Jehová Diosqa chanin kaqtan munakun
Diosta allinta reqsiy
Jehová Diosqa chanin kaqtan munakun
YAQAPASCHÁ pillapas millayta tratarasunki otaq mana allinkunata ruwaspa sinchita ñak’arichirasunki. Chhayna kaqtinqa sasapunin chaykuna aguantayqa kanman, astawanqa chay ruwasqanmanta chay runa mana nanachikuqtin otaq pipas mana imanaqtin. Aswan sasaraqchá kanman munakusqayki otaq confiasqayki runa chaykunata ruwaqtinqa. Chaykuna kaqtinqa yaqapaschá tapukuwaq: “¿Imanaqtintaq Diosri hinallata qhawan chaykuna kananta?” nispa. * Ama llakikuychu, Jehová Diosqa cheqnikunmi runakunaq tukuy mana allinkuna ruwasqanta. Chaymantapas Diosqa castiganqan millaykunata ruwaspa mana kutirikuq runakunataqa, chaytan Bibliapuni nin. Apóstol Pablon Diospa chay promesanmanta qelqaran Hebreos 10:26-31 textokunapi, chaymantan kunan yachasunchis.
Pablon khaynata niran: “Cheqaq-kayta reqsishaspanchisñachus yuyaymantapuni huchallikusunchis chayqa, manan hucha pampachaq sacrificio kanñachu”, nispa (versículo 26). ¿Imaraykutaq chhayna huchallikuqkunari manaña pampachasqachu kanqaku? Ñawpaqtaqa, “yuyay[pi]puni” huchapakusqankurayku. Chaymantapas, huchallapiña purisqankurayku; paykunaqa manan runa kayninkupichu qonqaylla huchaman urmanku, aswanmi sonqonkupipuni mana allin ruway q’esachakusqanrayku chaykunata ruwanku. Chaymantataq, yachashaspa huchakunapi purisqankurayku. Apóstol Pabloq nisqan hina, paykunaqa allintan ‘reqsinku Diosmanta cheqaq kaqta’; yachankun Diospa ima munasqantapas, ichaqa manan munankuchu chayman hina kawsayta.
¿Imanintaq Dios chhayna mana kasukuq k’ullu huchapakuqkunamantari? Apóstol Pabloq nisqan hina paykunapaqqa “manan hucha pampachaq sacrificio kanñachu”. Cristoq wañuyninqa manan yuyaypipuni huchapakuqkunapaqchu, aswanmi runa kaypi qonqaylla huchaman urmaqkunapaq (1 Juan 2:1, 2). Chhaynaqa, pipas huchanta saqespa Diosman mana kutirikuqqa, mana valeqpaq hinan qhawarin Jesuspa wañusqanta. Jehová Diospaqqa chay runaqa ‘Churintan sarunchan’, ‘yawarnintapas qhellipaqmi hap’in’ (versículo 29). Imayna kawsasqanwanmi chay runaqa rikuchin Jesuspa yawarninta “mana valeqpaq hina” qhawarisqanta, arí, Jesuspa wañusqanta mayqen huchasapa runallapas wañushanman hina qhawarisqanta (Comentario al Nuevo Testamento, William Barclay). Chhayna mana agradecekuq runakunataqa manan Cristoq wañusqanqa yanapanmanchu.
Chhaynaqa, ¿iman kanqa chhayna mana kasukuq runapaq? Chanin kaqta munakuq Diosmi kutichin: “Ñoqan [...] vengakuqqa kani, ñoqan [...] kutichipusaq”, nispa (versículo 30). Huchallapi puriq mana khuyapayaspa runamasinta ñak’arichiqqa, Diospa kamachikuyninkuna contran ruwashan, chhayna runaqa castigasqapunin kanqa. Arí, imachus tarpusqatan cosechanqa (Gálatas 6:7). Manaña kay tiempopi paganqakuchu chaypas, Diospa cuenta mañanan p’unchay chayamuqtinmi llapachanku paganqaku (Proverbios 2:21, 22). Pabloq nisqanta ama qonqasunchu, paymi niran: “¡Manchay-manchaymi kawsaq Diospa makinman urmayqa!” nispa (versículo 31).
Rikusqanchis hina Jehová Diosqa manan hinallatachu qhawanqa pipas yuyaypipuni huchallikuqtaqa. Sichus chhayna runakunaq causanpi ñak’ariranchis chayqa maytachá kusikunchis Diospa ruwananmanta yachaspa. Diosqa chinkachinqapunin ñak’arichiqninchis runakunata, chaypaqqa pisillañan kashan.
[Uranpi willakuy]
^ párr. 1 ¿Imaraykun Dios mana tukuchinchu runaq ñak’arisqanta? Chayta astawan yachayta munanki chayqa, ¿Imatapunin Biblia yachachin? nisqa librota qhawariy 106 paginamanta 114 paginakama, chaytaqa Jehová Diospa testigonkunan ruwan.