Mana yupay atiyraqmi kan consejo qoq librokunaqa

ALLINTA kawsay munaq runakunapaqqa imaymana yanapaykunan kan librokunapi. Arí, kay tiempokunapiqa askhan rikhurimushan imayna kawsanamanta rimaq librokunaqa. Chay librokunataqa askhatapunin vendeshanku Gran Bretaña, Japón, Estados Unidos nisqa nacionkunapi, Latinoamérica nisqapipas kaqllataqmi kashan. Chaymantapas kallantaqmi chaymanta rimaq curso nisqakuna videokuna ima, televisionpipas pasachimunkun chaykunataqa. Chaykunaq nisqanman hinaqa, runakunaqa paykunallas atinkuman problemankuta allichayta, manas psicólogo nisqakunata, casarasqakuna consejaqkunata ni religionpi yachachiqkunatapas necesitankuchu. Chayraykun askha runakuna chaykunata rantinku otaq qhawankupas. Ichaqa, ¿imakunamantan riman chay librokuna? Chaymanta yachasun.

Chay librokunamanta wakinqa imayna runa kanamanta, pareja imayna maskhakuymanta, wawakunata imayna uywanamantawanmi riman. Hukkunataq riman sinchi llakisqa kaspa, warmi qhari t’aqanakuspa, familiamanta pipas wañupuqtin imakuna ruwanamanta. Chaymantapas askhatan rantinku p’iti cintura kanapaq, cigarro pitayta saqenapaq, trago tomayta saqenapaqwan imakuna ruwanamanta yachachiq librokunata. ¿Yanapakunpunichu chay librokunaq nisqan? Wakinqa yanapakunmi, wakinmi ichaqa mana. Chaychá Bibliaqa nin: “Pisi yuyayniyoqqa tukuy uyarisqantan creen, yuyayniyoqmi ichaqa thaskisqankunata allinta qhawan”, nispa (Proverbios 14:15).

Imayna kawsanamanta rimaq librokunaqa manan igualchu foto horqonamanta, negocio ruwaymanta, huk rimaykuna yachanamanta rimaq manual nisqa qelqakunawanqa. Manual nisqakunaqa manan sasa entiendeychu nitaqmi cursokunapi estudianapaq hina sinchi qolqepaqchu. Imayna kawsanamanta yachachiq librokunan ichaqa mana chhaynallachu, aswanmi chaypiqa yuyayniykita imayna runa kasqaykitawan cambiayta munanku. Chaytan ruwanku kaykunamanta yachachishaspa: negocio ruwaymanta, psicología nisqamanta, warmi qhari imayna kawsanamanta, wawakuna imayna uywanamanta,  hukkunamantawan. Chayraykun tapukuna: “¿Piqpa yachayninmi kay libropi kashanman?” nispa.

Chay librokuna qelqaqkunaqa manan confianapaq hinachu. Wakinqa runakunaq uyariy munasqallantan qelqanku chhaynapi astawan vendenankupaq. Huk nacionpin chay librokuna vendesqankumanta sapa wata gananku pusaq waranqa millón dolaresta.

¿Allinpunichu chay librokuna?

Chay librokunaqa mayninpiqa hawan ukhullantan imatapas ninku. Wakinmi khaynata ninku: “Kusisqa kawsanaykipaqqa: ‘Tukuy imapas allinmi kapuwanqa’, nispan ninayki, chhaynata nispallan qolqeta tarinki, qhalilla kawsanki, parejaykiwanpas sumaqta kawsanki”, nispa. Chhayna consejokuna, ¿yanapawasunmanchu kusisqa kawsananchispaq? Manan.

Rimasunchis runamasiwan imayna kawsanamanta, casarasqakuna imayna kawsanankumantawan yachachiq librokunamanta. Chay librokuna askhanpiña vendekun chaypas, manan allintachu familiakunata yachachin kusisqa kawsanankupaq. Yachasunchis Latinoamérica nisqapi askhanpi vendesqa huk libromanta. Huk revistaq nisqan hina, chay libroqa ‘allintas runakunata yanapan runamasinwan allinpi kanankupaq, hinallataq kikinkuta valorakunankupaqpas’. Chay libron ichaqa nin: “Sichus parejaykiwan mana allintachu tiyanki chayqa, t’aqanakapuy; mana chayqa, kikiykitan mana allinta ruwakushanki”, nispa. Rikusqanchis hina, chay libroqa manan runakunata yachachinchu ima sasachakuyninkuta allichanankupaq, aswanmi yachachin kikinkuq allinnillankuta maskhanankupaq.

Arí, chay librokunapi kaq yachachikuykunamantaqa wakillanmi allin. Chay librokunata qelqaqkunaqa allintapaschá yachachinku huk asuntomanta, hukkunamantan ichaqa pantasqata yachachinku. Hinaspapas sapanka libro qelqaqkuna huk-huktataq yachachinku chayqa, sasan mayqenpa yachachisqanchus allin kasqanta reparay. Chaymi tapukuna: “Kay libro qelqaqqa, ¿allinta estudiaspa yachasqantachu qelqaran icha paypa munasqallantachu? ¿Qhapaq otaq allin reqsisqa kayta munaspallachu imatapas qelqaran?” nispa.

Ichaqa, chay librokunamantaqa kanmi huk allin consejokunata qoq libro, chay libroqa ñawpa tiempomantapacharaqmi runakunata yanapashan. Chay libroqa Biblian. Chaypa yanapayninwanmi waranqa-waranqanpi runakuna yuyayninkuta ‘mosoqman t’ikraranku’, ‘mosoq runa kaywantaq’ p’achawan hina churakuranku (Efesios 4:23, 24). Bibliaqa willawanchismi imaraykuchus sasachakuykuna kasqanta, yanapawanchistaq chaykuna allichananchispaqpas. Chaymantapas allintapuni reparachiwanchis imaraykus allin kaqta ruwananchis chayta. Chaykunaraykun Bibliaqa ancha allinpuni. Chaymantan qatiqnin paginapi astawan yachasunchis.