Bolivia nacionmanta apachimusqanku carta

Kusisqan kawsashan wakchaña kashaspapas

BOLIVIA nacionpin misionera hina kashani. Kaypiqa askha runakunan wakcha kanku, mana ima suyakuyniyoqtaq kawsankupas. Askha wataña kaypi tiyashani chaypas, admirakushaniraqmi chaykunata rikuspa. Diospa Gobiernonña chaykunata allichanqa chaypas, maytan munayman kunanpacha chaykuna allichakunanta. Ichaqa manan llakikuyllatachu kaypiqa rikurani; rikullaranitaqmi Diospa Simin Qelqaq nisqanman hina kawsaqkunaqa kusi kawsayta tarisqankuta, chaymi willasqaykichis Sabinamanta.

Unay watañan paypa qosan huk lado nacionman ripusqa llank’anata maskhaq, chay tiempopaqqa Sabinaq ususinkunaqa huch’uychallaraqmi kasqaku, hukninmi Milena sutiyoq karan, huknintaq Ghelian. Sabinaq qosanqa manan hayk’aqpas kutinpuranchu, chaymi payqa wawankunarayku llank’ayta qallarisqa, kunankamapas chaytan ruwashan.

Huk tiendapin Sabinataqa reqsirani, chaypin pacienciawan clientekunata atiendeshasqa, chay tiendaqa ñañanpa tiendanmi kasqa. Sabinata qhawaykuqtiy hinan repararani sinchi sayk’usqa kashasqanta. Hinan tapurani: “¿Munawaqchu Bibliamanta yachayta?” nispa, paytaq niwaran: “Munaymanmi; ichaqa manan tiempoy kanchu, ¿manachu aswanpas ususiykunata yacharichipuwankiman?” nispa. Hinan ususinkunawan estudiayta qallarirani. Tiempoq pasasqanman hinan Sabinawan allinta reqsinakurayku, chhaynapin imakuna pasasqanta willawaran.

Sapa p’unchaymi payqa las cuatrota hatarin ususinkuna puñushaqtinkuraq. Hinaspan payqa q’onchanta hap’ichin empanadakunata ruwananpaq, chaypaqmi sapa ch’isin listollataña masata saqen. Chaymantataq empanadapaq rellenota wayk’un hatun aluminio mankapi. Chay empanadakunata vendespan Sabinaqa wawankunata uywan.

Wayk’uyta tukuspaqa mañakusqan carretanmanmi churan: toldota, balón de gas nisqata, cocinata, mesata, bancakunata, mankata, aceiteta, hinallataq aychamanta ruwasqa rellenota, empanada ruwananpaq masata, frutamanta ruwasqa jugotapas.

Las seispaqqa Sabinawan wawankunawanqa listoñan kashanku vendeq rinankupaq. Wasinkuqa huk cuartochallan, chaytan candadowan wisq’aykunku vendeq rinankupaq. Ch’inllan lloqsinku khuyay uyantin Ch’isiyaqtaq llank’anqaku chayqa, anchatan kallpachakunanku. Yaqa sapa p’unchaymi ventanaykumanta rikumuyku chhayna warmikuna llank’aq  rishaqta. Bolivia nacionpiqa askha warmikunan Sabina hina tutayllamanta puririnku mikhunata vendeq.

Intiqa lloqsimuypaqqa las seis mediañan karun, Sabinawan ususinkunawantaq chayankuña vendesqanku esquinaman. Hinan ch’inlla alistakunku vendenankupaq. Sabina ruwasqan empanadata sartenpi theqtiyta qallarin, hinan runakunaqa rantikuq hamunku.

Wakinqa puñuy-puñuyllaraqmi hamunku rantikuq, Sabinataq hayk’atachus mañakusqankuta empanadakunata qon. Clientekunataq pisi valorniyoq qolqewan paganku. Sapa paqarmi Sabinaqa chhaynata llank’an. Empanadakunata llapanta venderuspataq sayk’usqa wasinman kutipunku. Chakinña nanan chaypas, Sabinaqa manan samanqachu; aswanpas ñañanpa tiendantan rinqa llank’apakuq.

Milenata Gheliantawan Bibliamanta yachachinaypaq chayllaraq chay tiendaman riqtiyqa Sabinaqa ñan alistasqaña huk k’uchupi iskay bancachakunata. Chay tiempopaqqa huknin ususinqa isqon watayoqmi karan, huknintaq qanchis watayoq. Paykunaqa qallariymantapachan kusikuywan suyawaqku, allintataq preparakuqkupas. Sinchi manchaliña karanku chaypas, pisi pisimantan mana manchakuspa rimapayawaranku, hinan amigantin kapurayku. Chayta rikuspan Sabinaqa anchata kusikuran, chaymi paypas ñoqawan Bibliata estudiananpaq decidekuran askhaña llank’anan karan chaypas.

Bibliamanta yachasqanman hinan Sabinaqa astawan Jehová Diosta munakuran, kusikuytapas qallariran. Manañan sayk’usqa, llakisqa uyayoqchu llank’aq puriran. Ñañanpas repararanmi chhayna cambiasqanta, chaymi huk kuti niran: “Sabinaqa sapakutillanmi asirikun, ñawpaqpin ichaqa mana chaytaqa ruwaqchu”, nispa. Hukkunapas reparallarankutaqmi chhayna cambiasqanta. Chayraqmi Sabinaqa kusikuyta tariran Diosmanta yachasqanrayku.

Payqa anchatan kusikuq Biblia estudiasqanmanta, ichaqa manan huñunakuyman riyta atiqchu ch’isiyaqta llank’asqanrayku. Huk kutinmi ichaqa hamuranpuni huñunakuyman, chaymatapachan mana faltakunchu. Huñunakuykunapin askha amigokunata tariran. Hinallataq allinta rikuran may sumaqtachus Jehová Dios pay sonqo kaqkunata, payrayku imaymanata saqeqkunatapas cuidasqanta (Lucas 12:22-24; 1 Timoteo 6:8).

Sabinaqa ancha allinpaqmi qhawariran yachasqanta, chaymi hukkunamanpas yachasqanmanta willayta munaran. Ichaqa manchakuranmi mana reqsisqa runakunawan rimayta, chaymi niran: “Sinchitan manchakuni runakunawan rimayta, manataqmi allin estudioyoqpaschu kani, ¿chaychu yachachiyta atiyman?” nispa. Chhaynaña sientekuran chaypas, decidikuranmi predicayta qallarinanpaq, ¿imarayku? Agradecesqa kasqanrayku, wawankunaman allin ejemplota qonanraykupiwan. Arí, payqa agradecesqan kasharan kusisqa kawsananpaq Bibliawan sumaqta yanapasqankumanta. Predicayta qallarisqanraykun wawankunapas predicayta qallariranku.

Sabinaqa manañan huk warmikuna hinachu sinchi sayk’usqa mana ima suyakuyniyoq llank’an. Manaña qhapaqmanchu tukuran chaypas, kusisqan kunanqa kawsashan. Payqa bautizarukunñan, Bibliaq nisqanman hinataq yachachishan Diospa Gobiernollan wakchayayta chinkachinanta (Mateo 6:10).

Reloqpiqa las cincoñan kashan, Sabinataq listoña kashan wasinmanta lloqsinanpaq; ichaqa manan empanada vendeqchu rinqa, aswanmi iñiqmasinkunawan huñukunqa callekunapi predicanankupaq. Payqa tiemponta t’aqaspan runakunata yanapan Diosmanta yachanankupaq, chaywanmi anchatan kusikun. Chaymi punkunta wisq’aykuspa kusisqa lloqsin. Carretanta tanqarikuspa vendeq rinanmataqa carteranpi askha qelqakunata aparikuspa runakunaman predicaq lloqsin. Chaymi kusisqa uyayoq nin: “Manan hayk’aqpas runakunaman Bibliamanta yachachiyta piensaranichu, kunanmi ichaqa ancha kusikuywan chayta ruwashani”, nispa.