¿Imaynapin wakmanta nacenku?

JESUSMI Nicodemoman willallarantaq imaynapichus pipas wakmanta nacenman chayta. Paymi niran: “Pipas Diospa qhapaqsuyunpi kananpaqqa unumantawan Diospa Espiritunmantawanmi nacenan”, nispa (Juan 3:5). Chaypi rikusqanchis hina wakmanta nacenapaqqa unumanta Diospa espiritunmantawanmi nacena. ¿Imaninantaq chayri?

‘Unuwan’ ‘Diospa espiritunpiwan’

Nicodemoqa judío runakunaq religionninpi allin yachayniyoqtaq karan chayqa, yachanmanpunin karan Hebreo Qelqakunapi Diospa kallpanta “Diospa espiritun” nispa sutichakusqanta, hinallataq chay kallpawan Diosqa runakunata imaymanapaq preparasqantapas (Génesis 41:38; Éxodo 31:3; 1 Samuel 10:6). Nicodemoqa entiendenmanmi karan Jesús ‘Diospa espiritunmanta’ rimaspaqa Diospa kallpanmanta otaq santo espiritunmanta rimashasqanta.

¿Imataq unumanta naceyri? Chaypaq qhawarisunchis Jesús manaraq Nicodemowan parlashaqtin, chay qhepamanpas imakunachus pasasqanmanta willaq textokunata. Chay textokunan willawanchis Bautizaq Juan hinallataq Jesuspa qatikuqninkunapas unuwan bautizasqankuta (Juan 1:19, 31; 3:22; 4:1-3). Llapanmi Jerusalén llaqtapiqa yacharanku bautizakuymanta, chaymi Nicodemopas allinta entiendenman karan unuwan bautizakuymanta Jesuspa rimashasqanta.

¿Iman “santo espirituwan” bautizakuy?

¿Imataq ‘Diospa espiritunmanta naceyri’? Manaraq Jesús Nicodemowan parlashaspaqa bautizaq Juanqa ñan willasqaña santo espirituwan bautizakuymanta. Paymi khaynata willaran: “Ñoqaqa unuwanmi bautizarqaykichis, paymi [Jesusmi] ichaqa Santo Espirituwan bautizasunkichis”, nispa (Marcos 1:7, 8). Marcosmi willaran pichus ñawpaqta santo espirituwan bautizakusqanta. Khaynatan willaran: “Chay p’unchaykunapin Galilea provinciapi Nazaret llaqtamanta Jesusqa hamurqan, hinan Jordán mayupi Juanqa payta bautizarqan. Unumanta lloqsimushaspan Jesusqa rikurqan hanaq pachata kicharikushaqta, Santo Espiritutapas palomata hina pay pataman uraykamushaqta”, nispa (Marcos 1:9, 10). Rikusqanchis hina, maypachachus Jesús Jordán mayuman chinkaykuran, chaypachan unuwan bautizasqa karan. Hanaq pachamanta santo espíritu pay pataman uraykamuqtintaq santo espirituwan bautizasqa karan.

 Bautizakusqanmanta kinsa wataña pasaruqtinmi Jesusqa yachachisqankunaman niran: “Qankunan ichaqa kay pisi p’unchaykunallamanta Santo Espirituwan bautizasqa kankichis”, nispa (Hechos 1:5). ¿Hayk’aqtaq chay nisqanri hunt’akuran?

33 watapi Pentecostés fiesta p’unchaypin. Chay p’unchaypin Jerusalén llaqtapi 120 Jesuspa yachachisqankuna huñusqa kasharanku, “hinan hanaq pachamanta qonqaylla huk suenay uyarikurqan, sinchi wayraq suenasqan hina, chay suenaymi tiyashasqanku wasiman hunt’aykurqan. Hinaqtinmi paykunaqa nina qallushaq hina rawraykunata rikurqanku [...]. Chaymi llapallankuman Santo Espirituqa hunt’aykurqan” (Hechos 2:1-4). Chay p’unchayllapitaqmi apóstol Pedropas askha runakunaman niran: “Huchaykichista saqepuspa Diosman kutirikuychis, hinaspa Jesucristoq sutinpi sapankaykichis bautizachikuychis, huchaykichis pampachasqa kananpaq, hinan Santo Espirituq atiy qokuyninta chaskinkichis”, nispa. ¿Uyarikurankuchu chay runakuna? Arí, uyarikurankun. “Chaymi simita sonqonkupi chaskikuqkunaqa bautizasqa karqanku, hinan chay p’unchaypi iñiqkunaman yapakurqan kinsa waranqa hina runakuna.” (Hechos 2:38, 41.)

Iskay clase bautismon kanan

Rikusqanchis hina, wakmanta nacenapaqqa iskay clase bautismotan pasana. Chaytan Jesuspas ruwaran. Payqa ñawpaqtan unuwan bautizakuran, chaymantataq santo espirituta chaskiran. Yachachisqankunapas unuwan santo espirituwan iman bautizakuranku, paykunamanta wakintaqa bautizaq Juanraqmi unuwan bautizasqa (Juan 1:26-36). Chay 3.000 mosoq cristianokunapas unuwanraqmi ñawpaqta bautizakuranku, chaymantañan santo espiritutaqa chaskiranku.

Chhaynaqa, ¿imaynapin kay tiempopi wakmanta nacey suceden? Jesuspa apostolninkunaq tiemponpi hinayá. Arí, chay tiempopi hinan kunanpas wakmanta naceqqa ñawpaqta sonqonta nanachikuspa huchanta saqenan, chaymantataq Diosman prometekunan servinanpaq hinaspa unuwan bautizakunan. Sichus chay qhepaman Jehová Dios chay cristianota akllanqa gobiernonpi kananpaq chayqa, santo espirituta chaskinqa. Chayraqmi nisunman: “Chay runaqa wakmantan nacen”, nispa. Rikusqanchis hina unuwan bautizakuytaqa sapankanchismi akllakunchis, santo espirituwan bautizakunapaqmi ichaqa Dioslla akllan.

¿Imaraykun Jesús unuwan santo espirituwan ima bautizakuyta huk naceywan rikch’anachiran? Chaywanyá rikuchisharan chay bautizakuqkuna hukniray kawsayta qallarinankuta. Chaymantan qatiqninpi yachasunchis.

[9 paginapi dibujo]

Bautizaq Juanqa unuwanmi bautizaran Diosman kutirikuq Israel runakunata