¿Imaynataq hanaq pachari?

WAKINMI ninku: “Manataq pipas hanaq pachamanta uraykamuq kanchu chayqa, manan yachasunmanchu imayna chay kasqanta”, nispa. Ichaqa Jesusmi nirqan: ‘Hanaq pachamantan uraykamuni’, nispa (Juan 6:38). Religionpi umalliqkunatapas nirqanmi: “Qankunaqa kaymantan kankichis, ñoqataq hanaq pachamanta kani”, nispa (Juan 8:23). Qhawasunchis imatan Jesús chaymanta yachachirqan chayta.

Diosqa hanaq pachapin tiyan, chaytan Jesús rikuchirqan ‘Yayayqa hanaq pachapin kashan’ nisqanwan (Mateo 12:50). Ichaqa manan kay phuyukunata rikusqanchis chaymantachu rimasharqan. Diosqa manan kay phuyu-phuyupi azulta rikusqanchis chaypichu tiyan. Bibliaq nisqan hina, “Diosqa kay pachaq muyun patapin tiyashan” (Isaías 40:22).

Chhaynaqa, ¿ch’askakunaq kasqanpichu tiyan? Chaytapas Bibliaqa “hanaq pacha” nillantaqmi, chaymi Salmo takita qelqaq nirqan: “Kamasqayki hanaq pachata qhawarispaymi chaypi churasqayki killatapas ch’askakunatapas rikuspaymi, nini: ¿Imataq runari payta yuyarinaykipaq?” nispa (Salmo 8:3, 4).

Imaynan carpinteropas mana ruwasqan roperopichu tiyan, chhaynallataqmi Jehová Diospas mana ch’askakunaq kasqanpichu tiyan. Rey Salomonmi chayta sut’incharqan, Jerusalén llaqtapi yupaychana wasita sayarichisqan qhepamanmi nirqan: “¿Cheqaqtachu qan Diosqa kay pachapi tiyawaq? Hanaq pachapas manan chaskiyta atisunkichu ancha hatun kashaspa, ¿imanpaqraqtaq kanman kay wasi sayarichisqayqa?” nispa (1 Reyes 8:27). Chaywanmi yachanchis Diosqa mana rikukuq cheqaspichu tiyasqanta.

Runaqa hatun largavistakunayoqña kanku, kay pachamantaña lloqsinku chaypas, “manan pipas Diostaqa hayk’aqpas rikurqanchu” (Juan 1:18). Jesuspa nisqan hina, “Diosqa espiritun” (Juan 4:24).

Bibliaq nisqan hina, espiritukunaqa manan ñoqanchis hinachu kanku. Manan aychankupas tullunkupas kanchu, chaymi mana paykunataqa rikusunmanchu. Chayrayku maypachachus Jesús nirqan manaraq kay pachaman hamushaspa Papanwan kuska tiyasqanmanta chayqa, espíritu hina kawsasqanmanta rimasharqan (Juan 17:5; Filipenses 3:20, 21). Maypichus Jesusqa Dioswan kuska kawsarqanku chaytan Biblia sutichan “hanaq pacha”, nispa. ¿Imaynataq chay hanaq pachari? ¿Imatataq chaypiri ruwanku?

 Chaypi kaqkunaqa imaymana llank’anayoqmi kanku

Bibliaq nisqan hina, hanaq pachapiqa waranqanpi angelkunan Diospa munayninta ruwashanku (Daniel 7:9, 10). Sapankapas manan kaqllachu kanku. Imaynan kay pachapi runakunaqa mana kaqllachu kanku chhaynallataqmi hanaq pachapipas. Chaywanpas paykunaqa huk-nisqallan sumaqta llank’anku, manan kay pachapi runakuna hinachu.

Biblian nin: “¡Munayninta ruwaq angelninkuna, Señor Diosta saminchaychis [hatunchaychis]! ¡Hanaq pachapi llapallaykichis, Señor Diosta saminchaychis! ¡Munayninta ruwaq kamachinkuna, Señor Diosta saminchaychis!” nispa (Salmo 103:20, 21). Chaypi nisqan hina, angelkunaqa allintan llank’ashanku. ¡Maytachá chaywan kusikunku!

Manaraq kay pachapas kamasqa kashaqtinmi angelkunaqa Diosta servisharqankuña. Jehová Dios kay pachata kamaqtinpas ‘sumaqtan takirqanku’, hinaspa ‘kusisqa q’ochukurqanku’ (Job 38:4, 7). Diostapas huk angelmi yanaparqan tukuy imaymanakunata kamashaqtin (Colosenses 1:15-17). Runarí, ¿angelkuna hina hanaq pachapi kawsananpaqchu kamasqa karqan?

¿Hanaq pachapaqchu kamasqa karqanchis?

Ñaqha nisqanchis hina, angelkunaqa ñan hanaq pachapi Diosta servirqankuña manaraq kay pachapas kamasqa kashaqtin. Chhaynaqa runakunaqa manan hanaq pachapi tiyananchispaqchu kamasqa karqanchis, chaymi Diosqa Adantawan Evatawan kamachirqan: “Askhata miraychis, kay pachamanpas hunt’aykuychis, chaypi munayniyoq kaychis”, nispa (Génesis 1:28; Hechos 17:26). Arí, Adanqa kay pachapi tiyananpaqmi kamasqa karqan, Dios reqsiytapas serviytapas atinanpaq. Chaymi Bibliapas nin: “Hanaq pachaqa Señor Diospa kaqninmi, kay pachatataqmi runaman qorqan”, nispa (Salmo 115:16).

Chayraykuchá runaqa mana wañuyta munanchu. ¿Imanaqtintaq runari wañun? Adanpa mana kasukusqanraykun. Kasukullanman karqan chayqa, manan hayk’aqpas wañunmanchu karqan (Génesis 2:17; Romanos 5:12).

Diosqa manan hayk’aqpas Adanta nirqanchu hanaq pachaman ripunanpaq. Manataqmi hayk’aqpas nirqanchu: “Runaqa kay pachapi allin pruebata pasaspañan hanaq pachaman ripunqa”, nispaqa. Aswanmi munarqan kay pachapi wiñaypaq kawsanankuta. Chay munayninqa kaqllapunin kashan, chaymi Bibliapi prometewanchis: “Chanin runakunaqa kay hallp’atan [kay pachatan] hap’ikapunqaku, chaypin wiñaypaq tiyanqaku”, nispa (Salmo 37:29). Chhaynaqa, ¿imaraykutaq Jesusri apostolninkunata prometerqan hanaq pachaman ripunankupaq? ¿Llapan allin runakunachu chayman rinqaku?