Diosmanta yachachisqan

‘Manan pipas yachanchu pichus Yaya kasqantaqa, aswanpas Churillan, hinallataq pimanchus Churiqa reqsichiyta munanman chayllapiwanmi yachan.’ (LUCAS 10:22.)

PHIWI Churiqa manaraq kay pachaman hamushaspan Taytanwan unayta hanaq pachapi tiyarqan (Colosenses 1:15). Chay tiempopin yacharqan Taytanpa imayna yuyaykusqanta, sientesqanta, imatapas imayna ruwasqanta. Chaymi kay pachaman hamuspaqa anchata kallpachakurqan llapa runaman Taytanmanta yachachinanpaq. ¿Imakunatan yachachirqan?

Diospa sutinmanta Jesusqa munarqanmi llapa runakuna Diospa sutinta reqsispa sutinmanta waqyakunankuta. Diospa sutinqa Jehová. Jesuspa sutinpunin “Jehová Diosmi Qespichiq” ninanta nin. Chaymi wañupunanpaqña kashaqtin Taytanmanta mañakuspa nirqan: “Ñoqan paykunaman [...] [sutiykita] yachachirqani”, nispa (Juan 17:26). Arí, Taytanmanta rimaspaqa sutintan hoqariq, yachachiqmi llapa uyarikuqkunamanpas. Diospa sutinta, sutin ima ninanta mana yachaspaqa, manachá chay runakuna Diosta reqsinkumanchu karqan. *

Ancha hatun munakuyninmanta Huk kutinmi Jesús Taytanmanta mañakushaspa nirqan: ‘Yayáy, [...] manaraq kay pacha kamasqa kashaqtinmi munakuwarqanki’, nispa (Juan 17:24). Payqa yacharqanmi Taytan ancha munakuq kasqanta, chaymi kallpachakurqan runakunaman Diospa munakuyninmanta yachachinanpaq.

Jesusqa yachachirqanmi Jehová Dios llapa runakuna munakusqanta. Nirqanmi: “Diosqa anchatapunin runakunata munakurqan, chaymi sapan Churinta kachamurqan, pipas paypi iñiqqa ama wañunanpaq, aswanpas wiñay kawsayniyoq kananpaq”, nispa (Juan 3:16). Arí, llapa runakunata munakuspan Diosqa ancha munakusqan Churinta kachamurqan. Churinpa wañusqanwan Diosta serviq runakuna huchamanta wañuymantawan qespichisqa kaspa wiñay kawsayman aypanankupaq. ¡Ancha hatunmi Diospa munakuyninqa! (Romanos 8:38, 39.)

Jesusqa yachachillarqantaqmi Jehová Dios sapanka serviqninkuna munakusqanta. Chaymi Taytanta rikch’anachirqan sapanka ovejachanpi interesakuq michiqwan (Mateo 18:12-14). Hinaspapas Diosqa yachansi sapanka pichitanka pampaman urmasqanta. ‘Chukchanchispas llapansi yupasqa kashan.’ (Mateo 10:29-31.) Sapanka pichitankapi interesakushaspa, ¿manachu sapanka serviqninkunapipas interesakunqa? Chukchanchistapas yupantaq chayqa, ¿manachu reparanqa necesitasqanchista, llakikuyninchistapas?

Hanaq pachapi Yaya kasqanmanta Ñawpaqpi yachasqanchis hina, Jesusqa Diospa sapan Churinmi. Chaymi askha kutipi Diosta nirqan ‘Yayay’ nispa. Biblian willan 12 watanpi kashallasparaq, yupaychana wasipi tarikushaspa Diosta ‘Yayay’ nispa nisqanta (Lucas 2:49). Evangelio qelqakunapin Jehová Diosta ‘Yayay’ nispa nisqan rikhurin  pachak isqon chunka kutita. * Jesusqa askha kutipin nirqan: “Yayaykichista” “Yayayku” “Yayaypa”, nispa (Mateo 5:16; 6:9; 7:21). Chaykunata nisqanpin rikuchirqan llapa runakuna huchayoqña kashaspapas Dioswan allinpi kay atisqankuta.

Khuyapayakuq, hucha pampachaq kasqanmanta Jesusqa yacharqanmi huchallikuq runakuna kasqanchisrayku Diospa khuyapayakuyninta necesitasqanchista. Chaymi chinkasqa churimanta willakuypi, Jehová Diosta rikch’anachirqan wawanta sumaqta pampachaq taytawan (Lucas 15:11-32). Arí, Diosqa huchallikusqanmanta pesapakuq runatan maskhashan. ¿Imapaq? Pampachananpaq. Jesusmi nirqan: “Niykichismi, chay hinan hanaq pachapipas astawan q’ochukuy kanqa huk huchasapaq Diosman kutirikusqanmanta, isqon chunka isqonniyoq chaninkunamantaqa, paykunaqa manañan Diosman kutirikunankuñachu”, nispa (Lucas 15:7). ¿Manachu chhayna khuyapayakuq Diosta munakuwaq?

Mañakusqata uyariq kasqanmanta Jesusqa hanaq pachapi kashaspan yacharqan ‘mañakusqata uyariq’ Jehová Dios hunt’aq serviqninkuna mañakunanku munasqanta (Salmo 65:2). Chaymi qatikuqninkunata yachachirqan mañakunankupaq. Nirqanmi: “Ama mana iñiqkuna hina thawtiychischu [yapa-yapamanta kaqllata rimaychischu]”, nispa. Chaymantapas yachachirqanmi kaykunata mañakunankupaq: Diospa ‘munaynin kay pachapi ruwakunanpaq, imaynan hanaq pachapipas ruwakun hinata’, sapa p’unchaypaq necesitasqankuta, huchankumanta pampachasqa kanankupaq, ima tentacionmantapas pakaykusqa kanankupaqwan (Mateo 6:5-13). Arí, Jesusqa sut’intan rikuchirqan, Taytan ancha munakuq kayninpi hunt’aq sonqo serviqninkunaq mañakuynin uyarisqanta (Mateo 7:7-11).

Rikusqanchis hina, Jesusqa sut’intan yachachirqan Jehová Diosmanta, imayna Dios kasqanmantapas. Ichaqa yachachirqanmi kay pachapaq runakunapaqpas Diospa munaynin imayna hunt’akunanmantapas. Chaymantan astawanqa rimarqan kay pachapi kashaspa.

[Uranpi willakuykuna]