Bibliata allinta entiendenapaq qanchis yanapaykuna

“Manan hayk’aqpas Bibliata hinaqa huk librota vendekurqanchu, sapa watataqmi chhaynapuni kashan.” (REVISTA TIME)

“Mayninpin Bibliata leeni, ichaqa puñuyraqmi aysawan leeqtiy.” (KEITH, MÚSICO INGLÉS)

BIBLIAQA Hallp’antinpin tarikun, ichaqa manan llapa runakunachu leenku. Wakinmi ichaqa leespa kawsayninkupi yanapachikunku. Nancy sutiyoq warmi nin: “Kinsa chunka phisqayoq watan yanapayta maskharqani llakikuy onqoyniyta atipanaypaq, ichaqa Bibliata sapa kutilla leesqay sapa tutamanta chaypi yuyaymanasqaymi astawanqa yanapawarqan”, nispa.

Mana hayk’aqpas Bibliata leerqankichu chayqa tapukurqankipaschá: “¿Imaraykun Bibliata leesqanku runakunata yanapan?” nispa. Leeshanki chayqa, ¿imatan ruwawaq astawan entiendenaykipaq? Qatimuq parrafokunapin qanchis yanapaykuna kashan Bibliata entiendenapaq, chayta qhawarisun.

1 Tukuy sonqowan leey

▪ Wakinmi Bibliata leenku allin librota hina qhawarispa, wakintaq allin yachaykunata tarinankupaq, hukkunataq “leenapunin” nisqankuraykulla. Bibliata leespaqa Diosmanta yachay yuyaywanmi kawsayninchispi yanapachikunapaq yuyaywanmi leena.

Biblian huk rikch’anachiywan rikuchin tukuy sonqowan leena kasqanta, ninmi: “Pipas Diospa siminta uyarishaspa mana hunt’aqqa espejopi uyanta qhawakuq runamanmi rikch’akun. Paymi imaynachus kasqanta qhawakun, ripuspataq imaynachus kasqanta qonqarqapun. Diospa hunt’asqa kamachikuy siminmi kacharichin, pipas chayta allin-allinta qhawaspa t’aqwin, hinaspa  mana qonqaspa chay kamachikuy simita hunt’an chayqa, tukuy ruwasqankunapin kusisamiyoq kanqa”, nispa (Santiago 1:23-25).

Chay rikch’anachiypi runaqa manan uyantapas nitaq p’achantapas allichakurqanchu. ¿Imarayku? Yaqapaschá ratolla qhawarukusqanrayku otaq yanqallapaq qhawakusqanrayku. Chay hinatan Bibliawanpas ruwanku, wakinqa maynillanmi leenku otaq yanqallata leerunku. Sichus tukuy yuyaywan Bibliata leenki chayman hinataq kawsankipas yuyaykunkipas chayqa kusisqan kanki.

2 Allin t’ikrasqa Bibliata leey

▪ Español simipiqa askha Bibliakunan kan leenapaq. Mayqenpas allinmi kanman, ichaqa allinta yanapachikunapaqqa qhawarinanchismi entiendenapaq hinachus icha manachus chayta. Wakin Bibliakunaqa sasa entiendeymi; mana reqsisqa simikunawanmi otaq allin educacionniyoq runakunallapaq qelqasqa kashan (Hechos 4:13). Wakin Bibliakunaqa creenciakunawanmi chhaqrusqa kashan manataqmi sut’intachu Diosmanta willan. Wakin Bibliakunapin Jehová sutiq rantinpi “Dios” otaq “Señor”, nispalla nishan. Chaymi allin t’ikrasqa Bibliata entiendey atinapaq kaqta maskhananchis.

Askha runakunan ninku: “Traducción del Nuevo Mundo nisqa Biblian allin t’ikrasqa kashan entiendenapaq hinataqmi kanpas”, nispa. * Bulgaria nacionpi tiyaq kurak runan Jehová Diospa testigonkunaq huñunakuyninman rispa huk Bibliata chaskikamurqan, paymi nin: “Unayñan Bibliata leeni, kay Bibliatan ichaqa aswan allinta entiendeni, sonqoymanmi chayan chaypi yachasqaypas”, nispa.

3 Diosmanta mañakuy

▪ Sichus sapa kutilla Bibliata leenaykipaq Diospa yanapayninta mañakunki chayqa, leesqaykitan astawan entiendenki. Chaytan Salmo librota qelqaqpas mañakurqan, nirqanmi: “Ñawiyta kichariway, yachachikuyniyki simipi musphanakunata rikunaypaq”, nispa (Salmo 119:18). Bibliaq yanapayninwanmi Diosta reqsinchis, chaymi mañakusqanchispi agradecekuna Biblia qowasqanchismanta (Salmo 119:62).

¿Imaynapin yachanchis Jehová Dios mañakusqanchista uyarisqanta? Chaypaq yachasun Uruguay nacionpi iskay ñañantin sipaskunamanta. Yachaytan munarqanku Daniel 2:44 textomanta, chaymi Diosmanta mañakurqanku pillapas chayta sut’inchananpaq. Chayllamanmi manaraq Bibliankuta wisq’ashaqtinku iskay Testigokuna punkuta takaykamurqanku, hinan Daniel 2:44 textollatataq leespa sut’incharqanku Diospa Gobiernon kay pacha gobiernokunata tukuchinanta. * Chhaynapin chay sipaskuna yacharqanku mañakusqankuta Dios uyarisqanta.

4 Sapa p’unchay leey

▪ Askha runakunan Bibliata leenku llakipi tarikuspa otaq sasachakuykunapi tarikuspalla. Qelqakuna ruwakusqan wasipi directormi willarqan 2001 watapi 11 septiembre killapi askha runakuna wañuchisqa kasqanku qhepaman “yaqalla Bibliata rantispa tukurusqankuta”. Ichaqa Dios kikinpunin munan sapa p’unchay Biblia leenanchista, ninmi: “Kamachikuy simi qelqamantaqa rimashallankipunin, chaytaqa tuta-p’unchaymi yuyaymanallankipuni qelqaq kamachikusqanman hinapuni ruwanaykipaq. Chay hinapin tukuy ima ruwasqaykipas allinkama kasunki”, nispa (Josué 1:8).

¿Imaraykun sapa p’unchay Bibliata leenanchis? Chayta entiendenapaq kay rikch’anachiywan tupachisun. Huk runan sonqo onqoyniyoq kashan, chaymi decidikun mikhusqanta  cuidakunanpaq. Ichaqa, ¿qhaliyanmanchu sonqon nanallaqtin mikhunanta cuidakusqan? Manan riki. Qhaliyananpaqqa sapa p’unchaymi cuidakunan. ‘Tukuy ima ruwasqanchis allin’ kananpaqpas sapa p’unchaymi Bibliata leenanchis.

5 ¿Imaynatan leewaq?

▪ Qallariymanta tukukuykama Biblia leeyqa allinmi, ichaqa aswan allinta entiendenaykipaqqa hukniraymantapas leewaqmi.

Huk runamanta yachawaq. Diosta serviq runamanta yachanaykipaq maskhay payllamanta willaq textokunata otaq capitulokunata. Yaqapaschá leewaq:

• Josemanta: Génesis 37-50.

• Rutmanta: Rut 1-3.

• Jesusmanta: Mateo 1-28; Marcos 1-16; Lucas 1-24; Juan 1-21. *

Huk temamanta. Huk temallamanta willaq textokunata maskhaspa leey. Yaqapaschá maskhawaq Dios mañakuymanta willaq textokunata, leewaqtaq ñawpa runakuna Diosmanta imayna mañakusqankuta. *

Kunkawan leey. Bibliapunin willan kunkawan leey allin kasqanta (Apocalipsis 1:3). Yaqapaschá familiantin leewaqchis, sapankankutaq leenkuman hukta otaq askha parrafokunata, otaq chay tiempopi runakunaq kunkanman hina leenkuman. Kallantaqmi Biblia discopi grabasqa, chaytapas uyariwaqmi. Huk warmin willakun: “Sasachakurqanin Bibliata leenaypaq, chaymi decidikurqani discopi grabasqakunata uyarinaypaq. Ima novelamantapas Biblia uyariymi astawan kusichiwan”, nispa.

6 Yuyaymanay leesqaykipi

▪ Imaymana ruwanayoq kasqanchisraykun mana tiemponchis aypanchu tiyayuspa yuyaymanananchispaq. Ichaqa leesqanchispi yuyaymanaymi yanapawasun Bibliata entiendenanchispaq. Leesqanchispi yuyaymanayqa mikhusqanchista allinta khamuy hinan. ¿Imaynatataq Bibliapi leesqanchista allinta “khamusunman”? Leesqanchista umanchispi yapa-yapamanta yuyarispa, tapukuspa: “¿Imatan kaypi leesqay yachachiwan Diosmanta? ¿Imaynatan kawsayniypi yanapawanman? ¿Imaynatan hukkunata chaywan yanapayman?”, nispa.

Chhayna yuyaymanaymi yanapawasun Diospa yachachikuynin sonqonchisman chayananpaq. Bibliata leespan kusikusun, salmista hinataqmi nisun: “¡Maytapunin yachachikuy simiykitaqa munakuni! P’unchay-ch’isiyaqmi chayllapiña yuyaymanani”, nispa (Salmo 119:97). ¿Imaraykun chay simikunata qelqaq runa chayllapiña yuyaymanaq? Chhayna yuyaymanasqanmi payta yanaparqan Diospa Siminta sonqonpi hap’ikunanpaq.

7 Allin yachachiqta maskhay

▪ Diosqa yachanmi Bibliata entiendenapaq hukpa yanapaynin necesitasqanchista. Bibliapunin willan wakin yachachikuykuna “sasa entiendey” kasqanta (2 Pedro 3:16). ¿Maypin chay yanapayta tarisunman? Chayta yachanapaq Hechos libroq nisqanta yuyarisun. Huk kutinmi kamachikuqpa tesoreron etíope runa Diospa Qelqanta leespa mana entiendesqachu. Hinan Diosqa huknin kamachinta kacharqan entiendechinanpaq. Chay qhepamanmi chay runa ‘ancha kusisqa ripurqan’ (Hechos 8:26-39).

Sichus qanpas Bibliata allinta entiendeyta munanki chayqa, Bibliamanta allin yachachiqta maskhay. Chaypaqqa Jehová Diospa testigontan niwaq visitamunasuykipaq otaq kay revista ruwaqkunaman qelqawaq estudiota mañakuspa (4 paginapin direccionkuna kashan). Maytan munayku chay qanchis yanapaykunawan Bibliata leespa entiendenaykita.

[Uranpi willakuykuna]