Wawaykikunata yachachiy

Ama Josepa wayqenkuna hina envidiakuqqa kaychu

¿HAYK’AQLLAPAS phiñakurankichu huk runamanta pipas: “Payqa allin runan, sonqo suwan, allin yachayniyoqmi”, nispa rimaqtin? *... Sichus chay pasarasunki chayqa, envidiakusharankin chay runamanta.

Sichus tayta mama pi wawantapas hukkunamanta aswan allinta munakunman chayqa, wasipipas kanmanmi envidianakuyqa. Bibliapas willanmi huk familiapi chay pasasqanmanta. Chaymi kunan chay familiamanta yachasunchis, imaynapi tarikusqanku imakunapichus yanapawasunman chaytawan.

Jacobpa qhari wawankunan chunka iskayniyoq karan. Chay chunka iskayniyoqmanta huknin wawanmi karan José, payqa yaqa sullk’a kaqmi karan. Josemantan wayqenkunaqa envidiakusqaku, ¿imaraykutaq envidiakunkumanri karan? ¿Yachankichu chayta?... Paytayá papan huk wayqenkunamanta astawanraq munakusqa, chayraykun envidiakusqaku. Anchatapuni munakusqanraykun papanqa allin p’achataraq ruwachipusqa. ¿Imaraykun astawan munakunman karan? “Yuyaq-kayninpiña churiyasqanrayku” hinallataq ancha munakusqan señoran Raquelpa phiwi wawan kasqanrayku ima.

Bibliaq willasqan hina Jacobqa “Joseta[n] munakurqan llapa churinkunamantapas aswantaraq”, chayta reparaspan wayqenkunaqa Joseta cheqnikapuranku. Chaypaq hinataqyá Josepas llapa familianman willakusqa imachus mosqokusqanta. Chay mosqokusqanpis tayta maman wayqenkuna ima payman qonqoriykushasqaku. Chayta uyarispan astawanraq “wawqenkuna[qa] payta envidiakurqanku”, taytanpas phiñarikuranmi chaykuna willakusqanmanta (Génesis 37:1-11).

Huk kutinmi Josepa wayqenkunaqa ovejankuta cabrankuta ima wasinmanta karupiraq michimusharanku. Chay tiempopaqqa Joseqa 17 watallanpiraqmi kasharan. Chaymi papanqa Joseta kacharan wayqenkuna watukuqta. ¿Imatan ruwankuman karan Josepa wayqenkuna  payta rikuruspanku? ¿Yachankichu chayta?... Josetan wañuchiyta munaranku, Rubenwan Judawanmi ichaqa mana munarankuchu.

Chayllamanmi rikuranku Egipto llaqtaman riq comerciantekunata, chaymi Judaqa niran: ‘Aswanpas chay runakunaman venderusun’, nispa, chaymi paykunaqa Joseta venderapuranku. Chaymantataq huk cabrata ñak’aspa yawarninwan Josepa p’achanta yawarcharanku. Chaytan paykunaqa papankuman aparanku, chaymi papankuqa chayta qhawaspa niran: “Ima phiña animalchá Josetaqa llik’irqarispa mikhurqon”, nispa (Génesis 37:12-36).

Egipto llaqtapi kashaspan Joseqa munachikuran chay llaqtapi gobiernaq faraonwan. ¿Imaraykutaq faraonri munakunman karan? Huk kutinmi faraón mosqokusqa. Chay mosqokusqanta mana pipas willayta atiqtinmi Joseqa Diospa yanapayniwan willaran chay mosqokusqan imachus kasqanta. Faraonqa mosqokusqanpin rikusqa qanchis allin wira wakakunata, chay qhepallamansi rikhurimullasqataq qanchis millay toqtillaña wakakuna. Chaymantan mosqokullasqataq qanchis uma trigota, chay trigokunaqa rurusapallañas kasqa, chayllamansi rikhurimullasqataq qanchis ch’usu trigokuna. Chay mosqokusqan imachus kasqantan Joseqa faraonman willaran. Josepa willasqanman hinaqa qanchis watatas allin mikhuy kanan kasqa, qanchis watataqsi yarqay kanan kasqa. Chaykuna willasqanmantan faraonqa Joseta churaran allin watakunapi mikhuyta waqaychaqta.

Yarqay watakuna chayamusqanman hinan Josepa familiankunaqa tukupusharankuña mikhuyninkuta. Chaymi Jacobqa Josepa chunka kuraq wayqenkunata Egipto llaqtaman kacharan mikhuykunata rantimunankupaq. Chayman chayaspankuqa manan Joseta reqsirankuchu. Chaymi Joseqa wayqenkunata probaran hinallapunichus kashanku icha cambiarunkuñachu chayta yachananpaq. Chay probasqanpin Joseqa repararan wayqenkuna manaña kaqchu kasqankuta. Chaymantapas paykunaqa sinchitan nanachikusharanku Joseta mana allin ruwasqankumanta. Chayñan Joseqa paykunaman reqsichikuran. Llapallankutaqmi anchata kusikuranku wakmanta tupasqankurayku (Génesis 40 capitulomanta 45 capitulokama).

¿Kunanri imanisunmantaq? ¿Allinchu kasqa envidiakuy?... Manan riki. Aswanpas mana allin ruwaykunamanmi apawasunman. Envidiakuq kasunman chayqa, kikin wayqenchistawanmi mana allinta ruwayta munasunman. Leesunchis Hechos 5:17, 18; 7:54-59 textokunata. Chaypi willasqanman hina, ¿imatan wakin runakuna ruwaranku Cristoq qatikuqninkunata envidiakusqankurayku?... ¿Yachankiñachu kunan imaraykus mana pitapas envidiakunanchista?...

Joseqa 110 watanpiñan wañukapuran. Paypaqa karanmi wawankuna; rikurantaqmi nietonkunata, nietonkunaq wawankunatapas. Allintachá paykunataqa yachachiran mana envidianakuspa sumaqta kawsanankupaq (Génesis 50:22, 23, 26).

[Uranpi willakuy]

Tapuykuna:

○ ¿Imataq envidiakuyri?

○ ¿Imatan Josepa wayqenkuna ruwaranku envidioso kasqankurayku?

○ ¿Imaraykun José wayqenkunata perdonapuran?

○ ¿Imatan Josepa wayqenkunamanta yacharanki?