¿Imapunitaq santo espirituri?

SANTO espirituta mañakunankupaq nisqan qhepallamanmi Jesusqa khaynata nillarqantaq discipulonkunata: “¿Mayqen taytataq qankunamanta churin challwata mañakuqtin, mach’aqwayta qoykunman? Runtuta mañakuqtinpas, ¿alacrán kuruta qoykunman?” nispa (Lucas 11:11, 12). Galileamanta wawakunaqa runtuta challwata iman mañakuqku yarqayninkupi mikhunankupaq.

Chay hinatan ñoqanchispas Diospa santo espiritunta necesitanchis, chayraykun Jesusta kasukuspa chay yarqachikuq wawakuna hina mañakushanallanchis (Lucas 11:9, 13). Ichaqa, ¿imaraykun ancha importante santo espirituta mañakuy? Chayta yachanapaqqa allintaraqmi yachananchis imachus santo espíritu kasqanta, chaypaqmi Bibliata allinta t’aqwinanchis.

‘Ancha Hatun Diospa atiynin’

Bibliaq nisqan hina santo espirituqa Jehová Diospa kallpanmi, chaywanmi tukuy ima yuyaykusqantapas ruwan. Chaymanta astawan yachanapaq qhawarisunchis Mariaman ángel Gabrielpa nisqanta, paymi nirqan: “Santo Espiritun qanman uraykamunqa, Ancha Hatun Diosmi atiyninwan p’istuykusunki, chaymi naceq wawaqa Diospaq t’aqasqa kanqa, Diospa Churin sutichasqataq kanqa”, nispa (Lucas 1:35). Chaypi nisqan hina, santo espirituwan Diospa ‘atiyninwanqa’ yaqa kaqllan kanku.

Huk textokunapipas chay hinallataqmi rikhurin. Profeta Miqueaspas khaynatan nirqan: “Ñoqatan ichaqa Señor Diospa Espiritun hunt’aykuwan atiywan”, nispa (Miqueas 3:8). Kaqllataqmi Jesuspas qatikuqninkunaman nirqan: “Qankunaman Santo Espíritu hamuqtinmi ichaqa atiyta chaskinkichis”, nispa (Hechos 1:8). Kaqllataq apóstol Pablopas ‘Santo Espirituq atiyninmanta’ rimarqan (Romanos 15:13, 19).

Ñawpaqpi yachamusqanchis hina, santo espirituwanmi Diosqa atiyninta rikuchin, chayraykun nisunman: “Santo espirituqa munayninta hunt’ananpaq Diospa churasqan kallpan”, nispa. Chay kallpawanmi ima munasqantapas ruwan. ¡May hatunpunichá chay kallpaqa! Chaytan sut’ita reparanchis kamasqankunata qhawaspa. Profeta Isaiaswanmi Diosqa khaynata qelqachirqan: “Hanaq pachata qhawariychis. ¿Pin chaykunata kamarqan? Ch’askakunata ch’ulla-ch’ullamanta lloqsichimuqmi, sutinmantakama qoyllurkunata waqyamuqmi. Payqa sinchi atiyniyoqmi sinchi kallpayoqmi, manan ch’ullapas faltanchu”, nispa (Isaías 40:26).

Chaypin rikuchiwanchis tukuy imapas, hanaqpachapi kaqkunapas Jehová Diospa ‘atiyniwan’ otaq kallpanwan ruwasqa kasqanta. Chay kallpawanmi llapa runakunapas kamasqa karqanchis. (Qhawariy: “Diosqa imaymanatan ruwarqan santo espiritunwan”, nisqata.)

Chhaynaqa santo espiritunwanmi Jehová Diosqa tukuy imaymanata kamarqan, chayllawantaqmi tukuy imatapas ruwan, runakunatapas yanapan. Bibliapin willawanchis  imaynatas Jehová Dios santo espiritunwan askha serviqninkunata yanaparqan chayta.

“Señor Diospa Espiritunmi ñoqapi kashan”

Santo espiritun Jesustapas yanaparqan predicananpaq, chaymi rikuchiwanchis hunt’aq serviqninkunaman Jehová Dios atiy qosqanta. Huk kutinmi Jesús Nazaret llaqtamanta runakunata nirqan: “Señor Diospa Espiritunmi ñoqapi kashan”, nispa (Lucas 4:18). ¿Imakunatan Jesús ruwarqan “Santo Espirituq kallpachasqan”? (Lucas 4:14.) Imaymanatan ruwarqan: onqosqakunata hampirqan, sinchi wayrata kutichirqan, milagrota ruwaspa askha yarqasqa runakunata mikhuchirqan, wakin runakunatataq kawsarichirqan. Chayraykuchá apóstol Pedroqa khaynata nirqan: “Jesusmi hatun ruwaykunawan, musphanakunawan, milagrokunawan ima Diospa chaninpaq qhawarisqan qhariqa karqan, Diosmi [...] paywan chaykunata ruwarqan”, nispa (Hechos 2:22).

Diosqa manañan kay tiempopi santo espiritunta qowanchischu milagrokuna ruwananchispaqqa, chhaynaña kaqtinpas chay espirituwanmi imaymanapi yanapawashanchis. Jesuspa nisqan hina, Jehová Diosqa tukuy sonqomantan santo espiritunta serviqninkunaman qon (Lucas 11:13). Apóstol Pablon chaymanta nirqan: “Diosninchismi kallpachawarqanku, hinan qatiykachakuyña kashaqtinpas mana mancharispa Diospa allin willakuyninkunata willarqaykichis”, nispa (1 Tesalonicenses 2:2). ¿Munawaqchu qanpas chay kallpata? ¿Imaynatan chayta chaskiwaq? Chaymantan qatiqninpi astawan yachasunchis.

 [21 paginapi foto recuadropiwan]

Santo espirituqa Diospa kallpanmi

Llaqtanpa allinninpaq imaymana ruwananmanta rimashaspan Diosqa nirqan: “Ñoqan ch’aki pampaman unuta parachimusaq, ch’aki hallp’api yarqhakunata purichisaq. Mirayniykimanmi Espirituyta kachaykamusaq, wawaykikunatan saminchasaq”, nispa (Isaías 44:3). Chaypi nisqan hina Diosqa unuwanmi rikch’anachirqan santo espirituta.

Askha kutipin Biblia willawanchis Diospa serviqninkuna ‘santo espirituwan hunt’a’ kasqankumanta. Paykunamanta wakinmi karqan: Jesús, bautizaq Juan, Pedro, Pablo, Bernabé, 33 watapi Pentecostés fiestapi huñunasqa kashaq Jesuspa qatikuqninkunapiwan (Lucas 1:15; 4:1; Hechos 4:8; 9:17; 11:22, 24; 13:9).

Ichaqa, ¿pipas haykunmanchu huk runakunaq ukhunman, chhaynapi paykunaman ‘hunt’aykunanpaq’? Manan riki. Biblian willawanchis wakin runakuna yachaywan, allin reparaq-kaywan, allin yachaypiwan hunt’a kasqankumanta; ichaqa manan maypipas ninchu: “Huk runawanmi hunt’aykurqan”, nispaqa (Éxodo 31:3; 35:35 Lucas 2:40).

Espíritu simiqa griego rimaypi pnéuma simimantan hamun, chayqa mana rikuna kallpamantan riman. Chay simimantan huk allin diccionario khaynata nin: “Chay pnéuma simiqa ‘wayra’ otaq ‘samay’ ninantan nin; chaymantapas nillanmantaqmi ‘espíritu’ nispapas, wayra hina mana rikuna kasqanrayku”, nispa (Diccionario expositivo de palabras del Antiguo y del Nuevo Testamento exhaustivo, de W. E. Vine).

Chhaynaqa santo espirituqa Diospa kallpanmi, chaywanmi ima yuyaykusqantapas hunt’an. *

[Uranpi willakuy]

[Fotota horqorqan]

Photodisc/​SuperStock