¿Maymanmi rinchis wañupuspanchis?

“Llapa runakunan mana wañuq almayoq kanchis [. . .]. Chaymi millay runakunaq almanqa wiñay nina rawraypi ñak’arinku, manataq wañuyta atinkuchu chayqa manan chhaynaniraq ñak’arisqankumantaqa ayqeyta atinkuchu.” (Clemente de Alejandría II, III siglokunamanta teólogo)

CLEMENTE hina nina infiernopi creeqkunaqa llapallankun ninku: “Runakunaqa mana wañuq almayoqmi kanchis”, nispa. Ichaqa, ¿chaytachu Biblia yachachin? Chaymanta yachananchispaq t’aqwirisunchis imaynatas Biblia kutichin qatimuqpi tapuykunaman chayta.

¿Karanchu Adanpa mana wañuq alman? Biblian nin: “Ñut’u hallp’amantan Jehová Diosqa runata ruwaran, hinaspa kawsay samayta senqanman samaykuran, chaymi runaqa kawsashaq alma kapuran”, nispa (Génesis 2:7, Reina-Valera 1977, castellano rimaypi). Chaypi nisqan hina, Adanqa manan huk almatachu chaskiran aswanpas paymi alma karan.

¿Iman Adanwan sucederan huchallikusqan qhepaman? Diosqa manan wiñaypaq nina rawray infiernopi ñak’arichispachu castigaran. Aswanpas Diosqa niranmi: “Hump’iykita hich’arispan mikhunata tarinki ruwasqa kasqayki hallp’aman tukunaykikama, ñut’u hallp’an kanki, ñut’u hallp’amantaqmi tukupunki”, nispa (Génesis 3:19). Chay textopi nisqan hina, manan Adanpiqa imapas wañusqan qhepaman kawsashallaqqa karanchu. Pay wañupuqtinqa almanpas wañuranmi.

¿Kanchu huk runallapas mana wañuq almayoq? Diosmi profeta Ezequielta niran: “Huchallikuq almaqa wañunqan”, nispa (Ezequiel 18:4, Reina-Valera 1977, castellano rimaypi). Qhepamanmi apóstol Pablo qelqaran: “Imaynan huk runallawan huchaqa kay pachapi qallarirqan, huchawantaq wañuypas rikhurirqan, chay hinallataqmi, wañuyqa llapa runaman chayarqan llapallan huchallikusqankurayku”, nispa (Romanos 5:12). Chhaynaqa llapa runakunataq huchallikunku chayqa, llapa almakunan wañunku.

¿Wañusqakuna yachankuchu otaq sientenkuchu imatapas? Diospa Simin Qelqan nin: “Kawsashaqkunaqa yachankun wañukapunankuta, wañukapuqkunan ichaqa mana imatapas yachankuchu”, nispa (Eclesiastés 9:5). Nillantaqmi: “Wañukapuspanqa hallp’amanmi tukupun, chay p’unchaypachan yuyaykusqankunaqa chinkapun”, nispa (Salmo 146:4). Chhaynaqa, wañusqakunaqa ‘manataq imatapas yachankuchu’, ‘chay p’unchay pachataq yuyaykusqankunapas chinkapun’ chayqa, ¿imaynatan nina rawray infiernopi wiñaypaq ñak’arinkuman?

Jesucristoqa manan hayk’aqpas yachachiranchu pipas wañupusqan qhepaman kawsashanallantaqa, aswanpas puñuywanmi wañuytaqa rikch’anachiran (Juan 11:11-14). Chaywanpas askha runakunan ninku, Jesusqa rimaranmi nina infiernomanta, chayman huchasapa runakuna wikch’uykusqa kanankumantapas, nispa. Chayrayku qatimuq temapi qhawarisunchis imanisharansi Jesús infiernomanta rimaspa chayta.