Manan pipas pay hinaqa karqanchu

Millonninpiñan kay pachapi tiyaq runakunaqa wañupunku, yaqa llapankutaqmi qonqasqa kapunku runaq yupinta paraq chinkachipusqan hina. Chhaynaña kaqtinpas pisi runakunallan allin ruwasqankuta saqewarqanchis chaykunawan yanapachikunanchispaq.

TUTAYLLAMANTA hatarispan luzta hap’ichinki hinaspa alistakunki llank’anaykiman rinaykipaq. Manaraq lloqsishaspan kunkaykipi infeccionpaq doctorpa recetamusqan pastillata millp’unki. Tiempoykita mana usuchinaykipaqtaq huk librota otaq revistata aparikunki viajasqayki carropi leenaykipaq. Chayllaraq p’unchay qallarishaqtinmi reparanchis chay allinkuna ruwasqankumanta agradecekunanchis kasqanta. Paykunamantan yachasun.

Michael Faraday Kay estudioso runaqa 1791 watapin nacerqan Gran Bretaña nacionpi, paymi motorta maquinatapas electricidad kananpaq ruwarqan, chaymi payta agradecekunchis luzniyoq kasqanchismanta.

Ts’ai Lun Kay runaqa China nacionpi kamachikuqta serviqmi karqan, paymi 105 watapi aswan allin papelta rikhurichimurqan. Chaymantapachan papelqa askhanpi lloqsimurqan.

Johannes Gutenberg Kay estudioso runaqa Alemania nacionmantan karqan, paymi 1450 watapi qelqakunata ruwanapaq maquinata ruwarqan. Chaymantapachan imaymana qelqakuna kan leenapaq.

Alexander Fleming Kay runaqa Escocia nacionmantan karqan, paymi 1928 watapi penicilina nisqa hampita infeccionpaq rikhurichirqan. Chaymantapachan infección onqoyta chay hampiwan hampikun.

Paykuna hinan huk runakunapas allinkuna ruwasqankuta saqewarqanchis, chaykunawanmi kay tiempopi yanapachikunchis, onqoykunamantapas qhaliyanchis.

Chay runakunamantan ichaqa huk ancha importante runa kan, payqa manan chay estudioso runakuna hinachu imatapas rikhurichirqan. Wakcha familiapin wiñarqan, wañupusqanmantapas iskay waranqa wata hinañan pasarun. Payqa ancha sumaq yachachikuykunatan runakunaman saqerqan. Yachachikuyninkunaqa pachantinpin askha runakunata yanapashan, chaymi paytaqa nisunman: “Manan pipas pay hinaqa karqanchu”, nispa.

¿Pitaq chay runari? Jesucriston. Qatimuq yachachikuykunapin yachasun imamanta yachachirqan, imaynatan yachachisqan yanapawasunman chaykunata.