Jesusllawanmi Diospa munayninqa hunt’akun

“Ñoqan kani ñanpas, cheqaq-kaypas, kawsaypas. Pipas ñoqallantapunin Yayamanqa chayanqa.” (JUAN 14:6.)

1, 2. ¿Imaraykun t’aqwirinanchis Diospa munaynin hunt’akunanpaq Jesuspa ruwasqanta?

ÑAWPAQ tiempomantañan runakunaqa allin qhawarisqa kayta munaranku, llank’anankupipas paykunan aswan allin ruwaq kayta munaranku, ichaqa yaqa llapallankun mana ayparankuchu imachus ruway munasqankuman. Huk otaq iskayllan ninkuman: “Manan pipas ñoqa hinaqa kawsayninpi ruwaranchu, ruwasqayqa ancha allinpunin”, nispa. Diospa Churin Jesucriston ichaqa mana piqpa ruway atisqanta ruwaran.

² ¿Imaraykun t’aqwirinanchis Diospa munaynin hunt’akunanpaq Jesuspa ruwasqanta? Dioswan allinpi kananchispaqqa chaymantan yachananchis. Jesusmi niran: “Ñoqan kani ñanpas, cheqaq-kaypas, kawsaypas. Pipas ñoqallantapunin Yayamanqa chayanqa”, nispa (Juan 14:6; 17:3, Edición 1988). Qhawarisunchis imaraykun Jesús mana piwanpas igualchu kanman chayta. Chhaynapin yachasunchis anchatataq valorasunchis Diospa munaynin hunt’akunanpaq Jesuspa ruwasqanta.

Diospa ‘sapallan Churin’

3, 4. a) ¿Imaraykun Jesús Diospa sapallan Churin? b) ¿Imatan Jesús ruwaran tukuy imaymanata Dios kamaqtin?

³ Jesusqa manan Diospa wakin wawankuna hinachu, aswanpas ‘Diospa sapallan Churinmi’ (Juan 3:16, 18). Griego rimaypi “sapallan” simiqa “mana pipas pay hina kaqmantan” otaq “familianpi sapallan kaqmantan” rimashan. Jehová Diospa wawankunaqa millonninpitaq hanaq pachapi kanku chayqa, ¿imaynapitaq Jesusri ‘sapallan familianpi’?

⁴ Dios kikinmi Jesustaqa kamaran mana piqpa yanapasqan chaymi payqa sapallan. “Payqa karqanñan manaraq imapas kamasqa kashaqtin”, ‘Diospa kamasqanpi qollanan’ (Col. 1:15; Apo. 3:14). Chaymantapas manan pipas Jesús hinaqa tukuy imaymanata kamaypi Diosta yanaparanchu. Jehová Diosña Kamaq chaypas, Jesuswanmi tukuy ima kaqtapas kamaran (leeychis Juan 1:3). Apóstol Pablon qelqaran: “Ñoqanchispaqqa sapan Dios Yayallan kan. Paymi lliw imaymanata kamarqan, chaymi ñoqanchispas paypaq kanchis. Kallantaqmi sapallan Señorpas, paymi Jesucristo, paywanmi Diosqa kamarqan lliw imaymanakunata, paymi ñoqanchistapas kawsachiwanchis”, nispa (1 Cor. 8:6).

5. ¿Imaynatan Biblia rikuchin Jesús sapallan kasqanta?

⁵ Ichaqa kanraqmi Jesuspa huk ruwasqankuna sapallan nispa sutichanapaq. Bibliaqa askha sutikunawanmi otaq titulokunawan Jesusta sutichan, chaykunan rikuchin payllawan Diospa munaynin hunt’akusqanta. Kunan yachasunchis phisqa sutikunamantawan, chaykunan tarikun Griego Rimay Qelqakunapi.

‘Simi’

6. ¿Imaraykun Jesusta ‘Simi’ nispa sutichakun?

⁶ (Leeychis Juan 1:14.) ¿Imaraykun Jesusta sutichakun ‘Simi’ nispa? Jehová Diosqa qallariymantapachan Jesusta utilizaran angelkunaman yachachinanpaq, hinallataq kay Hallp’api runakunamanpas kamachikuyninkunata yachachinanpaq. Jesusqa Simi kasqanta otaq Diospa rantinpi rimaq kasqantan sut’ita rikuchiran huk t’aqa judío runakunaman kay nisqanpi: “Yachachikuyniyqa manan ñoqaqchu, aswanpas kachamuwaqniy Diospan.  Pipas Diospa munayninta ruwayta munaqqa, yachanqan Diosmantachus yachachikuyniy kashasqanta, icha ñoqa kikillaymantachus rimashasqaytapas” (Juan 7:16, 17). Jesustaqa “Diospa Simin” nispan sutichakushallaran hanaq pachaman kutipuqtinpas (Apo. 19:11, 13, 16).

7. ¿Imaynapin ñoqanchispas Jesús hina huch’uyaykukuq kasunman?

⁷ Jesusllan lliw angelkunamantapas runakunamantapas ancha yachayniyoqqa, chaywanpas payqa manan yuyaykusqanman hinallachu yachachin aswanpas Taytanpa nisqanman hinapunin. Manan pay kikintachu allin yachayniyoqpaq qhawarinankutapas munan aswanpas Taytantan (Juan 12:50). ¡Jesuspa chhayna kasqanqa may allinmi qatikunanchispaq! Ñoqanchispas ‘allin willakuykunata willanapaqmi’ churasqa kanchis (Rom. 10:15). Chayrayku runakunaman yachachispaqa Jesús hina huch’uyaykukuq kaspa Bibliaq nisqanman hinalla rimananchis. Arí, ‘Diospa Simin Qelqaq nisqanmantaqa manan astawan yuyaykunanchischu’ (1 Cor. 4:6).

“Amén”

8, 9. a) ¿Ima ninantan nin “amén” nisqa simi, imaraykun Jesusta chay simiwan sutichakun? b) ¿Imaynatan Jesús rikuchiran “Amén” kasqanta?

⁸ Biblian Jesusmanta nin: “Laodicea llaqtapi iñiq t’aqaq angelninman qelqay: Ñoqa Amén, cheqaq rimaq hunt’aq testigon, Diospa kamasqanpi qollanan kay hinata niyki”, nispa (Apocalipsis 3:14, NM). ¿Imaraykun Jesusta “Amén” nispa sutichakun? “Amén” simiqa hebreo rimaypi “ahinapuni kachun” nisqa simimantan t’ikrakun, chay simitaq hamun “hunt’aq, cheqaqkaq” nisqa simimanta. Chaymantapas “hunt’aq, cheqaqkaq” nisqa simitaqa Jehová Diosmi hunt’aq ninapaqmi utilizakullantaq (Deu. 7:9; Isa. 49:7). Ichaqa, ¿imaynatan “Amén” suti rikuchin Jesús sapallan kasqanta? 2 Corintios 1:19, 20 textoq nisqanmi kutichin: ‘Diospa Churin Jesucristoqa manapunin “arí” nishaspaqa, manan, “mana” ninmanchu. Aswanpas Diosqa Cristowanmi “arí”, nishallanpuni. Diospa llapa prometesqankunaqa Jesucristowanmi hunt’akun, chayraykun Diosta yupaychaspaqa Jesucristoq sutinpi “Amén”, ninchis’.

⁹ Arí, Jesuswanmi Diospa llapa promesankunaqa hunt’akun chayraykun payqa “Amén”. Kay Hallp’api Diosta tukuy sonqo kasukusqanwan sacrificakusqanwan iman rikuchiran Diospa promesankuna cheqaq kasqanta hinaspa hunt’aran. Jesusqa hunt’aq kasqanwanmi rikuchiran Dios serviqkunata Satanaspa tumpasqan mana cheqaqchu kasqanta. Satanasmi niran: ‘Dios serviqkunaqa sasachakuykunapi tarikuspankuqa Diostan ñakanqaku’, nispa (Job 1:6-12; 2:2-7). Diospa llapa wawankunamantaqa Diospa Phiwi Churin Jesusmi aswan allintaqa Satanaspa tumpasqanman kutichiyta atinman karan. Chaymantapas payllan aswan allintaqa rikuchinman karan Dioslla kamachikunanpaq derechoyoq kasqanta.

10. ¿Imaynatan “Amén” kasqanpi Jesusta qatikusunman?

¹⁰ ¿Imaynatan “Amén” kasqanpi Jesusta qatikusunman? Jehová Diospaq hunt’aq kaspa, payta ancha hatun kamachiqninchista hina kasukuspapas. Chayta ruwaspaqa Proverbios 27:11 textoq nisqantan kasukushasunchis, chaypin nin: “Churilláy, yachayniyoq kay, hinaspa sonqoyta kusirichiway, chaymi k’amiwaqniyman kutichisaq”, nispa.

“Mosoq rimanakuypi allipunachiq”

11, 12. ¿Imaraykun mana pipas Jesús hina allipunachiq kanmanchu?

¹¹ (Leeychis 1 Timoteo 2:5, 6.) Jesusqa ‘Diostawan runakunatawan allipunachiqmi’, “mosoq rimanakuypi [otaq contratopi] allipunachiq” (Heb. 9:15; 12:24). Ichaqa Moisespas huk allipunachiqmi karan, Diosqa Moisesnintan Israel runakunamanqa Kamachikuy Simita qoran, chhaynaqa ¿imaraykutaq mana pipas Jesús hina huk allipunachiq kanmanchu? (Gál. 3:19.)

¹² Griego simimanta t’ikrakuq ‘allipunachiq’ simiqa leymanta rimaq simiwanmi tupan,  chaymi chay simiqa abogadoq ruwananmanta rimashan. Jesusqa huk abogado hinan mosoq rimanakuyta allipunachiran, chayraykun huk mosoq llaqta paqarin ‘Diospa cheqaq Israel llaqtan’ (Gál. 6:16). Chay llaqtaqa santo espirituwan hawisqa cristianokunan kanku, chaymi paykunaqa hanaq pachapi “rey t’aqa sacerdotekuna” kanqaku (1 Ped. 2:9, Mosoq Rimanakuy). Jehová Dios Israel runakunawan rimanakuy ruwasqanmi ichaqa mana chhayna llaqtata paqarichiranchu, chayraykun Jesusqa mana kaqllachu Moiseswan allipunachiq kasqanpi.

13. ¿Imaynatan Jesús allipunachiq kasqanwan yanapan mosoq rimanakuyman haykuqkunata?

¹³ ¿Imaynatan Jesús allipunachiq kasqanwan yanapan mosoq rimanakuyman haykuqkunata? Jehová Diosqa Jesús yawarninta hich’arisqanraykun mosoq rimanakuyman haykuqkunata chaninpaq qhawarin (Rom. 3:24; Heb. 9:15). Chayraykun chay rimanakuypi paykunata chaskin hanaq pachapi reykuna, sacerdotekuna ima kanankupaq. Jesucriston paykunata yanapan Diospa ñawpaqenpi ch’uya kanankupaq (Heb. 2:16).

14. ¿Imaraykun llapallanchis valorananchis mosoq rimanakuy ruwakunanpaq Jesuspa sacrificakusqanta?

¹⁴ Mosoq rimanakuyman mana haykuqkunaqa kay Hallp’api wiñaypaq kawsaytan suyakunku. ¿Imaynapin Jesuspa wañusqan paykunaq allinninpaq? Manaña chay rimanakuyman haykunkuchu chaypas, paykunaqa Jesuspa wañuyninwanmi huchankumanta pampachasqa kanku, chaymi paykunaqa chaninpaq qhawarisqa kanku Diospa amigon hina (Sant. 2:23; 1 Juan 2:1, 2). Chayrayku, hanaq pachapaqña otaq kay pachapaqña suyakuyninchis chaypas, anchatan valorananchis mosoq rimanakuy ruwakunanpaq Jesuspa sacrificakusqanta.

Uma Sacerdote

15. ¿Imaraykun Uma Sacerdote Jesús hukniray hukkunamanta?

¹⁵ Ñawpaq tiempopi askha uma sacerdotekunaña karanku chaypas, manan pipas Jesús hinaqa karanchu. ¿Imarayku? Apóstol Pablon kutichin: “Wakin uma sacerdotekunaqa sapa p’unchaymi paykuna kikinkuq huchankumanta sacrificiota haywarqanku, chaymantataq llapa llaqtaq huchankunamanta haywarqanku. Jesusmi ichaqa runakunaq huchanmanta pay kikinta sacrificiopi ch’ulla kutillata wiñaypaq haywakurqan. Kamachikuy simiqa pisi kallpayoq runakunallatan uma sacerdote kananpaq churarqan. Diospa juramentowan siminmi ichaqa kamachikuy simi qhepataña karqan, chay juramenton Churita uma sacerdote kananpaq churan, paymi wiñaypaq hunt’asqapuni kapun”, nispa (Heb. 7:27, 28). *

16. ¿Imaraykun Jesuspa sacrificio haywasqan ñawpaqpi uma sacerdotekunaq haywasqankuwan mana kaqllachu karan?

¹⁶ Jesusqa ch’uya runan karan, imaynan Adanpas manaraq huchallikushaqtin karan hina (1 Cor. 15:45). Chayrayku ch’uya hunt’asqa, manaña hukmanta haywanapaq sacrificiotaqa Jesuslla haywayta atiran. Kamachikuy simiq nisqanman hinaqa sapa p’unchaymi sacrificiota haywaqku. Ichaqa chay tiempopi sacerdotekunaq ruwasqan, sacrificio haywasqankupas qhepa tiempoman Jesuspa ruwanantan rikuchiran (Heb. 8:5; 10:1). Jesusqa Dioswan allinpi kananchispaqmi ch’ulla kutillata wiñaypaq sacrificiota haywaran, chayraykun mana pipas pay hina Uma Sacerdoteqa kanchu.

17. ¿Imaraykun valorananchis Uma Sacerdote Jesuspa yanapayninta, imaynatan chayta rikuchisunman?

¹⁷ Dioswan allinpi kananchispaqqa Jesús hina Uma Sacerdoteq yanapaynintan necesitanchis. ¡Payqa ancha allin uma sacerdoten! Apóstol Pablon niran: “Uma sacerdotenchisqa pisi kallpa kashaqtinchispas khuyapayawanchispunin, payqa ñoqanchis hinan imaymanapi wateqasqa [probasqa] karqan, ichaqa  manan huchallikurqanchu” (Heb. 4:15). Jesuspa chhayna ruwasqanta entiendeq cristianokunaqa manañan ‘paykuna kikinkupaqchu kawsanku, aswanpas paykunarayku wañuq’ Cristopaqñan kawsanku (2 Cor. 5:14, 15; Luc. 9:23).

Prometesqa Miray

18. a) Adanpa huchallikusqan qhepaman, ¿imatan Jehová Dios profetizaran? b) ¿Imatan qhepaman yachakuran chay Miraymanta?

¹⁸ Adán huchallikuqtinqa mana suyakuyniyoqpas runakuna kapunkuman hinan karan, Dioswan allinpi kayta, Paraisopi wiñaypaq kusisqa kawsaytapas chinkachipushankuman hina, Jehová Diosmi ichaqa profetizaran huchamanta librawananchispaq huk kacharichiqta kachamunanpaq, chaytan suticharan ‘miray’ nispa (Gén. 3:15). Chay Miraymantaqa manan pipas yacharanchu imayna kananta chaymi watakunaq pasasqanman hina askha profeciakuna willaran. Abrahampa, Isaacpa, Jacobpa mirayninmanta hamunan karan. Rey Davidpa mirayninmanta ima (Gén. 21:12; 22:16-18; 28:14; 2 Sam. 7:12-16).

19, 20. a) ¿Pin Diospa prometesqan Miray? b) ¿Imaraykun nisunman hawisqa cristianokunapas chay Miraymi kanku nispa?

¹⁹ ¿Pin chay Diospa prometesqan Miray karan? Gálatas 3:16 texton kutichishan. (Leeychis.) Ichaqa Gálatas 3:29 textopin Apóstol Pablo hawisqa cristianokunata nin: “Qankunapas Cristoqpuni kankichis chayqa, Abrahampa mirayninpunin kankichis, Abrahamman Diospa prometesqantapas chaskillankichistaqmi”, nispa. ¿Imaraykun Pablo niran: “Diospa prometesqan mirayqa Criston, chaymantataq hawisqa cristianokunan kanku”, nispa?

²⁰ Kay tiempopiqa askha runakunan hatunchakunku Abrahampa mirayninmi kayku nispa. Wakin religionkunapipas ninku: “Profetaykuqa Abrahampa mirayninmantan hamun”, nispa. Chhaynaqa, ¿Diospa prometesqan  Miraychu chay runakunapas kanku? Manan. Apóstol Pabloq nisqan hina, manan Abrahampa llapa mirayninchu ninman: “Diospa prometesqan Miraymi kayku” nispaqa. Abrahamqa askha churiyoqmi karan, ichaqa llapa runakunata bendecikunanpaq Mirayqa Isaacllamantan hamunan karan (Heb. 11:18). Diospa prometesqan Mirayqa Abrahammanta hamuq huk runallan kanan karan, paymi karan Jesucristo, Bibliaqa sut’itan rikuchin Jesús Abrahampa miraynin Isaacmanta hamusqanta. * Ichaqa hanaqpachapaq akllasqa cristianokunapas chaymantañan Abrahampa qhepa kaq miraynin kallarankutaq ¿imarayku? Paykuna ‘Cristoq kasqankurayku’. Rikusqanchis hina ñawpaq profeciapi Diospa prometesqan Mirayqa Jesusllawanmi hunt’akuran.

21. Jesusllawan Diospa munaynin hunt’akusqanmanta yachaspa ¿ima ruwasqanmantan astawan admirakunki?

²¹ ¿Imatan yachanchis Jesusllawan Diospa munaynin hunt’akusqanmanta? Kamasqa kasqanmantapachapas manan pipas Jesús hinaqa kanchu. Chaywanpas payqa huch’uyaykukuspan Taytanta servin tukuy sonqowan munayninta ruwaspa (Juan 5:41). Chhaynaqa sapa p’unchay kallpachakusun Jesús hina tukuy ima ruwasqanchispi “Diosta hatunchanapaq” (1 Cor. 10:31).

[Uranpi willakuykuna]

¿Yuyarishankichu?

• ¿Imatan yachachiwanchis Jesuspa sapanka titulonkuna payllawan Diospa munaynin hunt’akusqanmanta? (Qhaway recuadrota.)

• ¿Imaynatan Diosta servispa Jesusta qatikusunman?

[Tapuykuna]

[26 paginapi dibujo recuadropiwan]

Kay sutikunan rikuchiwanchis Diospa munaynin hunt’akunanpaq Jesús imaymana ruwasqanta

▪ Sapallan Churi (Juan 1:3). Jesusllatan Jehová Diosqa llapa kamasqanmantapas ñawpaqta kamaran, manan pipas yanaparanchu chaypiqa.

▪ Simi (Juan 1:14). Jehová Diosqa Jesuswanmi hukkunaman imatapas willachin yachachin ima.

▪ Amén (Rev. 3:14; Mosoq Rimanakuy [MR]). Jesusmi hunt’aran Diospa promesankunata kay pachapi kashaspa allin kawsasqanwan hinallataq runakunarayku wañusqanwan ima.

▪ Mosoq rimanakuypi Diostawan runakunatawan allipunachiq (1 Tim. 2:5, 6). Diosta runakunatawan Jesús allipunachisqanwanmi rikhurichiran “Diospa cheqaq Israel llaqtan[ta]”. Chay llaqtapin kashanku hanaq pachapaq akllasqa “rey t’aqa sacerdotekuna” (Gál. 6:16; 1 Ped. 2:9; MR).

▪ Uma sacerdote (Heb. 7:27, 28). Jesusllan ch’uya runa karan, manan imapipas huchallikuranchu, chaymi huk kutillata ñoqanchisrayku wañuran, chhaynapi manaña sapa rato sacrificiota haywashanapaq. Chaywanmi kacharichiwanchis huchamanta, hucha hawa imaymana mana allinkunamantawan.

▪ Prometesqa miray (Gén. 3:15). Criston prometesqa miraypi umalliqqa, wakin chaymantaña chay miraypi rikhuriqkunaqa ‘Cristoqmi kanku’ (Gál. 3:29).