Diosqa wakcha wawakunaq taytanmi
Diosta allinta reqsiy
Diosqa wakcha wawakunaq taytanmi
BIBLIAN Jehová Diosmanta nin: “Ch’uya tiyananpi tiyaq Diosqa mana tayta-mamayoqkunaq taytanmi”, nispa (Salmo 68:5). Chay nisqanmi rikuchiwanchis may sumaqllaña Jehová Dios kasqanta. Payqa cuidanmi mana yanapaqniyoqkunata, paykunamanta wakinmi kanku mana tayta mamayoqkuna. Israel runakunaman kamachikuykuna qosqanpin reparanchis maytapuni paykunamanta llakikusqanta. Éxodo 22:22-24 textopin allinta chayta reparanchis, chaypin ñawpaq kuti rikhurin ‘mana tayta-mamayoq’ nisqa rimay.
Éxodo 22:22 textopin nin: ‘Aman mana tayta-mamayoqta ñak’arichinkichu’, nispa. Chayta nispaqa Diosqa manan Israel runakunata valekusharanchu khuyapayakuq kanankupaq, aswanmi kamachisharan chhayna kanankupaq. Mana taytayoq wawakunaqa khuyaytan kawsaranku manaña pipas paykunata uywaq kasqanrayku. Chaymi Diosqa manapuni munaranchu paykunata ñak’arichinankuta.
Jehová Diosmi niran: “Qanchus paykunata ñak’arichinki, paykunataq waqyakamuwanqaku chayqa, ñoqaqa paykunata uyarisaqpunin”, nispa (Éxodo 22:23). Hebreo rimaypi Éxodo 22:22 textopiqa “qankuna” nispan Diosqa Israel runakunata rimapayaran, chaywanmi rikuchisharan wakcha wawakunataqa llaqtantin cuidanankuta; 23 versiculopin ichaqa “qan” nispañataq nin. Chaywanqa rikuchisharan sapanka Israel runa chay kamachikuyta kasukunan kasqanta. Jehová Diosqa makillan kasharan wakcha wawakunata uyarinanpaq yanapananpaq ima (Salmo 10:14; Proverbios 23:10, 11).
¿Imatan Dios ruwanman karan pipas wakcha wawata ñak’arichinman chayqa? Pay kikinmi niran: “Ñoqaqa k’arak phiñasqan qankunata espadawan wañuchisqaykichis”, nispa (Éxodo 22:24). Huk libroq nisqan hina, chay textopi ‘k’arak phiñasqa’ nisqa simiqa “sinchi phiñasqa” ninantas nin, hebreo rimaypitaqsi “senqayraqmi q’oñirinqa phiñakuymanta” ninanta nin. Chaymantapas kikin Diospunin huchachanan karan wakcha wawakuna ñak’arichiqkunataqa, manan Israel llaqtapi kaq juezkunachu (Deuteronomio 10:17, 18).
Jehová Diosqa manan cambianchu (Malaquías 3:6). Payqa khuyapayashallanmi mana tayta mamayoqkunataqa (Santiago 1:27). Payqa sinchitan phiñakun pipas mana yanapaqniyoq wawakunata ima mana allintapas ruwaqtinqa. Chaymi chay mana allin ruwaqqa manapuni maymanpas ayqeyta atinqachu Jehová “Diospa k’arak phiñakuynin p’unchay[manta]” (Sofonías 2:2). Chhaynapin chhayna millay runakunaqa yachanqaku “kawsaq Diospa makinman urmayqa” manchay-manchay kasqanta (Hebreos 10:31).