Wakchakunapaq allin noticiakuna

BIBLIAN nin: “Wakchakunaqa manan wiñaypaqchu qonqasqa kanqa”, nispa (Salmo 9:18). Chaymantapas Kamaqninchismantan nillantaq: “Makiykita kicharispan llapa kawsaqkunata munasqankuwan saksaykachinki”, nispa (Salmo 145:16). Chay promesakunaqa manan mosqoyllachu. Tukuy atiyniyoq Diosqa wakcha kayta tukuchinanpaq imachus necesitakusqantan ruwayta atin. ¿Imataq necesitakunri?

África nacionmanta huk economista warmin nirqan: “Wakcha nacionkunaqa khuyapayakuq sumaq sonqo kamachikuqtan necesitanku”, nispa. Chay nisqanpin reparanchis wakcha kayta chinkachinanpaq atiyniyoq gobierno necesitakusqanta, munanantaqmi wakcha kay chinkachiyta. Chay gobernanteqa pachantinpi kamachiqmi kanan. ¿Imarayku? Wakin nacionkunapiqa imaymanan kan wakinpitaq mana, chaykunata igualananrayku. Hinaspapas yachananmi wakcha kayta paqarichiq sasachakuyta tukuchinanpaq ima ruwayta. ¿Maypin kanman chhayna allin gobernante?

Taytanpa kamachisqanta ruwananmantan Jesús nirqan: “Señor Diospa Espiritunmi ñoqapi kashan, wakchakunaman allin willakuykunata willanaypaqmi akllawarqan”, nispa (Lucas 4:16-18).

¿Imakunan chay allin willakuykuna?

Diosmi Churinta churarqan Rey kananpaq, chayqa allin willakuymi. Jesusqa allin gobernanten kanqa, ¿imarayku? 1) Atiyniyoqmi pachantinpi allinta kamachinanpaq, 2) wakchakunatan khuyapayan, qatikuqninkunatapas yachachinmi wakchakunata yanapanankupaq, 3) allinnillanchis maskhay munasqanchistan chinkachinqa. Chay kinsantin ruwananmanta qhawarisunchis.

1. Jesusqa atiyniyoqmi pachantinta kamachinanpaq Diospa simin qelqan Jesusmanta nin: “Paymi kamachikuy atiyta chaskirqan, qhapaqchasqan karqan, rey kananpaq churasqan karqan, llapa llaqtakunan, hatun suyukunan, ima rimaytaña rimaqkunapas payta servinanku karqan”, nispa (Daniel 7:14). ¡May allinchá kanman pachantinpi huk gobiernolla kaqtinqa! Minería, petróleo hukkunatapas qechunakuymi chinkapunqa, chaykunamantaqa lliwmi igualninka beneficiakunqa. Jesús kikinmi willarqan pachantinpi imatapas ruwananpaq atiyniyoq kasqanmanta, nirqanmi: “Diosmi qowarqan tukuy atiyta hanaq pachapipas kay pachapipas”, nispa (Mateo 28:18).

2. Wakchakunatan khuyapayan Kay pachapi Jesús kashaspaqa wakchakunatan khuyapayarqan. Huk warmin tukuy kaqninkunata gastasqa medicokunaman rispa, chaymi Jesuspa p’achanta llamiykurqan qhaliyapuyta suyakuspa. Payqa 12 watañan yawar apay onqoywan kasharqan, chaymi anemia onqoyña hap’ipusqa. Diospa kamachikuyninman hina, payqa Diosta yupaychananpaqmi qhelli kasharqan, chaymi pitapas tupayuqtinqa paypas qhelli kanan karqan. Chhaynaña kaqtinpas, Jesusqa sumaqtan tratarqan, nirqanmi: “Ususíy, Diospi iñiyniykin qhaliyachisunki, thak-kaypi ripuy, onqoyniykimanta qhaliyachisqañan kanki”, nispa (Marcos 5:25-34).

Jesuspa yachachikuyninkunaqa runakunaq imayna yuyaykusqantan cambian, chhaynapi khuyapayakuq kanankupaq. Qhawarisun Diosta kusichiyta munaq runaman Jesuspa kutichisqanta. Chay runaqa yacharqanmi runamasinta munakunanta, ichaqa tapukurqanmi: “¿Pitaq runamasiyri?” nispa.

Chaymi Jesús allin samaritano runamanta rikch’anachiyta willarqan. Huk runatan Jerusalenmanta Jericó llaqtaman viajashaqtin suwakuna “wañunayashaqta” wikch’usqaku. Huk sacerdoten chayninta urayamuspa rikusqa, hinan huk ladonta pasapusqa. Huk levita runapas kaqllatataqmi ruwasqa. “Ichaqa Samaria  llaqtayoq runan chay ñanta purishaspa paypa kasqanman chayarqan, rikuspataq khuyapayaykurqan. Hinaspan asuykuspa, vinowan aceitewan k’irinkunata hampiykuspa wataykurqan, sillakunan uywaman sillaykachispataq tampuman aparqan, hinaspan payta cuidarqan. Qhepantin p’unchay ripunanpaqtaq iskay p’unchay jornal qolqeta tampuyoqman qorqan: –Payta cuidaykapullawanki, lliw ima gastasqaykimantapas kutimuspaymi pagapusqayki, nispa. ¿Mayqentaq chay kinsantinmanta suwakunaq ch’utisqanpa runamasin? ¿Imaninkitaq? nispa. Hinan payqa nirqan: –Payta khuyapayaykuqmi, nispa. Chaymi Jesusqa nirqan: –Riy, kaqllatataq qanpas ruwamuy, nispa.” (Lucas 10:25-37.)

Jehová Diospa testigonkunaqa Jesuspa yachachisqanta estudiasqankuraykun necesitaq runakunata yanapanku. Letonia nacionpi tiyaq escritoran 1960 watakunapi campo penitenciario nisqapi llank’ashaspa qelqarqan: “Onqosqa tarikushaqtiymi Testigokuna allinta atiendewarqanku. Manan pipas chay warmikuna hinaqa yanapawarqankuchu, Jehová Diospa testigonkunaqa huk responsabilidadta hinan qhawarinku runakuna yanapayta, ima religionmantaña mayqen nacionmantaña kaqtinkupas”, nispa.

Ecuador nacionpi qolqeq pisiyasqanwanmi Ancón llaqtapi askha Testigokuna mana llank’anayoq kasharqanku. Chaymi huk ladomanta Testigokuna yuyaykurqanku imaynata paykunata yanapanankupaq, mikhunatan wayk’urqanku tutapi challwaq runakunaman vendenankupaq (paña ladopi kaq foto). Llapallankun chayta ruwarqanku, wawakunapas. 1 horas tutamantantan qallarirqanku, chhaynapin 4 horas tutamantan botekuna chayamuqtinqa listoña kasharqan. Chaypi huñusqanku qolqetataq sapankaq necesitasqanman hina rakirqanku.

Kay experienciakunan rikuchin Jesuspa ejemplon, yachachikuyninkunapas khuyapayakuq kanankupaq runakunata yanapasqanta.

3. Yanapawasunmi allin kaqta ruwanapaq Lliw runapas huchayoq kasqanchisraykun allinnillanchista maskhanchis. Chaytan Biblia sutichan ‘hucha’ nispa. Apóstol Pablopas nirqanmi: “Chay hinaqa, kaytan tarini: allinkaqta ruwayta munashaqtiy mana allinkaq ñoqapi kashasqanta. Sonqoypiqa Diospa kamachikuy siminwanmi kusikuni. Cuerpoypin ichaqa wak kamachikuq kasqanta reparakuni, chayqa huchan. Chay huchaqa munayniypa contranmi hatarin, hinaspan cuerpoypi kaq kamachikuqman hap’iykachiwan. ¡Ay, ñoqa runamanta! ¿Pitaq kay wañuyman aysaqniy cuerpomanta kacharichiwanqa?”, nispa (Romanos 7:21-25). Chaypi nisqan hina Diosqa Jesuswanmi huchaman aysaq ruwaykunamanta librawasun, chaykunamanta huknin ruwaymi allinnillanchista maskhay, ¿imaynapin chay suceden?

Jesusta Bautizakusqan qhepamanmi Bautizaq Juan runakunata nirqan: “Qhawariychis, paymi Diospa Corderon runakunaq huchankunata pampachaq”, nispa (Juan 1:29). Pisi tiempollamantan huchamanta librasqa runakuna kay Hallp’api tiyanqaku, paykunapiqa manañan kanqañachu allinnillankuta maskhayman aysaq hucha (Isaías 11:9). Chhaynapin Jesusqa wakcha kayta paqarichiq sasachakuyta chinkachinqa.

¡Maytan kusikunchis wakcha kay hamuq tiempopi tukupunanta yachaspa! Biblian prometen: “Sapanka runan tiyaykunqa uvas yuran k’uchupipas higos sach’an k’uchupipas, manataqmi pipas manchachiqninku kanqañachu”, nispa (Miqueas 4:4). Chaypi nisqan hina, qhepa tiempomanqa sumaq llank’anayoqmi kasun, manañan imamantapas manchakusunchu manataqmi pipas wakcha kanqachu. Tukuy chaykunaqa Jehová Diostan hatunchanqa.