Manañan hamuq tiempota manchakuykuchu

KAY pachaq tukupunanta yuyaykuspan, 1980 watapi hina Gary Karenpiwan campoman astakurqanku. Paykunaqa tukuy imaymanatan yachayta munarqanku paykunallamanta imachus necesitasqankuta tarinankupaq.

Chaypaqmi askha librokunata rantirqanku, academiakunapi matriculakurqanku, askha runakunatataqmi tapukurqanku. Huertata ruwaspan 50 frutakunayoq huch’uy sachakunata plantarqanku, muhukunata herramientakunata waqaycharqanku, chakrapi llank’ayta yacharqanku, yacharqankutaqmi mikhuna unayta durananpaq imayna waqaychayta. Huk amigankun yachachirqan animalkuna nak’ayta imayna waqaychaytapas. Karenmi yachallasqataq ima plantakuna ima saphikuna mikhunapaq kasqanta mikhuyninku tukukuqtin chaykunawan kawsanankupaq. Garypas yacharqanmi saramanta gasolina ruwayta, q’onchata, wasinkutapas hunt’asqatan ruwarqanku manaña imatapas hawamanta necesitanankupaq.

Karen nin: “Runakunaq imayna kawsasqanta qhawarispan yuyaykurqani kay pacha tukupunanpaqña kashasqanta”, nispa. Gary nillantaq: “Huk wayna-sipaskuna hinan kallpachakurqani huk llaqtayoq runakunata cheqnikuy, Vietnam llaqtapi guerra, mana chanin  ruwaykunapas chinkananpaq. Ichaqa qhepamanmi repararqani runakuna paykunapura wañuchinakuspa tukukapunankuta, chaymi chaykunata saqepurqani”, nispa.

Gary nin: “Huk tutan mana imapas ruwanay kaqtin Bibliapi Nuevo Testamentota llapanta leerqani. Tukuruspataq astawan entiendenaypaq yapamanta tawa tuta leerqani. Paqaristinmi Karenta nirqani: ‘Tukukuy p’unchaypiñan kashanchis, ñan Dios kay Hallp’api tukuy imaymanata allichanqaña. Maskhasun chay p’unchaypi salvasqa kaqkunata hinaspa paykunaman huñukapusun’”, nispa. Chaymi huk-huk religionman rirqanku.

Chay qhepallamanmi Testigokuna wasinta visitarqanku hinan Biblia estudiayta qallarirqanku. Karen nin: “Anchatan kusikurqani Bibliamanta yachachiwaqtinku. Unayñan kay pacha imaynapi tukupunanmanta yachayta munarqani. Chayraqmi cheqaq yachachikuyta tarirqani. Yacharqanin qhepa tiempopaq sumaq suyakuy kasqanmanta, tukuyta Kamaq Jehová Taytanchismanpas astawanmi asuykurqani”, nispa.

Gary nin: “Chayraqmi yacharqani imapaq kawsasqayta. Manañan Biblia estudiayta saqeyta munarqanichu. Profeciakunaq hunt’akusqanta yachaspan repararqani kay pachata Dios allichananpaq pisillaña kasqanta. Khaynatan yuyaykurqani: ‘Manan kay pachaq tukukunanpaqchu preparakunay aswanpas Diospa munasqanman hina kawsanaypaqmi’”, nispa. Qhepaman sumaq kawsay kapunanta yachaspan manaña kay pacha tukupunanmanta llakikurqankuchu. Yacharqankun pisi tiempollamanta Dios runakunaq sasachakuyninkuna tukuchinanta Hallp’atapas sumaq paraisoman tukuchinanta.

Chaymantaqa ñan iskay chunka phisqayoq wataña pasarqon, ¿imaynatan kunan yuyaykunku? Karen nin: “Astawanmi kunanqa Diospi iñini, astawanmi munakunipas. Kallpachakunin hukkunapas payta reqsispa munakunankupaq. Garywanmi kallpachanakuyku tukuy sonqowan Diosta servishanallaykupaq. Huk runakunata yanapanaykuraykun kallpachakuyku tiempowan imatapas ruwanaykupaq kapuqnillaykuwan kawsanaykupaqpas”, nispa.

Gary nin: “Sapa p’unchaymi Diosmanta mañakuni Gobiernon hamunanpaq runakunaq ñak’ariyninta tukuchinanpaqpas. Sapa kuti predicaq lloqsiqtiymi Diosmanta mañakuni huk runallatapas Bibliawan kallpachanaypaq. Yanapawarqantaqmi kay iskay chunka phisqayoq watakunapi. Yachaykuña kay Hallp’api imaymana kananta chaypas, manañan hamuq tiempota manchakuykuchu”, nispa (Mateo 6:9, 10; 2 Pedro 3:11, 12).

[9 paginapi foto]

Garywan Karenwanmi Bibliamanta allin willakuykunata willashanku