Kay revista leeqkunaq tapukuynin

¿Jesuschu arcángel Miguel?

▪ Arí. Imaynan wakin llaqtakunapipas askha sutimanta waqyanku huk runata chhaynallataqmi karqan ñawpa tiempokunapipas. Jacob sutiyoq runataqa “Israel” nikullarqantaqmi (Génesis 35:10). Apóstol Pedrotapas Simón, Cefas, Simón Pedro nispan nillaqkutaq (Mateo 10:2; 16:16; Juan 1:42; Hechos 15:7). Chhaynaqa ¿imaynapin yachasunman Miguelqa Jesuspa huk sutin kasqanta? Chaymantan qatiqninpi yachasunchis.

Miguel sutiqa phisqa kutitan Bibliapi rikhurin, chhaynatan sutichakun huk atiyniyoq angelta. Daniel libropiqa kinsa kutitan rikhurin chay suti. Daniel 10:13, 21 textopi nisqan hina, chay Miguelqa ‘huknin umalli angelmi’, paymi ‘kamachikuqqa’. Paymi huk angelta yanaparqan sasachakuypi tarikuqtin. Chaymantapas Daniel 12:1 textopin nin: “Chay p’unchaykunapin llaqtaykita amachaq hatun kamachikuq Miguel sayarinqa”, nispa.

Apocalipsis 12:7 nillantaq: “Miguelmi angelninkunantin dragón contra maqanakurqan”, nispa. Chaypiqa Miguelmi atiparqan, chaymi Satanasta supayninkunatawan hanaq pachamanta wikch’uykamurqan.

Chay textokunapi rikusqanchis hina, Miguelqa Diospa llaqtanrayku maqanakuq angelmi, Diospa llaqtanta cuidaqmi. Payqa Jehová Diospa enemigon Saqra contrapas maqanakushallantaqmi.

Judas 9 versiculopin Miguelta nikun: “Arcángel”, nispa. “Arcángel” simiqa angelkunaq “umalliqnin” otaq “jefen” ninanmi. Bibliapiqa hukllatan arcángel nikun. 1 Tesalonicenses 4:16 textopipas rikhurinmi “arcángel” nisqa simi. Chaypin apóstol Pablo nirqan: “[Jesuspunin] kamachikuq kunkawan, Arcangelpa kunkanwan, Diospa trompetan tocasqawan ima, hanaq pachamanta uraykamunqa”, nispa. Chaypi nisqan hina, Jesucriston arcangelqa.

Arí, paymi arcángel Miguelqa. Miguel sutiqa “¿Pitaq Dios hinari?” ninantan nin; Jesús sutitaq “Jehová Diosmi Qespichiqqa [Salvaqqa]” ninanta nin. Chay sutikunan rikuchin Jesusqa Diosllaman sayapakusqanmanta, paymi munan Dioslla Ancha Hatun Kamachikuq kananta. Filipenses 2:9 texton nin: “Chayraykun Diospas paytaqa [Jesustaqa] anchatapuni hatunchaykurqan, hinaspan payman sutita churarqan lliw sutimantapas qollana kaqtapuni”, nispa.

Huk angelña Mariaman willarqan santo espíritu payman uraykamuqtin huk wawata wiksallikunanta chaypas, Jesucristoq kawsayninqa manan kay pachapichu qallarirqan, aswanmi hanaq pachapi (Lucas 1:31). Chaymantan Jesusqa askha kutipi rimarqan (Juan 3:13; 8:23, 58).

Jesús manaraq kay pachaman hamushaspaqa Miguel sutiyoqmi karqan. Hanaq pachaman kutipuspaqa wakmantan Miguel otaq angelkunaq umallin kapurqan “Dios Yaya hatunchasqa kananpaq” (Filipenses 2:11).