Jesuspa yachachikuyninkuna

Angelkunaqa yanapawasunmanmi

Jesusqa hanaq pachapin tiyarqan “manaraq kay pacha kashaqtin” (Juan 17:5). Chaymi paylla willawasunman kay tapuykunaq kutichiyninta:

¿Interesakunkuchu angelkuna ñoqanchispi?

▪ Jesusmi willarqan angelkuna runakunapi anchatapuni interesakusqankumanta. Nirqanmi: “Diospa angelninkunaqa q’ochukunku huk huchasapaq Diosman kutirikusqanmanta”, nispa (Lucas 15:10).

Chaymantapas Jesusqa willarqanmi chay angelkuna Dios serviqkunata hanaq pacha Taytankuwan allinpi kanankupaq yanapanankupaq churasqa kasqankuta. Chaymi payqa qatikuqninkunata nirqan ama iñiqmasinkuq conciencianpa contranpi imatapas ruwanankupaq. Nirqanmi: “Hanaq pachapiqa Yayaypa qayllanpipunin kashanku [paykunata] cuidaq angelkunaqa”, nispa (Mateo 18:10). Chaywanqa manan nisharqanchu sapanka qatikuqninkuna angelniyoq kasqankuta, aswanpas chay angelkuna Dios serviqkunapi anchata interesakusqankumantan rimasharqan.

 ¿Imawanmi Saqra runakunata waqllichiyta munan?

▪ Jesuspa nisqan hina, Saqraqa manan munanchu runakuna Dios reqsinankuta. Paymi nirqan: “Diospa qhapaqsuyunmanta willakuyta pillapas uyarispa mana entiendeqtinmi, saqraqa hamurqospa sonqonpi t’akasqa muhuta aparqapun”, nispa (Mateo 13:19).

Huk rikch’anachiypin Jesús willarqan huk runa chakranpi trigo t’akasqanmanta. Ichaqa awqanmi “chirisuela qora muhuta trigo chakraman t’akaykurqan”. Chakrayoq runaqa kikin Jesucriston karqan, trigotaq cheqaq cristianokuna. Chirisuelaqa pantasqa religionkunan, “chirisuela muhu t’akaq awqataq saqra”. Chay rikch’anachiywanmi Jesús rikuchirqan runakunata pantachinanpaq Saqraq ruwasqanmanta (Mateo 13:25, 39). Trigowan Chirisuelawanqa yaqa kaqllan kanku wiñashaspa, chhaynan pantasqa religionkunapas cheqaq religionwan yaqa kaqlla kankuman. Ichaqa pantasqatan yachachinku, runakunatan tanqanku Diosta mana kasukunankupaq. Chhaynapin Satanás pantasqa religionkunawan runakunata Diosmanta karunchan.

¿Imaynatan Satanasmanta cuidakusunman?

▪ Juan 14:30 textoq nisqan hina, Jesusmi Satanasta nirqan: “Kay pachapi kamachikuq”, nispa. Willarqanmi paymanta imayna cuidakunanchistapas. Qatikuqninkunaraykun Taytanmanta khaynata mañakurqan: ‘Mañakuyki [...] saqramanta paykunata waqaychanaykipaq. Manan kay pachamantachu kanku, ñoqapas manallataqmi kay pachamantachu kani. Cheqaq kayniykiwan paykunata t’aqay, simiykiqa cheqaq-kaypunin’, nispa (Juan 17:15-17). Arí, Satanaspa kamachisqan runakunamanta cuidakunapaqqa Diospa Siminmantan yachananchis.

¿Yanapawasunmanchu angelkuna?

▪ Jesusmi nirqan: ‘Kay tiempo p’uchukapunanpaq [kashaqtinmi], angelkuna hamuspanku chanin runakuna ukhumanta mana chanin runakunata t’aqanqaku’, nispa (Mateo 13:49). Kunanmi chay ‘p’uchukay’ tiempopi kawsashanchis, chaymi waranqa-waranqanpi runakuna Diospa Gobiernonmanta willakuyta uyarikushanku (Mateo 24:3, 14).

Ichaqa manan llapa Biblia estudiaqkunachu Diospa allin qhawarisqan kanku. Chaymi Jehová Dios llapa serviqninkunata angelkunawan llank’ayninkupi yanapachishan, t’aqachishantaqmi pay munakuq runakunata mana kasukuyta munaq runakunamanta. Sut’incharqantaqmi Diospa allin qhawarisqan runakunaqa ‘Uyarispa cheqaq allin sonqowan Diospa siminta waqaychaqkuna kasqankuta, hinaspa pacienciawan ruruq’ kasqankutawan (Lucas 8:15).

Astawan yachayta munanki chayqa ¿Imatapunin Biblia yachachin? nisqa librota qhaway 10 capitulota, chaytaqa Jehová Diospa testigonkunan ruwan.

[9 paginapi dibujo]

Angelkunaq yanapayninwanmi askha runakuna Diospa llaqtanman haykushanku