¿Imaynan Hanaq pachapi kaq yayanchis?

ASKHA runakunan yachanku “Yayayku” nisqa rezakuyta, chaytan Jesusqa yachachiran qatikuqninkunaman (Mateo 6:9-13). Sapa kuti chayta rezakuqtinkuqa “Yayayku” nispan Diosta waqyakunku. Ichaqa, ¿allintachu chay runakuna Diosta reqsinku?

Qanri, ¿Allintachu Diosta reqsinki? ¿Amigoykita hinachu Diosta qhawarinki? ¿Willakunkichu payman llakikuyniykimanta kusikuyniykimantapas? ¿Imataq Diosta reqsiyri?

“Jehová nisqan sutinqa”

Wawakunaqa chayllaraq rimayta yachashaspaqa “papáy” nispallan taytankuta ninku. Wiñasqanman hinañan sutinta yachanku, imayna runamanta reqsisqa kasqantapas, ancha allinpaqtaq payta qhawarinku. Ñoqanchisri, ¿yachanchischu hanaq pachapi kaq Yayanchispa sutinta? ¿Yachanchischu imatan paypa sutin yachachiwanchis chayta?

Askhaña Yayaykuta rezakuspa “sutiyki much’asqa kachun” ninku chaypas, manan yachankuchu Diospa sutinta. Dios kasqantaqa yachasunman ch’ak tutapi ch’askakunata, hatunkaray orqokunata, imaymana t’ikakunata qhawaspallan; sutinta yachananchispaqmi ichaqa Bibliata qhawananchis, chaypin qelqasqa kashan: “Jehová nisqan sutinqa”, nisqa (Éxodo 15:3, NM).

Diosqa munanmi sutin yachananchista, ¿imarayku? Sutinyá yachachiwanchis pay imayna kasqanta. Jehová sutiqa “Payqa [ima munasqanpas] kanmanmi” ninanmi. Yuyaykusqanta hunt’ananpaqqa ima necesitakusqanmanpas tukullanmanmi. Chayta entiendenanchispaq rimasunchis huk taytamanta. Payqa familianta allinta uywananpaqmi allin llank’aq, yuyaychaq, juez, allipunachiq, cuidaq, yachachiq ima kapun; chaytaqa ruwan familianpi kaqkuna necesitasqanman hina. Chhaynallataqmi Jehová Diospas; payqa, sutin nisqan hina, ima yuyaykusqantapas hunt’allanmanmi serviqninkunaq allinninpaq, manan imapas yuyaykusqantaqa yanqapi tukuchinmanchu.

Qhawasunchis imaynatan munakuq Diosninchis, sutin nisqanman hina, ima munasqanpas kanman chayta. Chhaynapin allinta yachasun Diosninchis imayna kasqanta, payman imayna asuykunanchistapas.

“Thak-kayta qowaqninchis munakuwaqninchis Dios”

Apóstol Pablon Kamaqninchismanta niran: “Thak-kayta qowaqninchis munakuwaqninchis Dios[mi]”, nispa (2 Corintios 13:11). ¿Imaraykun chayta niran? Chaypaq yuyarisunchis Jesucristoq nisqanta, paymi niran: “Diosqa anchatapunin runakunata munakurqan, chaymi sapan Churinta kachamurqan, pipas paypi iñiqqa ama wañunanpaq, aswanpas wiñay kawsayniyoq kananpaq”, nispa (Juan 3:16). Qhawasqanchis hina, runakunata anchata munakuspanmi Diosqa Churinta kachamuran ñoqanchisrayku wañunanpaq. Llapan Cristopi iñiqkunaqa wiñay kawsaymanmi aypankuman, huchaq apamusqan nanaykunamanta ñak’ariykunamantapas  kacharichisqan kankuman. Chaymi apóstol Pablo niran: “Huchaq pagayninqa wañuymi, Diospa qokuyninmi ichaqa Señorninchis Jesucristopi wiñay kawsay”, nispa (Romanos 6:23). Chay hinaqa, tukuy sonqonchiswan Diosta munakunanchis, asuykunanchispas.

Diosqa manan llapan runakunallatachu munakun; sapanka serviqninkunatapas munakunmi. Mana kasukuq Israel runakunamanmi Moisés niran: “¿Chaywanchu Señor Diosta kutichinkichis, mana yuyayniyoq asno runakuna? Payqa taytaykichismi, kamaqniykichismi, paymi suyuman tukuchirqasunkichis”, nispa (Deuteronomio 32:6). ¿Imatan chay nisqanmanta yachanchis? Diosqa munakushallaranmi Israel runakunata, askhapiña pantaranku chaypas. Chaymantapas kusisqa kawsanankupaq, paywan allinpi kawsanankupaqpas tukuy necesitasqankutan qoran.

Lliwmi imaymana llakikuykunapi tarikunchis, chaykunan mayninpiqa pisipachiwasunman. Chhayna llakikuypi tarikuqtinchisqa munanchispunin pipas yanapawananchista. ¿Pitaq yanapawasunman? Jehová Dios. Bibliaq willasqan hina, paymantaqa manan pipas aswan munakuq, aswan allin yuyaychaq, aswan allin yanapaqqa kanmanchu. Bibliaqa willawallanchistaqmi imarayku ñak’ariykuna kasqanta, imaynata chaykuna aguantanatapas. Imaynan munakuq taytaqa munakuywan wawanta hampin laq’akuspa k’irikuqtin, chay hinatan Jehová Diospas necesitasqanchis rato yanapawanchis. Payqa tukuy atiyniyoqmi, munantaqmi paypi iñiqkuna yanapaytapas (Isaías 59:1).

Anchata munakuwaqtinchismi Diosqa ‘mañakusqanchista uyarin’ (Salmo 65:2). ¿Imaraykun chayta ninchis? Apóstol Pablon niran: “Ama imamantapas llakikuychischu, aswanpas tukuy ima necesitasqaykichistapas Diosmanta mañakuychis, rogakuywan mañakuspaykichistaq Diosman graciasta qoychis. Hinan Diosqa thak-kayta qosunkichis runakunaq mana aypay atisqan thak-kayta, chay hinapin sonqoykichistapas yuyayniykichistapas Jesucristopi Diosqa waqaychanqa”, nispa (Filipenses 4:6, 7). Qhawasqanchis hina, Jehová Diosqa munakuywanmi “runakunaq mana aypay atisqan thak-kayta” qowanchis. Chay thak-kayta qowananchispaqqa tukuy sonqowan paymanta mañakunanchis, Bibliaq nisqanman hinataq ruwananchispas.

“Diosmi tukuy imaymana yachaqqa”

Biblian nin Jehová Dios “tukuy imaymana [yachaq]” kasqanta. Paymi aswan allintaqa yachan runakuna imayna kamasqa kasqanchista, imakuna necesitasqanchistapas (Job 36:4; 1 Samuel 2:3). Chayraykun Moisesta kamachiran ninanpaq: “[Diosqa] munarqanmi yachanaykichista ‘runaqa mana t’antallawanchu kawsasqanta, aswanpas Diospa nisqan simikunawan kawsasqanta’”, nispa (Deuteronomio 8:3; Mateo 4:4). Chay hinaqa, kusisqa kawsananchispaqqa manan imaymanayoq kaymantachu.

Simin Qelqapin Kamaqninchisqa allinninchispaq yachachiwanchis. Chayrayku Bibliaq nisqanta estudiaspa chayman hina ruwaqtinchisqa, “Diospa llapa siminwanmi” yanapachikushanchis. Yachasunchis Zuzanna sutiyoq cristianamanta. Paymi nin: “Qosaywan kuskan Bibliata leeyku, cristianomasiykuwan huñunakuyku, runakunamanpas willamuyku Bibliamanta yachasqaykuta; chaykuna ruwasqaykuraykun kusisqa sumaqta kawsakuyku. Dios yachachiwasqankuraykun allinta yachayku imapaq kawsanaykuta,  sumaqtataq huk nisqalla kawsaykupas”, nispa.

¿Qanri imaninkitaq chaymanta? ¿Munawaqchu Dios yachachinasuykita pusanasuykitapas? Sichus Bibliata estudiaspa Diospa munayninman hina kawsanki chayqa, paymi tukuy imaymanapi yanapasunki (Hebreos 12:9).

“Qanqa Diosniymi Qespichiqniymi kanki”

Kay tiyasqanchis pachapiqa sinchi maqanakuy guerrakunapas kan. Manan pipas yachanchu imakunaraqchá kanqa chayta. Llaqtaykipi guerrakuna kan chayqa, maytachá munashanki chaykuna tukukunanta. Huk llaqtakunapi runakunapas maytachá munankuman runa wañuchinakuy, wakchayay, terrorismo nisqapas tukukunanta. Anchatan chaykunamanta waqaychasqa kayta munanchis. ¿Pitaq chaykunamanta hark’awasunman?

Biblian nin: “Señor Diosqa qaqa sayaq pukara hinan, chaymanmi chanin runaqa phawan, allin hark’aykusqataqmi kashan”, nispa (Proverbios 18:10). Jehová Diosman hap’ipakuqqa yachanmi ñawpaq tiempopi serviqninkunata Dios hark’aykusqanta, qhepa tiempomanpas kaqllatataq ruwananta. Jehová Diosqa askha kutipin llaqtanta hark’aykuran. Huk kutinmi Israel llaqtanrayku maqanakuspa faraonta, carretankunata, ejercitonkunatawan unuwan millp’uchiran. Chhaynapin rikuchiran hunt’aq kasqanta, llakipi kaqkunamanta yuyarikuq yanapaq kasqantapas (Éxodo 15:1-4).

Ñoqanchispas hark’aykusqa, qespichisqa kananchispaqqa Jehová Diosmanmi hap’ipakunanchis. Chaytan rey Davidpas ruwaran sinchi sasachakuykunapi tarikuspa. Paymi Jehová Diosman niran: “Qanqa Diosniymi Qespichiqniymi kanki”, nispa (Salmo 25:5). Apóstol Pedropas yacharanmi Jehová Dios chhayna kasqanta, chaymi niran: “Señorqa yachanmi payta manchakuqkunata sasachakuymanta qespichiyta”, nispa (2 Pedro 2:9).

Llapan paypi iñiqtan Jehová Diosqa prometen: ‘Reqsiwasqaykiraykun waqaychasayki’, nispa (Salmo 91:14). Kunan tiempopipas Diosta serviqkunaqa rikunkun chay promesa hunt’akusqanta. Yachasunchis Polonia llaqtayoq Henryk sutiyoq cristianomanta, payqa 70 wata hinañan tukuy sonqowan Jehová Diosta servishan imaymana sasachakuykunapiña tarikuran chaypas. Chunka soqtayoq watallanpiraq kashaqtinmi, papanta presota aparanku campo de concentración nisqa carcelman (chaypa sutinmi karan Auschwitz nisqa). Paytawan kurak wayqentawan huk reformatorio nisqa wasiman aparanku yuyayninta cambiachinankupaq. Chay wasimantataq presota aparanku askha campo de concentración nisqakunaman, llank’achinankupaq. Chay p’unchaykunata yuyarispan nin: “Sinchi sasachakuypi tarikuqtiypas Jehová  Diosqa manan hayk’aqpas saqerpariwaranchu. Askha kutitaña wañuchiwayta munaqtinkupas Jehová Diosqa yanapawaranpunin aguantanaypaq”, nispa. Qhawasqanchis hinapas Jehová Diosqa serviqninkunatan kallpachan allin iñiyniyoq kanankupaq aguantanankupaqpas.

Pisi tiempollamantan Jehová Diosqa paypi iñiqkunata qespichinqa kacharichinqa ima. Paymi nin: “Ñoqallapunin Señorqa kani, ñoqallapunin qespichiqpas kani”, nispa (Isaías 43:11). ‘Hatun maqanakunan p’unchaypin’ mana allin runakunata wañuchinqa, chanin runakunallatataq kay pachapi qhepachinqa (Apocalipsis 16:14, 16; Proverbios 2:21, 22). “Llamp’u sonqokunan [...] kay hallp’ata chaskinqaku, sumaq thak-nisqataq tiyakunqaku” (Salmo 37:11).

“Diospa wawankuna[n]” kasunman

Profeta Malaquiaspa tiemponpin Israel runakuna Jehová Diosta ‘Taytayku’ niqku. Ichaqa manan taytankuta hinachu respetaranku, munakurankupas; aswanmi qhelli t’antata, ñawsa wist’u animalkunata sacrificiopi haywaranku. Chaymi Diosqa paykunata niran: “Ñoqaqa Taytaykichismi kani, ¿imanaqtintaq mana yupaychawankichischu?”, nispa (Malaquías 1:6).

Ama chay runakuna hinachu kay, aswanpas kallpachakuy Jehová Diosta allinta reqsinaykipaq payman asuykunaykipaqpas. Jesuspa qatikuqnin Santiagon niran: “Diosman asuykuychis, hinan payqa asuykamusunkichis”, nispa (Santiago 4:8).

Sichus Jehová Diosta Yayanchista hina qhawarinchis chayqa, hatunchananchismi paypa kamachisqantataq tukuypi hunt’ananchis. Chayta ruwanapaq kallpachakusunchis chayqa, manan Jehová Diosqa qonqawasunchu. Aswanmi yanapawasun mosoq pachaman chayananchispaq, chaypiqa “manan wañuypas kanqañachu, manallataqmi llakikuypas, waqaypas, nanaypas kanqañachu” (Apocalipsis 21:4). Chay tiempo chayamuqtinmi kasukuq runakunaqa ‘ismuqpaq nisqa kaymanta kacharichisqa kanqaku, chaymi Diospa wawankunawan kuska kacharichisqa hatunchayninpi kanqaku’ (Romanos 8:21).

[4 paginapi willakuy]

Diosqa munanmi Jehová sutinta yachananchista, chay sutiqa “Payqa [ima munasqanpas] kanmanmi” ninanmi

[5 paginapi willakuy]

“Sinchi sasachakuypi tarikuqtiypas Jehová Diosqa manan hayk’aqpas saqerpariwaranchu.” (HENRYK)

[6 paginapi willakuy]

“Qosaywan kuskan Bibliata leeyku, cristianomasiykuwan huñunakuyku, runakunamanpas willamuyku Bibliamanta yachasqaykuta; chaykuna ruwasqaykuraykun kusisqa sumaqta kawsakuyku.” (ZUZANNA)