Diosta allinta reqsiy

Llakiq ñit’isqan kaqkunapaq sonqochaykuna

UNAY tiempo llakisqa tarikuq hermanan nirqan: “Diosqa manan hayk’aqpas ñoqataqa munakuwanmanchu”, nispa. Askha kutitan umanpi takyanankama nikusqa Diosqa paymanta karupi kasqanta. ¿Cheqaqtachu Jehová Dios karupi kashan sinchi llakisqa tarikuq serviqninkunamanta? Davidpa qelqasqan Salmo 34:18 texton sonqochawanchis.

Davidqa yacharqanmi sinchi llakipi tarikuy imayna kasqanta. Waynallaraq kashaspan ayqekurqan rey Saulpa wañuchinanmanta, kay reymi phiñasqa kasharqan huchankunarayku Dios manaña paywan kasqanmanta, aswanpas Davidwan kashasqanmanta. Huk kutinmi ayqekurqan enemigonku filistea Gat llaqtaman, yuyaykurqanpaschá chaypiqa rey mana maskhananta. Ichaqa reqsirurqankun hinaspan locoman tukuspa ayqekurqan. Diostan hatuncharqan salvasqanmanta chaymi qelqarqan Salmo 34 textota.

¿Yuyaykurqanchu David, sinchi llakisqa kamachinkunamanta Dios karupi kashasqanta otaq paykuna Diospa qhawarisqan mana kanankuta? Manan. Paymi nirqan: “Señor Diosqa llakisqa sonqoyoqkunaq qayllanpin kashan, payqa llakiq ñit’isqan sonqoyoqkunatan qespichin”, nispa (versículo 18). ¿Imaynatan kay simikuna sonqochawasunman suyakuytataq qowasunman? Qatiqpin yachasun.

‘Diosqa [...] qayllanchispin kashan.’ Huk libron nin: “Chay simikunaqa sut’itan rikuchin Señor Dios llaqtanta yanapananpaq salvananpaqpas makilla kasqanta”, nispa. Kallpachawanchismi Jehová Dios serviqkunaq qayllallanpi kasqan, payqa yachanmi kay ‘sasa tiempokunapi’ imaynapi tarikusqankuta sonqonkupi imayna sientekusqankutapas (2 Timoteo 3:1; Hechos 17:27).

‘Llakisqa sonqoyoqkuna’. Huk runaq nisqan hina Davidpa qelqasqan simikunaqa karqan ima llakipipas tarikuspa ‘sonqo nanaypi tarikuymi’. Jehová Diosta hunt’aq sonqowan serviqkunapas sinchi sasachakuykunapi tarikuspaqa sonqo nanaypin kankuman.

‘Llakiq ñit’isqan sonqoyoqkuna.’ Llaki phutiypi kashaq runakunaqa mayninpin mana valorniyoqpaq qhawarikunku, hinaspa mana ima suyakuyniyoq sientekunku. Bibliata t’ikranapaq yanapaykunata qoq libron chay rimayta imayna t’ikranamanta nin: “Mana ima suyakuyniyoq kaqkuna”, nispa.

¿Imaynatan Dios kutichin “llakisqa sonqoyoqkunaq” ‘llakiq ñit’isqan sonqoyoqkunaq’ mañakusqankuman? ¿Karunchakunchu paykunamanta? ¿Munakuyninta yanapaynintapas mana merecenankupaq hinachu qhawarin? Manapunin. Imaynan huk munakuq tayta llakisqa sientekuq wawanta abrazan sumaqtataq kallpachan, chay hinatan Jehová Diospas ruwan serviqninkunawan. Payqa maytan munan llakiq ñit’isqan sonqonkuta kallpachayta. Diosqa atinmi ima sasachakuytapas atipanankupaq yachayta kallpata ima qoyta (2 Corintios 4:7; Santiago 1:5).

Kallpachaykikun imaynatas Jehová Diosman astawan asuykuwaq chayta yachanaykipaq. Payqa khuyapayakuyninpin kayta niwanchis: “Ñoqaqa [...] k’umuykukuq sonqoyoqwanmi kashani, k’umuykukuqkunata kallpachanaypaq, huchankuta reqsikuqkunaq sonqontapas kawsarichinaypaq”, nispa (Isaías 57:15).