Phisqakaq

Diosta maskhana

BIBLIAN NIN: “Kusisamiyoqmi huch’uyyaykukuspa Diosta maskhaqkunaqa”, nispa (Mateo 5:3).

¿IMA SASACHAKUYMI KAN? Yaqa llapa religionkunan hukniraytakama Diosmanta yachachinku. Chaymi askha runakuna tapukunku: “¿Imaynatan Dios munan yupaychanayta?” nispa. Wakin allin reqsisqa runakunan astawanqa ninku: “Diospi iñiyqa payta yupaychaypas yanqan, runaq mana allinninpaqmi”, nispa. Huk revistan willan Diospi mana iñiq runaq nisqanmanta: “Cristianokunaq creesqankuqa (cientificokunaq mana tarisqankupi ñawinchispa mana rikusqanpiwan) [...] runakunatan tanqan kawsayta pisipaq qhawarinankupaq chaytaqmi mana allin kawsayman apan”, nispa.

¿IMAN YANAPAWASUNMAN? Diospa kasqanta sut’ita yachana (Romanos 1:20; Hebreos 3:4). Piña imaña hark’awanchis chaypas yachanapunin kay tapuykunamanta: “¿Imapaqmi kawsanchis? ¿Kanchu huk kawsay wañusqanchis qhepaman? ¿Imaraykun khaynata ñak’arinchis? ¿Imatan ruwanay Dioswan allinpi kanaypaq?” nispa. Chay tapuykunamanta mana yachaspaqa manan kusisqachu kawsasunman.

Ichaqa manan lliw runakunaq rimasqantachu uyarina. Bibliaq nisqan hina ‘allin yuyayniyoqmi’ kananchis Diospa munasqanta yachanapaq (Rom. 12:1, 2, Mosoq Rimanakuy). Yaqapaschá kallpachakunanchis kanqa Bibliata estudianapaq chaypi nisqanman hina kawsanapaqpas ichaqa allinninchispaqmi kanqa. Chayta ruwaqtinchisqa sasachakuykunamantan ayqesun, manan sinchi llakisqachu imamantapas purisun, aswan kusisqataqmi kawsasunpas. Chayqa manan yanqa rimayllachu, askha runakunañan Diosta reqsispa munasqanta yachaspa ima chhaynata kawsashanku. Kay revistapin 26-29 paginakunapi willakushan imaynatan runakuna kawsayninkuta Bibliaq yanapayninwan cambiarqanku chayta.

Diosta kasukuspa kawsay allin kasqanta qhawarispan astawan Diosta munakusun. ¿Hayk’aqllapas Testigokuna kallpacharqasunkikuchu Bibliata estudianaykipaq? Sichus Bibliata estudianki chayqa apóstol Pablo hinachá ninki: “Pipas imachus kapuqninwan sonqopas sonqo kan chayqa, paypaqqa hatun qhapaq kayta tariy hinan Dios yupaychayqa”, nispa (1 Timoteo 6:6).

[8 paginapi foto]

Kikiykimanta yachay imatan Dios munan runakunamanta chayta