¿Pillapas willanmanchu qhepa tiempopi imakuna kananmanta?

“Ñoqan Diosqa kani [. . .]. Qallariymantapachan willani qhepaman imaynachus tukukunanta, qhepaman imachus kanantan ñawpaqmantaña willani.” (Isaías 46:9, 10.)

KAY tiempopiqa tukuy imapas cambiashallanmi, chaymi política nisqata, llaqtakunata, negocio ruwaytawan estudiaq yachaysapa runakunaqa qhepaman imakuna kananta yachayta munaspa allinta qhawarishanku tiempoq pasasqanman hina runaq kawsaynin imayna cambiashasqanta. Wakin runakunaqa qhepa p’uchaykunapi imayna kanankuta yachayta munaspan layqakunaman, suerte qhawaqkunaman ima phawanku. Ichaqa yaqa llapankun chaykuna yanqapaq kasqanta reparanku. Chhaynataq kashan chayqa, ¿manapunichu yachasunman qhepa tiempopi imayna kawsay kananta, familianchis imayna kananta, ñoqanchis kikinchispas imayna kananchista? ¿Kanmanchu pillapas qhepa tiempomanta willawananchispaq?

Isaías 46: 9,10 textoq nisqan hina, Jehová Diosqa yachanmi qhepa tiempopi imakuna kanantapas. Isaiaswanmi Jehová Diosqa willachiranña Israel runakuna Babilonia llaqtapi preso kasqankumanta lloqsipuspa Jerusalén llaqtata templontawan hukmanta hatarichinankumanta. ¿Yanqa-yanqallatachu chayta willachiran? Manan. Allintan willachiran imaynatachus, imaynapichus, pitaqchus kacharichinanta. Iskay pachak wata ñawpaqta hinaraqmi Isaiasqa willaranña Babilonia llaqtata Ciro sutiyoq rey hap’ikapunanta. ¿Imaynatan chayta ruwanman karan? Babiloniaq muyuriqnintan Éufrates mayu pasasharan, chaytas Ciroqa huk ladoman t’aqanan kasqa. Manan chaykunallamantachu Isaiasqa willaran, Babiloniaq iskaynin hatun punkunkunatapas kicharayasqatas qonqananku kasqa (Isaías 44:24–45:7).

Diosllan yachanman qhepa tiempopi imakuna kanantapas, manan runakunaqa; chaymi Salomonqa khaynata niran: “Ama paqarin p’unchay imachus ruwanaykimanta alabakuychu, manan yachankichu imachus chay p’unchaypi kananta”, nispa (Proverbios 27:1). Salomonpa chay nisqanqa cheqaqpunin, runakunaqa manapunin yachankumanchu paykuna kikinku imayna kanankutapas. Nisqanchis hina Diosmi ichaqa yachan. ¿Imaynapitaq payri yachanman? Tukuy imaymanapas paypa kamasqan kasqanrayku, yachanmi runakuna imayna kasqankuta imayna sonqoyoq kasqankutapas. Munaspaqa mana pantaspan willanman huk runa otaq huk nacionpas imakuna ruwananmanta. Chaymantapas payqa atinmanmi munasqanman hina imatapas ruwachiyta. Imatapas profetankunawan willachin chayqa, pay kikinmi imatapas ruwan hunt’akunanpaq. Pay kikinmi khaynata nin: “Ñoqan kamachiykunaq [otaq serviqniykunaq] siminta hunt’ani, kachasqaykunaq willakusqantapas hunt’achini”, nispa (Isa. 44:26). Arí Jehová Diosllan chaykunataqa ruwanman.

Qanchis pachak wata Cristoq ñawpaqnintaraqmi Isaiasqa willaranña Cristo imayna hamunanmanta. Ichaqa 1700 otaq 1800 watakuna ukhupin wakin runakuna Isaiaspa qelqasqanmanta mana allinta rimayta qallariranku. Paykunaqa manan creerankuchu Isaiaspa qelqasqan  cheqaq profeciakuna kasqanpi, aswanmi niranku: “Chaykunataqa Cristoq hamusqan qhepatañan huk runa qelqaran”, nispa. ¿Cheqaqchu karan chay rimasqanku? Manan. 1947 watapin mar Muerto nisqa qochaq chinpan orqoq t’oqonkunapi tariranku ñawpa tiempomanta askha qelqakunata, chay qelqakunawan kuskan kasqa Isaiaspa qelqasqanmanta copiasqankupas. Ñawpa qelqakunamanta allin yachaq runakunaq nisqaman hinaqa, chay qelqataqa pachak wata manaraq Cristo hamushaqtinsi copiankuman karan. Chaykunapi rikusqanchis hina Bibliaqa allintan willan qhepa tiempokunaman imakuna kanantapas.

Isaiaspas huk profetakunapas manan paykunallamantaqa willankumanchu karan qhepa tiempopi imakuna kananmantapas, aswanmi paykunaqa “Santo Espirituq yuyaychasqan [kaspa] Diosmanta rimarqanku” (2 Pedro 1:21). Qatiqninpin yachasunchis Jesusmanta Isaías imakuna willasqanta. Chaymantataq yachasunchis kay tiemponchismanta hamuq tiempomantapas Jesús qatikuqninkunapiwan imakuna willasqankumanta.