¿Ima ninmi Dios trago ukyaymanta?

KAMAQNINCHISQA allinnillanchistan munan. Payqa manan hark’awanchischu pisillata trago ukyaytaqa. * Pay kikinmi runaman qorqan ‘kusirichiq vinota’, ‘kallpachaykuq t’antata’, ‘uya llamp’uyachina aceitetapas’ (Salmo 104:15). Huk kutinmi Wawan Jesucristopas casamiento fiestapi kashaspa unuta ‘sumaqkaq vinoman’ tukuchirqan, chhaynapi chaypi kaqkuna kusirikunankupaq (Juan 2:3-10).

Diosqa Kamaqninchistaq chayqa, allintan yachan imatas alcohol ruwawasunman chayta. Chaymi Bibliapi allinninchispaq imatapas yachachiwanchis, manataq munanchu machaq kananchista (Isaías 48:17).

Bibliapin niwanchis: “Ama vinowan machaychischu, machaypiqa waqlliymi kan”, nispa (Efesios 5:18). Nillantaq: ‘Machaqkunaqa manan haykunqakuchu Diospa qhapaqsuyunman [Gobiernonman]’, nispa (1 Corintios 6:9-11). Chaymantapas nillantaq ‘machaykuna, aycha kusichiypi waqlliykuna, chaykunaman rikch’akuq ruwaykunapas’ hucha kasqanta (Gálatas 5:19-21).

¿Iman pasawasunman sinchita tragota ukyaqtinchis? Chaymantan qatimuq parrafokunapi yachasun.

Nishuta ukyayqa mana allinninchispaqmi

Wakinpaqqa allinmi kanman pisillata alcohol ukyay, ichaqa askhata ukyayqa cuerponchista yuyayninchistawanmi malogranman.

Nishuta ukyaqkunaqa ‘waqllisqatan yuyaykunkupas rimankupas’ (Proverbios 23:33). Julián nisqan hina, “tragoman yachasqa runakunaqqa manan cuerpollankuchu onqosqa kashan; yuyayninkupas onqosqan kashan, chaymi mana reparankuchu maytukuytachus hukkuna ñak’arichisqankuta”.

Ratollan ima huchamanpas urmanku. Biblian nin: “Upi vinowan poqosqa vinopiwanmi llaqtaypa yuyayninta waqllichin [pantachin]”,  nispa (Oseas 4:11). Chaypi nisqan hina, machasqa runaqa ch’aki sonqo kashaspa huchapaq qhawarisqan ruwaykunatapas “allin” ninmanmi, hinaspa chaykunata munapayanman imaraq. Chhaynapin manaña kallpan kanmanchu huchamanta ayqekunanpaq, Diospa hark’asqan kaqkunatataq ruwanman.

Yachasunchis Johnmanta. Huk kutinmi señoranwan sinchita phiñachinakusqaku, chaymi payqa cantinaman risqa. Chaypin iskay kinsa copata ukyasqa. Chayllamanmi huk warmi asuykusqa parlapayaqnin. Hinaqtinmi payqa iskay kinsa copatawan ukyaspa chay warmiwan puñusqa. Qhepamanmi ichaqa sinchitapuni ñakapakusqa chay ruwasqanmanta: “Amalla sinchitachu ukyayman karqan, manachá kunanqa pesapakushaymanchu”, nispa.

Mana allinta piensaykuspan imatapas rimanku ruwankupas. Biblian nin: “¿Pipaqmi muchuyqa? ¿Pipaqmi nanayqa? ¿Pipaqmi ch’aqwaykunapas waqaykunapas? ¿Pipaqmi yanqa-qasilla k’irisqakunaqa? ¿Pipaqmi pukayasqa ñawikunaqa? Vinota mana hayk’aq kachariqkunapaqmi, tupachisqa machana ukyanata maskhaqkunapaqmi”, nispa (Proverbios 23:29, 30). Chaymantapas nillantaq: “Lamar-qocha ukhupipas puñushawaq hinan kanki, otaq barcopi hatunkaray k’aspi puntapipas puñushawaq hina”, nispa (Proverbios 23:34). Machaq runaqa qonqayllan imapipas rikukunman, hinaspa ninman: “Maqawasqakun, ichaqa manan nanawanchu, soq’aykuwasqakun, ichaqa manan repararqanichu”, nispa (Proverbios 23:35).

Ratollan onqoyta tarinku. Bibliaq nisqan hina, tragoqa chaymantañan “mach’aqway hina k’utun, víbora hina kanin” (Proverbios 23:32). Chay nisqanqa cheqaqmi. Allin yachaq doctorkunaq nisqanman hinaqa, nishuta trago ukyayqa mach’aqwaypa venenon hinaraqsi kanman. Chaysi rikhurichin wakin cáncer onqoyta, hepatitis alcohólica nisqata, cirrosis onqoyta, pancreatitis nisqatawan; diabetes onqoyniyoqkunapaqpas sinchi mana allinpunis, kaqllataq onqoq warmikunaq wawachanpaqpas. Chaymantapas machaqpa ñosqonninta sonqontapas malograpunmansi. Chay onqoykunaqa wakillanmi. Wakin runakunaqa huk kutillapi nishuta ukyarqospankun wañuyta tarinku, otaq wañuy pataman chayanku. Ichaqa chay onqoykunamantapas hukmi aswan llakikunapaqqa. ¿Imataq chayri?

 Aswan hatun llakikuy Manaña machanankukamachu ukyanku chaypas, nishuta ukyaqkunaqa Diosmantan karunchakunkuman. Profeta Isaiasmi nirqan: “¡Ay, qankunamanta! ¡Tutallamanta hatarispan machanaman phawarinkichis! Tutakaman qhepakunkichis t’ili machanaykichispaq. [...] Señor Diospa ruwasqantataq ichaqa mana kasurparinkichischu, paypa ruwashasqantaqa manan entiendenkichischu”, nispa (Isaías 5:11, 12).

Diosmi niwanchis: “Ama machaqkunawanqa [askhata ukyaqkunawanqa] huñukuychu”, nispa (Proverbios 23:20). Edadniyoq warmikunatapas ninmi “ama machaq kanankupaq” (Tito 2:3). Ukyaqkunaqa mana cuentata qokuspallan pisi-pisimanta aswan askhata ukyankuman. Wakinqa puñunkupas: “¿Hayk’aqmi rikch’arisaq astawan vinota ukyanaypaq?” nispallañan (Proverbios 23:35). Chhaynaqa, pipas ch’isinta machasqanmanta qhaliyananpaq rikch’arirqospa hina tragotaña mañakuqqa sinchi mana allinmanmi churakushanku.

Bibliaq nisqan hina, machaypi puriqkunaqa “Diosmanmi [...] cuentata qonqaku”, paymi “kawsaqkunatapas wañuqkunatapas juzgan[qa]” (1 Pedro 4:3, 5). Señor Jesuspas Jehová Diospa p’unchayninmanta rimashaspan nirqan: “Cuidakuychis qankuna kikiykichista, paqtataq sonqoykichis rumiyanman viciokunawan, machaywan, kay kawsaypa llakichikuyninwan, chaytaq [...] [chay] p’unchay qonqaylla hap’isunkichisman”, nispa (Lucas 21:34, 35).

Chhaynaqa, ¿imatan ruwankuman nishuta ukyaqkuna ama sonqonku ‘machaywan rumiyananpaq’? Chaymantan qatiqninpi yachasun.

[Uranpi willakuy]

[4, 5 paginakunapi fotokuna]

Nishuta ukyaqqa sasachakuykunapin tarikun