Diosta allinta reqsiy

Diosman “rikch’akuq kaychis”

Efesios 4:32–5:2

KAY tiempopiqa chinkapushanñan sumaq sonqo runa kay, khuyapayanakuy, pampachanakuy, munanakuy ima. Yaqapaschá qan kikiyki kallpachakushanki allin runa kanaykipaq, ichaqa mana atikuqta hina qhawarishanki chay ruwayta. ¿Imaraykun chay kashanman? Yaqapaschá imapi pantasqallaykita qhawarishanki, hinaspa ñawpaqpi imapas mana allinkuna ruwasqaykita yuyarispa otaq ima vicioykitapas yuyarispa niwaq: “Manan hayk’aqpas chaykunata saqeyta atiymanchu”, nispa. Ichaqa llapanchispas atisunmanmi allin runaman tukuyta, Kamaqninchispas chaytaqa allintan yachan, chaytan Biblia willawanchis.

Diospa Simin Qelqan llapa cheqaq cristianokunata nin: “Diospa munasqa wawankunan kankichis, chayrayku payman rikch’akuq kaychis”, nispa (Efesios 5:1). Chay textoq nisqan hina, Diosqa confianmi serviqninkuna paypa munasqaman hina kawsanankupi. ¿Imarayku? Lliw runapas paypa rikch’ayninman hina kamasqa kasqanchisrayku (Génesis 1:26, 27). ¿Imaynapitaq paymanri rikch’akunchis? Pay hina munakuq sumaq sonqo kaspa. * Biblian niwanchis “Diosman rikch’akuq kaychis” nispa riki, chaywanqa: “Qankunapin confiani. Huchasapaña kankichis chaypas, atillankichismi sonqoypaq hina kawsaytaqa”, nispapas Dios niwashasunman hinan kanman.

Chhaynaqa, ¿imaynan kananchis Diosman rikch’akunanchispaq? Chaypaq qhawarisun Pabloq nisqanta. Manaraq ‘Diosman rikch’akuq kaychis’ nispa nishaspan payqa niran: “Sumaq sonqo kaychis, khuyapayanakuq, pampachaykunakuq”, nispa (Efesios 4:32; 5:1). ‘Diosman rikch’akuq kaychis’ nisqan qhepamantaq rimaran tukuy sonqowan hukkunata munakuspa kawsanamanta (Efesios 5:2). Jehová Diosqa sumaq sonqo kaypi, khuyapayakuq kaypi, pampachaq kaypi, hukkunata munakuypi iman ancha allin ejemplo ñoqanchispaq.

¿Imaraykutaq Diosman rikch’akuqri kananchis? Chaypaq yuyarillasuntaq apóstol Pabloq nisqanta. Paymi niran: “Diospa munasqa wawankunan kankichis, chayrayku payman rikch’akuq kaychis”, nispa. Chaypi rikusqanchis hina Jehová Diosqa wawankunata hinan qhawarin paypa munayninta tukuy sonqo ruwaq runakunataqa. ¿Manachu chay yachay sonqonchistaraq llanllarichin? Imaynan huk wawapas taytanmanta apakun ima ruwasqanpipas, chhaynatan ñoqanchispas kallpachakunanchis hanaq pacha taytanchis hina kananchispaq.

Jehová Diosqa manan mana munashaqtachu pay hina kananchispaq kamachiwanchis, aswanmi payqa munan ñoqallanchismanta pay hina kananchista. Chaymi sapanka akllakunan Diospa munasqanman hinachus kawsanqa icha manachus chayta (Deuteronomio 30:19, 20). Arí, llapanchispas atisunmanmi pay hina sumaq sonqo kaytaqa. Chaypaqmi ichaqa payta allintapuni reqsinanchis. ¿Imatataq ruwana Diosta reqsinapaqri? Bibliatan estudiana, chaypin allinta yachasun imayna Dios kasqanta, chhaynapitaq llapa serviqninkuna hina payman rikch’akusun.

[Uranpi willakuy]