¿Imatan wawakunaman yachachina?

“Diospa Simin Qelqakunaqa llapallanmi Diospa yuyaychasqan, chayraykun allinpuni yachachinapaq, anyanapaq, wanachinapaq, chanin kawsayta yachachinapaq.” (2 TIMOTEO 3:16)

WAWAKUNAQA Diosmantan sut’illanta yachananku. ¿Maypin chayta yachankuman? Bibliapi.

Bibliaqa Diospa sumaq cartan hinan, chaypin willawanchis imayna Dios kasqanta sumaq kamachikuyninkunamantapas. Qhawarisun wakin yachachikuyninmanta, wawakunaq allinninpaq kasqanmantapas.

¿Imatan Dios munan paymanta yachananchista?

▪ Bibliaq yachachisqan: “Runakuna yachachunku sutiyki Jehová kasqanta, qanllapunin teqsimuyuntinpi Ancha Hatunqa kanki” (Salmo 83:18, NM).

¿Imatan yachanchis? Manaña Diosta rikunchischu chaypas, payqa kawsaq Diosmi sutiyoqtaq kanpas.

▪ Bibliaq yachachisqan: Jehová Diosqa “llapan runakunaq sonqontan t’aqwin, yachantaq pakasqa lliw yuyaykusqakunatapas. Maskhankichus Señor Diosta chayqa, tarinkin” (1 Crónicas 28:9).

¿Imatan yachanchis? Jehová Diosqa interesakunmi llapa runakunapi, wawakunapipas (Salmo 10:14; 146:9). Payqa munanmi reqsinanchista.

▪ Bibliaq yachachisqan: “Amallataq [...] pi mana tayta-mamayoqtapas ñak’arichinkichu, qanchus paykunata ñak’arichinki, paykunataq waqyakamuwanqaku chayqa, ñoqaqa paykunata uyarisaqpunin” (Éxodo 22:22-24).

¿Imatan yachanchis? Jehová Diosqa llapanchistan uyariwanchis, wawakunaq mañakusqantapas. Paymanmi willasunman imachus sonqonchispi yuyaykusqanchista sientesqanchistapas.

▪ Bibliaq yachachisqan: “Yapapas-yapan Diostaqa wateqarqanku, Israelpa Ch’uya Diosnintan phiñachirqanku” (Salmo 78:41).

¿Imatan yachanchis? Ima ruwasqanchispas rimasqanchispas Jehová Diostan kusichin otaq llakichin, chayraykun manaraq imatapas ruwashaspa otaq rimashaspa allinta yuyaykunanchis.

 ¿Imaynatan qhawarinanchis hukniray runakunata?

▪ Bibliaq yachachisqan: “Diosqa manan mayqen runatapas rikch’ayninta qhawaspachu akllan, aswanpas may suyupipas payta yupaychaspa chanin-kayta ruwaqtaqa chaskinmi” (Hechos 10:34, 35).

¿Imatan yachanchis? Diosqa llapa runakunatan chaskin, chaymi ñoqanchispas llapa runata sumaqta qhawarinanchis.

▪ Bibliaq yachachisqan: “Suyakuyniykichismanta pipas tapuqniykichisman allinta kutichinaykichispaqqa wakichisqallapuni kashaychis, hinaspa kutichiychis llamp’u sonqowan respetowan” (1 Pedro 3:15).

¿Imatan yachanchis? Tukuy sonqowanmi iñiyninchismanta hukkunaman yachachina mana phiñakuspalla. Chaymantapas, wak iñiyniyoq runakunatapas allintan qhawarinanchis.

¿Imaynatan Familia ukhupi kawsana?

▪ Bibliaq yachachisqan: “Wawakuna, tukuy imapi tayta-mamaykichista kasuychis, chaymi Señorta kusichin”(Colosenses 3:20).

▪ ¿Imatan yachanchis? Wawakunaqa kasukusqankuwanmi rikuchinku tayta-mamankuta Diostapas munakusqankuta.

▪ Bibliaq yachachisqan: “Qankunapura paciencianakuychis, pipas hukpa contranpi imatapas riman chayqa, pampachaykunakuychis. Imaynan Cristopas pampacharqasunkichis, chay hinallataq qankunapas pampachaychis” (Colosenses 3:13).

¿Imatan yachanchis? Mayninpin familiapas otaq hukkunapas sonqonchista k’irinqaku. Ichaqa Diospa pampachayninta munasun chayqa, ñoqanchispas pampachananchismi (Mateo 6:14, 15).

 ¿Imaraykun llamp’u sonqo cheqaq rimaq kananchis?

▪ Bibliaq yachachisqan: “Chayrayku, amaña llullakuychisñachu, aswanpas sapankaykichis runa-masiykichiswan cheqaqkaqta rimaychis” (Efesios 4:25).

¿Imatan yachanchis? Cheqaqta rimaspaqa Diosmanmi rikch’akunchis. Llullakusun chaytaq Saqraman, paymi llullakuqkunaq taytan (Juan 8:44; Tito 1:2).

▪ Bibliaq yachachisqan: “Imaynatachus runakunaq ruwanasuykichista munankichis, chhaynallatataq qankunapas paykunata ruwaychis” (Mateo 7:12).

¿Imatan yachanchis? Familianchis huk runakunapas imayna sientekusqankuta, necesitasqankutapas qhawarinanchismi uyarinanchistaqmi nisqankutapas. Sichus huk sonqolla kawsasunchis chayqa hukkunapas sumaqtan qhawariwasun (1 Pedro 3:8; Lucas 6:38).

Bibliapi chay yachachikuykuna qhawarisqanchismi wawakunata yanapanqa sumaq runa kanankupaq. Ichaqa, ¿pin wawakunata yachachinan?