Jesús hina ‘Saqraq contranpi qaqata sayaychis’

‘Saqraq contranpi qaqata sayaychis, chaymi payqa qayllaykichismanta ayqekapunqa.’ (SANT. 4:7.)

1. ¿Imatan Jesús yacharanña manaraq kay Hallp’aman hamushaspa?

JESUCRISTOQA allintan yacharan kay Hallp’aman hamuqtin Saqra pay contra hatarinanta. Yachallarantaqmi Edén huertapi Saqraman Diospa kay nisqanta: “Qantawan warmitawanmi [hanaq pachapi Diospa llaqtan] cheqninachisqaykichis, mirayniykitawanpas paypa miraynintawanpas, mirayninmi [Jesucristo] umaykipi t’ustusunki, qantaq talonninpi kaninki” (Gén. 3:14, 15; Apo. 12:9). Jesustaqa Saqra talonninpi kaniran kay Hallp’api wañuchiqtinku. Ichaqa pisi tiempollapaqmi wañuran, Jehová Diosmi hanaq pachaman kawsarichipuran. Satanasmi ichaqa umanpi t’ustusqa kanqa chaymantaqa manan hayk’aqpas hatarimunqañachu (leeychis Hechos 2:31, 32; Hebreos 2:14).

2. ¿Imaraykun Jehová Dios mana iskayaranchu Jesús Saqraq trampankunaman mana urmananmanta?

² Diosqa yacharanmi churin Jesús Saqraq imaymana tentasqanta mana kasuspa allinta tukuy ima ruwanantapas hunt’ananta. ¿Imaraykun mana iskayaranchu Jesús hunt’aq kananmanta? Diosqa ‘manaraq imapas kamasqa kashaqtinmi’ Jesustaqa kamaran ‘paywanmi llank’aranpas’ chaymi allinta reqsiran, yacharanmi kasukuq hunt’aq kananta (Pro. 8: 22-31; Col. 1:15). Chayraykun payqa mana Satanasta hark’aranchu Jesusta wañunankama pruebaman churananta, Diosqa yacharanmi wañunankama aguantananta (Juan 3:16).

Jehová Diosqa pakaykunmi serviqninkunata

3. ¿Imaynatan Saqra Dios serviqkunata qhawarin?

³ Jesusmi willaran “kay pachapi kamachikuq” Saqra kasqanta, chaymi qatikuqninkunaman niran: ‘Qankunapas qatiykachasqallataqmi kankichis imaynan ñoqapas qatiykachasqa karani hinata’, nispa (Juan 12:31; 15:20). Kay pachapi Saqraq kamachisqan runakunaqa cheqnikunkun cheqaq cristianokunata, ¿imarayku? Jehová Diosta servisqankurayku, chanin kaqta predicasqankurayku ima (Mat. 24:9; 1 Juan 5:19). Saqraqa kay pachapiraq kashaq akllasqa cristianokunatan astawanqa urmachiyta munan, paykunan hanaq pachamanta Cristowan kamachimunqaku. Chaymantapas millonninpi Testigokunatan makilla qhawamushan imallapipas urmachiyta munaspa, paykunaqa kay Hallp’a sumaq paraisoman tukupuqtinmi wiñaypaq kawsayta suyakushanku. Chaymi Diospa Simin Qelqa niwanchis: “Awqaykichis saqraqa qaparishaq león hinaraqmi tukuyneqta purishan pillatapas oqoykunanpaq maskhaspa”, nispa (1 Ped. 5:8).

4. ¿Imaynapin yachanchis Saqra Diospa llaqtanta mana ch’usaqyachiy atisqanta?

⁴ Diosmi llaqtanta yanapashan chaymi Saqraqa mana ch’usaqyachiyta atinchu. Qayna pachak watakunapin wakin mana khuyapayakuq millay kamachikuqkuna Jehová Diospa testigonkunata ch’usaqyachinankupaq imaymanata ruwaranku; ichaqa manan atirankuchu, chaymi kunanqa yaqa qanchis waranqa Testigokunaña Jehová Diosta servishanchis, pachak waranqa masñan congregacionkunapas pachantinpi kashan. Kunanri, ¿maypitaq chay millay kamachikuqkunari kashanku? Paykunaqa chinkapunkuñan.

5. ¿Imaynatan Isaías 54:17 kay tiempopi hunt’akun?

⁵ Diosmi Israel llaqtanman prometeran: “Manan ima ruwasqa armapas imanasunkipaschu, llapa huchachaqniykitapas upallachinkin. Chaytan kamachiykikunapaq ruwani, chay hinatan atipachishani”, nispa (Isa. 54:17). Kay ‘tukukuy qaylla p’unchaykunapipas’ Diospa llaqtanqa rikushanmi chay promesaq hunt’akusqanta (2 Tim. 3:1-5, 13). Arí, Diosqa yanapawashallasunmi Saqraq trampankunata atipananchispaq, payqa manapunin hinallatachu qhawanqa Saqra ch’usaqyachiwananchistaqa (Sal. 118:6, 7).

6. Daniel qelqaq nisqanman hina, ¿iman Satanaspa kamachisqan pachata sucedenqa?

⁶ Kay millay pachaqa pisi tiempollamantañan tukukapunqa Saqraq kamachikuyninmantaqa manañan imapas qhepanqachu. Profeta Danielmi Diospa yuyaychasqan qelqaran: “Reykuna [kunan tiempo gobiernokuna] kamachikushaqtinmi, Hanaq Pacha Diosqa mana hayk’aq thunikuq suyuta [“reinota”, NM] sayarichinqa, manataqmi wak suyuqa chayta kamachinqachu, aswanpas llapa suyukunatan ñut’uspa tukunqa, wiñaypaqtaq kanqapas”, nispa (Dan. 2:44). Chay profecía hunt’akuqtinqa manañan Satanaschu kay Hallp’ataqa kamachinqa nitaq runakunapas kamachinqañachu. Saqraq kamachisqan pachapi tukuy mana allin ruwaykunaqa wiñaypaqmi chinkapunqa hinaspan Diospa Reinollanña Hallp’antinta kamachinqa (leeychis 2 Pedro 3:7, 13).

7. ¿Imaynapin yachanchis Saqrata atipananchista?

⁷ Jehová Dios Satanaspa kamachisqan pachata tukuchishaspanqa sumaqtan llaqtanta pakaykunqa chay qhepamanpas yanapashallanqan (leeychis Salmo 125:1, 2). Ichaqa ¿imanisunmantaq sapankanchismanta? Bibliaq nisqan hina ñoqanchispas atisunmanmi Saqraq contranpi qaqa sayayta imaynan Jesuspas ruwaran hinata. Chayraykun Jesucristomanta apóstol Juanpa chaskisqan profecía willashan ‘ancha askha runakuna’ kay pacha ñut’usqa kaqtin qespichisqa kanankumanta, Saqraña contrankupi hatarishaqtinpas. Paykunan ninqaku: “¡Kamachikuy tiyanapi tiyashaq Diosninchismi Corderopiwan [Jesucristo] qespichiqninchisqa!” nispa (Apo. 7:9-14). Biblian willashan hanaqpachapaq akllasqa cristianokuna ‘wak ovejamanta’ kaq cristianokunapiwan  Saqrata atipanankumanta (Juan 10:16; Apo. 12:10, 11). Atipanankupaqmi ichaqa anchata kallpachakunanku Diosmantapas mañakunanku Saqraq makinman mana urmanankupaq (Mat. 6:13).

Jesusqa atiparanmi Saqrata

8. ¿Imawanmi ñawpaqta Saqra Jesusta tentaran? ¿Imaynatan Jesús kutichiran?

⁸ Saqraqa imaymanawanmi Jesuspa hunt’aq kayninta urmachiyta munaran ichaqa manapunin atiranchu. Jesús ch’inneq orqopi kashaqtinpas imaymanawanmi urmachiyta munaran Diosta mana kasunanpaq. Payqa yacharanmi tawa chunka p’unchay tawa chunka tuta mana mikhusqa kasqanta, chaymi niran: “Diospa Churinchus kanki chayqa, kay rumikunata niy t’antaman tukunanpaq”, nispa. Jesustaq mana pay kikinpaq milagrota ruwayta munaspa niran: “Diospa Simin Qelqan nin: ‘Manan t’antallawanchu runaqa kawsanqa, aswanpas Diospa llapa siminwanmi’”, nispa (Mat. 4:1-4; Deu. 8:3).

9. ¿Imaraykun cuidakunanchis qhelli hucha ruwaykunaman mana urmananchispaq?

⁹ Kay tiempopiqa cuerponchispa munapayasqankunawanmi Saqraqa urmachiyta munawanchis. Payqa qhelli hucha ruwaymanmi urmachiyta munawanchis, chhayna kawsayqa imaymanapin rikukun. Chayraykun anchata kallpachakunanchis chaykunaman mana urmananchispaq. Diospa Simin Qelqaqa sut’itan nin: “¿Manachu yachankichis mana chanin runakunaqa Diospa qhapaqsuyunman mana haykunankuta? Ama pantaychischu. Qhelli huchapi puriqkunapas, ídolo yupaychaqkunapas, wasanchaqkunapas, warmiman tukuqkunapas, qharipura t’inkikuqkunapas, [...] Diospa qhapaqsuyunmanqa [reinonmanqa] manan haykunqakuchu”, nispa (1 Corintios 6:9, 10). Arí, qhelli huchapi kawsayta mana saqey munaqkunaqa manan Diospa prometewasqanchis Paraisomanqa haykunqakuchu.

10. Mateo 4:5, 6 nisqan hina, ¿imaynatan Satanás Jesusta hukmanta urmachiyta munaran?

¹⁰ Saqra Jesusta huktawan ch’inneq orqopi tentasqanmantan Biblia willan: “Hinan saqraqa Jerusalén llaqtaman Jesusta pusarqan, hinaspan Dios yupaychana wasi pataman sayaykachispa payta nirqan: –Diospa Churinchus kanki chayqa, kay ukhuman saltaykuy Diospa Simin Qelqan nin, ‘Qanraykun angelninkunata kachamunqa, chaymi qanta makinkupi hap’isunkiku ama rumipi chakiykita k’irikunaykipaq’”, nispa (Mat. 4:5, 6). Satanasta Jesús kususpaqa sut’itan rikuchinman karan paypuni Mesías kasqanta. Ichaqa chayta ruwaspaqa hatunchakushanmanmi karan, chayraykun Diosqa mana allinpaqchu chayta qhawarinman karan. Chaypipas hukmantan Jesusqa rikuchillarantaq Jehová Diospaq hunt’aq kasqanta, chaymi niran: “Diospa Simin Qelqaqa nillantaqmi, ‘Aman Señor Diosniykita wateqankichu [otaq pruebaman churankichu]’”, nispa (Mat. 4:7; Deu. 6:16).

11. ¿Imakunawanmi Satanás urmachiwasunman, imaraykun mana allinchu kanman chaykunaman urmay?

 ¹¹ Kunan tiempopipas Satanasqa Diosta pruebaman churananchispaqmi tentawasunman. ¿Imaynata? Yaqapaschá kallpachawasunman Diosta mana serviq runakunaq allin qhawarisqan kayta maskhananchispaq, paykuna hina p’achakunanchispaq, allichakunanchispaq, mana allin kusirikuykunapi purinanchispaqpas. Ichaqa, ¿yanapawasunmanchu Dios angelninkunawan kamachikuyninkunata mana kasukuspa sasachakuykunapi tarikuqtinchis? Manan. Davidpas Bat-sebawan huchallikusqanmanta khuyaytaña sonqonta nanachikuran chaypas, Jehová Diosqa manan chay ruwasqanmanta sasachakuykunapi tarikuqtin libraranchu (2 Sam. 12:9-12). Chhaynaqa amapuni Jehová Diosninchista pruebaman churasunchu kay pachaq ruwayninkunaman k’askakuspa (leeychis Santiago 4:4; 1 Juan 2:15-17).

12. ¿Ima wateqaymantan willashan Mateo 4:8, 9 textopi? ¿Imaynatan Jesús kutichiran?

¹² Chaymantapas Saqraqa kay pachata kamachinanpaqmi Jesusman munachiran, chaymi kay pacha lliw suyukunata lliw hatun atiyninkunatawan qhawarichispa niran: “Qonqoriykukuspachus yupaychawanki chayqa, lliw kaykunatan qopusqayki”, nispa (Mat. 4:8, 9). Chaypi nisqan hina, Saqraqa mana p’enqakuspan Jehová Dios hina yupaychasqa kayta munaspa Jesuspa hunt’aq sonqo kayninta waqllichiyta munaran. Payqa qallariypipas yupaychasqa kaytapuni munaspan Jehová Diosmanta karunchakapuran, chayraykun hatunchakuq sinchi millay angelman tukupuran (Sant. 1:14, 15). Jesusmi ichaqa allinta sonqonpi yuyaykuran Hanaq pachapi kaq Yayanta kasukunanpaq. Chaymi niran: “Anchhuriy, Satanás, Diospa Simin Qelqan nin, ‘Señor Diosniykitan yupaychanki, pay sapallantataqmi servinkipas’”, nispa. Arí, Jesusqa huk kutitawanmi rikuchiran Saqraq contranpi churakusqanta, payqa manan imatapas Saqramantaqa munaranchu. ¡Manapunin hayk’aqpas chay millay angeltaqa yupaychanmanchu! (Mat. 4:10; Deu. 6:13; 10:20.)

‘Saqraq contranpi qaqata sayaychis, chaymi payqa qayllaykichismanta ayqekapunqa’

13, 14. a) ¿Imatan Saqra Jesusman munachisharan kay pachapi lliw suyukunata atiyninkunatawan qhawarichispa? b) ¿Imaynatan kunan tiempo Saqra sonqonchista waqllichiyta munan?

¹³ Saqraqa kay pacha lliw suyukunata lliw hatun atiyninkunatawan qhawarichispan Jesusman munachisharan kay pachapi hatun kamachikuq kananpaq. Kaytachá yuyaykuran: “Lliw chaykunata qhawarispan Jesusqa anchatapuni munanqa kay pachapi aswan atiyniyoq hatun kamachikuq kayta”, nispa. Kunan tiempoqa manapaschá Jesusman hinachu Saqraqa kay pachata kamachinanchispaq munachiwasun, ichaqa sonqonchistan waqllichiyta munan imaymana qhawasqanchiswan, uyarisqanchiswan, yuyaykusqanchiswan ima.

¹⁴ Satanasmi kay pachataqa kamachishan, chaymi periodicokuna, revistakuna, radiopi, televisionpi programakunapas hunt’a kashan qhelli hucha ruwaykunawan imaymana mana allin ruwaykunawan ima. Imaymana propagandakuna lloqsimusqanpas kallpachawanchismi mana necesitasqanchis cosaskunata rantinanchispaq. Chaykunawanmi Saqraqa qhapaq kaykunata maskhayman waqllichiyta munawanchis. Ichaqa sichus ñoqanchis mana ima mana allin kaqtapas leenchischu, qhawanchischu nitaq uyarinchischu chayqa, “anchhuriy, Satanás” nispan nishanchis. Kay pacha runakunaq imaymana ruwasqanwan mana chhaqrukuspaqa Jesustan qatikushanchis. Chaymantapas sichus mana manchakuspa reqsichikusun llank’ananchispi, escuelapi compañeronchiskunawan,  vecinonchiskunawan, familianchiskunawanpas Jehová Diospa testigon kasqanchista Jesuspa discipulon ima kasqanchista chayqa, Satanaspa kamachisqan pachaman mana k’askakusqanchistan rikuchisun (leeychis Marcos 8:38).

15. ¿Imaraykun makilla kashananchis?

¹⁵ Kinsa kutipi Jesuspa hunt’aq sonqo kayninta mana waqllichiyta atispan “saqraqa paymanta t’aqarikapurqan” (Mat. 4:11). Ichaqa manan pasaqpaqchu t’aqakuran, Biblian nin: “Manapuni wateqayta atispataq saqraqa Jesusmanta anchhuripurqan huk kutikama”, nispa (Luc. 4:13). Anchataña Jehová Diosta agradecekunchis Saqraq trampanman mana urmasqanchismanta chaypas, maskhashanallanchismi yanapayninta, Saqraqa kallpachakushallanqan imallapipas urmachiwananchispaq, chaytaqa ruwanqa manan suyashaqtinchischu aswanpas hayk’aqchus pay allinpaq qhawarinqa chay kutipin. Chayraykun makilla kashananchis ima pruebatapas atipananchispaq, sonqomantataq yuyaykunanchis Jehová Diosta servishanallanchispaq.

16. ¿Ima kallpatan Jehová Dios qowasunman? ¿Imaraykun mañakushanallanchis?

¹⁶ Saqraq contranpi qaqata sayanapaqqa santo espiritun yanapawasun, chaypaqmi Jehová Diosmanta mañakunanchis, payqa qowasunpunin mañakuqtinchisqa. Santo espirituq yanapayninwanqa kallpanchiswan mana atisqanchis ruwaykunatan ruwasun. Jesusmi qatikuqninkunata niran: “Qankunapas mana allin kashaspa wawaykichisman allin kaqkunataqa qoyta yachankichismi, chaymantapas astawanraqmi hanaq pachapi kaq Yayaykichisqa mañakuqninkunaman Santo Espiritunta qonqa”, nispa (Luc. 11:13). Chhaynaqa sapa kutilla mañakusun Diospa ancha atiyniyoq santo espiritunta chaymi kallpachawasun Saqraq contranpi qaqata sayananchispaq yanapawasuntaq trampankunaman mana urmananchispaqpas. Chaymantapas ‘Saqraq q’otukuq yuyayninkuna contra qaqa sayananchispaqqa’ tupapakuna p’achawan otaq Diospa qosqan hunt’asqa armadurawanmi churakunanchis (Efe. 6:11-18).

17. ¿Iman Jesusta yanaparan Saqraq contranpi qaqata sayananpaq?

¹⁷ Jesustaqa qhepaman q’ochukunanta yachasqanmi yanapallarantaq Saqraq contranpi qaqata sayananpaq , chaymi “cruzpi [kurkupi, NM] p’enqay wañunanta pisicharparispa muchurqan, hinaspan Diospa kamachikuy tiyananpa paña ladonpi tiyaykurqan”, ñoqanchistapas chaymi yanapawasunman (Heb. 12:2). Sichus Diosta ancha hatun kamachikuqninchista hina tukuypi kasukusunchis, sutinta hatunchasunchis, hamuq tiempopaq suyakuyninchistapas mana qonqasunchu chayqa, Jesús hinan q’ochukusunchis. Maytachá kusikusunchis Satanaspas, kamachisqan pachapas chinkapuqtin kay profecía hunt’akuqtinqa: “Llamp’u sonqokunan [...] kay hallp’ata chaskinqaku, sumaq thak-nisqataq tiyakunqaku” (Sal. 37:11). Chhaynaqa, tukuy atisqanchista kallpachakusun Jesús hina Saqraq contranpi qaqa sayananchispaq (leeychis Santiago 4:7, 8).

¿Imanispan kutichiwaq?

• ¿Imapin yachanchis Jehová Dios llaqtanta pakaykusqanta?

• ¿Imaraykun nisunman Jesusqa allintapuni Saqraq contranpi qaqata sayaran nispa?

• ¿Imakunata ruwaspan Saqraq contranpi qaqata sayasunman?

[Tapuykuna]

[27 paginapi foto]

Sichus kay pachaman k’askakusun chayqa Diospa awqanmi kasunchis

[29 paginapi dibujo]

Jesusqa manan Saqrata kasuranchu kay pachapi lliw suyukunata kamachinanpaq qhawarichiqtin