¿Imakunan kanqa pisi tiempollamanta?

QHEPA tiempopi imaymanakuna kananmanta rimashaspan apóstol Pedro niran: “Diospa prometewasqanchis mosoq hanaq pachata mosoq hallp’a pachatawan[mi] suyashanchis, chaykunapiqa tukuy imapas chaninkaman kanqa”, nispa (2 Pedro 3:13). Profeta Isaiasqa ñan willasqaña ‘mosoq hanaq pachamanta mosoq hallp’a pachamantawan’ (Isaías 65:17; 66:22). Chay profeciamanta rimasqanwanmi Pedroqa rikuchisharan qhepa tiempopi hunt’akunanraq kasqanta.

 Pedroq willasqanmanta 32 wata hinaña pasaruqtinmi, apóstol Juanman Dios mosqoypi hina rikuchiran chay ‘mosoq hallp’a pachata’, chayllamanmi rikuchillarantaq Dios kay pachata kamachikamuqtin runakunapaq imakuna ruwananmanta (Apocalipsis 21:1-4). Ñawpaqpi yachamusqanchis hina, Jesuswan apóstol Pablowan kay tiempopaq imaymanakuna willasqankuqa ñan llapanña hunt’akushan. Chaykunan rikuchiwanchis Dios kay pachata gobiernananpaqña kashasqanta. Ichaqa, ¿yachanchischu chay mosoq pachapi imayna kawsay kananta? Chaypaq Isaiaspa qelqasqankunata qhawarisun.

¿Imaynan kanqa chay mosoq pacha?

Llapa runakunan paykunapura sumaqpi kawsanqaku Diosta servispa. “Paykunaqa manañan awqa-tinkuypaq [otaq guerrapaq] yachaqanqakuñachu, manan mayqen suyupas huk suyuwan maqanakunqañachu, espadankumantapas yapuna rejakunatan ruwakapunqaku, lanzankunamantapas ichhunakunatan ruwakapunqaku.” (Isaías 2:2-4.)

Runakunawan llapa animalkunawanmi sumaqta kawsanqaku. “Lobopas borregopas kuskan tiyanqaku, uturunkupas malta cabrachapas kuskan puñunqaku, torillowan uña leonwanpas kuskan mikhunqaku, huk erqetaq michiqninku kanqa. Wakawan china ukumariwanqa kuskan mikhunqaku, uñankupas kuskallan puñunqaku, leonqa toro hinan q’achuta mikhunqa [...]. Imaynan lamar-qochaqa unuwan hunt’a kashan, chay hinan kay pachaqa Señor Diosta reqsiq runakunawan hunt’a kanqa, chayraykun Diospa lliw ch’uya orqonpiqa manapuni chhikan mana allinpas kanqachu.” (Isaías 11:6-9.)

Askhan mikhuypas kanqa. “Sión orqo patapin Tukuy-atiyniyoq Señor Diosqa llapan suyukunapaq wakichinqa [otaq preparanqa] sumaq añaka mikhunakunata, sumaq allinnin vinokunata, sumaq misk’i mikhuykunata, sumaq allinnin ukyanakunatawan.” (Isaías 25:6.)

Manan pipas wañunqachu. “Señor Diosqa wiñaypaqmi wañuytapas chinkachinqa, llapaq ñawinmantan waqaytapas ch’akichinqa, llapan pachantinpi imaymana llakikunawan llaqtanpa p’enqakuynintan chinkachipunqa. Señor Diospunin chayta nin.” (Isaías 25:8.)

Wañupuqkunan kawsarimpunqaku. “Wañuqniykikunan kawsarinqaku, ayaykikunan sayarinqaku. ¡Hallp’api puñuqkuna, wakmanta rikch’ariychis, hinaspa kusikuymanta qaparkachaychis! [...] Wañusqakuna[n] hallp’amanta paqarimunqaku.” (Isaías 26:19.)

Cristoqa allintan juzganqa. “Manan payqa ñawinpa rikusqanman hinallachu juzganqa, manataqmi rimayta uyarispallachu huchachanqapas. Chanin-kayman hinan sarunchasqakunata chaninchanqa, suyupi wakchakunaq uyarichikusqanmanmi sayakunqa.” (Isaías 11:3, 4.)

Ñawsapas roqt’upas qhaliyapunqakun. “Hinan ñawsakunapas qhawarinqa, roqt’ukunapas uyarinqa.” (Isaías 35:5.)

 Mana hayk’aq wiñasqan pampapipas imaymanakunan wiñanqa. “Ch’inneqpas ch’aki pampapas kusikunqan, wakmanta t’ikarispan q’ochukunqa. Hamanq’ay hinan t’ikarinqa, kusikuymanta takispan q’ochukunqa.” (Isaías 35:1, 2.)

‘Mosoq hallp’a pachan’ kanqa. Jehová Diosmi niran: “Ñoqaqa mosoq hanaq pachatan [cielomantapacha gobiernaq mosoq gobierno] mosoq hallp’a pachatawanmi [Diospa allinpaq qhawarisqan runakuna] kamasaq, ñawpaq sucedesqankunaqa qonqasqan kapunqa, manañan yuyarisqapasñachu kanqa. Ñoqan Jerusalenta chaypi tiyaq runakunatapas kamasaq, chaypin kusikunqakupas kusichinqakupas, chaykunatan kamasaq, chayrayku, wiñaypaq kusikuychispas q’ochukuychispas [...]. [Chay mosoq pachapi tiyaqkunaqa] wasitan wasichanqaku, hinaspan chaykunapi tiyanqaku, uvastan plantanqaku, chaypa rurusqantan mikhunqaku. Manan wakpa tiyananpaqchu wasichanqaku, manan wakpa mikhunanpaqchu mallkinqaku. Mallkiq kawsasqanta hinan llaqtayqa unayta kawsanqa, akllakusqaykunaqa llank’asqankuq rurusqantan kusisqa mikhunqaku. Manan yanqachu llank’anqaku, manan wawankuqa mana wañunanpipaschu wañunqa, ñoqa Señor Diosmi paykunatapas mirayninkutapas saminchashallasaqpuni [qhawarishallasaqpuni]. Manaraq waqyakamushaqtinkun ñoqaqa kutichimusaq, rimashallaqtinkuraqmi ñoqaqa uyarisaq”, nispa. Chaymantapas nillarantaqmi: “ Ñoqan mosoq hanaq pachatapas mosoq hallp’a pachatapas kamasaq, chaykunan ñawpaqeypi wiñaypaq kashallanqapuni, chay hinan mirayniykichispas sutiykichispas kashallanqapuni”, nispa (Isa. 65:17-25; 66:22).

Qhepa tiempopi kawsayqa sumaqmi kanqa.

Manan Isaiasllachu willaran hamuq tiempopi sumaq kawsay kananmantaqa. Bibliapiqa yaqa llapanpin willakushan Dios Cristowan kay pachata gobiernachiqtin imakuna kananmanta. * ¿Munawaqchu kay pacha paraisoman tukupuqtin chaypi kawsayta? Biblian willawanchis hamuq tiempopi Dios imakuna ruwananmanta, hinallataq chaypi kawsanaykipaq imakuna ruwanaykimantawan. Chaykunamanta yachayta munanki chayqa, Jehová Diospa testigonkunan yanapasunkiman.

[Uranpi willakuy]

[8 paginapi dibujo]

Llapan runakunan sumaqta kawsanqaku paykunapura, hinallataq animalkunawanpas

[9 paginapi dibujo]

Wañupuqkunan kawsarimunqaku

[10 paginapi dibujo]

Kay pachan munay paraisoman tukupunqa