Diosta niran: “Machuña kaqtiypas ama qhawarpariwaychu, kallpay pisiyapuqtinpas ama saqerpariwaychu. Diosníy, machullaña soqo umallaña kashaqtiypas ama saqerpariwaychu”, nispa (Sal. 71:9, 18). Jehová Diosqa manan Davidtaqa saqerpariranchu, qantapas manallataqmi saqerparisunkichu. Davidqa huk salmo takita qelqasqanpin rikuchiran Jehová Diosman tukuy sonqonwan hap’ipakusqanta (leeychis Salmo 68:19). Sichus qanpas Jehová Diosta tukuy sonqoykiwan kasukunki chayqa, manan saqerparisunkichu, aswanmi tukuy kawsasqayki p’unchaykuna yanapasunki.

15. ¿Imatan yuyaq wayqe pananchiskuna ruwankuman allin kaqkunapi yuyaykunankupaq?

¹⁵ Jehová Diosqa yuyashallanqapunin payta hatunchanaykipaq ñawpaqpi ruwasqaykitaqa kunan ruwasqaykitapas. “Diosqa chaninpunin, payqa manan qonqanchu ruwasqaykichiskunataqa, iñiq wawqe-panakunata yanapaykuspa payta munakusqaykichistapas.” (Heb. 6:10.) Chhaynaqa kallpachakuy allin kaqkunapi yuyaykunaykipaq. Ama hayk’aqpas yuyaykuychu: “Ñoqaqa manañan valenichu Jehová Diosta servinaypaqqa”, nispa, aswanpas yuyaykuy Jehová Diosmanta askha bendicionkuna chaskisqaykipi hamuq tiempopi sumaq bendicionkunata chaskinaykimantawan. Llapa cristianokunan ‘suyakushanchis sumaq kawsayta’, chaytaqa Jehová Diospunin prometewanchis (Jer. 29:11, 12; Hech. 17:31; 1 Tim. 6:19). Kallpachakuy chay suyakuypi yuyaymananaykipaq, hinaspa wayna sipaspas kashawaq hina yuyaykuy, amataq qonqaychu huñunakuykunaman risqaykiwan wayqe panakunata kallpachasqaykita. *

16. ¿Imaraykun Juan manaña umalliq kayta munaranchu? Ichaqa, ¿imaraykun yuyaykusqanta cambiaran?

¹⁶ Congregacionpi umalliq Juanmanta rimasunchis, paymi pusaq chunka watanpiña kashan, paypa esposan Saran such’u kapuran, chaymi Juanqa sapa p’unchay esposanta cuidan. * Askha pananchiskunan kay wayqenchista yanapanku esposanta cuidaypi, chaymi payqa huñunakuykunaman riyta atin, predicacionmanpas lloqsin. Chhaynapi tarikuspan Juanqa yuyaykuran: “Manañan atiymanñachu umalliq kaytaqa”, nispa, chaymi waqaspa niran: “Imapaqñan umalliq kayman, manañataq allintañachu yanapakunipas chayqa”, nispa. Ichaqa wakin umalliqkunan kallpacharanku: “Ñawpaqtaqa allintaraq yuyaykuy; pisitaña ruwanki chaypas experienciaykiqa anchatan yanapawanku”, nispa. Paykunaq nisqanwan kallpachakuspan Juanqa manaña umalliq kasqanta saqeyta munaranchu, chaywanmi wayqe panakunaqa anchata kusikuranku.

Jehová Diosqa anchatan valoran yuyaqkunataqa

17. ¿Imaynatan Biblia yuyaq cristianokunata kallpachan?

¹⁷ Yuyaq cristianokunaqa rurunkumanraqmi sasachakuykunapiña tarikuspapas, chayraykun  Biblia nin: ‘Señor Diospa wasinpi mallkisqa kaqkunaqa [...] Yuyaqña kashaspapas rurunqakuraqmi, kallpallayoqmi kashanqaku, llanllashallanqakupunitaq’, nispa (Sal. 92:13, 14). Apóstol Pablopas onqosqaña tarikuran chaypas khaynatan niran: “Mana pisipaykuchu, aycha cuerpoykuña mawk’ayapushan chaypas”, nispa (leeychis 2 Corintios 4:16-18).

18. ¿Imanaqtinmi yuyaqkunatapas paykuna cuidaqkunatapas yanapananchis?

¹⁸ Arí, yuyaqña kashaspapas rurushallankumanmi, chaytan askha yuyaq wayqe pananchiskuna rikuchinku. Ichaqa, familiankuq cuidasqanña kanku chaypas, imaymanamantan sufrinku machuyapusqankurayku. Yuyaqkunata cuidaqkunapas sayk’unkumanmi. Chayraykun llapallanchis yuyaqkunataqa munakuywan yanapananchis hinallataq paykuna cuidaqkunatapas (Gál. 6:10). Manan simillanchiswanchu ninanchis: “Allillanña ripuychis, allinta p’istukuychis, saksaykuychis”, nispaqa, aswanmi may atisqanchisman hina yanapananchis (Sant. 2:15-17).

19. ¿Imamantan mana iskayanankuchu yuyaq wayqe pananchiskuna?

¹⁹ Diosqa munakushallanmi yuyaq wayqe pananchiskunataqa manaña ñawpaqpi hinachu payta servinku chaypas. Payqa anchatan tukuy sonqowan serviqninkunataqa valoran, manataqmi hinallatachu paykunataqa qhawarparinqa (Sal. 37:28; Isa. 46:4). Arí, Jehová Diosqa mana saqerparispan paykunataqa yanapaykunqa tukuy kawsasqanku p’unchaykuna (Sal. 48:14).

[Uranpi willakuykuna]

¿Imanispan kutichiwaq?

• ¿Imaraykun yuyaq wayqe pananchiskunata anchata munakunchis?

• ¿Imakunata ruwaspan yuyaq wayqe pananchiskunata yanapasunman?

• ¿Iman yuyaq wayqe pananchiskunata yanapanman allin kaqkunapi yuyaykunankupaq?

[Tapuykuna]

[23 paginapi fotokuna]

Llapallanchismi yuyaq wayqe pananchiskunataqa chaniyoqpaq qhawarinchis