¿Imaraykun ratulla t’aqanakapunku?

“Wakin fariseokunataq Jesusman asuykurqanku, wateqayta munaspataq tapurqanku: –¿Atikunchu ima hawallapas qosaq warminmanta t’aqakuynin?” nispa (Mateo 19:3).

CASARASQAKUNA, ¿atinkumanchu mana t’aqanakuspa kawsayta? Jesustan tapurqanku sichus ima hawallapas casarasqakuna t’aqanakunkumanchus chayta, hinan payqa kutichirqan pipas casarakuqqa mana t’aqanakunanta, nirqanmi: “¿Manachu Diospa Simin Qelqata leerqankichis? Diosqa qallariypi kamarqan qharita warmitawanmi. Diospa Simin Qelqan nin: ‘Chayraykun runaqa taytantapas mamantapas saqepunqa, hinaspan warminman hukllachaykakapunqa, huk cuerpollataq kapunqaku’, nispa. Chay hinaqa, manan iskayñachu kanku aswanpas huk cuerpollañan. Chayrayku, runaqa Diospa hukllachasqantaqa ama t’aqachunchu”, nispa. (Mateo 19:4-6). * Rikusqanchis hina, Diosqa munanmi casarasqakuna mana t’aqanakuspalla kawsanankuta.

Wakin llaqtakunapiqa pachaq casarasqakunamantan tawa chunka t’aqanakapushanku. ¿Chayraykuchu nisunman: “Bibliapi yuyaychaykunaqa manañan yanapawasunmanchu”, nispa? Chhaynaqa, ¿manañachu allin kanman casarakuy?

Kay rikch’anachiywan entiendesun. Iskay casarasqakunan sapankanku carrota rantinku. Hukninmi allinta cuidan sumaqllatataq manejanpas, chaymi carronqa allinlla kashan. Huknintaq comunta apakachan nitaq cuidanpaschu, chaymi carronqa thantakapun hinaspa wiqch’upunku. ¿Pin huchayoq? Kikin dueñonmi.

Chhaynallataqmi casarakuywanpas, manan casarasqakuna t’aqanakusqanraykuchu nisunman: “Casarakuyqa manan allinchu”, nispa. Chaytan rikuchinku askha kusisqa kawsaq casarasqakuna. Casarakuypas carro hinan, allinta cuidaqtinchisqa unaypaqmi kanqa.

Bibliapin kan allin yanapaykuna casarasqakuna kusisqa kawsanankupaq, hayk’a tiempoña casarasqa kaqtinkupas. ¿Munawaqchu yachayta chay yanapaykunamanta? Invitaykikun qatiqnin paginakunata leenaykipaq.

[Uranpi willakuy]