¿Imatan ruwana Bibliata entiendenapaq?

1. Dioswanmi yanapachikuna

Italia llaqtapi tiyaq Ninfa sutiyoq warmin nin: “Ñawpaqpiqa Bibliatan leeq kani puñunaypaq. Yacharanin Diospa yuyaychasqan kasqanta, chaymi munaranipuni chaymanta yachayta. Manaña leey gustawaqchu chaypas, llapanta leenaypaqmi yuyaykurani. Qallariypiqa entienderanin leesqayta, chaymantan ichaqa sasa entiendey yachachikuykunata tarirani, hinan saqepurani”, nispa.

ASKHA runakunaña Ninfa hina rikukuranku chaypas, Jehová Diosqa munanmi Bibliata entiendenanchista, chaytan yacharanchis ñawpaq paginapi. Chhaynaqa, ¿imatan ruwananchis? Yanapaynintan mañakunanchis.

Jesuspa apostolninkunamanta rimasun. Paykunaqa manan chay tiempopi religionpi umalliqkuna hinachu allin educasqa karanku, chaymi “mana estudiaq” otaq mana ima yachaqpaq hina qhawarisqa karanku (Hechos 4:13). Hinaña kaqtinpas paykunaqa allintan yacharanku Diospa Simin Qelqata. ¿Iman paykunata yanaparan? Diospa santo espiritunmi. Jesusmi paykunata nisqa: “Santo Espiritutan Yaya sutiypi kachamunqa, paymi tukuy imaymanata yachachisunkichis”, nispa (Juan 14:26). Chay santo espirituqa Jehová Diospa kallpanmi, chaywanmi tukuy imatapas kamaran (Génesis 1:2). Chayllawantaqmi 40 runakunatapas yuyaycharan Bibliata qelqanankupaq (2 Pedro 1:20, 21). Kay tiempopipas chay kallpatan Diosqa qonqa paypa siminta yachay munaqkunaman.

Santo espiritunta qowananchispaqqa iñiywanmi sapa kutin mañakunanchis. Chaymi Jesús niran: “Mañakuychis qosunkichismi [...]. Qankunapas [...] wawaykichisman allin kaqkunataqa qoyta yachankichismi, chaymantapas astawanraqmi hanaq pachapi kaq Yayaykichisqa mañakuqninkunaman Santo Espiritunta qonqa”, nispa (Lucas 11:9, 13). Chaypi rikusqanchis hina, Jehová Diosqa llapa mañakuqninkunamanmi qonqapuni santo espiritunta. Chay espiritun yanapawasun Bibliaq yachachikuyninkunata entiendenanchispaq, hinallataq yachaytapas qowasun Bibliaq nisqanman hina kawsananchispaq (Hebreos 4:12; Santiago 1:5, 6).

Chhaynaqa, Bibliata leenanchispaqqa santo espirituntan Diosmanta mañakuna, chhaynapin leesqanchista entiendesun.