Kamaqninchisqa hatunchanapaq hinan
Diosta allinta reqsiy
Kamaqninchisqa hatunchanapaq hinan
YAQAPASCHÁ hayk’aqllapas tapukuranki: “¿Imapaqtaq kay pachapiri kawsashani?”, nispa. “Tukuy imapas yanqallamantan rikhurimuran”, nispa niqkunaqa manan chayta yachankuchu. Jehová Dios tukuy imatapas kamaq kasqanpi creeqkunan ichaqa yachanku imapaqchus kawsay kasqanta (Salmo 36:9). Yachankun Apocalipsis 4:11 textopi nisqanta hunt’anankupaq kamasqa kasqankuta. Chaytaqa apóstol Juanmi qelqaran. Chaymi kunan chay textoq ima nisqanta allinta estudiaspa yachasunchis imapaqpunichus kamasqa kasqanchista.
Hanaq pachapis Jehová Diosta nishasqaku: “Qanqa Señor Diosniyku, hatunchaytapas, yupaychaytapas, atiytapas chaskinaykipaq hinapunin kanki, tukuy imaymanata qan kamasqaykirayku, chaymi munayniykiwan kashankupas, kamasqapas karqanku”, nispa. Chaytan Juan rikusqa mosqoypi hina. Chaypi nisqanku hina Jehová Diosllan chaskinan yupaychayta, hatunchayta, atiytapas. ¿Imarayku? Paylla tukuy imatapas kamaq kasqanrayku.
Chhaynaña kaqtinpas yaqa llapa runakunan mana Kamaqninkuta hinachu payta qhawarinku. Wakin Dios sonqo runakunan ichaqa, Diospa imaymana kamasqanta qhawarispa allinta reparanku Dios imayna kasqanta, arí, Diosqa “kamasqankunapin sut’ita reqsichikun” (Romanos 1:20). Chayraykun chay runakunaqa agradecekuspa Diosta hatunchanku yupaychanku ima. Chaymantapas llapa runakunamanmi willanku Jehová Dioslla tukuy imaymana kamaq kasqanmanta, paylla ancha respetana admiranapaq hina kasqanmantawan (Salmo 19:1, 2; 139:14).
Ñaqha leesqanchis hina, Jehová Diosqa manan yupaychayta hatunchayta imallachu chaskinan; atiytapas chaskinanmi. Ichaqa, ¿imaynatataq tukuy atiyniyoq Diosmanri atiyta qosunman? (Isaías 40:25, 26.) Diospa rikch’ayninman hinataq kamasqa karanchis chayqa, ñoqanchispapas kanmi atiyninchisqa, ichaqa manan Diospa hinachu (Génesis 1:27). Sichus Dios ñoqanchisrayku tukuy imaymana ruwasqanmanta tukuy sonqowan agradecekusun chayqa, allintan kallpachakusun payta servinapaq, chhaynapin atiyninchista payman qosun. Arí, kallpanchista otaq atiyninchista munayninchista ruwaspalla tukushanamantaqa, Diospa munaynintan ruwananchis (Marcos 12:30).
Chhaynaqa, ¿imaraykun kay pachapi kawsashanchis? Apocalipsis 4:11 texton nin: “Tukuy imaymanata qan kamasqaykirayku, chaymi munayniykiwan kashankupas, kamasqapas karqanku”, nispa. Chay textoq nisqan hina, Diospa munasqanraykun kay pachapi kawsanchis, manan munasqanchisraykuchu. Chaymi pipas munasqanman hina kawsaqtinqa mana kusisqachu kawsan. ¿Chhaynaqa imatan ruwananchis kusisqa thak kaypi kawsanapaq? Allintan yachananchis imatachus Diospa munasqanta, chayman hinataqmi kawsananchispas. Chayta ruwaspallan yachasunchis imapaqchus kawsasqanchista (Salmo 40:8).
[26 paginapi kaq fotota horqorqan]
NASA, ESA y A. Nota (STScl)