Bibliaq yanapayninwan cambianku

¿IMAN yanaparqan huk guerrillero suwa runata kawsayninpi cambiananpaq? ¿Imaraykun karate nisqapi campeona warmi chay ruwasqanta saqepurqan? ¿Iman karqan huk tayta wawanrayku kallpachakusqanmanta? Qatimuq experienciakunapin chaymanta yachasun.

“Tutayaqpi hinaña kawsarqani chaypas kunanqa kusisqan kawsani” (GARRY P. AMBROCIO)

47 WATAYOQ

FILIPINAS NACIONMANTA

GUERRILLERON KARQAN

ÑAWPAQPI KAWSASQAY: Vintar llaqtapin wiñarqani, chay llaqtaqa sumaq orqokunaq muyurisqan pampakunan karqan, ch’uya unuyoq, maypas samakunapaq hinan karqan. Tiyasqay cheqasqa munaymi kaq, ichaqa sasan kawsay karqan. Suwakunan uywaykuta apaqku wasiykutapas suwaqku.

Waynachallaraq kashaqtiymi amigoykunawan sinchita machaq kayku cigarrotapas pitaq kayku chaykuna rantinaypaqtaq suwakuq kani, abuelaypa alhajankunatapas suwakurqanin. Nuevo Ejército Popular nisqapi kanaypaq yuyaykuspan soldadokuna sinchita maqawaqku. Chaymi chaykunata manaña aguantayta atispa cheqapaq chay guerrillerokunawan huñukapurqani. Phisqa watan montañakunapi soldakunamanta ayqekuspa huk-huk cheqaskunapi tiyarqayku; sasan karqan. Chaymi manaña chhaynapi tiyayta munaspa, llocos Norte nisqa llaqtapi gobernadorman entregakapurqani. Chay runaqa allintan tratawarqan yanapawarqantaq llank’anata tarinaypaqpas. Chaywanpas mana allinllatan kawsasharqani, kaqllan wasikunata haykuspa suwakuq kani runakunatapas manchachiqmi kani.

BIBLIAQ YANAPAYNINWAN CAMBIAPUNI: Llank’asqaypin karqan Jehová Diospa testigon Loida sutiyoq sipas. Paymi Jovencio Testigota reqsichiwarqan Bibliata estudianaykupaq. Ichaqa manan millay ruwasqayta saqerqanichu. Bibliata estudianaykupaq Jovencio hamullaqtinmi mana pitaqchu kani, hinaspapas suwakuspallan purisharqani. Huk kutinmi suwakushaqtiy policía hap’iwarqan, chaymi chunka hukniyoq killa carcelpi kamurqani. Chaypin Jehová Diosmanta mañakurqani yanapawananpaq, huchallikusqaymanta pampachawananpaq, allin ñanninta pusariwananpaq, santo espiritunwan kallpachawananpaqpas.

Carcelpi kashaqtiymi huk Testigo visitamuwarqan hinaspa Bibliata saqewarqan. Bibliata leespan yacharqani Jehová Dios khuyapayakuq, munakuq kasqanta, hucha pampachaq kasqantapas. Chaypin repararqani khuyapayakuq kayninpi payta reqsinaypaq yanapay munawasqanta. Chaymi Diosmanta mañakurqani  mana allin ruwasqayta saqenaypaq kallpata qowananpaq. Proverbios 27:11 texton sonqoyman chayarqan. Jehová Dioswanpas rimashayman hinan kayta niwarqan: “Churilláy, yachayniyoq kay, hinaspa sonqoyta kusirichiway, chaymi k’amiwaqniyman kutichisaq”, nispa.

Carcelmanta lloqsisqay qhepamanqa estudiashallarqanin Bibliata, huñunakuykunamanpas riytan qallarirqani. Pisi-pisimantan Bibliaq nisqanman hina kawsayta qallarirqani, Jehová Diospa yanapayninwantaq mana allinkuna ruwasqayta saqespa bautizakapurqani.

KUNAN KAWSASQAY: Tutayaqpi hinaña kawsarqani chaypas kunanqa kusisqan kawsani. Viciokunapi purisqayta saqepuspan mosoq runaman tukupurqani (Colosenses 3:9, 10). Kunanqa Diospa ch’uya llaqtanpin kashani Tukuy atiyniyoq Diosta yupaychaspa, yanapashanin runamasiykunatapas Diosta reqsinankupaq.

“Brasil nacionniytan representayta munarqani” (JULIANA APARECIDA SANTANA ESCUDEIRO)

31 WATAYOQ

BRASIL NACIONMANTA

KARATE NISQATA YACHAQ

ÑAWPAQPI KAWSASQAY: Londrina llaqtamantan kani. Tiyasqay cheqaspiqa yaqa llapa runakunan wakcha karqanku ichaqa sumaq limpion karqan. 10 wataypi kashaqtiymi kurak turay kallpachawarqan karate (taekwondo) nisqata yachanaypaq. Papayqa mana munaqchu chaykuna yachanayta, qhepamanmi ichaqa manaña hark’akuwarqanchu.

Anchatan preparakurqani karate nisqata allinta yachanaypaq, chaymi Paraná llaqtapi askhata atiparqani. Brasil llaqtaypipas campeonato nisqakunapin askhata atiparqani, 1993 watapitaq título nisqata qowarqanku. Ñoqaqa huk nacionkunatan riyta munarqani hukkunawan maqanakunaypaq, ichaqa wakcha kasqaykuraykun mana qolqe kaqchu pasajeypaq.

Maytan munarqani juegos olímpicos nisqapi karate nisqapas kananta; qhepamanqa hunt’akurqanmi chay munasqay. Chay juegos olímpicos nisqamanmi riyta munarqani Brasil llaqtaypa sutinpi, chaypaqtaqmi tuta p’unchay preparakurqani. Hukkunaq yanapayninwanmi maqanakuq rirqani Francia, Vietnam, Corea del Sur, Japón nacionkunata, hinallataq juegos sudamericanos nisqatapas. Chay qhepamanmi juegos panamericanos nisqamanñataq riyta munarqani. Allin maqanakusqayta qhawarispan 2003 watapi kinsata akllawarqanku Santo Domingo llaqtapi (República Dominicana) Juegos Panamericanos nisqaman rinaykupaq.

BIBLIAQ YANAPAYNINWAN CAMBIAPUNI: 2001 watapin parlaqmasiywan kuska Jehová Diospa testigonkunawan Bibliata estudiayta qallarirqayku. Qallariypiqa manan kusisqachu estudiaq kani, sinchi sayk’usqa kaspan estudiasqaykupi puñuyapuq kani. Ichaqa sonqoymanmi chayarqan yachasqay, chaytan repararqani qhepaman huk hatun maqanakuyman risqaypi.

Manaraq juegos panamericanos nisqapi maqanakuy qallarishaqtinmi entrenadorkuna niwarqanku preparakuq hina hukkunawan maqanakunaypaq.  Maqanakunay tupawaqtinmi qonqaylla mana munapurqanichu maqanakuyta. Ñoqallataqmi nikurqani: “Cristianokunaqa manan yanqallapas maqanakunankuchu”, nispa. Hinan yuyarirqani Mateo 19:19 textopi: ‘Runa-masiykitaqa qan kikiykita hinan munakunki’ nisqanta. Chaymi kutirispa ripurqani, runakunataq qhawaywarqanku.

Wasiyman chayaspan yuyaykurqani chaymanta ñawpaqman ima ruwanaypi. Jehová Diospa testigonkunaq ruwasqan folletota hap’ispan leerqani, chaypin rimarqan imatachus Dios munan ñoqanchismanta. Chaypin tarirqani Salmo 11:5 textota, chaypin nin: “Señor Diosqa [...] millay runakunatapas maqaylla maqaqkunatapas cheqnikunmi”, nispa. Chay nisqanqa sonqoymanmi chayarqan, hinan karate nisqata saqepunaypaq decidikurqani.

Entrenawaq runakunaqa manan munarqankuchu saqenayta. Niwarqankun: “Qanqa Brasilmanta aswan allin maqanakuqmi kanki, ñan juegos olímpicos nisqamanpas chayankiña”, nispa. Ichaqa manan uyarirqanichu, ñan decidikurqaniña ima ruwanaytapas.

Chay tiempopaqqa ñan parlaqmasiywan casarakapurqaykuña. Payqa Testigokunawanmi predicaq lloqsisharqanña, chaymi kusisqa willawaq huk runakunawan parlasqanmanta. Ñoqaqa yacharqanin chhayna kusisqa kanaypaq kawsayniypi cambianay kasqanta. Chaymi religionniyta saqepurqani Bibliaq kamachikusqanta hunt’aspataq bautizakapurqani.

KUNAN KAWSASQAY: Kusisqan qosaywan kawsayku Bibliaq nisqanman hina kawsanaykupaq kallpachakuspa. Iñiqmasikunata yanapananpaqmi kusisqa yanapani ima necesitasqanpipas. Yaqapaschá astawan kallpachakuspa qorimanta medallata aypayman karqan aswan reqsisqataq kaymanpas karqan. Ichaqa manan kay pachaq ima kaqninkunapas tupanmanchu Jehová Diosta serviywan.

“Papayqa pacienciawanmi suyarqan” (INGO ZIMMERMANN)

44 WATAYOQ

ALEMANIA NACIONMANTA

DISCOTECAPIN PORTERO KARQAN

ÑAWPAQPI KAWSASQAY: Gelsenkirchen llaqtapin nacerqani, chaypiqa carbón minakunan kan. Familiaypiqa soqtan kayku, iskay qharikuna iskay warmikuna tayta-mamaypiwan. Papayqa Jehová Diospa testigonmi karqan, mamaytaq huk religionmanta chaymi mana munaqchu religionninmanta yachachiwanankuta. Papayqa camiontan manejaq, manaraq wallpa waqashaqtintaq llank’ayta qallariq, chaypin chunka horata otaq mastapas llank’aq. Chaywanpas kallpachakuqmi Bibliamanta yachachiwanankupaq. Ñoqataqmi ichaqa chay yachachiwasqanta wikch’uyukuq kani.

Aburrikuqmi kani papaypa pusawasqan huñunakuykunapi, chaymi 15 wataypi manaña munarqanichu pusawananta. Huk wata pasaqtinmi boxeo nisqaman preparakuq haykurqani. Chay qhepamanmi iskay wata mana allinta kawsarqani, papaypa umantaraqmi nanachirqani. 18 watayta hunt’aqtiytaq wasimanta ripurqani.

 Anchatan munaq kani deporte ruwayta, chaymi semanapi soqta kutita imaraq preparakuq kani boxeo nisqapi, chaymantataq kallpayoq kanaypaq pesakunata hoqariq kani. Sábado domingo p’unchaykunan amigoykunawan tusuna wasita riq kayku. Huk kutinmi huk runawan chay ukhupi maqanakurqayku, hinan saqmashaspalla atiparurqani. Chaypi dueñon rikusqa maqanakusqayta, chaymi allin sueldota munachiwarqan wachimán hina llank’anaypaq. Allintataq pagawanan karqan chayqa manan rogachikurqanichu.

Punkupi sayaspan munasqay runakunallata haykuchiq kani. Chay tusuna wasimanqa hunt’an haykuqku waranqa runakuna hinaraq. Chaymi mana tiempoy kaqchu imapaqpas. Chaypiqa maqanakuqkupunin, ñoqatapas armakunawan p’akisqa botellakunawan iman kamaykuwaqku. Wakinqa mana haykuchiy munasqaymanta otaq chay wasimanta qarqosqayraykun hawapi suyawaqku maqawanankupaq. 20 wataypi kashaspaqa mana piqpa atipananmi qhawarikurqani. Arí, k’arak sonqo, hatunchakuq, payllapaq munaq, munaynillanta ruwaq runamanmi tukupurqani.

BIBLIAQ YANAPAYNINWAN CAMBIAPUNI: Papayqa pacienciawanmi suyarqan cambianayta. Qhawaq ¡Despertad! * revistakunatan hukkunawan apachimuwaq. Ichaqa chaskiruspan hinallata wasiypi montoyoq kani. Huk kutinmi chay revistakunata qhawayta qallarirqani, hinan chaykunapi tarirqani kay pachapi kamachikuqkuna, qhapaq kay, religionkunapas tukupunan kasqanta, chaymi panayta waqyarqani, payqa qosanwanmi Jehová Diospa testigon kanku. Hinan paykuna Bibliamanta estudiota munachiwaqtinku, nirqani: “¡Arí, munaymanmi!”, nispa.

Gálatas 6:7 textopi nisqanmi yanapawarqan kawsayniyta cambianaypaq. Ñoqaqa yacharqanin imatachus runaqa tarpunqa chayllatataq qhepaman cosechanan kasqanta. Hinaspapas Isaías 1:18 textopi nisqanmi anchata kallpachawarqan. Chaypin nin: “Hamuychis, parlasunchis. Sansaq-puka hinaña huchaykichis kashan chaypas, rit’ita hinan yuraqyachisaq”, nispa. Biblia estudiayta qallarisqaymantapachan chay simikuna yanapawarqan ama kikiyta pisichakunaypaq, Jehová Diosman kutirikunaypaqpas.

Mana allin amigoykunamantan t’aqakapunay karqan, mana allinkunapi purisqaytapas saqepunaymi karqan. Chaymi amigoykunaman willarqani Biblia estudiasqaymanta yachasqaymantapas. Chaymantapachan “padrecito” niwarqanku, t’aqakapuwarqankutaqmi kanpas. Llank’anaymantapas lloqsipurqanin, hinan panay yanapawarqan huk allin llank’anata tarinaypaq. Anchata kallpachakuspan soqta killapi kawsayniyta cambiarqani.

Panaypa huñunakuyninmanmi riyta qallarirqani 30 kilometro hinapiraq kashaqtinpas. Karqanmi tiyasqay qayllapi Huñunakuna Wasi, ichaqa manan erqe kashaqtiy reqsisqaykunawan tupayta munarqanichu. Manan munarqanichu chaykunapi predicaytapas. Manapunin munarqanichu tusuna wasimanta qarqosqay runakunawan nitaq drogata qosqay runakunawanpas tupayta. Ichaqa entrenamiento chaskisqaypin yacharqani aswan sasa ejerciciokuna allinpaq kasqanta. Chaymi predicaq lloqsinapaq tukuy necesitakusqanta hunt’aspa kallpachakurqani tukuy atisqayta predicanaypaq.

Ichaqa kallarqantaqmi huk sasachakuy ñoqapaq: manan gustawaqchu leeypas estudiaypas. Yacharqanin iñiyniypi allin taqyasqa kanaypaq Bibliapi yachachikuykunata astawan t’aqwinay kasqanta. Repararqanin espiritualpi allin kanaypaqqa kallpachakunay kasqanta, imaynan aswan kallpayoq kanaypaq pesakunata hoqarinapaq kallpachakuq kani hinata.

KUNAN KAWSASQAY: Diospa munayninpin kunan kawsakushani. Ichaqa kallpachakushallanin ñawpaqpi millay runa kasqayman mana kutirinaypaq, allin sonqoyoq cristianawan casarasqa kasqaymi yanapawashan. Chaymantapas Diospa llaqtanpin allin amigokunata tarini. Papaypa wañukapusqanmantan phisqa wataña karun ichaqa manaraq wañukapushaspan rikurqan haqaynata ñak’arichisqan churin Diospa llaqtanman kutipusqanta.

[Uranpi willakuy]