Kay pachaq tukupunanmanta tawa tapukuykuna

JESUSQA rimarqanñan kay pachaq tukukapunanmanta, nirqanmi: “Chay p’unchaykunaqa manchay ñak’ariymi kanqa, chay hinaqa manan hayk’aqpas kay pacha qallariymantapacha kunankama karqanchu, manataqmi kanqapaschu”, nispa (Mateo 24:14, 21).

Bibliapi chhayna willakuykunata yachaspan runakuna imaymanata tapukunku. Qhawarisun imaninmi Biblia tawa tapukuykunamanta. Munaspaqa Bibliaykipin textokunata maskhawaq.

1 ¿Iman tukupunqa?

Bibliaqa manan willanchu kay Hallp’anchis tukupunanmanta aswanpas wiñaypaq kananmantan. Salmo 104:5 textopin nin: “Qanmi kay pachata allinta teqsicharqanki sayashasqanmanta ama hayk’aqpas kuyurinanpaq”, nispa. Manataqmi ninchu kay Hallp’api llapa kawsaqkuna wañupunanta (Isaías 45:18). Jesuspunin willarqan huk t’aqa runakuna wañuymanta qespichisqa kanankuta (Mateo 24:21, 22). Chhaynaqa, ¿ima tukupunanmantan Biblia willan?

Kay pachapi mana allin kamachikuqkuna. Diospa yuyaychasqanmi profeta Daniel qelqarqan: “Chay reykuna kamachikushaqtinmi, Hanaq Pacha Diosqa mana hayk’aq thunikuq suyuta [gobiernota] sayarichinqa, manataqmi wak suyuqa chayta kamachinqachu, aswanpas llapa suyukunatan ñut’uspa tukunqa, wiñaypaqtaq kanqapas”, nispa (Daniel 2:44).

Guerra, Hallp’a qhellichay. Salmota qelqaqmi hamuq tiempopi Diospa ruwananmanta rimaspa nirqan: “Paymi teqsimuyuntinpi awqa-tinkuykunata qolluchin, wach’ina p’eqtakunatapas lanzakunatapas p’akirqarin, carretakunatapas ruphaykachin”, nispa (Salmo 46:9). Hinaspapas Diosmi prometen ‘kay pacha waqllichiqkuna wañuchinanta’ (Apocalipsis 11:18).

Millay runakuna, mana chaninkaqpas. Diospa Simin Qelqan nin: “Chanin kawsaqkunaqa kay suyupin tiyanqaku, mana huchallikuqkunapas kaypin kashanqaku, millay runakunan ichaqa kay suyumanta wikch’usqa kanqaku, wasanchaqkunapas chaymanta t’irasqan kanqaku”, nispa (Proverbios 2:21, 22).

 2 ¿Hayk’aqmi p’uchukay chayamunqa?

Diosqa ñan huk p’unchayta churanña “hayk’aqchus” millay runakunata tukuchinanpaq Gobiernon kay Hallp’ata kamachimunanpaqpas (Mar. 13:33). Ichaqa manan pipas yachanchu hayk’aqpunichus kananta. Jesusmi nirqan: “Chay p’unchayta chay horatawanmi ichaqa mana pipas yachanchu, manallataq hanaq pachapi kaq angelkunapas, Churipas, aswanpas Yayallan yachan”, nispa (Mateo 24:36). Ichaqa paypas qatikuqninkunapas willarqankun manaraq chay p’unchay chayamushaqtin kay Hallp’api imakuna kananmanta. Pachantinpi chaykuna hunt’akusqanta rikuspan yachasun chay p’unchay chayamushasqanta. ¿Imakunatan rikusun?

Terremotokuna, lloqllakuna, politicapi llaqtapi sasachakuykuna. Huk kutinmi qatikuqninkuna Jesusta tapurqanku chay p’unchay chayamushasqanmanta yachanankupaq imakuna rikunankuta. Jesusmi nirqan: “Llaqtakunan huk llaqtakunawan maqanakunqaku, huk suyun hukkaq suyuwan maqanakunqa, kanqataqmi kayneqpi chayneqpi pacha chhaphchiykuna, yarqaykuna, ch’aqwaykunapas, chaykunaqa ñak’ariy qallariyllaraqmi kanqa”, nispa (Marcos 13:8). Apóstol Pablopas willarqanmi: “Tukukuy qaylla p’unchaykunataqa sasa tiempokunan chayamunqa. Runakunan kanqa paykuna kikinkuta munakuqkuna, qolqe sonqokuna, alabakuqkuna, hatunchakuqkuna, runamasinkuta k’amiqkuna, tayta-mamankuta mana kasuqkuna, mana reqsikuqkuna, Diosta mana manchakuqkuna, mana munakuyniyoqkuna, mana khuyapayakuqkuna, yanqa qasi tumpakuqkuna, aychankuq munaynillanta ruwaqkuna, millay yana alma runakuna, tukuy allinkaqta cheqnikuqkuna, amigonkunata hap’iykachiqkuna, waq’a hina ruwaqkuna, paypayman tukuqkuna ima. Chay runakunaqa Dios munakunankutaqa aycha kusichiyllapin puriyta munanqaku”, nispa (2 Timoteo 3:1-5).

Pachantinpi askha rimaykunapi predicakun. Jesusmi willarqanña: “Qhapaqsuyumanta allin willakuykunan kay pachantinpi willasqa kanqa, llapa suyukunaq yachananpaq, hinaqtinmi p’uchukayqa chayamunqa”, nispa (Mateo 24:14).

3 ¿Iman kanqa chaykuna qhepaman?

Bibliaqa manan yachachinchu llapa allin runakuna hanaq pachaman rispa chaypi wiñaypaq tiyanankuta. Diosqa runakunata kamarqan kay Hallp’api wiñaypaq tiyanankupaqmi. Chayqa hunt’akunqapunin, Jesusmi nirqan: “Kusisamiyoqmi llamp’u sonqoyoqkunaqa, paykunaqa kay pacha hallp’atan herenciapaq chaskinqaku”, nispa (Mateo 5:5; 6:9, 10). ¿Manaraq p’uchukay chayamushaqtin wañupuqkunari? Paykunaqa kawsarimpunqakun (Job 14:14, 15; Juan 5:28, 29). ¿Chay qhepamanri?

Jesusmi hanaq pachamanta kamachikamunqa. Profeta Danielmi qelqarqan: “Tuta rikhuriytan ñoqa qhawasharqani, chayllamanmi runaq churinta hina [Kawsarimpuq Jesusta] rikurqani, paymi phuyu ukhupi hamusharqan. Paymi Yuyaq Runaman [Jehová Diosman] qayllaykurqan, hinan Yuyaq Runaman asuykachirqanku. Paymi [Jesús] kamachikuy atiyta chaskirqan, qhapaqchasqan karqan, rey kananpaq churasqan karqan, llapa llaqtakunan, hatun suyukunan, ima rimaytaña rimaqkunapas payta servinanku karqan. Kamachikuyninqa wiñaypaq kamachikuymi, manan hayk’aqpas tukukunqachu, munaychakuyninqa mana qolluchinan kanqa”, nispa (Daniel 7:13, 14; Lucas 1:31, 32; Juan 3:13-16).

Wiñaypaqmi kawsanqaku qhalilla mana imata manchakuspa. Profeta Isaiasmi willarqan: “Wasitan wasichanqaku, hinaspan chaykunapi tiyanqaku, uvastan plantanqaku, chaypa rurusqantan mikhunqaku. Manan wakpa tiyananpaqchu wasichanqaku, manan wakpa mikhunanpaqchu mallkinqaku”, nispa (Isaías  65:21-23). Apóstol Juanpas nirqanmi: “Kunanqa runakunawanñan Diosqa tiyan, paykunawantaqmi tiyanqapas. Paykunan llaqtan kanqaku, kikin Diostaqmi paykunawan kashanqa, Diosninkutaq kanqapas. Diosmi paykunaq ñawinkumanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu, ñawpaqkaqkunaqa manaña kapusqanrayku”, nispa (Apocalipsis 21:3, 4).

4 ¿Imatan ruwana kawsananchispaq?

Apóstol Pedron willarqan tukukuy p’unchaykunapi asipayakuqkuna kananta, millay kawsay tukupunanmantan ninkuman: “¿Maytaq hamunchu?” nispa (2 Pedro 3:3, 4). Chaywanpas chay tiempopi kawsaq runakunatan kallpacharqan:

Ñawpa tiempopi sucedesqanta yuyarinankupaq. Apóstol Pedron willarqan: “Manallataqmi Diosqa ñawpa runakunatapas pampacharqanchu, aswanmi unuwan millp’uchirqan llapa waqllisqa millay runakunata, ichaqa chanin kawsaymanta willaq Noellatan qespichirqan, wakin qanchis runakunatawan kuskata”, nispa (2 Pedro 2:5). Asipayakuq runakunamantataqmi nirqan: “Paykunaqa yanqan mana yachaqman tukunku, Diospa siminwan ñawpa tiempopi hanaq pacha ruwasqa kasqanta, hallp’a pachapas unu ukhumanta rikhurimusqanta unu patallapitaq kashasqantapas. Chay  unullawantaqmi ñawpa tiempopi kaq hallp’a pachapas millp’usqa lliw tukukapurqan. Kunan kashaq hanaq pachawan kay pachawanmi * ichaqa Diospa kikin siminwan ninapaq waqaychasqa kashan, hinaspan hatun taripay p’unchaypi ninawan ruphaykachisqa kanqa, Diosta mana manchakuq runakunaq muchunan chayamuqtin”, nispa (2 Pedro 3:5-7).

Diospa kamachikusqanta kasukunankupaq. Apóstol Pedron kawsay munaqkunata nirqan: “Dios sonqo purispan Diosllapaqña kawsanaykichis”, nispa (2 Pedro 3:11). “Kawsanaykichis” nispaqa manan simillawan “iñinin” ninamantachu rimasharqan nitaq qespichisqa kananchisraykulla Diosman kutirikunamantachu.

Chhaynaqa, ¿imamantan rimasharqan? ¿Munawaqchu Bibliaykipipuni chaykunamanta yachayta? Jehová Diospa testigonkunan tukuy sonqomanta yanapasunkikuman. Bibliata estudiasqaykin yanapasunkiman hamuq tiempota mana manchakuspa suyakunaykipaq.

[Uranpi willakuy]

[7 paginapi willakuy]

Diosqa kay Hallp’a qhellichaqkunatan tukuchinqa manan tiyasqanchis Hallp’atachu