Kawsayniykiqa qanmantan kanqa

“Diosqa runata kamarqan, Diosman rikch’akuqtan paytaqa kamarqan, qharita warmitawanmi kamarqan.” (Génesis 1:27)

CHAY simikunaqa rimashan ‘Dios lliwta tiemponpi sumaq tupaqta ruwasqanmantan’. ¿Iman chay ruwasqan karan? Paypa kamasqan runakunan: Adanwan Evawan, paykunamantan rimashan Bibliaq qallariyninpi (Eclesiastés 3:11). Diosmi paykunata nisqa: “Askhata miraychis, kay pachamanpas hunt’aykuychis, chaypi munayniyoq kaychis, kamachiychistaq challwakunata, phalaq animalkunata, kay pachapi puriq, suchuq llapa animalkunatapas”, nispa (Génesis 1:28).

Chaypi nisqan hina, Diosqa runakuna wawakunayoq kanankuta, kay pachata cuidanankuta hinallataq sumaq paraisoman tukuchinankutawanmi munaran. Payqa manan niranchu hayk’a tiempo kawsanankuta nitaq hayk’aq wañunankutapas. Aswanmi munaran sumaqta kawsanankuta. Arí, Diospa munayninman hina kawsaspaqa sumaqtan mana imamanta llakikuspalla kawsankuman karan.

 Kunanmi ichaqa mana chhaynatachu kawsashanchis, aswanmi machuyapuspa payayapuspa ima wañupunchis. Chaychá Jobpas niran: “Runaqa pisi p’unchaynillayoqmi, askha sasachayniyoqmi”, nispa (Job 14:1). ¿Iman pasaran khayna kawsay kananpaq?

Chaymantan Biblia nin: “Huk runallawan[mi] huchaqa kay pachapi qallarirqan, huchawantaq wañuypas rikhurirqan, chay hinallataqmi, wañuyqa llapa runaman chayarqan llapallan huchallikusqankurayku”, nispa (Romanos 5:12). ¿Pin kanman karan hucha paqarichiq ‘runa’? Adanmi karan, paymi yuyaypi Diosta mana kasukusqachu (Génesis 2:17). Mana kasukuq kasqanraykun manaña wiñaypaqchu kawsaran. Wawankunapas manañan atirankuñachu wiñaypaq kawsaytaqa, aswanmi saqewaranchis huchata wañuytawan. Ichaqa, ¿manañachu imatapas ruwayta atikuran? ¿Chaypichu kawsay tukukuran? Manan.

Diosqa hunt’anqan imachus munasqanta

Tiempoq pasasqanman hinan Diospa kamachin khaynata niran: “Chanin runakunaqa kay hallp’atan hap’ikapunqaku, chaypin wiñaypaq tiyanqaku”, nispa (Salmo 37:29). Chaypi rikusqanchis hina Diosqa hunt’anqan Edén huertapi imachus nisqanta. Bibliaqa nillantaqmi: “Diosmi paykunaq ñawinkumanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu, ñawpaqkaqkunaqa manaña kapusqanrayku”, nispa. Diospunin niran: “Qhawariy, ñoqan lliw imaymanata mosoqta ruwa[saq]”, nispa (Apocalipsis 21:4, 5).

Bibliaq nisqan hina, llapa ima ruwanapaqpas kanmi huk tiempo. Ichaqa yaqapaschá tapukusunman: “¿Hayk’aqtaq hunt’akunqa Diospa munayninri?” nispa. Kay revistata ruwaq Jehová Diospa testigonkunaqa yachaykun “tukukuy qaylla p’unchaykuna[pi]” kashasqanchista hinallataq Dios “lliw imaymanata mosoqta ruwa[nan]” tiempo chayamushasqantawan, chaytan ñoqaykuqa llapa runakunaman yachachishayku (2 Timoteo 3:1). Chaymantapas kallpachaykikun Bibliamanta astawan yachanaykipaq, chhaynapin yachanki qhepa tiempopi kawsay imaynachus kananta. Chaymi llapanchista Biblia niwanchis: “Señor Diosta maskhaychis tarinaraq kashaqtin, payta waqyakuychis qayllallapiraq kashaqtin”, nispa (Isaías 55:6). Chhaynaqa wiñay kawsayman aypay mana aypaypas ñoqanchismantan kanqa, manan pimantapaschu. Chaymantapas imaynachus kawsayninchis kanqa, hayk’aqchus wañusun chaykunaqa manan willasqañachu kashan.

[7 paginapi willakuy]

“Qhawariy, ñoqan lliw imaymanata mosoqta ruwa[saq]”