Pisillan kamachimunqaku askha runakunaq allinninpaq

APÓSTOLKUNAQ tiemponmantapachan Diosqa wakin serviqninkunata adoptaran paypa wawankuna kanankupaq. Paykunaqa wakmantan nacenku, chaymi hanaq pachaman rinqaku reykuna kanankupaq (2 Timoteo 2:12). Chaypaqmi ichaqa ñawpaqta wañunanku, hanaq pachapitaq kawsarichisqa kananku (Romanos 6:3-5). Chay qhepamanñan paykunaqa “kay pacha[ta] kamachikunqaku” (Apocalipsis 5:10; 11:15).

Ichaqa manan paykunallachu salvasqa kanqaku. Bibliaq nisqan hinaqa iskay t’aqa runakunan salvakunqaku. Huknin t’aqapiqa pisillan kanqaku, hanaq pachamantataq kamachimunqakupas; huknin t’aqapitaq ichaqa askha kanqaku, paykunaqa kay pachapin tiyanqaku ñawpaq t’aqapi kaqkunaq gobiernasqan. Apóstol Juanmi wakmanta naceq cristianokunaman khaynata qelqaran: “[Jesusmi] huchanchiskunata pampachachiwananchispaq wañurqan, manataqmi ñoqanchispa huchallanchismantachu, aswanpas lliw runakunaq huchankumantawanmi wañurqan”, nispa (1 Juan 2:2). Chaypi rikusqanchis  hina, iskay t’aqamantan apóstol Juanqa rimaran.

Apóstol Pablopas iskay t’aqa runakunamantan rimaran. Paymi niran: “Tukuy imaymana kamasqakunaqa [hatun t’aqa runakunaqa] makillañan suyashanku Diosqa wawankunata [huch’uy t’aqa runakunata] sut’ita rikhurichinanta”, nispa (Romanos 8:19-21). Chay apostolkunaq nisqanqa yachachiwanchis wakmanta naceqkunaqa hanaq pachapi kamachikuq kanankuta hinallataq kay pachapi tiyaq runakunaq allinninpaq kamachimunankutapas. Chaymi Jesusqa yachachisqankunaman niran khaynata mañakunankupaq: “Qhapaqsuyuyki hamuchun, munayniyki kay pachapi ruwakuchun, imaynan hanaq pachapipas ruwakun hinata”, nispa (Mateo 6:10).

Hebreo Qelqakunapipas (Antiguo Testamento) willakullantaqmi iskay t’aqa runakunamanta, paykunatan Diosqa salvanqa. Jehová Diosmi ñawpa tiempopi serviqnin Abrahamman khaynata prometeran: ‘Llapan ayllukunapaqmi [mirayniyki] samincha [otaq bendición] kanqa’, nispa (Génesis 22:18). Chaypi rikusqanchis hina, llapa runakunan (hatun t’aqamanta kaqkuna) askha bendicionkunata chaskinqaku Abrahampa ‘mirayninmanta’ (huch’uy t’aqapi kaqkunamanta).

¿Pikunataq Abrahampa ‘mirayninri’ kanku? Jesucristo wakmanta naceqkunapiwanmi. Chaymi apóstol Pablo wakmanta naceqkunata niran: “Cristoqpuni kankichis chayqa, Abrahampa mirayninpunin kankichis”, nispa (Gálatas 3:16, 29). ¿Ima bendicionkunatan llapa runakuna chaskinqaku chay ‘miraymanta’? Chay mirayraykun runakunaqa Dioswan allinpi kanqaku, wiñaypaqtaq kay pachapi kawsanqakupas. Rey Davidpa nisqan hina, “chanin runakunaqa kay hallp’atan hap’ikapunqaku, chaypin wiñaypaq tiyanqaku” (Salmo 37:29; Isaías 45:18; Apocalipsis 21:1-5).

Cristowan kuska kamachikuqkuna pisillaña kanku chaypas, askha runakunan kay pachapi wiñaypaq kawsanqaku. ¡Ima munaymi kanman qanpas familiaykipas kay pachapi wiñaypaq kawsawaqchis chayqa!

[12 paginapi dibujo]

Mana yupay atina runakunan kay pachapi kawsanqaku. ¿Munawaqchu chaypi kayta?