Jesuspa yachachiyninkuna

¿Imaynan kananchis runamasinchispaq?

¿Imanaqtinmi sumaq sonqo kananchis?

¿Imatan ruwasunman pipas phiñachiq hina imatapas niwaqtinchis otaq ruwawaqtinchispas? Jesús hina kayta munanchis chayqa, llapapaqmi sumaq sonqo kananchis mana allintaña ruwawaqtinchispas cheqnikuwaqtinchispas. Jesusmi niran: “Munakuqnillaykichistachus munakunkichis chayqa, ¿ima allintan ruwankichis? Huchasapakunapas chay hinataqa ruwankun [...]. Munakuychis awqaykichiskunata [enemigoykichiskunata], [...] hinaspan Ancha Hatun Diospa wawankuna kankichis. Payqa mana reqsikuqninkunapaq, mana allinkunapaqpas sumaq sonqon”, nispa (Lucas 6:32-36; 10:25-37).

¿Imaraykun pampachaq kananchis?

Huchallikuspanchisqa munanchismi Dios pampachawananchista. Jesuspas yachachiranmi Diosmanta mañakuqtinchis ‘pampachaykuwayku huchaykumanta’ ninanchista (Mateo 6:12). Chaymantapas nillarantaq: “Runakunatachus contraykichispi huchallikusqankuta pampachankichis chayqa, qankunatapas hanaq pachapi kaq Yayaykichisqa pampachallasunkichistaqmi. Ichaqa contraykichispi runakunaq huchallikusqankuta mana pampachankichischu chayqa, manallataqmi Yayaykichispas huchallikusqaykichiskunata pampachasunkichischu”, nispa (Mateo 6:14, 15).

 ¿Imaynatan familianchiswan kusisqa kawsasunman?

Jesús manaña kayk’aqpas casarakuranchu chaypas, askhatan familiakunaqa paymanta yachankuman. Qhawasunchis imaynatan Jesuspa wakin yachachikuyninkuna ruwasqankunapas yanapawasunman chayta.

1. Qosaqa tukuy sonqowanmi señoranta munakunan. Jesusqa llapa runakunatan munakuran, chaymantan qosakuna allinta yachankuman. Paymi yachachisqankunaman niran: “Mosoq kamachikuytan churapuykichis: Qankunapura munanakuychis”, nispa. Tukuy sonqowan munanakunankupaqtaq niran: “Imaynan ñoqapas munakuykichis, ahinata qankunapas munanakuychis”, nispa (Juan 13:34). ¿Imaynatan qosakuna Jesuspa nisqanta kasukunkuman? Biblian nin: “Qosakuna, esposaykichista munakuychis, imaynan Cristopas iglesiata [otaq iñiqkunata] munakuspa [paykunarayku] wañurqan hinata [...]. Chay hinatan qosakunapas esposankutaqa munakunanku, kikinkuq cuerponkuta hina. Esposanta munakuqqa pay kikintan munakun. Manan pipas pay kikinpa cuerpontaqa hayk’aqpas cheqnikunchu, aswanpas mikhuchispanmi allinta uywan, imaynan Cristopas iglesiapaq ruwan hinata”, nispa (Efesios 5:25, 28, 29).

2. Casarasqakunaqa manan hayk’aqpas wasanchanakunankuchu. Wasanchaqkunaqa Dios contra huchallikunku, familiankumanpas sinchi llakikuytan apamunku. Jesusmi niran: “¿Manachu Diospa Simin Qelqata leerqankichis? [...] Diospa Simin Qelqan nin: ‘Chayraykun runaqa taytantapas mamantapas saqepunqa, hinaspan warminman hukllachaykakapunqa, huk cuerpollataq kapunqaku’, nispa. Chay hinaqa, manan iskayñachu kanku aswanpas huk cuerpollañan. Chayrayku, runaqa Diospa hukllachasqantaqa ama t’aqachunchu, nispa. [...] Chayraykun ñoqaqa niykichis: Pipas warminmanta ima hawallapas t’aqakunman wak qhariwan mana wasanchashaqtin, hinaspa wak warmiwan casarakapunman chayqa, wasanchay huchatan ruwan”, nispa (Mateo 19:4-9).

3. Wawakunaqa kasukunankun tayta mamankuta. Jesusqa mana huchayoqña karan chaypas tayta mamantaqa kasukuranpunin, paykuna huchayoqña karanku chaypas. Bibliaq nisqan hina Jesús 12 watanpi kashaspan paykunawan uraykuspa Nazaret llaqtaman kutipuran, ‘paykunata kasukuspataq tiyarqan’ (Lucas 2:51; Efesios 6:1-3).

¿Imaraykun Jesuspa yachachisqanta hina ruwananchis?

Jesusmi qatikuqninkunata niran: “Kaykunata entiendespachus ruwankichis chayqa, kusisamiyoqmi kankichis”, nispa; chaywanmi nisharan yachachisqanman hina ruwanankupaq (Juan 13:17). Jesuspa yachachisqan hina, hukkunapaq allinta ruwapusun chayqa sut’itan runakuna rikunqaku cheqaq cristiano kasqanchista. Paymi niran: “Chhaynapin ñoqaq yachachisqaykuna kasqaykichista llapa yachanqaku qankuna munanakuqtiykichis”, nispa (Juan 13:35).

Astawan yachayta munanki chayqa, ¿Imatapunin Biblia yachachin? * nisqa libropi 14 capitulota qhaway.

[Uranpi willakuy]

[16 paginapi dibujo]

Llapan qolqenta tukuq runamanta Jesús willasqanqa sumaq sonqo kaytan pampachakuq kaytawanmi yachachiwanchis (Lucas 15:11-32)

[17 paginapi foto]

Casadokunaqa manan wasanchanakunankuchu