Jehová Diosta tukuy sonqonchiswan servishallasun

‘Cheqaq kayniykipi purisaq. Qanta tukuy sonqo serviqta ruwaway.’ (SAL. 86:11.)

1, 2. a) Salmo 86:2, 11 textoq nisqan hina, ¿iman yanapawasun pruebakunapi tarikuqtinchis Diosta servishanallapaq? b) ¿Hayk’aqmantapachan kallpachakunanchis tukuy sonqowan Diosta servinapaq?

WAKIN wayqe pananchiskunaqa askha watakunan qatiykachaykunata aguantaranku, carcelpipas wisq’asqa karanku, qhepamanmi ichaqa urmaranku qolqe maskhayman. ¿Imaraykun chaykunaman urmaranku? Chayqa imayna sonqoyoq kasqankumantan karan. Salmo 86 capitulon Dios sonqo kayta tupachin tukuy sonqomanta Diosta serviywan. Chay salmota qelqaq Davidmi Diosmanta mañakuran: “Qan sonqon kani, waqaychaykuway, qanman hap’ipakuq kamachiykita qespichiway”, nispa. Nillarantaq: “Señor Diosníy, ñanniyki puriyta yachachiway, cheqaq-kayniykipi purinaypaq. Qanta tukuy sonqo serviqta ruwaway”, nispa (Sal. 86:2, 11).

² Manachus Jehová Diospi confiasunchis chayqa, huk ruwaykunan chiriyachiwasunman tukuy sonqowan munayninta ruwananchista. Mana allin munapayaykunaqa sonqonchispin pakasqa kashanman. Tukuy sonqonchiswanña Jehová Diosta kasukuranchis sasachakuykunapi tarikuspa chaypas, qonqayllamantan urmasunman Saqraq trampankunapi. Chayrayku, kunanmi kallpachakunanchis tukuy sonqonchiswan Jehová  Diosta servinanchispaq manaraq ima pruebapipas tarikushaspa. Biblian niwanchis: “Sonqoykitaqa allintapuni waqaychay”, nispa (Pro. 4:23). Chaymanta astawan yachanapaq qhawarisun iman sucederan Judamanta profetawan, paymi willaran Diospa huchachasqanta rey Jeroboamman.

‘Regalotapas qoykamusqayki’

3. ¿Imatan Jeroboam ruwan Diospa huchachasqanta uyarispa?

³ Rikushasunmanpas hina yuyaykusun. Diospa profetanmi willanña rey Jeroboamman Diospa huchachasqanta, chay reymi qori torillokuna yupaychayta qallarichiran Israelpa chunka ayllunkunapi. Reyqa sinchita phiñakuspan runankunata kamachin profetata hap’inankupaq. Diosmi ichaqa mana saqerparinchu profetanta. Reypa makinqa haywashaqtinmi ch’akirapun, qori torillo yupaychana altarpas chhallukapun. Chaymi reyqa profetaman kutirispa nin: “Valekuykin, Diosniyki Señor Diosmanta mañapuwanaykita, makiy qhaliyananpaq”, nispa. Profetataq Jehová Diosmanta mañakun, hinan reypa makinqa qhaliyapun (1 Reyes 13:1-6).

4. a) ¿Imaraykun profetaman reypa munachisqan huk prueba kanman karan? b) ¿Imanispan profeta kutichiran?

⁴ Chaymantataq Jeroboamqa Diospa profetanta nin: “Haku wasiyta risun imallatapas mikhuykamunaykipaq sumaq sonqotapas [otaq regalotapas] qoykamusqayki”, nispa (1 Rey. 13:7). ¿Imatan profeta ruwanan? ¿Rinanchu reypa wasinta, Diospa juciontaña chay reyman willaran chaypas? (Sal. 119:113.) Jeroboamqa qhapaq runan, payqa ancha valorniyoq regalokunatan amigonkunaman qonman. Sichus profeta sonqonpi munapayanman imaymanayoq kayta chayqa, reypa munachisqanqa hatun prueban paypaq kanman. Jehová Diosmi ichaqa profetata kamachiran: “Aman t’antatapas mikhunkichu, unutapas ukyankichu, amallataq risqayki ñannintapaschu kutimunki”, nispa. Chaymi profetaqa Jeroboamman kutichin: “Wasiykiq kuskannintaña qowankiman chaypas manan qanwanqa riymanchu, manataqmi kay cheqaspiqa t’antatapas mikhusaqchu, unutapas ukyasaqchu”, nispa. Profetaqa wak ñannintan Betelmanta kutipun (1 Rey. 13:8-10). ¿Imaynatan chay profetaq ruwasqan yanapawasunman Diosta tukuy sonqowan servinanchispaq? (Rom. 15:4.)

Necesitasqallanchiswan kawsasun

5. ¿Imanaqtinmi imaymanayoq kayta munay pruebaman churawasunman?

⁵ Imaymanayoq kayta munayqa tukuy sonqomanta Dios serviyninchistan pruebaman churan. ¿Confiashanchischu Jehová Diospi ima necesitasqanchistapas qowananchispaq? (Mat. 6:33; Heb. 13:5.) ¿Kawsasunmanchu imachus necesitasqallanchiswan? ¿Icha imaymanatachu ruwashanchis imaymanayoq kananchispaq? (Leeychis Filipenses 4:11-13.) ¿Imaymanayoq kayta munaspachu predicayninchista pisiyachiyta munanchis? ¿Dios serviytachu ñawpaqman churashanchis? Chay tapuykunaman imayna kutichisqanchisqa tukuy sonqowanchus Diosta servishanchis icha manachus chaymantan kanqa. Apóstol Pablon niran: “Imachus kapuqninwan sonqopas-sonqo kan chayqa, paypaqqa hatun qhapaq kayta tariy hinan Dios yupaychayqa. Kay pachamanqa manan imatapas apamurqanchischu, manallataqmi imatapas apasunchischu. Chayrayku, mikhunanchispaqpas p’achakunanchispaqpas kashaqtinqa, chaykunawanmi sonqopas-sonqo kashananchis”, nispa (1 Tim. 6:6-8).

6. ¿Imakunatan munachiwasunman? ¿Imakunatan tapukunanchis allinta decidinanchispaq?

⁶ Yaqapaschá llank’ananchispi jefenchis allin puestota munachiwasunman askha qolqeta ganananchispaq. Otaq pipas wak nacionman rinanchispaq allin pagasqa llank’anata munachiwasunman. Qallariypiqa yaqapaschá chaykunamanta nisunman: “Jehová Diosmi bendeciwashan”, nispa. Ichaqa manaraq decidikushaspan tapukunanchis: ¿Chaytapunichu munani? nispa. Astawanqa kayta tapukunanchis, ¿tukuy sonqoywanchu Jehová Diosta servishallasaq chay llank’ayta akllakuspay?

7. ¿Imanaqtinmi qhapaq kaykuna munapayayta sonqonchismanta wikch’unanchis?

⁷ Satanaspa kamachisqan pachapiqa sinchi mast’arisqan kashan imaymanayoq kayta munapayayqa (leeychis 1 Juan 2:15, 16). Saqraqa waqllichiytapunin munawanchis, chayraykun sonqonchista  qhawarikushanallanchis; yaqapaschá qhapaq kaykunata munapayay sonqonchispi saphichakushanman, chayta reparaspaqa, usqhayllan wikch’unanchis (Apo. 3:15-17). Jesusqa manan Satanasta kasuranchu kay pachata kamachinanpaq munachiqtin (Mat. 4:8-10). Qatikuqninkunatan Jesusqa niran: “Tukuy imaymana munapayaymanta cuidakuychis. Runaq kawsayninqa manan askha kaqniyoq kaspallachu allin kanqa”, nispa (Luc. 12:15). Tukuy sonqonchiswan Jehová Diosta servisun chayqa, paypin confiasunchis manataq ñoqanchispichu.

Yuyaq profetan engañaran

8. ¿Imaynapin Judamanta profeta wakmanta pruebapi tarikuran?

⁸ Sichus Judamanta hamuq profeta mana samarispa wasinman kutipunman karan chayqa, manan imapas payta pasanmanchu karan. Betelmanta lloqsiqtin hinan ichaqa wakmanta huk pruebapi tarikullarantaq. “Betelpi huk yuyaq profeta tiyarqan, paypa churinkunan payman willarqan Judamanta hamuq profetaq Betelpi tukuy ruwasqankunata.” Chaykunamanta yachaspan yuyaq profetaqa churinkunata niran: ‘Asnoyta caronapuwaychis Diospa profetanman aypanaypaq’, nispa. Qhepanta rispataq sach’a chakipi tiyashaqta profetata tariran, hinan niran: “Haku wasiyta, mikhuykamusun”, nispa. Judamanta profetan ichaqa kutichiran: “Manan qanwan kutiymanchu”, nispa. Chaymi yuyaq profetaqa llullakuspa niran: “Ñoqapas qan hina profetallataqmi kani. Chaymi Señor Diosqa huk angelninwan kamachiwarqan wasiyman qanta pusaspa mikhuchinaypaq ukyachinaypaq” ima, nispa (1 Rey. 13:11-18).

9. ¿Imaraykun manapuni allinchu llullakuy?

⁹ Manan yachanchischu imaraykuchus chay yuyaq profeta Diospa profetanta wasinman pusasqanta, ichaqa llullakuranmi. Yaqapaschá ñawpaqpi yuyaq profetaqa Diosta tukuy sonqowan serviran, ichaqa Diospa profetantan engañaran, chay ruwasqanqa manapunin allinchu karan (leeychis Proverbios 3:32). Llullakuqkunaqa manan allinpichu Jehová Dioswan kanku, hukkunatapas mana allintan ruwanku.

Yuyaq profetawanmi ripuran

10. ¿Imatan Diospa profetan ruwaran yuyaq profeta wasinman invitaqtin? ¿Imaynapin tukupuran Diospa profetan?

¹⁰ Judamanta profetaqa reparananmi karan yuyaq profetaq engañasqanta. Khaynatan tapukunan karan: “¿Imaraykutaq Jehová Diosri huk runamanraq angelninta kachamunman imatapas niwananpaq?”, nispa. Jehová Diosmantapas mañakunmanmi karan yuyaq profetaq nisqan cheqaqchus karan icha manachus chayta yachananpaq. Ichaqa manan chaytachu ruwaran. Aswanpas “Judamanta profetaqa yuyaq profetaq wasinta rispa chaypi mikhurqan ukyarqan” ima. Jehová Diosqa phiñakuranmi chay ruwasqanmanta.  Kay profetataqa huk leonmi ñanpi wañuchiran Judaman kutipushaqtin. ¡Diospa profetan kashaspa chhaynapi tukupusqanqa ancha llakikunapaqmi! (1 Rey. 13:19-25.) *

11. ¿Imaraykun profeta Ahíya allin ejemplo karan?

¹¹ Profeta Ahiyan ichaqa machuyanankamapas tukuy sonqonwan Diosta serviran, paymi Diospa kamachisqanta kasukuspa Jeroboamta rey kananpaq hawiran. Profeta Ahíya yuyaqña kashaqtin ñawinpas manaña rikupuqtinmi, Jeroboamqa esposanta payman kacharan onqosqa churinwan imachus sucedenanta yachananpaq. Profetaqa mana manchakuspan willaran churinpa wañupunanmanta (1 Rey. 14:1-18). Ahiyaqa askha bendicionkunatan Jehová Diosmanta chaskiran, Diospa Simin qelqakunanpaqpas yanapakuranmi. ¿Imaynatan yanapakuran? Paypa qelqankunan qhepaman sacerdote Esdrasta yanaparan Bibliaq wakin libronkunata qelqananpaq (2 Cró. 9:29).

12-14. a) ¿Imatan yachanchis Judamanta profetata sucedesqanwan? b) Willay, ¿imaraykun allinpuni ancianokunaq yuyaychawasqanchispi yuyaymanay, manaraq imatapas decidishaspa Diosmanta mañakuypas?

¹² ¿Imaraykun Judamanta profeta mana Diosta tapuranchu yuyaq profetaq wasinta rinanpaq? Bibliaqa manan chaymanta willanchu. Yaqapaschá kay profetaqa yuyaq profetaq nisqanta uyariyta munaran. ¿Imatan chaymanta yachanchis? Jehová Diospa kamachikuynintaqa imaña kaqtinpas kasukunanchismi, payqa chanillantan imatapas kamachiwanchis.

¹³ Wakinqa, ima yuyaychaytapas chaskispankuqa munasqallankutan uyarinku. Kaypi yuyaykuy: huk wayqenchismanmi allin llank’anata munachinku, ichaqa chay llank’anata chaskiqtinqa manañan tiempon kanmanchu familianpaq, Diosta servinanpaqpas. Payqa ancianomanmi rin yuyaychayta chaskinanpaq, ancianotaq kayta nin: “Qanmi decidinayki familiaykita imayna manteninaykitaqa, ichaqa kaytan reparanayki: chay llank’ayta chaskinki chayqa manañan tiempoyki aypasunkichu Diosta servinaykipaq”, nispa. ¿Imatan chay wayqenchis ruwanan? ¿Qallariypi ancianoq nisqallanpichu yuyaykunan? Icha yuyaykunallantaqchu qhepaman yuyaychasqanpipas. Astawanqa yuyaykunan chay llank’ayta chaskispa imaynata Diosta servinqa chaypin.

¹⁴ Kaymantawan yachasunchis: huk pananchismi mana iñiq qosanmanta t’aqakuyta munan, chaypaqqa ancianotaraqmi tapun. Ancianotaq nin: “Qanmi chaytaqa decidinayki”, nispa, chaymantataq Bibliaq yuyaychasqanta qhawachin (1 Cor. 7:10-16). ¿Allintachu chay pananchis ancianoq nisqanpi yuyaymananqa? ¿Icha decidikunñachu qosanmanta t’aqakapunanpaq? Manaraq imatapas decidishaspan Jehová Diospa yanapaynintaraq maskhanan, allintataq yuyaymananan Bibliaq yuyaychasqanpi.

Huch’uyaykukuq kasun

15. ¿Imatan yachanchis profetaq huchallikusqanmanta?

¹⁵ ¿Imatawanmi yachasunman Judamanta profetaq huchallikusqanmanta? Proverbios 3:5 nin: “Tukuy sonqoykiwan Señor Diosman hap’ipakuy, amataq qan kikiykiq yuyayniykimanqa k’askakuychu”, nispa. Ñawpaqpi hina Jehová Diospi hap’ipakunanmantaqa paypa yuyaykusqallanpin chay profetaqa confiaran. Huchallikusqanraykun wañupuran mana allinpaqtaq Jehová Diospas qhawariran. Chaymantan yachanchis Diosta tukuy sonqowan huch’uyaykukuspa serviyta.

16, 17. ¿Imakunan yanapawasun Diosta tukuy sonqowan servishanallapaq?

¹⁶ Sonqonchispiqa manan confiasunmanchu, Jeremías 17:9 nin: “Runaq sonqonqa tukuy imamantapas  aswan q’otukuqmi, millay ruwaqtaq kanpas”, nispa. Tukuy sonqonchiswan Jehová Diosta kasukushanallapaqqa sapa kutillan kallpachakunanchis ñawpa kawsayninchista wikch’upunanchispaq, mana chayqa hatunchakuq runamanmi tukupusunman kikillanchispitaq confiasunmanpas. Chaymantapas ‘Diosman rikch’akuq kamasqa mosoq runawanmi p’achakunanchis, chaymi rikukun chaninta kawsaypi cheqaq ch’uya kawsaypiwan’ (leeychis Efesios 4:22-24).

¹⁷ Proverbios 11:2 nin: “K’umuykukuqmi [...] yachayniyoq kapunqa”, nispa. Sichus huch’uyaykukuq kasun Jehová Diospitaq hap’ipakusunpas chayqa, allinkaman ima decidisqanchispas kanqa. Mayninpiqa pisi kallpayapusunmanmi sasachakuykunapi tarikuspa, mana allinpaqtaq imatapas qhawarisunman (Pro. 24:10). Yaqapaschá unay tiempoña Diosta servispa yuyaykusunman: “Ñamá ñoqaqa allintaña Diospaq llank’aruni kunanqa hukkunañataq llank’achunku”, nispa. Hinaspapas hukkuna hinapaschá kawsayta munasunman Dios serviypi mana afanakuspalla. Ichaqa sichus tukuy atisqanchista ‘kallpachakusun’, ‘Señorpa llank’ananpipas aswan-aswanta llank’asun’ chayqa, allintan sonqonchista waqaychasun (Luc. 13:24; 1 Cor. 15:58).

18. ¿Imatan ruwasunman sasachakuypi tarikuspa allinta decidinapaq?

¹⁸ Mayninpiqa yaqapaschá sasachakuykunapi tarikuspa mana yachasunmanchu ima decidiytapas. ¿Munasqanchisman hinallachu imatapas decidisun? Chhaynapi tarikuspaqa Jehová Diospa yanapaynintan mañakunanchis. Santiago 1:5 nin: “Mayqenniykichispas pisi yachayniyoq kashan chayqa, [...] askhatapuni qoq Diosmanta mañakuchun, hinan Diosqa payman yachayta qonqa”, nispa. Hanaq pacha Taytanchisqa imatapas allinta decidinanchispaqmi santo espiritunwan yanapawasun (leeychis Lucas 11:9, 13).

Decidikusun tukuy sonqowan servishanallapaq

19, 20. ¿Ima ruwananchispaqmi decidisqa kashananchis?

¹⁹ Diosmanta Salomón karunchakapuqtinqa sasa tiempokunan qallariran, Israel runakunaq Diosta tukuy sonqonkuwan serviyninkun pruebaman churasqa karan. Askhaña pisiparanku chaypas, wakinqa tukuy sonqonkuwanmi Jehová Diosta serviranku.

²⁰ Ñoqanchispas imaymana pruebakunapiña tarikuspapas wakin Israel runakuna hinan tukuy sonqonchiswan Diosta servisunman. Chhaynaqa, Jehová Diosta tukuy sonqonchiswan servishallasun, payqa manan hayk’aqpas saqerpariwasunchu (2 Sam. 22:26).

[Uranpi willakuy]

¿Imanispan kutichiwaq?

• Sichus reparanchis imaymanayoq kayta munapayay sonqonchispi saphichakushasqanta chayqa, ¿imaraykun usqhaylla wikch’unanchis?

• ¿Iman yanapawasun Jehová Diosta tukuy sonqowan servinapaq?

• ¿Imaynatan huch’uyaykukuq kay yanapawanchis Jehová Diosta tukuy sonqowan servishanallapaq?

[Tapuykuna]

[13 paginapi fotokuna]

¿Sasachu qanpaq pruebakunata atipay?

[15 paginapi fotokuna]

¿Allintachu yuyaymananki Bibliamanta yuyaychaykunata chaskispayki?