“Filósofo nisqa cristianokunan griegokunaq yachachisqanta qatikuspa yachachirqanku: ‘Almaqa mana mañuqmi’, nispa. Paykunaq nisqanman hinaqa, maypachachus huk wawacha mamitanpa wiksanpi rikhuriqtin hinas Diosqa almata churan.” (The New Encyclopædia Britannica, 1988.)

Khaynatan nin: “Huchallikuq almaqa wañunqapunin”, nispa (Ezequiel 18:4, Reina-Valera, 1960 [VV]).

Ñawpaqkaq alma kamasqa kasqanmantan Biblia nin: “Hinamantataq ñut’u hallp’amanta Diosqa runata ruwarqan, hinaspa kawsay samayta senqanman samaykurqan, chaymi runaqa kawsashaq alma kapurqan”, nispa (Génesis 2:7, VV). Hebreo rimaypi “alma” simiqa néfesch ninmi.

Chay néfesch simiqa “samayniyoq kawsashaq” ninantan nin. Jehová Dios Adanta kamashaspaqa manan huk almatachu qorqan, aswanpas kawsachiq kallpatan qorqan. Chay kallpaqa cuerpopin kashan, chayllapitaqmi kashanqa kawsashananchiskamaqa. Chaymi Bibliapi almamanta rimaspaqa huk kawsaq runamanta rimashan. Chay kawsay kallpa tukukapuqtinri, ¿iman suceden almata? Wañupunmi (Génesis 3:19; Ezequiel 18:20, VV).

“Almaqa manan wañunchu” nisqa yachachikuy rikhurimusqan qhepamanqa, wakinmi tapukurqanku: “¿Maymanmi almanchis ripun wañupuqtinchis? ¿Iman suceden millay runakunaq almanwan?” nispa. Hinan huk pantasqa yachachikuypas paqarimullarqantaq. Chaymi nirqanku: “Huchasapa runakunaqa infierno ninapin ñak’arishanku”, nispa.

Kay textokunata leey: Eclesiastés 3:19; Mateo 10:28, VV; Hechos 3:23, VV.