¿Imaña kaqtinpas hunt’aq sonqowanchu Diosta servinki?

“Wañunaykamapas Diospaqqa hunt’aqmi kasaq.” (JOB 27:5, NM.)

1, 2. a) ¿Imapaqmi kallpachakunanchis? b) ¿Ima tapuykunatan kay estudiopi t’aqwirisun?

YAQAPASCHÁ yuyaykushanki huk sumaq wasita ruwanaykipaq, chaypi llapa familiaykiwan kusisqa kawsanaykipaq. Ichaqa, ¿imatan ruwanayki chay munasqayki hunt’akunanpaq? Ñawpaqtaqa chay wasitan sayarichinayki, hinaspa chaypi familiantin tiyanayki sumaqtataq chay wasiykita cuidanayki.

² Kaqllatataqmi ruwananchis Diospaq hunt’aq kananchispaqpas. Diospaq hunt’aq kayqa may allinmi, anchatan yanapawanchis ñoqanchistapas familianchistapas. Ichaqa manan yanqallachu ninanchis Diospaq hunt’aq kaytan munani nispa, aswanpas kallpachakunanchismi chay munasqanchista hunt’ananchispaq. Wasita hatarichinapaqqa askha qolqetan necesitakun anchatataqmi kallpachakunanchispas ruwananchispaq (Luc. 14:28, 29). Watakunaq pasasqanman hina Jehová Diosta hunt’aq sonqowan servishanallapaqpas anchatan kallpachakunanchis, chay ruwayqa ancha allinpunin kanqa. Kay estudiopin kay tapuykunata t’aqwirisun: ¿Imatan ruwananchis hunt’aq kanapaq? ¿Imaynatan Diospaq hunt’aq kasunman sasachakuykunapiña tarikuspapas? ¿Atinkumanraqchu hatun huchaman urmaqkuna hukmanta Diospaq hunt’aq kayta?

¿Imatan ruwananchis hunt’aq kanapaq?

3, 4. a) ¿Imaynatan Jehová Dios yanapawanchis payta hunt’aq sonqowan servinanchispaq? b) ¿Imaynatan Jesuspa ruwasqan yanapawanchis hunt’aq kananchispaq?

³ Ñawpaq estudiopi yachasqanchis hina, Jehová Diosqa sapankanchismanmi saqewanchis payta hunt’aq sonqowan servinanchispaq mana servinanchispaqpas. Sichus decidikusun Dios servinanchispaq chayqa chaskisunmi yanapayninta. Arí, Jehová Diosqa yachachiwanchismi payta hunt’aq sonqowan servinanchispaq, santo espiritunwanmi yanapawanchis yachasqanchisman hina kawsananchispaq (Luc. 11:13). Chaymantapas yanapawanchismi paywan allinpi kayninchista mana allin ruwaykunawan ama waqllichinanchispaq (Pro. 2:7).

⁴ ¿Imatan Jehová Dios ruwaran payta hunt’aq sonqowan servinanchispaq? Churintan kay Hallp’aman kachamuran. Jesusqa tukuypin Diosta kasukuran, payqa ‘wañunankaman kasukuran’ (Fili. 2:8, Mosoq Rimanakuy). Ñak’arinanña kaqtinpas kasukuranmi, chaymi Yayanta niran: “Ama ñoqaq munasqaychu kachun, aswanpas qanpa munasqayki”, nispa (Luc. 22:42). Chayraykun sapankanchis tapukunanchis: “¿Jesús hinachu Diosta kasukushani?” nispa. Diosta hunt’aq sonqowan servinapaqqa tukuy sonqomantan payta kasukuna. ¿Imakunapin Diosta kasukunanchis? Chaykunamantan kunan qhawarisunchis.

5, 6. a) ¿Imaynatan David rikuchiran sapallanchis kashaspa Diospaq hunt’aq kananchista? b) ¿Imamanmi cristianokuna urmankuman sapallanku kashaspa?

⁵ Ñawpaqkaqpi: Jehová Diostaqa kasukunanchis sapallanchis kashaspa. Rey Davidqa allintapunin rikuchiran sapallanchis kashaspa Diospaq hunt’aq kananchista (leeychis Salmo 101:2). Ichaqa reytaq karan chayqa askha runakunawanmi llank’aran, chaymantapas payqa sinchi askha runakunaq ñawpaqenpichá rimaran (tupanachiy Salmo 26:12). Chay kutikunapiqa Diosta kasukuspan llaqtapaq allin  ejemplo kanan karan (Deu. 17:18, 19). Ichaqa yacharanmi ‘wasinpi’ sapallan kashaspapas Diosta hunt’aq sonqowan kasukunanta. Ñoqanchisrí, ¿kasukushanchischu Diosta sapallanchis kashaspa?

⁶ Davidmi niran: “Manan ima millaykunatapas ñawiywanqa qhawasaqchu”, nispa (Salmo 101:3, NM). Kay tiempopiqa imaymana qhelli ruwaykunan kashan qhawanapaq, chaykunawanmi cristianokunaqa hunt’aq sonqo kayninchista waqllichisunman, astawanqa sapallanchis kashaspa. Internetpipas rikukullanmi millay qhelli hucha ruwaykunaqa, chaymi facilllata chay qhelli ruwaykunataqa qhawasunman. Sichus huk cristiano chaykunata qhawanman chayqa, ¿kasukushanmanchu Salmo 101:3 textoq nisqanta? Qhelli hucha ruwaykunata qhawayqa manapunin allinchu, chay ruwaykunaqa sonqonchistan waqllichin, conciencianchistan qhellichan, casado warmi qharitapas t’aqanachinmi (Pro. 4:23; 2 Cor. 7:1; 1 Tes. 4:3-5).

7. Sapallanchis kashaqtinchis, ¿ima texton yanapawasunman Diosta sonqomanta kasukunapaq?

⁷ Ichaqa manan mayqen Diosta serviq cristianopas sapallanchisqa kashasunmanchu. Hanaq pachapi kaq munakuq Yayanchisqa qhawamuwashallanchismi (leeychis Salmo 11:4). Diosqa maytachá kusikun qhelli hucha ruwaykunata mana qhawaqtinchisqa, Mateo 5:28 textopi kamachikuyta kasukuqtinchispas. Chayrayku amapuni hayk’aqpas qhawaychu huchaman apaq millay qhelli ruwaykunataqa. Amapuni Diospaq hunt’aq sonqo kasqaykitaqa waqllichiychu qhelli ruwaykunata qhawaspa otaq leespa.

8, 9. a) ¿Ima sasachakuypin tarikuranku Danielwan compañeronkunawan? b) ¿Imaynatan wayna sipaskuna kusichinkuman Jehová Diosta iñiqmasinkutapas?

⁸ Iskaykaqpi: mana iñiq runakuna ukhupi tarikuspapas tukuy sonqowanmi Diostaqa kasukunanchis, chhaynapin hunt’aq kasqanchista rikuchisun. Yuyaykusun Danielpi, kinsantin compañeronkunapi ima, paykunan waynallaraq kashaqtinku Babilonia llaqtaman preso apasqa karanku. Chay llaqtaman chayaspankun Jehová Diosta mana reqsiq runakuna ukhupi tarikuranku. Diospa hark’asqan mikhunakunata munachiqtinkuqa manan paykunapaqqa sasachu kanman karan Diospa kamachikuyninta p’akinankupaq. Manan chaypiqa karanchu tayta mamankupas, umalliqkunapas nitaq Israelpi sacerdotekunapas paykunata rikunanpaq. ¿Pitaq yachanman karan mana kasukusqankuta? Jehová Diosmi. Chayraykun paykunaqa yuyaykuranku Diosta kasukunankupaq chay hawa sasachakuypiña otaq peligropiña tarikunkuman karan chaypas (Dan. 1:3-9).

⁹ Kay tiempopipas Jehová Diosta serviq wayna sipaskunaqa chaytan ruwanku, paykunaqa respetankun Diospa kamachikuyninkunata chaymi compañeronkunaq millay ruwasqankuta mana ruwankuchu. Sichus qankuna wayna sipaskuna mana drogakunkichischu, mana k’araq  sonqoyoqchu otaq maqakuqchu kankichis, qhelli rimaykunatapas mana rimankichischu, qhelli hucha ruwaymantapas ayqekunkichis chayqa, Diostan kasukushankichis chhaynapin rikuchishankichis paypaq hunt’aq kasqaykichista. Chay ruwasqaykichiswan Diosta, iñiqmasinchiskunatawan kusichisqaykichismantapas, qankunan kusisqa kawsallankichistaq allinniykichispaq kasqanrayku (Sal. 110:3, NM).

10. a) ¿Ima ruwasqankuwanmi wakin wayna sipaskuna Diospaq hunt’aq kayninkuta waqllichiranku? b) ¿Imaynatan qhawarinku qhelli hucha ruwayta Diospaq hunt’aq kaqkuna?

¹⁰ Kinsakaqpi: Diostaqa kasukunallanchistaqmi qhariwan otaq warmiwan tratasqanchispi. Yachasqanchis hina, Diosqa huchachanmi qhelli ruwaykunataqa. Wakinmi ichaqa mana huchapaqchu chaykunata qhawarinkuman. Wakin wayna sipaskunan parejankuq otaq parlaqmasinkuq qharikayninta otaq warmikayninta llamipayanku ch’onqanku ima otaq hatun hisp’ananmanta t’inkinakunku, chay ruwaykunamantan paykunaqa ninku, manan qhelli ruwaychu nispa. Ichaqa qonqankun chay ruwaykunatapas huchapaq Dios qhawarisqanta qhelli hucha ruway otaq fornicación kasqanrayku. Chayrayku, sichus huk cristiano chaykunata ruwanman chayqa Diospa llaqtanmantan wikch’usqa kanman. * Astawanqa, chayta ruwaq wayna sipaskunaqa manan Diospaq hunt’aq sonqochu kanku. Diosta hunt’aq sonqowan serviqkunaqa ayqekunkun chay ruwaykunamanta. Paykunaqa manan wanachisqa kayta manchakuspallachu qhelli ruwaymantaqa ayqekunku, aswanpas Diospa sonqonta mana k’iriyta munaspankun. Imapas huchallichiq kaqman achhuykunankumantaqa mana allin ruwaykunamantan karunchakunku qhelli hucha ruwaymantapas ayqekunkun (1 Cor. 6:18). Chhayna kawsaymi Diospaq hunt’aq sonqo kayqa.

¿Imaynatan Diospaq hunt’aq kasunman sasachakuykunapiña tarikuspapas?

11. ¿Imaraykun ancha allinpuni Diosta kasukushallay? Rikch’anachiywan willay.

¹¹ Qhawasqanchis hina Diospaq hunt’aq kayqa payta kasukuymi, chayrayku hunt’aq kanapaqqa kasukunallanchispuni Diosta. Huk kutillapi kasukuyqa manapaschá imapaschu kanman, ichaqa tiempowanmi kasukuyninchisqa askhaman tukunman, chhaynapi hunt’aq kasqanchista rikuchinapaq. Chaymanta aswan allinta yachanapaq adobewan rikch’anachisun. Huk adobellaqa manan imapaschu kanman, askha adobekunawanmi ichaqa huk sumaq wasita hatarichisunman. Chhaynallataqmi, sichus Diosta kasukullasunpuni chayqa, tukuy kawsasqanchis p’unchaykunan paypaq hunt’aq kasun (Luc. 16:10).

12. ¿Imaynatan David sasa tiempopi tarikuspa Diospaq hunt’aq kasqanta rikuchiran? ¿Imatan chaymanta yachanchis?

¹² Diospaq hunt’aq kasqanchistaqa astawan rikuchisunman, sasachakuykunapi tarikuspa otaq mana chaninta pipas tratawaqtinchis. Davidmanta yachasun. Wayna kashaqtinmi paytaqa Jehová Diosta serviq rey Saúl qatiykacharan. Chay tiempopaqqa manañan Diosqa Saulta  allinpaqchu qhawariran, Davidmi ichaqa Diospa allin qhawarisqan karan, chayraykun Saulqa sinchita paypaq phiñakuran. Saulqa askha watatawanraqmi Israelpi rey karan, chaymi Davidta soldadonkunawan qatiykacharan. ¿Phiñakuranchu David Diospaq askha wata Saúl qatiykachasqanmanta? ¿Yanqan ñoqaqa kay sasachakuyta aguantashani nispachu niran? Manapunin. Aswanpas payqa anchatan Saulta respetaran Jehová Diospa akllasqan rey kasqanrayku, chaymi mana wañuchiytapas munaranchu (1 Sam. 24:2-7).

13. ¿Imaynatan rikuchisunman Diospaq hunt’aq kasqanchista mayqen iñiqmasinchispas mana allinta ruwaspa sintirachiwaqtinchis?

¹³ ¡Davidpa chay ruwasqanqa ancha allinpunin yachaqakunanchispaq! Llapa Diosta serviqkunan huchayoq runa kanchis, chayraykun wakin iñiqmasinchiskunaqa mana allintachu comportakunkuman. Yaqapaschá mana allinta tratawasunman otaq Diospa llaqtanmanta karunchakapunkuman. Ichaqa kusikunchismi llapallanku Diospa llaqtan hina paypaq hunt’aq kanankuta yachaspa (Isa. 54:17). ¿Imatan ruwasunman mayqen iñiqmasinchispas mana allinta ruwaspa sintirachiwaqtinchis? Sichus chay iñiqmasinchispaq sinchita sonqonchispi phiñakusunman chayqa, Diospaq hunt’aq sonqo kayninchistan waqllichipusunman. Manan hukkunaq mana allin ruwasqanraykuqa Dioswan phiñakunanchischu nitaq chayraykuchu saqepunanchis Diospaq hunt’aq kayta (Sal. 119:165). Chhayna pruebakunata aguantaspaqa, Diospaq hunt’aq kasqanchistan rikuchisunchis.

14. ¿Imaynatan hunt’aq cristianokuna chaskinku Bibliamanta ima yachachikuypas aswanta sut’inchakuqtin otaq huk cambiokuna kaqtinpas?

¹⁴ Chaymantapas Diospaq hunt’aq kasqanchista rikuchinapaqqa mana rimapakuspan chaskinanchis Diospa llaqtanpi ima cambiopas kaqtin. Diospa llaqtanpaq hunt’aq kaspaqa paypaqpas hunt’aqllataqmi kanchis. Kunanmi Diosqa llaqtanta astawanraq saminchashan, chaymi Diosta yupaychayqa mana hayk’aq sucedesqanta hina astawan mast’arikushan (Isa. 2:2-4). Bibliamanta ima yachachikuytapas astawan sut’inchakuqtin otaq Diospa llaqtanpi ima cambiopas kaqtinqa tukuy sonqomantan chaskinanchis. Bibliamanta yachachikuykuna p’unchaymanta p’unchay aswanta k’ancharisqanqa kusikunapaqmi (Pro. 4:18). Chayrayku sichus mana allintachu entiendenchis imarayku chay cambiokuna kasqanmanta chayqa, Jehová Diospa yanapaynintan mañakunanchis chaykunata sonqomanta chaskinapaq, hinaspa kasukushallasun payta hunt’aq sonqowan servispa.

¿Atinkumanraqchu huchaman urmaqkuna Diospaq hunt’aq kayta?

15. ¿Pillan Diospaq hunt’aq kayninchista waqllichinman?

¹⁵ Hukkaq estudiopi yachasqanchis hina ancha importanten Diospaq hunt’aq kayqa, chayta ruwaspallan paywanqa allinpi kasunchis hamuq tiempopaqpas suyakuyniyoq kasunchis. Ama qonqaychu, Diospaq hunt’aq kayninchistaqa kikillanchismi waqllichipusunman. Jobqa allintan chayta yacharan, chaymi niran: “Wañunaykamapas  Diospaqqa hunt’aqmi kasaq”, nispa (Job 27:5, NM). Sichus qanpas Job hina yuyaykuspa astawan Diosman achhuykunki chayqa, tukuy tiempon Diosta hunt’aq sonqowan servinki (Sant. 4:8).

16, 17. a) ¿Imatan mana ruwananchu hatun huchaman urmaq cristiano? b) ¿Imatan ruwanan?

¹⁶ Chaywanpas, wakin cristianokunaqa manañan hunt’aq sonqowanchu Diosta servinku. Wakinqa hatun huchamanmi urmanku, imaynan apostolkunaq tiemponpipas urmaranku hinata. Sichus chayta ruwaranki chayqa, ¿atiwaqraqchu hukmanta Diospaq hunt’aq sonqo kayta? Arí, atiwaqraqmi. Ichaqa, ¿imatan chaypaq ruwanayki? Ñawpaqtaqa rimasunchis imatas mana ruwanaykichu chaymanta. Hatun huchaman urmaqqa manan tayta mamanman, umalliqkunaman, mayqen iñiqmasinchiskunamanpas huchallikusqanmanta willayta munanmanchu. Biblian ichaqa kayta nin: “Huchankunata pakaykuqqa manan allinyanqachu, huchankunata willakuspa saqepuqmi ichaqa khuyapayasqa kanqa”, nispa (Pro. 28:13). Diosmantaqa manan imatapas pakasunmanchu chaymi huchallikusqankuta pakaqkunaqa mana allintachu ruwashanku (leeychis Hebreos 4:13). Wakinqa iskay uyan kanku Diosta servishaspapas pakallapin huchallikushankuman. Chhayna ruwayqa manan hunt’aq sonqowan Diosta serviychu. Jehová Diosqa manan chaskinchu huchallikusqankuta pakaqkunaq yupaychaynintaqa, aswanpas payqa sinchitan phiñakun chhayna ruwasqankuwan (Pro. 21:27; Isa. 1:11-16).

¹⁷ Sichus huk cristiano hatun huchaman urman chayqa umalliqkunamanmi willakunan. Jehová Diosqa umalliqkunatan churan iñiyninpi onqoqkunata yanapanankupaq (leeychis Santiago 5:14). Ama wanachisqa kayta manchakuspaqa iñiyniykipi chiriyaychu. Sichus sinchi onqosqa kaspa inyeccionta churachikunayki kanman chayqa, ¿nanayta manchakusqaykiraykuchu mana churachikuwaq? (Heb. 12:11.)

18, 19. a) Hatun huchaman urmaqkunaqa atinkumanraqmi Diospaq hunt’aq kayta, ¿imaynapin chayta yachanchis? b) ¿Imata ruwananchispaqmi kallpachakushanallanchis?

¹⁸ ¿Atinkumanraqchu hatun huchaman urmaqkuna Diospaq hunt’aq kayta? Hukmanta Davidmanta yachasunchis. Payqa hatun huchamanmi urmaran, qosayoq warmiwanmi wasanchay huchata ruwaran, hinaspa kamachiran qosanta wañuchinankupaq. Chayta ruwaspaqa manan Diosta hunt’aq sonqowanchu servisharan. Chaywanpas payqa atinmanraqmi karan Dioswan allinpi kayta. Ichaqa wanachisqan kanan karan. Payqa sinchitan sonqonta nanachikuran chay hucha ruwasqanmanta, chaymi Diosqa khuyapayaykuspa pampacharan. Davidqa yacharanmi Diospa anyasqan allinninpaq kasqanta, chaymi tukuy kawsasqan p’unchaykunapi Diosta sonqomanta kasukuran. Davidqa Proverbios 24:16 textopi nisqanman hinan ruwaran: “Qanchis kutitaña chanin runa urmanqa chaypas, payqa sayaripullanqapunin”. Chaymi Jehová Diosqa David wañupusqan qhepaman churin Salomonman willaran taytan imayna kasqanmanta (leeychis 1 Reyes 9:4). Arí, Diosqa hunt’aq sonqo runata hinan Davidta yuyariran. Qhawasqanchispas hina, Diosqa pampachanmi huchallikusqankumanta sonqonkuta nanachikuqkunataqa, hatun huchamanña urmaranku chaypas (Isa. 1:18).

¹⁹ Sichus hunt’aq kayta munanki chayqa, tukuy sonqomantan Diosta kasukunayki. Kallpachakushallay hunt’aq sonqowan Diosta servinaykipaq, hatun huchaman urmaqtiykipas sonqomanta pesapakuy. ¡May allinpunin Diospaq hunt’aq kayqa! Chhaynaqa, David hina Diospaq hunt’aq kasunchis, paymi niran: “Ñoqaqa hunt’aqllapunin Diospaq kasaq”, nispa (Sal. 26:11, NM).

[Uranpi willakuy]

¿Imaynatan kutichiwaq?

• ¿Imatan ruwananchis Diosta hunt’aq sonqowan servinapaq?

• ¿Imaynatan Diospaq hunt’aq kasunman sasachakuykunapiña tarikuspapas?

• ¿Atinkumanraqchu hatun huchaman urmaqkuna hukmanta Diospaq hunt’aq kayta?

[Tapuykuna]

[16 paginapi recuadro]

‘¡MAY ALLINPUNIN CHAY RUWASQANQA!’

Phisqa killaña onqoq warmin mate tomana wasipi qolqenta qonqarparisqa, chaysi “sinchi llakisqa kasharan payqa”, chaytan niran huk periodicopi. Iskay waranqa dolarmi qolqen kasqa, manas hayk’aqpas chhaytukuy qolqetaqa apakachaqchu. Qolqentan ichaqa huk honrado señorita tarikusqa, hinaspan chay qolqeq dueñonta maskhayta qallarisqa, mana tarispataq chay llaqtapi guardiakunaman qosqa paykuna dueñonman qopunankupaq. Qolqenta qopuqtinkun chay señoraqa niran: “May allinpunin chay señoritaq ruwasqanqa”, nispa. Ichaqa, ¿imaraykutaq chay señorachari kutichipuytapuni munaran chay qolqeta? Ñawpaqpi nimusqanchis periodicollataqmi nin: “Payqa Jehová Diospa testigonmi, chay religionpin yachachisqaku imatapas mana hoqarikuq kananpaq”, nispa.

[17 paginapi dibujo]

Wayna sipaskunaqa sasachakuykunapiña tarikuspapas atinkumanmi Diospaq hunt’aq kayta

[18 paginapi dibujo]

Davidqa hunt’aq kayninta waqllichiranña chaypas, hukmantan Diospaq hunt’aq karan