Diosta manchakuy, amataq runataqa

HUK jovenmi admirasqaraq uyarisharan Jehová Diospa testigonkunaq yachachisqanta. ¿Imarayku? Chay jovenqa yachaytapunis munasqa imarayku Dios millay kawsayta hinallata qhawasqanmanta. Chaytan testigokunaqa Bibliawanpuni willasharanku, chaywanmi admirasqa kasharan. Payqa manan yachasqachu Bibliapi chaykuna willasqanta.

Chay testigokunaq ripusqan qhepallamanmi wasiyoqqa chayasqa, hinan sinchi phiñasqa jovenpa cuartonman haykuspa tapusqa: “¿Pikunan karan chay iskay runakuna?” nispa.

Hinan chay jovenqa sinchita mancharikuspa mana rimariytapas atisqachu.

Chaymi chay wasiyoqqa sinchi phiñasqa nisqa: “Yachanin pikunachus kasqanta, huk kutitawanchus chay runakunata kaypi rikusaq chayqa, ripunkin wasiymanta”, nispa.

Chaykunata nirparispan chay wasiyoqqa punkuta wisq’arparispa pasapusqa.

Cheqaq cristianokunaq contranpi hatariqkunaqa kanqapunin

Chaykunaqa pasanpunin, Bibliapipunin niranña: “Jesucristowan hukllachasqa kaspa Diospaq hinapuni kawsayta llapa munaqkunaqa qatiykachasqapunin kanqaku”, nispa (2 Timoteo 3:12). Arí, chaypi nisqan hina cheqaq cristianokunaqa manan allin qhawarisqachu kanku. ¿Imaraykun chaykuna kanman? Apóstol Juanpa nisqan hina paykunaqa ‘Diospan kanku, lliw kay pachataq saqraq munaychakusqan kashan’ chayraykun. Chaymantapas Bibliaq nisqan hina, chay Saqraqa “qaparishaq león hinaraqmi tukuyneqta purishan pillatapas oqoykunanpaq maskhaspa” (1 Juan 5:19; 1 Pedro 5:8). Arí, Saqraqa imaymanatan ruwan  runakunata Diosmanta karunchananpaq. Hukninmi runata manchakuy, chaymantan kunan yachasun.

Rikusqanchis hina cristianokunataqa hark’ashallankupunin. Jesustapas chaytan ruwaranku, payqa manan ima mana allintapas ruwaqchu aswanmi runakunata yanapaq, chhaynaña kaqtinpas paytaqa cheqnikurankun. Chaychá payqa manaraq wañushaspa niran: “Yanqa qasin cheqnikuwarqanku”, nispa (Juan 15:25). Chaymantapas qatikuqninkunatan niran: “Kay pacha runakunachus cheqnikusunkichis chayqa, yachaychis qankunamanta ñawpaqtaraq ñoqata cheqnikuwasqankuta. Manan kamachiqa patronninmanta kurakchu, nispa qankunaman nisqay simita yuyariychis. Ñoqata qatiykachawarqanku chayqa, qankunatapas qatiykachallasunkichistaqmi”, nispa (Juan 15:18, 20).

Apostolkunaq tiemponpi wakin runakunaqa huk runakunata manchakusqankuraykun mana willakuqkuchu cristianokuna yanapakusqankuta. Bibliapin willan wakin chay runakunamanta, paykunaqa ‘judío umallikunata manchakusqankuraykun’ mana Jesusmanta rimaqkuchu (Juan 7:13; 12:42). Chay tiempopi religionta umalliqkunaqa runakunatan amenazaqku: “Pipas Cristopi iñiqqa sinagogamantan qarqosqa kanqa”, nispa. Chaypi rikusqanchis hina, askha runakunan huk runakunata manchakusqankurayku mana cristianochu karanku (Hechos 5:13).

Chay tiempopin Jerusalén llaqtapi cristianokunatapas “sinchita qatiykachayta qallarirqanku” (Hechos 8:1). Ichaqa manan Jerusalén llaqtapi cristianokunallachu chhaynapi tarikuranku, aswanpas romanokunaq kamachisqan llapa llaqtakunapin. ¿Imaynapin chayta yachanchis? Roma llaqtapi judío runakunan apóstol Pablota niranku: “Yachaykun chay t’aqa contra hinantinpi rimasqankuta”, nispa (Hechos 28:22). Arí, chay runakunaq nisqan hina, cristianokunaqa ‘hinantinpin’ qatiykachasqa karanku.

Kay tiempopipas Saqraqa kaqllatataqmi ruwan Cristota qatikuy munaqkunawan. Chaymi Jehová Diospa testigonkunawan Biblia estudiaq askha runakuna hukkunaq k’amisqan burlakusqan ima kanku. Chhayna kaqtinqa yaqapaschá hukkunawan allillanpi kayta munaspa manchakunkuman Biblia estudiayta. Chakrapi llank’aqkunapas ninkumanpaschá: “Bibliata estudiasaq chayqa manapaschá chakraypi yanapawanqakuchu nitaq uywaykunatapas qhawaysiwanqakuchu”, nispa. Chhayna manchasqaña tarikuranku chaypas, askha runakunan Jehová Diospi confiaspa estudiallaranku, Jesús hina Diospa munasqanta ruwanankupaq. Chay ruwasqankumantan Jehová Diospas paykunataqa cuidallaranpuni.

Runakunata manchakunamantaqa Diostan manchakunanchis

Bibliaqa Diosta manchakunanchispaqmi niwanchis manan runata manchakunapaqchu. Arí, “yachayniyoq kanapaqqa Señor Diostaraqmi manchakuna” (Salmo 111:10). Ichaqa, ¿imataq Diosta manchakuyri? Chay manchakuyqa manan khatatataychu nitaq millay runata manchakuy hinachu, aswanmi payta munakusqanchisrayku sonqonta kusichiy otaq imatapas munasqanman hina ruway. ¿Imaraykutaq Diostari manchakuna? Chaytan kunan yachasun.

1 Jehová Diosllan tukuy atiyniyoqqa. Runakunaqa manan imapaschu Jehová Dioswan tupanachisqaqa, payllan ancha atiyniyoqqa. Paypaqqa “hatun suyukuna[pas] unu sut’uy hinallan” (Isaías 40:15). Chaymantapas tukuy atiyniyoq Diosqa atinmi ‘ima ruwasqa armamantapas’ serviqninkunata hark’ayta (Isaías 54:17). Paymantan kanqa pichus wiñay kawsayta chaskinqa pitaqchus mana chayqa. Chhaynaqa, ¿pimanmi risunman? Paypa ladonmanta kayllan allinqa kanman. Ichaqa, ¿imatan ruwananchis paywan kanapaq? Paymantan allinta yachananchis, mana manchakuspataq kasukuna (Apocalipsis 14:6, 7).

2 Diosqa yanapawasunmi imapipas. Proverbios 29:25 texton nin: “Runakunata manchapakuyqa huk toqllan [otaq trampan], Señor Diosman hap’ipakuqmi ichaqa waqaychasqa kashan”, nispa. ¿Imaraykun runakunata manchakuy huk trampa kanman? Manan Jehová Diosta serviyta atisunmanchu aswanmi manchapakuspalla purisunman, chayraykun. Chhaynaña kaqtinpas Jehová Diosmi khaynata niwanchis: “Ama manchakuychu, qanwanmi ñoqaqa kashani, ama pisipaychu, ñoqaqa Diosniykin kani, ñoqan kallpachasqaykipas yanapasqaykipas, ñoqan hap’iykusqaykipas”, nispa (Isaías 41:10).

3 Diosqa munakunmi paypa munayninta ruwaqkunataqa. Apóstol Pablon niran: “Allintapuni yachani: Manan wañuypas, kawsaypas, angelkunapas, kamachikuqkunapas,  atiyniyoqkunapas, kunankaqpas, hamuqkaqpas, hanaq pachapi kaqpas, Ukhu-pachapi kaqpas, ima kamasqapas Señorninchis Jesucristopi Diospa munakuyninmantaqa t’aqawasunchischu”, nispa (Romanos 8:37-39). Arí, chaypi nisqan hina, sichus Jehová Diosta kasukushallasun chayqa payqa anchatan munakuwasun.

4 Diostan agradecekunanchis tukuy imaymana qowasqanchismanta. Jehová Diosraykun kawsanchis, payraykun tukuy imaymanapas kashan chhaynapi kusisqa kawsananchispaq. Bibliapunin willawanchis ‘tukuy allin kaqkuna’ Diosmanta hamusqanta (Santiago 1:17). Chaymi Davidpas Jehová Diospa munakuyninta rikuspa khaynata niran: “Diosnilláy Señor Dios, askhallañan musphana ruwasqaykikunaqa, askhallañan yuyarikuwasqaykikunaqa. ¡Manan pipas qan hinaqa kanchu! Chaykunamanta rimariyman chaypas, manan yupayta atiymanchu”, nispa (Salmo 40:5).

5 Imayna kasqanchisqa yaqapaschá hukkunatapas yanapanman. Sichus Dios munakusqanchista rikuchisun payllatataq manchakusunpas chayqa, yaqapaschá hukkunata yanapasunman. Jesuspa familianmanta yuyarisun. Paykunamanta wakinqa manan creesqakuchu Jesuspi, aswanmi niranku: “Manan yuyayninpichu kashan”, nispa (Marcos 3:21; Juan 7:5). Kawsarimpusqan qhepamanmi ichaqa familianmanta askha paypi iñiranku. Wayqen Judas, Santiagopas Bibliapi wakin librokunataraqmi qelqaranku. Saulowanpas chaymi pasaran, payqa cristianokunatan qatiykachaq chaymantañan apóstol Pablo kapuran. ¿Imatan paykunamanta yachanchis? Sichus ñoqanchispas tukuy sonqowan Jehová Diosta servishallasun chayqa, yaqapaschá hark’awaqninchiskunapas cristianoman tukupunkuman (1 Timoteo 1:13).

Aberash sutiyoq warmimanta yachasunchis. Payqa África ladopin tiyan, chay warmiqa unayñas Diosmanta mañakusqa cheqaq yachachikuyta tarinanpaq. Jehová Diospa testigonkunawan Bibliata estudiayta qallariqtinmi ichaqa wakin familian religionpi umalliqkuna ima, sinchita hark’aqku. Chaymi familianmanta wakin Bibliata estudiaqkunaqa, manchakusqankurayku manaña estudiayta munasqakuchu. Aberashmi ichaqa Diospa yanapayninta mañakusqa mana pisipaspa estudiananpaq, chaymantañan bautizakapuran. Chhayna ruwasqanraykun familianmanta pusaq runakuna hukmanta Biblia estudiayta qallariranku.

Mana manchakuqmi kana

Runakunata mana manchakunapaqqa Jehová Diostan tukuy sonqowan munakunanchis. ¿Imatan chaypaq ruwana? Bibliatan allinta estudiana chaypitaq yuyaymanana, wakin textokunaqa Hebreos 13:6 hinan, chay textopin nin: “Señormi yanapaykuwaqniyqa, manan manchakusaqchu. Runari, ¿imanawanqataq?” nispa. Chaymantapas amapuni qonqasunchu imaraykuchus Diosta manchakunanchis kasqanta, chaypaqmi yachamuranchis phisqa yanapaykunamanta.

Sichus ñoqanchis Bibliaq nisqanman hina kawsasunchis chayqa, imaymana allinkunatan chaskisunchis. Yachasunmi imaraykuchus kawsasqanchista, imaraykuchus wañusqanchista, imaymanakunatawan. Chaymantapas Bibliapiqa allin yuyaychaykunan kashan, chaypin yachachillantaq qhepa tiempopi sumaq kawsay kananta. Chaykunan yanapawasunchis amaña sinchita llakikunapaq. Tukuy atiyniyoq Diosmantapas ima ratupas mañakullasunmanmi.

Apóstol Juanmi niran: “Kay pachaqa tukukapushanmi, tukuy imaymana mana chanin munayninkunapiwan. Diospa munayninta ruwaqmi ichaqa wiñaypaq kawsanqa”, nispa (1 Juan 2:17). Chhaynaqa manan runakunata manchakushanachu, aswanmi Diosta manchakuna, chhaynapin wiñaypaq kawsasun. Jehová Diosmi nisunki: “Churilláy, yachayniyoq kay, hinaspa sonqoyta kusirichiy, chaymi k’amiwaqniyman kutichisaq”, nispa (Proverbios 27:11). Chhaynaqa, kasukuyyá invitasqasuykita.

Payta manchakuqkunatan Jehová Dios nillantaq: “Huch’uyyaykukuqqa Señor Diostapas manchakuqqa qhapaq kayta, hatunchasqa-kayta, unay kawsaytawanmi tarinqa”, nispa (Proverbios 22:4). Jehová Diosllan chaytaqa qowasunman manan pi runapaschu.

[17 paginapi foto]

Aberash runata mana manchakuq kasqanraykun familianmanta pusaq runakuna Bibliata estudiashanku